Agenda item

Er mwyn cael sicrwydd bod darpariaeth addas ar gael i bawb sydd angen y gwasanaeth.

Derbyn yr adroddiad gan ddiolch i bawb sy’n gweithio yn y Gwasanaeth Egwyl Fer, a mynegi gobaith y bydd y cyllid ar gael i barhau i gynnig y gwasanaeth i bawb sydd ei angen fel mae amser yn mynd yn ei flaen.

 

Cyflwynwyd – adroddiad yr Aelod Cabinet Plant a Theuluoedd ar y gwasanaeth Egwyl Fer (Tîm Integredig Derwen).  Gwahoddwyd y pwyllgor i graffu cynnwys yr adroddiad er mwyn cael sicrwydd bod darpariaeth addas ar gael i bawb sydd angen y gwasanaeth.

 

Gosododd yr Aelod Cabinet y cyd-destun gan ddiolch i’r holl staff am eu gwaith diflino a’u brwdfrydedd a’u cariad wrth weithio hefo’r plant mwyaf bregus yng Ngwynedd.  Ymhelaethodd y Pennaeth Cynorthwyol Adnoddau - Plant a Chefnogi Teuluoedd ar gynnwys yr adroddiad ac yna rhoddwyd cyfle i’r aelodau ofyn cwestiynau a chynnig sylwadau. 

 

Nodwyd bod yr adroddiad a’r cyflwyniad yn amlygu’r galw anferthol am y gwasanaeth egwyl fer, a’i bod yn amlwg bod yna waith gwych iawn a hanfodol yn mynd yn ei flaen.

 

Tynnwyd sylw at yr angen am wasanaeth egwyl fer ar gyfer oedolion yn ogystal, ond eglurwyd bod yr eitem hon yn trafod y ddarpariaeth ar gyfer plant yn unig. 

 

Mynegwyd pryder o ddeall fod nifer y gwirfoddolwyr wedi gostwng o 20 cyn y cyfnod Cofid i 3 erbyn hyn.  Holwyd beth sy’n cael ei wneud i geisio recriwtio rhagor o wirfoddolwyr, a gofynnwyd oedd modd defnyddio’r gwirfoddolwyr presennol mewn ymdrech i geisio denu rhagor.  Mewn ymateb, nodwyd:-

 

·         Gan na fu’n bosib’ parhau â’r cynllun egwyl fer dros y cyfnodau clo, y collwyd nifer o wirfoddolwyr wrth i bobl symud yn eu blaenau.

·         Bod y Swyddog Egwyl Fer yn cyfarfod yn rheolaidd â Phrifysgol Bangor, sef y prif gysylltiad o ran yr ymgyrchoedd recriwtio.

·         Y cytunid â’r sylw ynglŷn â defnyddio gwirfoddolwyr presennol, ond na ellid gwneud mwy nag amlygu bod y cyfleoedd yn bodoli a bod mor rhagweithiol â phosib’ o safbwynt ymateb i unrhyw ymholiadau.

·         Bod 5 darpar wirfoddolwr yn mynd drwy’r broses DBS ar hyn o bryd a mawr obeithid y byddai’r unigolion hyn ar gael i’r gwasanaeth yn fuan er mwyn gwneud gwahaniaeth.

·         O bosib’ bod yr argyfwng costau byw yn effeithio ar awydd pobl i roi eu hunain ymlaen i wirfoddoli, ond yn sicr byddai’r Gwasanaeth yn dyfalbarhau i geisio cynyddu’r nifer.

 

Holwyd pa wasanaeth a gynigir i deuluoedd plant ag anghenion llai dwys ynghyd â beth yw’r rhagolygon ar gyfer y dyfodol o ystyried bod y galw yn cynyddu o flwyddyn i flwyddyn.  Gofynnwyd hefyd a ellir bod yn hyderus y byddwn yn gallu cwrdd â’r anghenion dwys, heb son am yr anghenion eraill, yn wyneb sefyllfa gyllidol y Cyngor ar gyfer y blynyddoedd nesaf.  Mewn ymateb, nodwyd:-

 

·         Bod y cwestiynau yn adlewyrchu’r heriau mae’r Gwasanaeth yn eu hwynebu ac yn amlwg yn eu trafod o ran datblygiad, ayb, a sut i addasu’r gwasanaeth i gyfarch yr anghenion sy’n codi.

·         Bod y ddarpariaeth bresennol yn cyfarch amrywiaeth o anghenion, ac nid yr anghenion uwch yn unig, gyda’r anghenion uwch yn tueddu i fod yn egwyl fer yn Hafan y Sêr a mwy o oriau cefnogol efallai na’r anghenion is.

·         Bod amrywiaeth o anghenion yn cael eu darparu yn yr oriau cefnogol a bod ceisio dadansoddi rhywfaint o hynny yn ddarn o waith na lwyddwyd i’w wneud efallai ar gyfer yr adroddiad hwn, ond y gellid ei wneud mae’n debyg gyda rhywfaint o ymdrech.

·         Bod gweithgareddau’r gwasanaeth gwirfoddoli yn benodol ar gyfer y lefelau is o anghenion, gyda llai o ddibyniaeth ar, efallai, asesiad gweithiwr cymdeithasol i fod yn darparu hynny, tra bod yr asesiad gofal a chefnogaeth gan weithiwr cymdeithasol yn rhan allweddol o’r gofyn yng nghyswllt y gwasanaethau dros nos a’r gwasanaethau cefnogol mwy dwys.

·         Bod cyfarch yr anghenion i’r dyfodol yn mynd i fod yn her, yn enwedig o ystyried sefyllfa ariannol y Cyngor, a petai yna asesiadau sy’n dangos yr angen, bod cyfrifoldeb ar y Gwasanaeth i ddarparu hynny rhywsut.  Dyma’r her a wynebir o ran cynllunio gwasanaethau ac ni ellid ateb gydag unrhyw sicrwydd o safbwynt sut mae’r cynnydd yn y galw yn mynd i newid eto.

 

Holwyd a oes yna restr aros i fynd i Hafan y Sêr, ac os felly, am ba hyd mae unigolion ar y rhestr aros honno.  Gofynnwyd hefyd ydi Hafan y Sêr yn llawn bellach yn dilyn Cofid.  Mewn ymateb, nodwyd:-

 

·         Er bod rheolwr Hafan y Sêr yn ceisio uchafu’r niferoedd sy’n gallu aros yn yr uned bob nos, ei bod yn her i lenwi’r 6 gwely yn yr uned drwy’r adeg, ond nid oedd hynny oherwydd rhesymau staffio.  Roedd staffio’r uned wedi bod yn eithaf sefydlog bob amser, ac yn ogystal â’r staff ar gytundebau sefydlog, roedd yna hefyd banc o staff wrth gefn ar gyfer sefyllfaoedd unigol.

·         Bod rhaid amrywio staffio i gyd-fynd ag anghenion y plant, e.e. roedd rhai plant ddim yn cysgu drwy’r nos a rhai plant angen 2 aelod staff ar eu cyfer, ac roedd hyn oll yn rhan o’r gwaith cynllunio wrth dderbyn plentyn i’r uned.

·         Mai’r ffactor hwn oedd weithiau’n arwain at y ffaith bod plentyn yn gorfod aros am le yn yr uned, gan fod rhaid ystyried pa blant eraill fydd yn aros yn yr uned ar yr un pryd â’r plentyn yna, a beth yw anghenion yr holl blant ac ydi’r anghenion hynny yn cyd-blethu hefo’i gilydd.

·         Y gellid cael anghenion eithaf heriol gydag ambell blentyn sy’n gallu ansefydlogi plant eraill, ac roedd hynny i gyd yn nwylo’r rheolwr o safbwynt y gwaith paratoi.

·         Bod y rhestr aros am le dros nos yn yr uned yn gallu bod oddeutu 3 mis, ond bod hynny’n cynnwys cyflwyno’r plentyn yn raddol i’r uned yn ystod y cyfnod.

·         O ran oedrannau’r plant sy’n agored i Derwen yn gyffredinol, bod mwy o blant ifanc yn dod i mewn nag sydd o blant hŷn yn gadael ar hyn o bryd.  Credid bod yr un peth yn wir am Hafan y Sêr, ac roedd hyn yn mynd i gael effaith ar y capasiti a’r trosiant a’r rhestrau aros yn y diwedd.  Roedd hyn hefyd yn her feunyddiol o safbwynt cynllunio addasiadau, sy’n cael eu cynllunio fisoedd ymlaen llaw.

·         Bod y Gwasanaeth yn falch iawn o’r ddarpariaeth yn Hafan y Sêr, ond bod angen rhagor o ddarpariaeth o’r fath i ddiwallu’r angen.

·         Bod y budd mae’r teuluoedd yn cael o’r plentyn yn treulio noson neu ddwy yn yr uned yn enfawr, ac yn cadw teuluoedd hefo’i gilydd.

·         O ran capasiti yn gyffredinol a’r rhestrau aros, bod teuluoedd yn gallu mynd trwy gyfnod o argyfwng lle mae newidiadau’n digwydd ac ymddygiad y plentyn, o bosib’, yn fwy heriol nag arfer, a bod yr uned yn ceisio’u gorau i ymateb i sefyllfaoedd o’r fath drwy gynnig ac addasu'r arosiadau.

 

Yn ei sylwadau cloi, nododd yr Aelod Cabinet:-

·         Iddi gael sgwrs gyda Swyddog Gwirfoddoli Prifysgol Bangor ynglŷn â’r mater hwn a bod yna drafodaethau yn mynd rhagddynt i gefnogi gwaith ffantastig y Swyddog Egwyl Fer yn ceisio recriwtio mwy o wirfoddolwyr.

·         Bod y Cabinet wedi gwarchod cyllid y math hwn o ddarpariaeth ar gyfer y plant mwyaf bregus hyd yn hyn, ond bod y Cyngor yn wynebu heriau cwbl ddigynsail dros y blynyddoedd i ddod.  Gan hynny, byddai’n gwerthfawrogi cefnogaeth y pwyllgor i sicrhau nad ydi’r plant yma’n colli ceiniog o’r ddarpariaeth a byddai hithau’n gwneud popeth o fewn ei gallu i sicrhau nad ydi’r ddarpariaeth yn wynebu toriadau, o gofio’r cyd-destun.

 

PENDERFYNWYD derbyn yr adroddiad gan ddiolch i bawb sy’n gweithio yn y Gwasanaeth Egwyl Fer, a mynegi gobaith y bydd y cyllid ar gael i barhau i gynnig y gwasanaeth i bawb sydd ei angen fel mae amser yn mynd yn ei flaen.