Agenda item

Alwen Williams, Prif Weithredwr Dros Dro y CBC, i gyflwyno’r adroddiad.

Cymeradwyo’r Cynllun Gweithredu drafft arfaethedig i’w gyflwyno i Lywodraeth Cymru.

Cyflwynwyd yr adroddiad gan Alwen Williams, Prif Weithredwr Dros Dro’r CBC.

PENDERFYNWYD cymeradwyo’r Cynllun Gweithredu drafft arfaethedig i’w gyflwyno i Lywodraeth Cymru.

TRAFODAETH

Cwestiynwyd a fyddai’n ymarferol bosib’ cyflwyno’r fersiwn terfynol o’r Cynllun Trafnidiaeth Rhanbarthol i Lywodraeth Cymru erbyn diwedd Mawrth 2025, o ystyried maint y gwaith sydd angen ei gwblhau a’r arbenigedd sydd ei angen i ddarparu prosiect enfawr o’r math yma, yn enwedig yn wyneb cyhoeddiad Llywodraeth y DU ynglŷn â’r gwaith o drydaneiddio rheilffordd arfordir y Gogledd, sydd hefyd yn ddarn enfawr o waith.  Mewn ymateb, nododd Prif Weithredwr Dros Dro’r CBC:-

·         Bod rhanbarthau eraill wedi mynegi pryder ynglŷn â’r amserlenni hefyd, ond er nad oedd wedi gweld yr adroddiad terfynol, roedd y Comisiwn Trafnidiaeth wedi cyflawni llawer iawn o waith yng Ngogledd Cymru dros y 18 mis diwethaf a byddai yna lawer o ddata yn sail i gasgliadau’r adroddiad fyddai’n ddefnyddiol, yn arbennig o ran creu’r achos dros newid.

·         Y credai y byddai’n rhaid comisiynu gwaith i ymgynghorwyr ag arbenigedd, yn arbennig o amgylch yr Asesiad Ardrawiad Amgylcheddol, yn ogystal â chynnal adolygiad annibynnol o’r cynlluniau yng Ngogledd Cymru.  Byddai hynny, yn amlwg, yn ddibynnol ar argaeledd ac amserlenni o fewn yr asiantaethau a allai ymateb i’r math yna o waith.

·         Y credai y byddai’n rhaid adolygu’r amserlenni wrth i’r gwaith fynd yn ei flaen ac wrth i ni gyrraedd y cerrig milltir, ond roedd yn optimistaidd ar hyn o bryd y gellid cyflawni’r gofynion erbyn Mawrth 2025.

·         Y byddai’n adrodd yn ôl i’r Cyd-bwyllgor yn rheolaidd ar gynnydd, gan amlygu unrhyw risgiau, ac yn sgil cymeradwyo’r Cynllun Gweithredu, byddai’r Is-bwyllgor Trafnidiaeth yn cael ei sefydlu i arwain ar y gwaith.

·         Y credai y byddai hynny’n elfen gritigol hefyd yn ogystal â sicrhau ein bod yn cadw at yr amserlen ac at y gyllideb ac yn adrodd yn ôl yn briodol i’r CBC.

Mewn ymateb i gyfres o gwestiynau, eglurodd Prif Weithredwr Dros Dro’r CBC:-

·         Y byddai’r Is-bwyllgor Trafnidiaeth yn rhoi cyfeiriad i’r cynllun a chyfeiriad i’r swyddogion i arwain ar greu'r cynllun a pharatoi’r gwaith.

·         Bod y Llywodraeth wedi mynd drwy broses o gymeradwyo mewnol ar gyfer cynlluniau drafft y 4 rhanbarth a byddent yn dyfarnu, ac yn ein hysbysu, o fewn yr wythnosau nesaf gobeithio, ynglŷn â’r cyllid fydd yn dod yn ei flaen. 

·         Y disgwylid hyd at £125,000 i helpu gyda’r gwaith o ddatblygu’r cynllun.

·         Y byddai rhywfaint o’r arian yn cael ei wario ar ymgynghorwyr.  Byddai angen cynnal ymgynghoriad cyhoeddus, a byddai yna gostau ynghlwm â hynny mae’n debyg.  Byddai yna gost hefyd ynghlwm â’r gwaith o wneud yr Asesiad Ardrawiad Amgylcheddol.

·         Y bu’n ymgysylltu gyda swyddogion pob awdurdod yn y Gogledd i greu’r cynllun drafft yn y lle cyntaf, a’i bod yn rhagweld, unwaith y byddai’r Is-bwyllgor Trafnidiaeth wedi’i sefydlu ac yn weithredol, y byddai yna bwyllgor o swyddogion i helpu hefyd. 

·         Bod yna arbenigedd trafnidiaeth yn eistedd o fewn y cynghorau a’i bod yn bwysig eu bod hwy yn teimlo bod ganddynt berchnogaeth a’r gallu i arwain ar y cynllun hefyd.