Agenda item

Dymchwel tŷ presennol a chodi tŷ newydd yn ei le ynghyd a gwaith i sefydlogi clogwyni

 

AELOD LLEOL: Cynghorydd Gruffydd Williams

 

Dolen i'r dogfennau cefndir perthnasol

 

PENDERFYNIAD: Caniatáu – amodau

1. Amser

2. Yn unol â chynlluniau

3. Deunyddiau

4. Cynllun Rheoli Adeiladu

5. Materion Bioamrywiaeth

6. Materion yn ymwneud a’r clogwyn

7. Gwarchod y llwybr cyhoeddus

8. Tynnu hawliau PD

8. Withdrawal of PD rights

 

Dymchwel tŷ presennol a chodi tŷ newydd yn ei le ynghyd a gwaith i sefydlogi clogwyni

            Roedd rhai o’r Aelodau wedi ymweld â’r safle 05-09-23

a)    Amlygodd yr Uwch Swyddog Cynllunio fod y cais wedi ei drafod eisoes mewn cyfarfod o’r Pwyllgor Cynllunio a gynhaliwyd Gorffennaf 17eg 2023. Penderfynwyd gohirio’r penderfyniad ar y pryd er mwyn cynnal ymweliad safle fel bod modd i’r Aelodau gael cyfle i weld y safle yng nghyd-destun ei leoliad.

 

Nodwyd mai cais llawn ydoedd ar gyfer dymchwel tŷ presennol a chodi tŷ newydd yn ei le ynghyd a gwaith i sefydlogi clogwyni arfordirol. Yn allanol, byddai’r tŷ newydd yn cynnwys to crib o orffeniad zinc tywyll a gorffeniadau’r waliau allanol yn gyfuniad o fyrddau coed ar y llawr uchaf a charreg naturiol ar y lloriau is. Nodwyd bod y safle a’r adeilad presennol wedi ei leoli wrth droed clogwyn Traeth Nefyn a'r clogwyni wedi eu dynodi fel Ardal Gadwraeth Arbennig (ACA) Clogwyni Pen Llŷn a hefyd yn Safle o Ddiddordeb Gwyddonol Arbennig (SoDDGA) Porthdinllaen i Borth Pistyll. Ategwyd bod y safle y tu allan i ffin ddatblygu gyfredol Nefyn gyda mynediad at y safle ar hyd y traeth yn ogystal â llwybr cyhoeddus sydd yn arwain i lawr o ben y clogwyn heibio’r safle ac ymlaen at y traeth islaw.

 

Eglurwyd bod y safle presennol yn cynnwys tŷ sydd yn dyddio’n ôl i ddiwedd yr 1960’au/dechrau’r 1970’au ac o ffurf sydd yn cynnwys toeau gwastad ac yn cyfleu edrychiadau o’r cyfnod. Mae’r safle a’r ardal ehangach oddi mewn dynodiad Tirlun o Ddiddordeb Hanesyddol Eithriadol Llŷn ac Enlli a  thu allan i barth llifogydd cyfagos sydd yn berthnasol i’r traeth yn unig. Nodwyd bod elfennau o’r cynnig wedi ei diwygio o’i gyflwyniad gwreiddiol o ganlyniad i sylwadau a dderbyniwyd oedd yn cynnwys  gorffeniadau allanol yr adeilad yn dilyn sylw gan yr Uned AHNE (er nad yw’r safle o fewn yr AHNE, ystyriwyd y rhain fel sylwadau cyffredinol).

 

Ategwyd, yn wreiddiol, bod rhan o’r cynnig yn golygu gwyro’r llwybr cyhoeddus presennol sydd yn rhedeg heibio’r safle a’i ail leoli i fod ymhellach o’r adeilad. Yn dilyn trafodaethau ynghyd a derbyn sylwadau ar y cynnig gan Uned Hawliau Tramwy’r Cyngor, Cyngor Tref Nefyn ac aelodau’r cyhoedd, penderfynwyd bod y cynnig yn rhy ddadleuol ac felly'r llwybr yn aros fel y mae. Cyflwynwyd y cais i bwyllgor gan yr Aelod Lleol am y rhesymau ei fod yn orddatblygiad o’r safle, y byddai’n creu ansefydlogrwydd i’r clogwyni ac effaith andwyol ar yr ardal.

Yng nghyd-destun polisïau perthnasol, cyfeiriwyd at ofynion polisi PS 5 sy’n nodi y dylid rhoi blaenoriaeth i ddefnyddio tir ac isadeiledd yn effeithiol, gan flaenoriaethu ailddefnyddio tir ac adeiladau a ddefnyddiwyd o’r blaen, lle bynnag bo hynny’n bosib. Yn yr achos yma, mae tŷ presennol yn bodoli a’r safle eisoes wedi ei ddatblygu ac felly mae’r bwriad yn bodloni gofynion cyffredinol polisi PS 5 o Gynllun Datblygu Lleol ar y Cyd Gwynedd a Môn (CDLI). Ategwyd bod Polisi TAI 13 y CDLI yn ymwneud yn benodol ag ail-adeiladu tai ac yn gosod cyfres o feini prawf mae'n rhaid cydymffurfio â nhw (lle bo'n briodol) er mwyn caniatáu cynlluniau o’r fath.

Nodwyd bod y cais yn amlwg wedi golygu cryn graffu arno oherwydd nifer o ystyriaethau arbenigol na fyddai yn arferol i’w canfod i’r un graddau o leiaf, gyda mwyafrif ceisiadau Cynllunio i ddymchwel ac ail gosi tai preswyl. Adroddwyd bod cwmnïau a/neu unigolion cymwys wedi asesu’r wybodaeth i law ac wedi datgan eu barn ac y byddai canfyddiadau ac argymhellion yr adroddiadau arbenigol yn cael eu cynnwys fel amodau ffurfiol fel bod rhaid cynnal y datblygiad yn llwyr unol a’r mesurau a argymhellwyd. Drwy sicrhau hyn, byddai’r datblygiad yn cael ei gynnal yn llwyr gyda’r cydsyniad cyffredinol a gytunwyd. Pe byddai’r sefyllfa yn newid o ran diwygio’r cynnig mewn ymateb i  sefyllfa a godir, yna bydd rhaid ymateb i unrhyw sefyllfa o’r newydd.

 

Mewn ymateb i rai o’r gwrthwynebiadau a dderbyniwyd yn mynegi pryder y byddai caniatáu yn gosod cynsail beryglus, nodwyd bod hawl cyfreithiol cael tŷ ar y safle ac y byddai hawl i’w addasu heb ganiatâdau cynllunio. Nodwyd bod maint a swmp y tŷ yn cyd-fynd a’r tŷ presennol, ond bod bwriad cael to crib yn hytrach na tho fflat.

 

I bwrpas y cais, nodwyd bod y wybodaeth arbenigol wedi ei asesu a’i ganfod yn dderbyniol. Ystyriwyd bod y bwriad yn dderbyniol ac yn cydymffurfio a gofynion y polisïau perthnasol.

 

b)    Yn manteisio ar yr hawl i siarad, nododd yr Aelod Lleol y sylwadau canlynol;

·         Yn diolch i’r Aelodau hynny fu’n ymweld â’r safle

·         Bod y lleoliad o fewn Tirlun o Ddiddordeb Hanesyddol Eithriadol Llŷn ac Enlli ac yn ymylu ar safleoedd arwyddocaol Ardaloedd Cadwraeth Arbennig (ACA) a Safleoedd o Ddiddordeb Gwyddonol Arbennig (SoDdGA)

·         Nad yw’r adeilad sydd yn cael ei gynnig yn welliant i’r un sydd yn bodoli. Mater o farn yw bod dyluniad y bwriad yn welliant

·         Bod nifer helaeth o drigolion lleol wedi gwrthwynebu

·         Bod y cais gwreiddiol wedi amlygu symud y llwybr - croesawu bod cyfeiriad y llwybr yn aros fel y mae - angen amod yn gwarantu defnydd y llwybr i bysgotwyr a’r cyhoedd

·         Os caniatáu, angen sicrhau bod y llwybr i’r traeth yn cael ei warchod yn ystod y cyfnod adeiladu ac yn aros yn agored i bysgotwyr a cherddwyr

 

c)    Cynigiwyd ac eiliwyd caniatáu’r cais

 

          ch)   Yn ystod y drafodaeth ddilynol nodwyd y sylwadau canlynol gan Aelodau:

·      Yn diolch am y cyfle i ymweld â’r safle

·      Bod y cynnig yn welliant i’r hyn sydd yn bodoli

·      Nad yw’r safle presennol yn ymddangos fel tŷ

·      Bod yr adeilad presennol yn ddi-lun, yn ddi-raen ac yn ddi-chwaeth o gymharu â bythynnod traddodiadol yr ardal

·      Nad yw lliwiau du a llwyd yn cydweddu’r ardal - yn lliwiau tywyll

·      Bydd cwyno mewn amser, pam caniatáu'r bwriad, fel sydd  i’r adeilad presennol!

·      Bydd yr adeilad i’w weld fel rhan o’r olygfa eiconig a geir wrth yrru i lawr o Pistyll tuag at Nefyn

·      Nad yw’r cynnig yn welliant

 

Mewn ymateb i gwestiwn ynglŷn â ‘dad-risgio’ a beth mae hyn yn ei olygu yng nghyd-destun sefydlogrwydd y clogwyni, nodwyd mai cyfrifoldeb yr ymgeisydd yw sicrhau bod y tir yn addas ar gyfer y datblygiad mewn golwg, ac wrth fabwysiadu dull dadrisgio ar lefel y cynllun bydd yr awdurdod cynllunio lleol yn gosod amodau ar gyfer mynd i’r afael â risgiau. Ategwyd bod pryderon am ansefydlogrwydd y clogwyni wedi eu trafod a bod y dystiolaeth arbenigol a gyflwynwyd gan yr ymgeisydd wedi ei wirio gan arbenigwr peirianyddol gan nodi fod yr adroddiad arbenigol wedi ei gwblhau gan unigolion cymwys a phrofiadol sydd yn amlwg yn fodlon gyda chanfyddiadau’r adroddiad fel y mae.

 

O ystyried yr asesiadau a wnaed, barn arbenigol a roddwyd a’r diffyg gwybodaeth neu wybodaeth dechnegol ac arbenigol i wrthddweud trwy brofi yn ddiamheuol fod y cynllun a’r mesurau a wneir yn anaddas, rhaid derbyn fod y cynllun adeiladu a’r mesurau lliniaru a gynigiwyd yn briodol i amddiffyn y bwriad. Cyfrifoldeb yr ymgeisydd yw sicrhau bod yr adeilad yn cael ei weithredu yn unol â'r cynlluniau.

 

Mewn ymateb i sylwadau yn ymwneud â gorffeniadau a deunyddiau, nododd yr Uwch Swyddog Cynllunio bod modd gosod amodau i reoli hyn. Ategodd mai awgrymiadau yn unig sydd yn y darluniau, ond gellid cytuno ar adnoddau gwahanol megis carreg, coed, llechi. Nododd ei fod yn ffyddiog y gellid cytuno ar y gorffeniad fel nad oes ardrawiad a bod yr adeilad yn ymdoddi yn well i’r cefndir.

 

Mewn ymateb i sylw ynglŷn â gosod amod i sicrhau diogelwch defnyddwyr y llwybr cyhoeddus yn ystod y cyfnod adeiladu , nodwyd bod gwarchod y cyhoedd yn amod sylfaenol i’r bwriad ynghyd a chais am gynllun rheoli adeiladu.

 

               PENDERFYNWYD: Caniatáu gydag amodau

 

1. Amser

2. Yn unol â chynlluniau

3. Deunyddiau

4. Cynllun Rheoli Adeiladu

5. Materion Bioamrywiaeth

6. Materion yn ymwneud a’r clogwyn

7. Gwarchod y llwybr cyhoeddus

8. Tynnu hawliau PD