Agenda item

Rhoi diweddariad o’r ddarpariaeth Dysgu a Datblygu i Aelodau, gan amlygu rhwystrau presennol i gyflwyniad y rhaglen.

Derbyn yr adroddiad gan nodi’r sylwadau a gyflwynwyd.

Cyflwynwyd yr adroddiad ar y ddarpariaeth Dysgu a Datblygu a’r cyfleoedd hyfforddiant sydd ar gael i Aelodau. Nodwyd bod yr adroddiad ychydig yn wahanol y tro hwn er mwyn amlygu'r heriau sydd ynghlwm â chyflwyno’r rhaglen.

Soniwyd am y broses ymgynghori gyda Phenaethiaid a Swyddogion sydd eisoes ar waith ar gyfer creu rhaglen hyfforddiant 2024/25. Nodwyd bod hynny o’r rhaglen 2024/25 sydd wedi ei phoblogi yn barod i’w gweld yn yr adroddiad. Adroddwyd bod y gwasanaeth yn derbyn nifer o geisiadau am hyfforddiant newydd ac yn ceisio eu blaenoriaethu. Adlewyrchwyd ar sylwadau blaenorol gan rai Aelodau bod y rhaglen wedi datblygu i fod yn rhaglen drom o ran ei gynnwys.

Amlygwyd bod teitlau allweddol sydd wedi eu hadnabod fel meysydd craidd wedi eu rhestru yn yr adroddiad. Pwysleisiwyd ei bod yn hanfodol i Aelodau gwblhau’r rhain gan nodi bod amryw heb gwblhau’r teitlau. Tynnwyd sylw at y ffigyrau yn y tabl yn rhan 2.4 o’r adroddiad.

Ychwanegwyd bod rhai o’r teitlau craidd yn rhedeg ers peth amser a bod y niferoedd sy’n mynychu’r sesiynau yn broblemus. Nodwyd bod cynnal hyfforddiant sy’n hanner llawn o ran presenoldeb ddim yn rhoi’r gwerth gorau am arian ac yn arwain at orfod ail gynnal yr un hyfforddiant amryw o weithiau. Nodwyd bod hyn yn arafu gallu swyddogion i symud ymlaen â’r rhaglen hyfforddiant ehangach gan y bydd angen ail ymweld â’r teitlau craidd yn y flwyddyn 2024/25. Amlygwyd y consyrn nad yw’r Aelodau sydd heb fynychu’r hyfforddiant craidd efo’r cefndir na’r wybodaeth angenrheidiol i’w rôl.

Yn ystod y drafodaeth cododd y sylwadau canlynol:

-        Canmolwyd ansawdd uchel yr hyfforddiant gan nodi eu bod yn ddefnyddiol, a diolchwyd am waith y gwasanaeth Dysgu a Datblygu.

-        Mynegwyd pryder a siomedigaeth bod nifer o Aelodau heb fynychu’r hyfforddiant craidd a gofynnwyd pa gamau sydd ar y gweill er mwyn sicrhau bod pawb yn mynychu’r teitlau mandadol.

-        Holiwyd ynghylch blaengynllun ac os oes modd ei gylchredeg. Credwyd y byddai derbyn blaengynllun o’r dyddiadau o fudd i Aelodau allu cynllunio a gadael amser rhydd ar gyfer y teitlau amrywiol.

-        Cydnabuwyd ei bod yn anodd mynychu hyfforddiant oherwydd prinder amser Aelodau gyda rhai efo calendrau llawn, yn ogystal ag amryw efo cyfrifoldebau eraill megis gyrfa neu blant. Diolchwyd am y camau sydd eisoes wedi eu cymryd i geisio gwella nifer mynychwyr. 

-        Holiwyd am y posibilrwydd o wylio sesiynau sydd wedi eu recordio ac os oes modd i Aelodau wneud hynny yn amser eu hunain. Gofynnwyd a fydd hyn yn cyfri fel eu bod wedi mynychu’r sesiwn.

-        Awgrymwyd cysylltu ag Arweinyddion Grwpiau Gwleidyddol er mwyn iddynt dynnu sylw at y mater yn ffurfiol o fewn y Grwpiau gan amlygu’r hyfforddiant fwyaf hanfodol. Ategwyd bod cyfrifoldeb bellach ar yr Arweinyddion Grŵp i sicrhau bod Aelodau yn mynychu hyfforddiant.

-        Cwestiynwyd yr angen i Aelodau ail wneud hyfforddiant os eisoes wedi ei gwblhau e.e. yn y Cyngor diwethaf (2017-22) neu drwy sefydliad arall.

-        Amlygwyd bod nifer o sesiynau yn cael eu canslo oherwydd diffyg niferoedd neu salwch gyda rhai heb gael eu hail drefnu. Cyfeiriwyd yn benodol at sesiwn efo Cymorth i Ferched Cymru gafodd ei ganslo ar y 9^fed o Chwefror.

Mewn ymateb i’r sylwadau:

-        Adroddwyd bod y gwasanaeth wedi bod yn canolbwyntio ar atgoffa Aelodau am yr angen i fynychu teitlau craidd ac ail gynnig sesiynau yn ogystal â chynnig sesiynau ar amseroedd gwahanol e.e. gyda’r nos. Yn ychwanegol nodwyd bod y Swyddog Datblygu Aelodau yn targedu unigolion sydd ddim yn mynychu ac yn eu hatgoffa. Croesawyd awgrymiadau pellach gan yr Aelodau.

-        Nodwyd bod gwybodaeth helaeth am y teitlau ar y Mewnrwyd Aelodau a bod llawer o wybodaeth yn cael ei rannu yn y Bwletin Aelodau yn wythnosol yn ogystal â dolen i’r Mewnrwyd. Amlygwyd bod copi o’r blaengynllun i’w weld ar y Mewnrwyd Aelodau. Ychwanegwyd bod ymdrechion wedi bod i osgoi gwrthdaro rhwng dyddiadau hyfforddiant a Phwyllgorau’r Cyngor.

-        Nodwyd bod recordiad rhai o’r hyfforddiant yn cael eu gosod ar y Mewnrwyd Aelodau. Gofynnwyd i’r Aelodau gysylltu efo’r Swyddog Datblygu Aelodau er mwyn cadarnhau ar ôl gwylio recordiad, fel arall ni fydd y gwasanaeth yn ymwybodol o hyn.

-        Cytunwyd i’r gwasanaeth gysylltu efo’r Arweinyddion Grŵp Gwleidyddol cyn gynted ag y bo modd er mwyn iddynt annog Aelodau i fynychu teitlau craidd.

-        Nodwyd bod diweddariadau yn aml efo teitlau fel y Cod Ymddygiad ac Arwain yn Ddiogel a Diogelwch Personol felly anogwyd yr Aelodau i ail fynychu os yn amserol.

-        Cadarnhawyd y bydd sesiwn pellach efo Cymorth i Ferched Cymru yn cael ei ail drefnu at fis Ebrill, bydd dyddiad newydd yn cael ei gynnig cyn gynted ag y bo modd.