Aelod Cabinet
– Y Cynghorydd Beca Brown
Cyflwyno Adroddiad Blynyddol Addysg 2022-23.
Cofnod:
Cyflwynwyd –
Adroddiad Blynyddol Addysg 2022-23.
Gosododd y Pennaeth Addysg y cyd-destun gan
nodi ei ddymuniad i hwyluso’r gwaith craffu drwy symud tuag at gynhyrchu
adroddiadau fydd yn rhoi mwy i’r craffwyr o ran yr hyn sydd o’n blaenau, ond
llai o ran sylwedd yr adroddiadau, ac a fydd hefyd yn rhoi mwy o amlygrwydd i’r
her sy’n wynebu’r ysgolion, y staff a’r gwasanaethau sy’n cefnogi.
Rhoddwyd cyfle i’r aelodau ofyn cwestiynau a
chynnig sylwadau.
Mynegwyd siomedigaeth nad oedd cyfeiriad at
ysgolion arbennig yn yr adroddiad.
Nodwyd bod yr adroddiad yn cyfeirio at broblemau recriwtio cymorthyddion
dosbarth yn y prif lif, ond nad oedd sôn am yr ysgolion arbennig lle mae’r
broblem yn llawer gwaeth. Nodwyd hefyd,
er bod gwaith y cymorthyddion yn yr ysgolion arbennig yn hynod ddwys, eu bod yn
derbyn yr un cyflog â chymorthyddion prif lif.
Mewn ymateb, nodwyd:-
·
Nad
oedd rhan benodol o’r adroddiad yn ymdrin ag ysgolion arbennig, ond bod y
gwasanaethau y cyfeirir atynt yn cwmpasu’r sectorau cynradd, uwchradd, gydol
oes ac arbennig. O bosib’ y gellid
ail-edrych ar hynny ac egluro sefyllfa’r sector arbennig yn yr adroddiad
blynyddol nesaf.
·
Nad
oedd y broblem recriwtio cymorthyddion yn unigryw i Wynedd. Petai’r unigolion yn gweithio oriau llawn
amser drwy gydol y flwyddyn, gellid dadlau eu bod ar gyflog teg, ond gan eu bod
yn gweithio llai nag wythnos waith arferol, a hynny yn ystod tymor ysgol yn
unig, roedd yn anodd denu pobl i’r rôl.
·
Bod
gwaith i hyrwyddo’r swyddi a’r proffesiwn yn cynnwys ymgyrch ar y gwefannau
cymdeithasol a thrafodaethau gyda Choleg Meirion-Dwyfor gyda’r nod o gynnal
digwyddiad hefo’r ysgolion.
·
O
ran yr ysgolion arbennig, bod darn o waith i’w wneud o ran arfarnu swyddi o
fewn yr ysgolion hynny a strwythurau o fewn yr ysgol a fyddai, o bosib’, yn
adlewyrchu dwysedd y gwaith a wynebir o gymharu â’r prif lif.
·
Bod
lle hefyd i edrych ar y dyletswyddau a gyflawnir gan gymorthyddion ar lefelau
1-4 yn yr ysgolion er mwyn gweld oes yna rolau uwch, ond islaw athro, y
gallai’r unigolion hynny ymgymryd â hwy, megis cymryd gwersi a chyflawni gwaith
llanw yn ôl yr angen.
Holwyd a oedd pob ysgol wedi cael gwybod am
ei chategori ieithyddol erbyn hyn a beth yn union y bwriedid ei wneud er mwyn
sicrhau fod y drefn gategoreiddio newydd yn datblygu ac yn gwreiddio er mwyn
cyflawni uchelgais Gwynedd yn y maes hwn.
Mewn ymateb, nodwyd:-
·
Bod
gwaith eisoes wedi digwydd yn y cefndir o ran comisiynu ymgynghorydd allanol i
weithio gyda’r Adran o ran y Polisi Iaith, a bod amserlen mewn lle er mwyn cael
popeth yn barod erbyn diwedd y flwyddyn addysgol bresennol.
·
Y
byddai cyfle i’r aelodau fod yn rhan o’r broses o ddod â’r Polisi Iaith ynghyd,
a bwriedid adrodd yn ôl i’r pwyllgor hwn ym mis Mawrth ar y cynnydd yn erbyn
argymhellion yr Ymchwiliad Craffu Ysgolion Uwchradd Categori 3 Gwynedd.
·
Y
deellid yr hyn sy’n cael ei ddweud o ran y pwysau o ran yr iaith, y
categoreiddio iaith, ayb, ac y byddai’r Pennaeth yn gweithio gyda’r tîm i roi
hynny at ei gilydd.
·
Bod
yr ysgolion yn ymwybodol o’u categori.
·
Mai
canllaw anstatudol oedd y categoreiddio ar hyn o bryd, ond y byddai’n statudol
yn y Bil Addysg Gymraeg.
·
Nad
y categoreiddio, o reidrwydd, sy’n mynd i yrru ein uchelgais yng Ngwynedd,
eithr y polisi a’r ddarpariaeth o fewn yr ysgolion. Gan hynny, credir bod y gwaith sy’n cael ei
wneud o ran y polisi a gweithio hefo’r ysgolion a rhanddeiliaid yn bwysicach
na’r drefn gategoreiddio genedlaethol sydd, mewn gwirionedd, yn drefn lled
weinyddol.
·
Bod
yr Adran yn casglu data ar y ddarpariaeth bresennol sydd gan yr ysgolion a
hefyd yn gofyn i bob ysgol rannu blaenoriaethau o ran datblygu, cynnal a
chynyddu’r ddarpariaeth Gymraeg.
·
Bod
yr Adran hefyd yn craffu ar flaenoriaethau’r Gymraeg gydag Ymgynghorydd Cefnogi
Gwelliant GwE sy’n gyfrifol am y Gymraeg, a hefyd yn gweithio gyda GwE i
ddarparu arweiniad a chefnogaeth i ysgolion penodol ar flaenoriaethau eu cynllun
datblygu ysgol.
·
O
ran y Bil Addysg Gymraeg, bod yr Adran hefyd yn edrych ar oblygiadau ariannol
trosglwyddo i’r system newydd a faint mae’r ddarpariaeth a’r gynhaliaeth yn
mynd i olygu i ni fel Awdurdod yn ariannol pan ddaw i rym.
Pwysleisiwyd pwysigrwydd gweld y data
ieithyddol. Mewn ymateb, nodwyd bod y
data yn cael ei gasglu yn flynyddol ac yn cael ei rannu gyda nifer o
randdeiliaid.
Mynegwyd pryder nad oes fawr o oruchwyliaeth
gan yr Awdurdod o weithrediad y Siarter Iaith a’r Strategaeth Uwchradd, ac
roedd yn ymddangos, o siarad gydag ambell ysgol, nad oes ganddynt gynllun
siarter, ac mai’r oll a wneir ganddynt yw llenwi holiadur blynyddol. Yn wyneb hynny, argymhellwyd ychwanegu
blaenoriaeth i’r adroddiad bod yr Awdurdod am oruchwylio mwy ar weithrediad y
Siarter a’r Strategaeth Iaith yn ein hysgolion, ynghyd â llunio adroddiad ar
gyfer pob ysgol. Mewn ymateb, nodwyd:-
·
Y
byddai’r Siarter Iaith yn cael ei ail-lansio ar ei newydd wedd yn Eisteddfod yr
Urdd eleni, a bod yna gynlluniau i’w hyrwyddo’n genedlaethol.
·
Yn
dilyn yr ail-lansiad, bod bwriad i ail-gychwyn y broses achredu fel bod modd i
ysgolion ymgeisio am wobr aur, arian neu efydd i gydnabod eu hymdrechion.
·
Bod
Cydlynydd y Siarter Iaith a Chydlynydd y Strategaeth Uwchradd yn darparu
cefnogaeth i’r ysgolion a hefyd yn gweithio’n agos iawn gyda GwE i sicrhau bod
arian grant y Siarter Iaith yn cael ei wario’n benodol i ddiwallu anghenion
ieithyddol y gwahanol ddalgylchoedd.
Roedd yna waith da iawn yn digwydd yn y dalgylchoedd o ran rhoi profiadau,
a hefyd o ran datblygu hyfforddiant i staff ynglŷn â gwerthoedd
defnyddio’r Gymraeg yn gymdeithasol.
·
Bod
y Cydlynwyr Iaith Dalgylchol yn cydlynu bwydo gwybodaeth i’r Cydlynydd Siarter
Iaith, a bod y gwaith yn cael ei fonitro ac yn mynd rhagddo.
·
Bod
y plant ymhob ysgol yn ateb holiaduron ynglŷn â’r defnydd cymdeithasol a
wneir ganddynt o’r Gymraeg a bod hwnnw wedyn yn cyflwyno Gwe Iaith i’r ysgol
fel bod modd adnabod cryfderau a meysydd i’w datblygu yng nghyd-destun y
Gymraeg yn gymdeithasol.
·
Bod
y Cyngor Ysgol, gyda’r athrawon, yn llunio cynllun gweithredu i ddatblygu’r
meysydd penodol sydd angen sylw a bod yr Awdurdod yn monitro’r gwaith hwnnw, yn
ogystal â gweithio’n genedlaethol i sicrhau bod hyn yn digwydd ar draws Cymru.
·
Y
byddai yna fwy fyth o graffu ar y Gwe Iaith a’r gweithredoedd o fewn yr
ysgolion yn sgil ail-gyflwyno’r broses achredu.
Nodwyd nad oedd y rhagair i’r adroddiad
blynyddol yn cydnabod cefnogaeth a chyfraniad llywodraethwyr, na’r dysgwyr
chwaith, wrth weithredu’r strategaethau addysgol. Mewn ymateb, nodwyd bod hynny’n gam gwag ac y
dylid bod wedi diolch i’r plant a’r bobl ifanc a’r llywodraethwyr a’r gymuned
gyfan sy’n cefnogi’r sector addysg.
Awgrymwyd bod yr adroddiad yn brin o
dystiolaeth, e.e. ffigurau / canrannau, i gefnogi ac i gyfiawnhau’r hyn sydd
wedi’i nodi. Mewn ymateb, nodwyd bod
bwriad i symud i ffwrdd oddi wrth y syniad nad yw adroddiadau bob amser yn
amlygu gwendid, gan ddarparu adroddiadau sy’n tanlinellu’r heriau yn ogystal er
mwyn cael balans. Golygai hynny, ynghyd
â’r bwriad i roi llinell amser ar dargedau wrth osod blaenoriaethau yn y
dyfodol, y byddai’n llawer haws adrodd i’r craffwyr y flwyddyn nesaf yn yr
adroddiad blynyddol.
Gofynnwyd am ddiweddariad ar y sefyllfa o
ran recriwtio seicolegwyr addysgol gan fod hyn yn fater o flaenoriaeth. Mewn ymateb, nodwyd:-
·
Nad
oedd y sefyllfa wedi gwella a bod bwriad i anfon llythyr at y Llywodraeth ar y
cyd rhwng Cynghorau Gwynedd, Môn a Chonwy yn tynnu sylw eto at y pryder
ynglŷn â’r dull hyfforddi a’r anhawster recriwtio seicolegwyr dwyieithog.
·
O
bosib’ y byddai modd i’r Adran recriwtio unigolion sy’n gorffen hyfforddi ar
gyfer y flwyddyn academaidd nesaf.
Mynegwyd pryder y gall y cynnydd yn nifer y
plant ag anghenion dwys ac ymddygiad heriol iawn sy’n mynychu’r canolfannau ABC
roi mwy o bwysau ar y 2 ysgol arbennig yn y sir, sydd bron, neu wedi cyrraedd
eu capasiti. Mewn ymateb, nodwyd:-
·
Bod
y Tîm Anghenion Dysgu Ychwanegol Blynyddoedd Cynnar yn cynnwys athrawon sy’n
cefnogi’r cylchoedd meithrin ynghyd â thîm bychan sy’n cefnogi plant ag
anghenion dysgu ychwanegol yn y blynyddoedd cynnar.
·
Bod
plant bellach yn cael eu hadnabod yn gynnar a bod cynlluniau datblygu unigol
cynhwysfawr yn cael eu paratoi ar eu cyfer cyn iddynt gychwyn ysgol.
·
Y
gwelwyd cryn gynnydd yn y blynyddoedd diwethaf yn niferoedd y plant ag
anghenion ychwanegol oherwydd bod y Gwasanaeth wedi mynd ati yn fwriadol i
chwilio am blant, neu i fod yn darparu ar gyfer plant ag anghenion yn y
blynyddoedd cynnar, ond roedd y niferoedd wedi cysoni erbyn hyn.
·
Er
bod y niferoedd yn eithaf cyson o ran cyfeiriadau blynyddoedd cynnar, bod y
dwyster yn uwch, ac roedd y Gwasanaeth yn ymateb i hynny.
·
Mai
pwrpas y canolfannau ABC, os ydyn nhw’n gweithio’n effeithiol, yw atal plant
rhag cyrraedd ysgolion arbennig drwy eu harfogi gyda’r sgiliau cymdeithasol,
ayb, sydd eu hangen arnynt i allu ymdopi ag addysg prif lif.
·
Nad
oedd hynny’n gweithio bod tro ac roedd yn wir i ddweud bod yna lwybr o’r canolfannau
ABC i’r ysgolion arbennig.
·
Bod
y Gwasanaeth hefyd yn edrych ar sut i uwch-sgilio’r ysgolion prif lif o ran
plant ifanc sy’n dod i mewn ag anawsterau mwy cymhleth, ac yn datblygu’r
cydweithio rhwng yr ysgolion arbennig a’r prif lif, gan rannu ymarfer da.
·
Bod
capasiti’r ysgolion arbennig yn broblem a bod yr Awdurdod yn edrych ar
hynny. Nid oedd datrysiad hawdd yn y
tymor byr, ond roedd trafodaeth i’w chael gyda’r ysgolion arbennig ynglŷn
â sut orau i ryddhau gofod yn y dosbarthiadau.
Mynegwyd pryder ynglŷn â’r amseroedd
aros am asesiadau niwroddatblygiadol a gofynnwyd am ragor o wybodaeth
ynglŷn â’r cydweithio gyda’r Tîm Niwroddatblygiadol i geisio cyfarch y
broblem. Mewn ymateb, nodwyd:
·
Bod
yna dipyn o fuddsoddiad gan y Llywodraeth, nid yn gymaint o’r sector addysg,
ond gwasanaethau eraill o ran cefnogi dysgwyr gydag anawsterau
niwroddatblygiadol.
·
Bod
llawer o blant yn cael eu cyfeirio ond nad oedd y rheini i gyd yn mynd i gael
diagnosis ar y diwedd.
·
O
ran y drefn addysg, ni edrychid ar y diagnosis, ond yn hytrach ar yr anghenion
sy’n cael eu hadnabod.
·
Bod
y gwaith sy’n digwydd ar y cyd â’r timau eraill yn y maes yn cynnwys mapio
allan beth mae pawb yn ei roi fel cefnogaeth, gwneud yn siŵr nad oes yna
unrhyw ddyblygu ymdrechion a gwneud y gorau o’r adnoddau sydd gan bawb, a hefyd
efallai edrych ar gynllunio pa hyfforddiant sydd ei angen a’r mewnbwn i
deuluoedd.
·
Bod
angen symleiddio popeth ar draws y gwasanaethau plant, iechyd ac addysg i
hwyluso teuluoedd fel eu bod yn cael y mewnbwn allweddol.
Holwyd beth oedd yr Adran yn ei wneud i
geisio cael mwy o athrawon a chymorthyddion i ymgeisio am y swyddi gwag mewn
rhai ysgolion. Nodwyd bod ymddygiad
plant tuag at athrawon wedi gwaethygu’n sylweddol yn sgil y cyfnod Cofid, a
dyna pam bod presenoldeb cymhorthydd yn y dosbarth mor bwysig. Nodwyd hefyd ei bod yn anodd recriwtio
siaradwyr Cymraeg i’r ysgolion yn ardal Tywyn, a holwyd sut y gellid dod o hyd
i bobl gyda’r cymwysterau gorau i ddod i weithio i’r Ganolfan Iaith newydd fydd
yn agor yn Nhywyn. Mewn ymateb, nodwyd:-
·
Bod
gennym her wirioneddol yng Ngwynedd o ran cynhwysiad ac ymddygiad yn yr
ysgolion a bod hyn wedi’i amlygu yn adroddiad Estyn.
·
Bod
yr Adran yn rhoi blaenoriaeth i argymhellion Estyn ar hyn o bryd ac yn edrych
ar gynlluniau sy’n mynd i sicrhau gwell darpariaeth ar draws y sectorau cynradd
ac uwchradd ar gyfer plant sydd ag ymddygiadau cynyddol heriol.
·
Bod
yr ymddygiadau heriol hyn, yn ogystal â’r cynnydd yn y llwyth gwaith, yn sicr
yn cael effaith ar recriwtio staff i’r proffesiwn. Nodwyd hefyd ei bod yn mynd yn gynyddol anodd
recriwtio penaethiaid a bod nifer o’r penaethiaid presennol yn dysgu 3-4
diwrnod yr wythnos ar ben y cyfrifoldeb o fod yn bennaeth.
·
O
bosib’ bod angen edrych ar greu rhyw fath o ymgyrch i recriwtio athrawon a chymorthyddion
i Wynedd, a’r bobl orau i werthu’r proffesiwn yw’r athrawon eu hunain a’r
prifathrawon. Er bod yna heriau
ymddygiadol, mae yna lawer mwy o brofiadau positif ar lawr dosbarth nag sydd
yna o rai negyddol, ac mae angen hyrwyddo hynny.
Nodwyd nad oedd y problemau recriwtio yn
unigryw i Wynedd ac y dylid pwyso ar Lywodraeth Cymru am fwy o arian ar gyfer
tâl athrawon, neu fel arall, byddwn, o bosib’, yn edrych ar gau ysgolion
gwledig oherwydd prinder athrawon. Mewn
ymateb, nodwyd:-
·
Bod
y sefyllfa gyllidol yn ein hysgolion yn anodd gyda 38 o ysgolion yn mynd trwy
sefyllfa o ormodedd, a hynny gyda toriad o 3% dros dair 3 blynedd.
·
Bod
yna ostyngiad mewn niferoedd plant ar draws y sir sy’n cyfrannu at y diffyg
ymhellach ac yn gwneud sefyllfa penaethiaid yn anodd gan y bydd rhaid iddynt
wneud penderfyniadau anodd dros yr wythnosau a’r misoedd nesaf o ran strwythur
staffio a sut i symud ymlaen i’r dyfodol.
·
Mai
hwn oedd y cyfnod mwyaf heriol a welwyd yn y byd addysg ac roedd yn ymddangos
bod nifer o bobl abl iawn i gamu i mewn i swydd pennaeth wedi penderfynu aros
i’r don basio cyn cymryd y cam hwnnw.
Nodwyd mai’r tâl a’r amodau gwaith sy’n ei
gwneud yn anodd recriwtio athrawon a bod y gwir oriau mae athrawon yn gweithio
yn gwneud y tâl fesul awr yn gymharol fach.
Holwyd sut y bwriedid ymdopi â’r diffyg
penaethiaid dros y blynyddoedd nesaf.
Mewn ymateb, nodwyd:-
·
Y
byddai’r Strategaeth Addysg newydd yn gyfle i wyntyllu hynny hefo’r ysgolion.
·
Bod
yr atebion posib’ yn cynnwys gweithio hefo penaethiaid mewn ysgolion eraill ac
annog pobl sy’n dal yn ôl rhag ymgeisio am swydd pennaeth i gamu ymlaen i
lenwi’r bwlch, hyd yn oed petai hynny ar sail dros dro yn unig, gan dderbyn y
byddai cynnal y math hwnnw o weinyddiaeth, sydd ddim yn wydn, yn rhoi pwysau
ychwanegol ar yr Adran Addysg a GwE.
Cyfeiriwyd at yr anawsterau recriwtio
technegwyr mewn ysgolion a holwyd pa ffyrdd gwahanol oedd yna o gefnogi
ysgolion o ran y ddarpariaeth TG. Mewn
ymateb, nodwyd:-
·
Bod
yna broblem recriwtio technegwyr gwyddoniaeth, yn ogystal â thechnegwyr TG.
·
Yn
ogystal â rhannu technegwyr gydag ysgolion eraill, bod technegwyr canolog y
Cyngor wedi bod yn daparu gwasanaeth ymestyn allan ar gyfer cefnogi gwaith
technegol mewn ysgolion sy’n methu penodi technegydd, ond bod angen technegydd
yn y fan a’r lle ar gyfer y mwyafrif o dasgau.
·
Bod
yr Adran wedi bod yn gweithio gyda Phrifysgol Bangor i weld oes yna fyfyrwyr
fyddai â diddordeb mewn gwneud y math yma o waith, ond yn anffodus, nid oedd y
cyflogau yn denu’r math yma o unigolion.
·
Bod
yr Adran hefyd wedi bod yn gweithio gyda Coleg Meirion Dwyfor ac ysgolion e.e.
i weld fyddai gan rywun ddiddordeb mewn cymryd blwyddyn allan ar ôl Lefel A i
wneud y math yma o waith, ac er y llwyddwyd i gael ambell enw, nid oedd yr
unigolion hynny wedi dilyn ymlaen gyda’r cynnig.
·
Bod
y Strategaeth Ddigidol yn amcanu i gynyddu sgiliau dysgwyr fel eu bod yn gadael
ysgol gyda’r sgiliau digidol fydd yn eu galluogi i gyflawni’r swyddi hyn maes o
law.
·
Bod
angen ceisio lleihau’r galw am dechnegwyr yn y lle cyntaf drwy uwchraddio’r
dyfeisiadau sydd yn yr ysgolion ar hyn o bryd, er, wrth gwrs, bod raid cofio
bod y cynnydd yn nifer y dyfeisiadau ar draws y sir yn mynd i arwain at fwy o
alw am gefnogaeth dechnegol.
Awgrymwyd mai canlyniad y toriadau yng
nghyllidebau ysgolion fydd dosbarthiadau mwy a holwyd i ba raddau y rhagwelir y
bydd angen cyfyngu ar y cwricwlwm er mwyn gwneud iawn i’r pynciau craidd drwy
neilltuo mwy o oriau ar eu cyfer gan y bydd dosbarthiadau yn fwy, ac i ba
raddau mae hynny wedyn yn milwrio yn erbyn y math o ddatblygiadau sy’n rhan o’r
cwricwlwm newydd. Mewn ymateb, nodwyd:-
·
Wrth
lunio amserlenni gwersi, bod yr ysgolion bob amser yn cychwyn gyda’r pynciau
craidd, ac yn adeiladu ar hynny.
·
Wrth
i’r cwricwlwm newydd ddod i mewn, rhagwelid y gallai fod yn fwy anodd i
ysgolion llai gael y balans ar draws y 5 maes dysgu a phrofiad oherwydd yr
angen am yr holl arbenigedd a’r amrywiaeth staffio, ond o ran maint
dosbarthiadau, dylai ysgolion gael dosbarthiadau hyfyw sy’n gallu dysgu.
·
Y
dylai’r gyfundrefn cynhwysiad a’r holl gefnogaeth sydd ar gael sicrhau nad yw
ysgol byth yn cyrraedd y pwynt o orfod neilltuo mwy o oriau ar gyfer y pynciau
craidd.
·
Na
ragwelid cyfyngu ar y cwricwlwm newydd, ond yn sicr byddai’r ysgolion yn wynebu
heriau wrth symud ymlaen.
Sylwyd nad oedd cyfeiriad yn yr adroddiad at
y drefn o ddychwelyd plant sy’n mynychu’r canolfannau iaith i’r fam-ysgol ar y
5ed diwrnod o’r wythnos. Mewn ymateb,
nodwyd, gan fod y gyfundrefn drochi yng Ngwynedd ar ei newydd wedd bellach wedi
cwblhau cylch blwyddyn gyfan, bod y Gwasanaeth yn symud ymlaen i ymgynghori ac
ymgysylltu gyda rhanddeiliaid ynglŷn â gwerthusiad o’r gyfundrefn
honno. Unwaith y byddai’r sylwadau
wedi’u coladu a’r broses wedi’i chwblhau, byddai’r mater yn dod gerbron y
pwyllgor hwn i’w graffu.
Nodwyd bod yna gryn bryder mewn un ardal o’r
sir yn benodol bod dychwelyd plant o’r canolfannau iaith i’r fam-ysgol 1
diwrnod yr wythnos yn cael effaith ar yr iaith sy’n cael ei defnyddio ar fuarth
yr ysgol. Nodwyd bod aelod wedi bwriadu
cyflwyno cwestiwn ynglŷn â hyn i’r Cyngor llawn diwethaf, ond iddo gael ei
wrthod. Mewn ymateb, nodwyd petai’r gwerthusiad
o’r gyfundrefn yn profi bod angen newid y drefn, byddai’r Gwasanaeth yn edrych
ar hynny o ddifri’.
Mewn ymateb i gwestiwn, eglurwyd y byddai’r
adolygiad o’r gyfundrefn drochi yn adolygiad mewnol, ond yn cynnwys llais pawb.
Holwyd faint o blant Saesneg fel Iaith
Ychwanegol oedd yna yng Ngwynedd, yn benodol felly yn y sector cynradd. Mewn ymateb, nodwyd y gellid darparu’r union
ffigwr ar gyfer yr aelod.
Holwyd beth oedd sefyllfa’r Polisi Iaith o
safbwynt plant sydd ddim yn siarad Saesneg na Chymraeg, a holwyd pam nad
oeddent, yn y sector cynradd o leiaf, yn mynd ati’n syth i ddysgu Cymraeg. Holwyd hefyd pa wersi y gellid eu dysgu o
edrych ar y gyfundrefn dysgu Saesneg, sydd hefyd yn faes arbenigol ieithyddol. Mewn ymateb, nodwyd:-
·
Bod
plant sydd ddim yn siarad Saesneg na Chymraeg yn cael eu derbyn yn syth i’r
canolfannau iaith, a’u bod hefyd yn dysgu Saesneg fel iaith ychwanegol. Nid oedd yna bolisi bod rhaid i’r plant
ddysgu Saesneg yn gyntaf.
·
Bod
4% o’r plant yn y canolfannau iaith y tymor diwethaf yn blant oedd wedi
cyrraedd heb unrhyw Gymraeg na Saesneg.
·
Bod
y Gwasanaeth a’r Tîm Saesneg Iaith Ychwanegol yn rhannu gwerthoedd ac
egwyddorion trochi, a hefyd yn cynnal hyfforddiant gydag ysgolion sydd wedi
derbyn mewnbwn sylweddol o blant sydd ddim yn siarad Saesneg na Chymraeg.
·
Y
ceisid sicrhau nad yw’r plant yn cael mewnbwn gan y ddau dîm ar yr un pryd a’u
bod yn dod i’r canolfannau iaith yn gyntaf ac wedyn yn derbyn cefnogaeth gan y
Tîm Saesneg Iaith Ychwanegol.
Nodwyd:-
·
Bod
y Gwasanaeth Ieuenctid wedi’i leoli mewn 3 adran wahanol o’r Cyngor dros y 2
flynedd ddiwethaf, a hefyd wedi bod trwy gyfnod o ail-strwythuro eithaf
sylweddol.
·
Bod
yr adroddiad yn sôn am edrych ar gyfleoedd cyllidebol newydd, a holwyd beth a
olygid gan hynny.
·
Bod
holiadur a rannwyd gyda phobl ifanc cyn y Nadolig yn gymhleth dros ben a bod
hynny’n codi pryder ynglŷn â dibynadwyedd yr ymgynghori.
·
A
fyddai’r adolygiad o’r Gwasanaeth yn golygu cynnal ymgynghoriad llawn, neu
ddarparu holiadur yn unig?
Mewn ymateb, nodwyd:-
·
Y
croesawid y Gwasanaeth Ieuenctid i’r Adran Addysg a chredid mai dyma ei gartref
naturiol o fewn y Cyngor o ystyried y gwaith arbennig mae’r Gwasanaeth yn ei
wneud gyda’r ysgolion.
·
Bod
yna waith da yn digwydd hefyd gyda’r bobl ifanc sy’n gadael yr ysgolion, ac
sydd, o bosib’, angen cefnogaeth i symud ymlaen o ran eu bywyd gwaith a
hyfforddiant, ayb, ac roedd hynny eto’n ffitio’n dda o fewn y gyfundrefn
addysg.
·
Bod
y gwaith ieuenctid cymunedol yn cael ei ariannu gan wahanol ffynonellau ariannol
a grantiau, ayb, a dymunid edrych ar gysondeb y ddarpariaeth ar draws yr
ardaloedd.
·
Bod
y cymorth ieuenctid o ran ysgolion yn gyson ac ar gael yn yr ysgolion i gyd a
bod yna ganmol i’r gwaith sy’n digwydd yn amlasiantaethol.
·
Bod
y gwaith hynod o dda o ran y dysgwyr ôl-16 yn digwydd yn unol â’r fframwaith ar
gyfer cefnogi dysgwyr sy’n gadael addysg a hyfforddiant.
·
O
ran y sylw ynglŷn â chymhlethdod yr holiaduron, byddai’r Gwasanaeth yn
edrych ar hynny ac yn sicrhau bod y cynnwys yn glir a dealladwy i bawb.
·
O
ran y goblygiadau cyllidol, er bod yna dorri ar y Gwasanaeth Ieuenctid o ran y
toriadau sydd wedi’u hamlygu, bod y Gwasanaeth yn ffodus i ryw raddau bod
swyddi gweigion, ac ati, yn golygu bod modd torri heb golli unigolion allweddol
o’r gwasanaeth.
Nodwyd:-
·
Na
chytunid mai’r Adran Addysg yw’r lle perffaith ar gyfer y Gwasanaeth Ieuenctid
ac y dylai fod yn wasanaeth ar wahân sy’n pontio sawl adran o ystyried bod
Cynllun y Cyngor ar gyfer y 5 mlynedd nesaf yn cyfeirio at bwysigrwydd darparu
cyfleoedd hamdden a chymdeithasu y tu allan i sefydliad addysg ar gyfer plant a
phobl ifanc.
·
Y
gwelwyd cynnydd yn nifer y bobl ifanc sy’n ei chael yn anodd bod yn rhan o
addysg arferol ers cyfnod y pandemig, a bod y Gwasanaeth Ieuenctid yn hynod
bwysig, fel gwasanaeth ataliol bron, fel nad yw pobl ifanc yn mynd i sefyllfa
anodd.
·
Bod
y gwaith mae’r Gwasanaeth Ieuenctid yn wneud ar hyn o bryd gydag adnoddau prin
yn anhygoel.
·
Bod
y ddarpariaeth wych a gynigir gan yr elusen Porthi Dre yng Nghaernarfon yn
gwneud gwahaniaeth aruthrol i les pobl ifanc.
·
Bod
yr adroddiad yn sôn bod 1,300 o achrediadau wedi’u cwblhau gan bobl ifanc, ac
er bod hyn yn lwyddiant i’r bobl ifanc, dylid cwestiynu beth mewn difri’ yw
gwerth yr achrediadau hyn ar y diwedd.
Holwyd a oedd y Gwasanaeth yn cysylltu â’r bobl ifanc hynny sydd wedi
cwblhau achrediadau yn y gorffennol i ofyn a fu’r achrediadau hynny o gymorth
iddyn nhw gael gwaith neu hyfforddiant.
Nodwyd hefyd mai’r flaenoriaeth i bobl ifanc yw cael cyfle i hamddena a
chymdeithasu ac y gallai’r angen i gwblhau achrediadau fod yn faen tramgwydd i
bobl ifanc ymgysylltu gyda’r Gwasanaeth Ieuenctid.
·
Bod
yr adroddiad yn nodi bod y Gwasanaeth Ieuenctid wedi ymgysylltu gyda 65% o bobl
ifanc o Haen 1 a 2 (Nifer o bobl ifanc mwyaf bregus Gwynedd), sy’n golygu na
lwyddwyd i ymgysylltu gyda’r 35% arall.
Tra’n cydnabod nad yw’n bosib’ cyrraedd pawb, a bod yna gynnydd aruthrol
wedi bod yn y galw, holwyd pa gynllunio ymlaen llaw sy’n digwydd i sicrhau
gallu cyrraedd y galw yn well.
Mewn ymateb, nodwyd:-
·
Bod
yr ateb o ran sut i gael mwy i ymgysylltu â’r Gwasanaeth Ieuenctid i’w weld yn
y ffaith bod y Gwasanaeth yn gweithio gyda’r plant o fewn yr ysgolion, a hynny
mewn ffordd wahanol i’r athrawon a’r cymorthyddion.
·
Y cytunid
y gallai’r angen i gwblhau achrediadau fod yn faen tramgwydd i bobl ifanc
ymgysylltu â’r Gwasanaeth Ieuenctid, a bod angen edrych ar hynny. Er hynny, roedd rhai pobl ifanc, megis
unigolion sydd ddim yn ymgysylltu cystal yn yr ysgol, yn cael gwir werth o’r
achrediadau gan eu bod yn caniatáu iddynt gael gwell mynediad i addysg bellach,
ayb, na fyddent yn ei gael drwy’r cwricwlwm ysgol yn unig.
·
O
ran hyrwyddo mwy o bobl ifanc i fod yn rhan o’r Gwasanaeth Ieuenctid, bod yna
strategaeth ar hyrwyddo’r Gwasanaeth ar waith ac o bosib’ y byddai ymweld â
Phorthi’r Dre yn un ffordd o gael pobl ifanc i ymgysylltu’n well gyda’r
Gwasanaeth Ieuenctid.
Nododd y cynrychiolydd undebau athrawon fod
ganddi gwestiynau i’r Pennaeth Addysg a Rheolwr Gyfarwyddwr GwE, ond yn
anffodus, bod raid iddi adael y cyfarfod.
Gofynnodd Rheolwr Gyfarwyddwr GwE iddi ebostio’r cwestiynau ato fel y
gallai ymateb yn uniongyrchol.
Sylwyd bod yr adroddiad yn nodi bod gan
99.16% o staff yr ysgolion DBS cyfredol, sy’n ganran uchel iawn, ond y dylai
fod yn 100%, a holwyd ai’r ffaith bod ceisiadau yn cael eu prosesu, ayb, oedd y
rheswm am hynny. Mewn ymateb, nodwyd:
·
Y
dylai’r ganran fod yn 100% yn amlwg a bod yr Adran yn gweithio tuag at
hynny. Er hynny, roedd cyrraedd 100%
bron yn amhosib’, yn enwedig os oes unigolion wedi’u hatal o’r gwaith ac
felly’n methu cael prosesu eu DBS, ond yn dal ar y gyflogres tra mae’r
ymchwiliad yn mynd rhagddo. Hefyd, roedd
yna athrawon llanw, sydd ddim bellach yn dysgu, ond yn parhau ar restr yr
Awdurdod, ac un neu ddau o unigolion sy’n disgwyl eu canlyniadau, ayb, o ran y
DBS.
·
Bod
gan yr Awdurdod restr yn nodi ym mha ysgolion ac ym mha wasanaeth mae’r
unigolion sydd heb DBS a bod yna Swyddog Diogelu yn cysylltu â phob un ohonynt
yn fisol er mwyn sicrhau bod y nifer mor isel ag y gall fod.
·
Bod
y niferoedd staff sydd heb DBS cyfredol wedi gostwng o 96 i 26 mewn 3 mis.
Holwyd a ellir bod yn glir a yw nifer y
plant sy’n cymryd cinio ysgol ar gynnydd ai peidio, ac a yw’r ymgyrchoedd i
gael plant i fwyta’n iach yn effeithio ar hynny. Mewn ymateb, nodwyd:-
·
Bod
y cynnig o ginio am ddim i ddysgwyr cynradd o’r Flwyddyn Derbyn i Flwyddyn 6 yn
weithredol yng Ngwynedd ers dechrau mis Medi diwethaf, ac er bod y ddarpariaeth
ar gael ar gyfer y plant, bod gwaith i’w wneud eto o ran cwblhau gosod offer
mewn ceginau, ac ati.
·
Y
gwelwyd cynnydd yn nifer y plant sy’n cymryd cinio ysgol ers mis Medi, er, o
bosib’, nad oedd y cynnydd hwnnw gymaint â’r disgwyl mewn rhai ysgolion, ac
roedd lle i fod yn hyrwyddo dipyn mwy ar y cynnig.
·
O
bosib’ bod rhai yn dal i feddwl nad yw’r cynnig yn agored i bawb a bod yr
ymdeimlad o stigma ynghlwm â chinio am ddim yn parhau.
·
Bod
bwriad i gyflwyno adroddiad i’r pwyllgor hwn ym mis Mawrth ar y Prosiect Cinio
am Ddim, ac erbyn hynny, byddai’r Adran wedi casglu barn penaethiaid
ynglŷn â pha gynnydd maen nhw’n teimlo sydd wedi bod yn eu hysgolion, ydi
hynny wedi gwella ar yr elfen bwyta’n iach gan blant ac ydi o wedi effeithio’n
gadarnhaol ai peidio ar ymddygiadau neu addysg y plant yn ystod y cyfnodau ar
ôl amser cinio.
·
Y
byddai’r Adran hefyd yn gweithio gyda dwy ysgol ar gynllun peilot i geisio
gweld i ba raddau y gellir gweithio’n fwy dwys gyda rhai teuluoedd i geisio’u
hannog i fanteisio ar y cynnig.
Nodwyd bod y diwrnod ysgol yn gallu bod yn
ddrud i rieni, a holwyd a oedd gwaith ar droed i asesu a oes yna blant yn methu
ysgol oherwydd bod eu rhieni’n methu fforddio popeth sydd ei angen. Mewn ymateb, nodwyd:-
·
Bod
yna waith yn digwydd ar hyn o bryd i edrych yn benodol ar gost gyrru plentyn
i’r ysgol yng Ngwynedd.
·
Bod
ymateb rhieni hyd yma i’r holiaduron a anfonwyd at randdeiliaid wedi bod yn
dda, yn egluro’r rhwystredigaeth, nid yn unig o ran y ffaith bod yna gostau,
ond bod y costau hynny’n tueddu i ddigwydd ar yr un amser. Byddai’r Adran yn edrych hefyd oes yna
sylwadau ynglŷn â phresenoldeb yn benodol yn yr ymatebion ddaw yn ôl.
Holwyd beth oedd y rheswm dros y bwlch
rhwng yr hyn sydd yn y gyllideb a gwir gost cludiant ysgol. Mewn ymateb, nodwyd:-
·
Bod
y gyllideb cludiant yng Ngwynedd yn gor-wario ers blynyddoedd lawer a bod rhaid
edrych ar hynny dros yr wythnosau a’r misoedd nesaf.
·
Bod
y sefyllfa’n gymhleth a’r gyllideb cludiant yn anodd i’w rheoli am nifer o
resymau, gan gynnwys plant yn symud ysgolion, plant yn symud i mewn ac allan o
ofal, rhai plant gydag anghenion arbennig sy’n cael eu cwrdd y tu hwnt i’r
ardal leol, yr angen i gludo plant i ystod o sefydliadau gwahanol, gan gynnwys
canolfannau ABC, canolfannau iaith ac ysgolion arbennig, y ffaith bod y
contractwyr yn gyfuniad o gwmnïau bysus a thacsis a bod ambell gontractwr yn
rhoi’r gorau i’r contract ac yn ail-dendro am y contract am bris uwch.
·
Bod
bwriad i benodi Rheolwr Cludiant ar gyfer yr Adran Addysg yn y dyddiau nesaf
fel bod un person o fewn yr Adran yn cymryd cyfrifoldeb dros gludiant.
·
Bod
rhaid edrych ar y galw a’r ddarpariaeth er mwyn gweld oes yna ffordd fwy
cost-effeithiol o gludo plentyn o A i B, ond roedd honno’n dasg ynddi’i hun o
ystyried nad oes, efallai, ond un cwmni yn y farchnad am y contract mewn rhai
ardaloedd gwledig.
Holwyd a oedd gan yr Awdurdod ddarpariaeth i
sicrhau bod cynlluniau cydraddoldeb yn cael eu rhoi mewn lle yn yr
ysgolion. Mewn ymateb, nodwyd, yn sgil
diweddaru’r modelau o bolisïau a chynlluniau yn wyneb y canllawiau newydd, y
byddai’r Adran yn rhoi’r arfau gorau i’r ysgolion ddatblygu eu cynlluniau
cydraddoldeb unigol eu hunain.
Holwyd a oedd yna broses mewn lle i sicrhau
bod plant mewn gofal yn mynychu’r ysgol gymaint â phosib’ ac a oedd gan yr
Adran y capasiti i gwrdd â phob gofyn statudol o ran plant mewn gofal. Mewn ymateb, nodwyd:-
·
Bod
gennym y capasiti, ond bod yna broblem o ran mynediad at ddata fel bod modd
targedu plant mewn gofal yn amserol gan fod plant yn mynd i mewn ac allan o
ofal cyn bod modd darparu unrhyw beth ar eu cyfer o ran yr ysgolion.
·
Bod
yr Adran yn edrych ar hyn yn benodol a bod y data yn ymestyn ymhellach na
phresenoldeb yn unig, ac yn ymwneud â chyrhaeddiad plant mewn gofal yn ogystal.
·
Ei
bod yn anodd iawn cael gafael ar ddata sy’n dangos lle dylai plentyn mewn gofal
fod o ran cyrhaeddiad addysgol a dod i farn ynglŷn ag effeithiolrwydd y
ddarpariaeth.
·
Bod
y Tîm Data yn edrych ar bresenoldeb plant mewn gofal o gymharu â phlant eraill
ac yn darganfod ffyrdd dychmygol iawn o ddatrys llawer o’r rhwystrau o ran
casglu gwybodaeth o fewn yr ysgolion.
Dogfennau ategol: