Agenda item

Yn unol â’r Rhybudd o Gynnig a dderbyniwyd oddi wrthi yn unol ag Adran 4.19 y Cyfansoddiad, bydd y Cynghorydd Llio Elenid Owen yn cynnig fel a ganlyn:-

Mae’r penderfyniad gan Gydbwyllgor Comisiynu Gwasanaeth Iechyd Gwladol Cymru a’r byrddau iechyd i gau canolfannau Ambiwlans Awyr Cymru Caernarfon (Dinas Dinlle) a’r Trallwng, a’u canoli, yn ergyd drom i Gwynedd gyfan ac yn esiampl arall o sut mae gwasanaethau canolog Cymru yn anwybyddu dyheadau a gofynion Cymru wledig. Rwy’n gofyn ar y Cyngor i wrthwynebu'r penderfyniad, a gofyn am ymyrraeth ac ymchwiliad llawn i'r penderfyniad gan Lywodraeth Cymru.

Mae’r penderfyniad gan Gydbwyllgor Comisiynu Gwasanaeth Iechyd Gwladol Cymru a’r byrddau iechyd i gau canolfannau Ambiwlans Awyr Cymru Caernarfon (Dinas Dinlle) a’r Trallwng, a’u canoli, yn ergyd drom i Gwynedd gyfan ac yn esiampl arall o sut mae gwasanaethau canolog Cymru yn anwybyddu dyheadau a gofynion Cymru wledig.  Mae’r Cyngor hwn yn gwrthwynebu'r penderfyniad, ac yn gofyn am ymyrraeth ac ymchwiliad llawn i'r penderfyniad gan Lywodraeth Cymru.

(A)      Cyflwynwyd y rhybudd o gynnig a ganlyn gan y Cynghorydd Llio Elenid Owen o dan Adran 4.19 y Cyfansoddiad, ac fe’i eiliwyd:-

Mae’r penderfyniad gan Gydbwyllgor Comisiynu Gwasanaeth Iechyd Gwladol Cymru a’r byrddau iechyd i gau canolfannau Ambiwlans Awyr Cymru Caernarfon (Dinas Dinlle) a’r Trallwng, a’u canoli, yn ergyd drom i Gwynedd gyfan ac yn esiampl arall o sut mae gwasanaethau canolog Cymru yn anwybyddu dyheadau a gofynion Cymru wledig.  Rwy’n gofyn ar y Cyngor i wrthwynebu’r penderfyniad, a gofyn am ymyrraeth ac ymchwiliad llawn i'r penderfyniad gan Lywodraeth Cymru.

Gosododd yr aelod y cyd-destun i’w chynnig, gan nodi:-

·         Flwyddyn a hanner yn ôl, y bu i’r Cyngor bleidleisio yn unfrydol o blaid ei chynnig yn galw ar y cyrff perthnasol i gadw canolfannau Ambiwlans Awyr yn Ninas Dinlle a’r Trallwng, ac adeiladu ar y gwasanaethau yn eu lleoliadau presennol, ond roedd y penderfyniad diweddar i gau’r canolfannau hynny yn siomedig a thorcalonnus, ac yn ergyd drom i Wynedd gyfan.

·         Y daeth Cydbwyllgor Comisiynu GIG Cymru, sy’n cynnwys pedwar Aelod Lleyg a saith Prif Weithredwr Bwrdd Iechyd Cymru, i benderfyniad mwyafrifol ddiwedd Ebrill i dderbyn argymhellion Adolygiad Gwasanaeth y Gwasanaeth Casglu a Throsglwyddo Meddygol Brys (EMRTS), i uno canolfannau Ambiwlans Awyr Caernarfon a’r Trallwng ar safle newydd yng nghanol Gogledd Cymru, gyda’r union leoliad i'w benderfynu.

·         Bod Bwrdd Iechyd Betsi Cadwaladr a Bwrdd Iechyd Powys – y ddau ranbarth iechyd sydd yn benodol am gael eu heffeithio yn sgil y penderfyniadau - yn erbyn y penderfyniad, ond ni wrandawyd o gwbl ar angen na barn cyhoedd yr ardaloedd hyn ar y mater.  Gan hynny, roedd yn ofynnol ar Lywodraeth Cymru i ymyrryd a chynnal ymchwiliad llawn i'r penderfyniad.

·         Bod yr argymhellion yn nodi y bydd y penderfyniad hwn yn galluogi mwy o bobl i elwa ar yr arbenigedd clinigol a gaiff ei ddarparu gan dimau'r gwasanaeth gofal critigol hwn a hefyd yn cynnwys darparu gwasanaeth pwrpasol ychwanegol ar y ffyrdd ar gyfer cymunedau gwledig.  Fodd bynnag, fel roedd Aelodau Seneddol Gwynedd wedi nodi, roedd yna gwestiynau cwbl ganolog sydd heb eu hateb eto, yn enwedig o gwmpas y ddarpariaeth bwrpasol ychwanegol ar y ffyrdd, ac roedd y cyfan yn parhau yn gwbl amwys.

·         Na chredid bod synnwyr o gwbl symud y canolfannau o Ddinas Dinlle a’r Trallwng, ar gyrion rhai o ardaloedd mwyaf pellgyrhaeddol a gwledig Cymru, a’u hail-leoli mewn ardal boblog ar gyrion yr A55 yng Ngogledd Ddwyrain Cymru.

·         Bod rhaid amlygu ein cefnogaeth a’n diolch ni, fel pobl leol, ac fel aelodau etholedig i elusen Ambiwlans Awyr Cymru, a thimau clinigol Gwasanaeth Casglu a Throsglwyddo Meddygol Brys (EMRTS) GIG Cymru.  Mae’r gwaith a’r gwasanaeth gwych maen nhw’n ei wneud er mwyn darparu gofal brys yn ein cymunedau yn hollol amhrisiadwy, ac mae elusen Ambiwlans Awyr Cymru yn un o’r elusennau sydd agosaf at galonnau pobl.

·         Y dymunai hefyd ddiolch i bawb a gymerodd ran yn y broses ymgysylltu dros y misoedd diwethaf, a bod y gefnogaeth gref iawn yn lleol i gadw’r safleoedd hyn yn eu lleoliadau presennol yn amlwg yn ystod y broses ymgysylltu.

Mynegodd nifer o aelodau gefnogaeth frwd i’r cynnig.  Nodwyd:-

·         Ei bod yn rhy hawdd dweud y bydd y newidiadau yn arwain at well gwasanaeth, a bod rhaid mynnu’r dystiolaeth a’r manylion sy’n dangos hynny.

·         Yr erfynnid ar yr holl aelodau i arwyddo a rhannu’r ddeiseb ar wefan Senedd Cymru yn galw am ymchwiliad cyhoeddus llawn i gau’r canolfannau yn Ninas Dinlle a’r Trallwng.

Yn ei sylwadau cloi, nododd y cynigydd bod y 3 chynnig gerbron y cyfarfod hwn o’r Cyngor yn ymwneud â’r cam mae ein hardaloedd gwledig yn gael gan y sefydliadau canolog, a phwysleisiodd bwysigrwydd parhau i gydweithio ac i ymgyrchu yn erbyn y penderfyniad i gau canolfannau ambiwlans awyr Dinas Dinlle a’r Trallwng.

PENDERFYNWYD mabwysiadu’r cynnig, sef:-

Mae’r penderfyniad gan Gydbwyllgor Comisiynu Gwasanaeth Iechyd Gwladol Cymru a’r byrddau iechyd i gau canolfannau Ambiwlans Awyr Cymru Caernarfon (Dinas Dinlle) a’r Trallwng, a’u canoli, yn ergyd drom i Gwynedd gyfan ac yn esiampl arall o sut mae gwasanaethau canolog Cymru yn anwybyddu dyheadau a gofynion Cymru wledig.  Mae’r Cyngor hwn yn gwrthwynebu'r penderfyniad, ac yn gofyn am ymyrraeth ac ymchwiliad llawn i'r penderfyniad gan Lywodraeth Cymru.