Agenda item

Cais o dan Adran 73 i amrywio amod 2 ar ganiatâd cynllunio 5/59/500 (Estyniad i'r Chwarel Lechi ac ail gyfeirio Ffyrdd y Chwarel) er mwyn ymestyn yr amser ar gyfer cloddio a gweithio deunydd hyd at 2048 yn Chwarel Cwt y Bugail, Cwm Teigl, Llan Ffestiniog  

 

AELOD LLEOL: Cynghorydd Linda Ann Jones

 

Dolen i'r dogfennau cefndir perthnasol

 

PENDERFYNIAD:

Dirprwyo'r hawl i Bennaeth yr Adran Amgylchedd gymeradwyo'r cais, gydag amodau'n ymwneud â'r canlynol:

·        Y gwaith i ddod i ben ar 31/12/2048, adfer y safle erbyn 31/12/2049.

·        Gweithgareddau a ganiateir a chydymffurfiaeth â’r lluniad / manylion / cynlluniau / gwybodaeth a gyflwynwyd.

·        Marcio ffin y safle ac ardaloedd cloddio am fwynau ynghyd â'r ardaloedd tipio.

·        Dirymu hawliau GPDO Rhannau 19 a 21 ar gyfer offer neu beiriannau sefydlog, adeiladau a strwythurau a gwastraff mwynau.

·        Terfyn allforio o 15,000 tunnell y flwyddyn.

·        Deunydd wedi'i allforio wedi'i gyfyngu i'r briffordd gyhoeddus bresennol.

·        Gweithrediadau tipio i'w cyfeirio tuag at y tirffurf terfynol.

·        Capasiti tipio wedi'i ddiweddaru.

·        Rheoli cyfyngiadau sŵn.

·        Cyfyngu ar ffrwydro rhwng 07:00 a 20:00 o ddydd Llun i ddydd Sadwrn. Dim ffrwydro ar ddydd Sul na gwyliau banc na chyhoeddus. ⁠

·        Cyflymder gronynnau brig wedi'i gyfyngu i 50mm/ s ar gyfer 95% o ffrwydradau gorlwytho dros gyfnod o dri mis a heb fod yn fwy na 60mm/ s ar unrhyw adeg.

·        Rhaid mesur anterth cyflymder gronynnau ar y pwynt agosaf at safle'r ffrwydrad o fewn yr ardal gysgodol a ddangosir yn Lluniad Cyfeirnod WCYBG2312 Rhif 10.

·        Monitro gweithrediadau ffrwydro i gofnodi cyflymder gronynnau brig.

·        Adolygiad bob pum mlynedd o’r gweithrediadau.

·        Cyflwyno'r adolygiad cyntaf o fewn 12 mis.

·        Cynllun Adfer manwl.

·        Gwaith adfer graddol / blaengar.

·        5 mlynedd ôl-ofal/monitro.

·        Bydd cynllun ailfodelu tirffurf yn cael ei gymhwyso i feinciau Chwarel y North Pole a wynebau cysylltiedig fel y nodir ar gynlluniau ar gyfer creu tirffurf sefydlog a nodweddion i gyd-fynd â bwtresi a chreigiau a sgri cyfagos.

·        Ar ôl rhoi'r gorau i weithio, bydd y chwareli/peiriannau/deunyddiau/offer yn cael eu clirio a bydd y safle’n cael ei gadael mewn cyflwr glân/taclus, meinciau chwarel yn cael eu paratoi, eu trin a'u plannu gyda fflora o darddleoedd lleol, ffyrdd cludo i gael eu symud.

·        Cyfyngu mynediad i dda byw i'r ardaloedd sydd wedi'u hadfer.

 

·        Dim peiriannau nac offer i'w gweithredu heb sgriniau 'lladd' sain priodol ac wedi'u cynnal yn iawn, distawyddion ac ati.

·        Bydd pob cerbyd sy'n cludo deunydd crai neu wastraff yn cael eu gweithredu mewn modd fel nad ydynt yn cynhyrchu gormod o sŵn.

·        Dim gweithrediadau fydd yn achosi i lwch ffoi godi a bod pob ardal sy'n cael eu tramwyo gan gerbydau yn cael eu dyfrio i lawr.

·        Bydd cael gwared ar lystyfiant, atgyweirio neu ddymchwel adeiladau a gweithio ardaloedd ble yn flaenorol cafodd mwynau eu tynnu/chwarelu/tipio yn digwydd y tu allan i'r tymor nythu er mwyn gwarchod adar sy'n nythu. Ecolegydd cymwys  ⁠

·        Dim gweithrediadau i'w gwneud ar yr wyneb heb dynnu a storio'r pridd uchaf, isbriddoedd a mawn.

·        Priddoedd uchaf ac isbriddoedd i'w hailddefnyddio cyn gynted â phosibl (Wrth adfer).

·        Priddoedd uchaf i gael eu storio mewn twmpathau heb fod yn fwy na 2m o uchder.

·        ⁠Cofnodi adeilad hanesyddol y cyfleusterau storio celf a Chynllun Ymchwilio Ysgrifenedig.

·        Cynllun monitro a difa rhywogaethau anfrodorol/ymledol.

 

Cais o dan Adran 73 i amrywio amod 2 ar ganiatâd cynllunio 5/59/500 (Estyniad i'r Chwarel Lechi ac ail gyfeirio Ffyrdd y Chwarel) er mwyn ymestyn yr amser ar gyfer cloddio a gweithio deunydd hyd at 2048 yn Chwarel Cwt y Bugail, Cwm Teigl, Llan Ffestiniog

 

Tynnwyd sylw at y ffurflen sylwadau hwyr oedd yn cynnwys sylwadau yn ymwneud  a threftadaeth a thrafnidiaeth

 

a)    Amlygodd yr Uwch Swyddog Cynllunio Mwynau a Gwastraff bod Chwarel Cwt y Bugail wedi ei  lleoli ar grib Manod Mawr ac yn cynnwys chwareli Manod, Graig Ddu a Bwlch y Slater. Adroddwyd bod y chwarel hefyd yn cynnwys ardal i brosesu a storio sydd wedi eu lleoli ar lwyfandir (wedi ei greu o domen gwastraff llechi) ar lethrau dwyreiniol y mynydd ac yn cynnwys siediau torri, ardal storio, siediau ffitio, maes parcio staff, swyddfa a chyfleusterau llesiant. Er eglurder, ategwyd nad oedd yr ardal brosesu'r chwarel, y siediau torri, gweithdai, maes parcio staff ac isadeiledd cysylltiedig eraill i'r dwyrain o wagle'r chwarel wedi eu cynnwys yng nghaniatâd cynllunio 5/59/500. Er hynny, roedd Cytundeb Adran 106 cysylltiedig yn berthnasol i'r holl safle ac yn sicrhau bod cynigion adfer yn cael eu gweithredu. ⁠

 

Eglurwyd bod ardal gronnus gwaith y chwarel (sydd wedi ei gynnwys yn y cais Cynllunio) yn fwy na 25ha ac felly dros drothwy datblygiadau Atodlen 1 dan y Rheoliadau Cynllunio Gwlad a Thref (Asesu Effaith Amgylcheddol) 2017. Cyflwynwyd Datganiad Amgylcheddol (DA) fel rhan o'r Asesiad Effaith Amgylcheddol (EIA) mewn ymateb i'r gofyniad hwn. 

 

Yng nghyd-destun egwyddor y datblygiad nodwyd, ar hyn o bryd mai’r polisïau cynllunio lleol perthnasol oedd Polisi Mwynau Strategol PS 22 a Pholisi MWYN 3 Cynllun Datblygu Lleol ar y Cyd Gwynedd ac Ynys Môn 2011 (CDLl). Datgan Polisi PS 22 y bydd y Cyngor yn cyfrannu at y galw rhanbarthol a lleol parhaus am gyflenwad o fwynau yn unol ag amcanion allweddol datblygu cynaliadwy. Nodwyd hefyd bod Polisi Cynllunio Cymru - Argraffiad 12 (PCC 12) yn ymgorffori polisïau cynllunio Llywodraeth Cymru ar gyfer datblygiadau mwynau ym Mholisi Cynllunio Mwynau Cymru (2001).  Yn unol â gofyn PCC 12, mae gan Cyngor Gwynedd fel yr Awdurdod Cynllunio Mwynau ddyletswydd i sicrhau bod adnoddau mwynau yn cael eu defnyddio mewn modd cynaliadwy, fel y gallant gyfrannu'n briodol at ofynion deunyddiau adeiladu'r ardal. ⁠Ategwyd bod y cais hefyd yn cydymffurfio a meini prawf Polisi MWYN 3 sydd yn caniatáu cynigon datblygu ar gyfer chwilio am fwynau, mwyngloddio neu ymestyn gweithfeydd presennol i gynnal banc tir agregau ardal y Cynllun neu ddiwallu’r galw am fwynau eraill. ⁠ ⁠

 

Yng nghyd-destun mwynderau gweledol a’r dirwedd, nodwyd y byddai’r datblygiad arfaethedig yn achosi effeithiau uniongyrchol i dirwedd safle'r cais nad oes modd eu hosgoi oherwydd natur echdynnu mwynau. Fel rhan o'r dogfennau ategol, roedd yr ymgeisydd wedi darparu Arfarniad Tirwedd a Gweledol (LVIA) sy'n ystyried sensitifrwydd dynodiadau tirwedd, ardaloedd preswyl a derbynyddion hamdden cyfagos. ⁠ ⁠Amlygwyd bod Cyfoeth Naturiol Cymru (CNC) wedi asesu’r dogfennau gan ddarparu dadansoddiad o’r effeithiau gweledol gan ddadleu y byddai ymestyn gweithrediadau ar y safle’n creu effaith ar lonyddwch a chymeriad y Parc Cenedlaethol; bod cysyniad y gwaith adfer a ganiateir ar gyfer yr ardal lle ceir adeiladau/siediau/ardaloedd stocio yn gymharol niwlog heblaw am gael gwared ar strwythurau a phroffilio'r tir/y domen llechi a fyddai'n gadael tirffurf ymwthiol.

 

Mewn ymateb, nodwyd nad oedd y cais yn un ar gyfer datblygiad mwynau newydd, ac mai estyniad ffisegol a / neu addasiadau i'r ardal waith oedd dan sylw. Er hynny,  cydnabuwyd bod caniatâd cynllunio, 5/59/500 yn gymharol lac o ran cyfyngiadau ar weithrediadau a all gael effaith sylweddol ar lonyddwch (h.y., sŵn, ansawdd aer, oriau gweithredol) ac nad oedd yr adeiladau / gweithdai / siediau llifio, cyfleusterau staff a meysydd parcio wedi eu cynnwys gan y caniatâd yma, ond o dan nifer o ganiatadau hanesyddol ar wahân. ⁠

 

Ystyriwyd bod cyfle yma i asesu effeithiau gweledol y datblygiad yn erbyn safonau polisi cynllunio presennol, drwy osod amod priodol i ddatblygu cynllun adfer gwell fyddai’n gallu lleihau effaith weledol y safle ar ôl cwblhau’r gwaith. Byddai hyn yn goresgyn pryderon CNC ac yn sicrhau cydymffurfiaeth â pholisïau.

 

Yng nghyd-destun Hydroleg a hydroddaeareg, nodwyd y byddai’r gwaith cloddio yn parhau mewn modd tebyg i’r hyn a wneir ar hyn o bryd. Caiff dŵr ffo o'r chwarel ei gyfeirio at wagle’r chwarel ac wedyn i mewn i wagleoedd Chwarel Manod sy'n gweithredu fel pyllau gwaddol ar gyfer solidau crog. Bydd dŵr o weithrediadau prosesu yn cael ei ailgylchu gydag unrhyw ddŵr budr o'r gweithfeydd yn cael ei fwydo trwy wasg hidlo cyn ei bwmpio i mewn i Chwarel Manod. Bydd dŵr ffo oddi ar y safle wedi'i gyfyngu i lifo o'r pwll sy'n gorlifo i ‘Lyn Ministry’ gydag unrhyw orlif yn bwydo afon Teigl. ⁠⁠Ar hyn o bryd mae'r chwarel yn dilyn mesurau lliniaru priodol rhag gollyngiadau damweiniol a fydd yn cael eu cadw. Adroddwyd bod CNC wedi adolygu'r wybodaeth a gyflwynwyd ac wedi cadarnhau nad oedd ganddynt unrhyw bryderon ynghylch hydroleg gydag ymestyn oes gwaith y chwarel yn amodol ar gydymffurfio â pharhau i ddefnyddio mesurau atal llygredd a chanllawiau arfer da.

 

Ystyriwyd felly na fyddai'r datblygiad arfaethedig yn cael unrhyw effaith niweidiol ar nodweddion hydrolegol a pherygl llifogydd ac yn cydymffurfio â gofynion Polisi Strategol PS 19 a Pholisi AMG 3, AMG 5, PCYFF 2, PCYFF 3, PCYFF 6 a MWYN 3 Cynllun Datblygu Lleol ar y Cyd Gwynedd a Môn 2011 - 2026.

 

Yng nghyd-destun materion ecolegol a bioamrywiaeth, nodwyd bod swyddog bioamrywiaeth yr Awdurdod Lleol wedi amlygu pryderon am ardal yn y rhan fwyaf gogleddol o ffin y safle sydd yn yr ardal sydd wedi ei gymeradwyo ar gyfer cloddio mwynau ond sydd eto i'w chloddio/chwarela. Eglurwyd bod yr ardal yma oddeutu 0.5ha o ran maint ac yn cynnwys glaswelltir ucheldirol, rhostir a chors, brigiadau creigiau a phocedi bach o fawn ac yn ardal o werth bioamrywiaeth uchel. Er gwaethaf colli'r tir hwn, roedd y swyddog bioamrywiaeth wedi argymell cynnwys mesurau lliniaru o fewn y cynllun adfer. ⁠

 

Yng nghyd-destun archaeoleg a threftadaeth diwylliannol nodwyd bod CADW wedi amlygu pryderon yn ystod y cyfnod ymgynghori cychwynnol ynghylch digonolrwydd yr wybodaeth a gyflwynwyd mewn perthynas â threftadaeth ddiwylliannol fel y'i cynhwysir ym mhennod 9 y Datganiad Amgylcheddol (DA). Roedd y pryderon hyn yn benodol mewn perthynas ag effeithiau gweithrediadau chwarela (ffrwydro/dirgryniad) nodweddion hanesyddol nas dynodwyd yn y chwarel yn ymwneud â storio gweithiau celf o bwys cenedlaethol yn ystod yr Ail Ryfel Byd.  Eglurwyd bod Chwarel Manod wedi ei dewis fel lleoliad cyfleus i storio celf cyfrinachol ac arbenigol ac roedd y datganiad amgylcheddol yn ystyried bod y cyfleuster storio o ‘werth uchel ar y cyfan’ o ran gwerth tystiolaethol, hanesyddol a chymunedol, ond mai gwerth tystiolaethol cymedrol yn unig sy'n weddill o ran yr olion ffisegol adeiledig (cyflwr y cyfleuster wedi dirywio ers i'r  Weinyddiaeth Amddiffyn ildio'r cyfleuster - generaduron, goleuadau, rhesel hongian lluniau i gyd wedi'u tynnu gydag ychydig o offer wedi eu gadael ar ôl a’r hyn sy'n weddill o'r strwythurau mewn cyflwr gwael a dirywiol gydag ansefydlogrwydd toeau'r ceudyllau hefyd yn cyfyngu mynediad corfforol diogel i'r safle). ⁠

 

Daw'r adroddiad, gan GWP Consultants, i'r difrod dirgryniad posibl o ffrwydro, i'r casgliad y dylid addasu dulliau ffrwydro presennol unwaith y bydd y gwaith o fewn 60m i rannau bregus o'r mwyngloddiau. Ategwyd bod CADW, o dderbyn gwybodaeth ychwanegol, wedi dod i'r casgliad y gellid cynnal gwaith cloddio heb niweidio'r cyfleuster storio celf. Roedd CADW wedi cadarnhau nad oedd gwrthwynebiad i'r bwriad yn amodol ar osod amodau perthnasol ar y caniatâd cynllunio. Bydd yr amodau'n cynnwys cyfyngiadau ar weithgareddau ffrwydro a gofyniad am raglen i gofnodi adeiladau i ledaenu'r canfyddiadau. ⁠ ⁠

 

Yng nghyd-destun yr economi nodwyd bod ymestyn gwaith cloddio mwynau yn y chwarel yn , yn uniongyrchol ac yn anuniongyrchol, swyddi/cyflogaeth gysylltiedig eraill (megis cludiant, peiriannau a pheirianneg). Ategwyd bod y cwmni’n gwneud cyfraniad uniongyrchol a sylweddol i’r economi leol a chyflogaeth uniongyrchol/anuniongyrchol o ganlyniad i weithrediadau'r chwarel. Yn fwy na hyn, mae cadw gweithwyr lleol yn cael effeithiau positif ar ddiwylliant, ac yn fwy penodol, ar statws yr iaith Gymraeg yn yr ardal. ⁠Ystyriwyd felly y byddai’r bwriad yn gwneud cyfraniad positif i economi’r ardal yn unol â Pholisi Strategol PS 13 y Cynllun Datblygu Lleol ar y Cyd a NCT 23.

 

b)     Yn manteisio ar yr hawl i siarad, nododd yr ymgeisydd y sylwadau canlynol;

 

·         Bod y cais cynllunio yn hwyluso gweithrediad parhaus Cwt y Bugail / Chwarel Manod, gan ganiatáu parhad mewn cynhyrchu llechi yn y chwarel tan 2048.

·         Os caiff y cais ei gymeradwyo, bydd yr oes estynedig a ganiateir ar gyfer y chwarel yn darparu sylfaen gadarn i’r Cwmni allu gwneud penderfyniadau ynghylch gwariant cyfalaf i’r dyfodol yng Nghwt y Bugail fyddai’n lleihau gwastraff, cynyddu nifer y llechi a gynhyrchir fesul tunnell o graig a gloddir, i gynyddu’r gwerthiant  blynyddol mewn ymateb i’r galw ac ehangu’r dewis gan gyflwyno cynnyrch newydd, arloesol. 

·         Bydd hefyd yn sicrhau 34 o swyddi medrus yn y chwarel hyd at 2048.

·         Bod y Cwmni'n ddiolchgar i swyddogion Gwynedd a CADW am y cyfle i gydweithio i ddatrys materion yn ymwneud â defnydd ogofau gerllaw'r chwarel  a ddefnyddiwyd gan yr Oriel Genedlaethol yn ystod yr Ail Ryfel Byd.

·         Bod cynllun gweithredu wedi ei gytuno fydd yn caniatáu i'r chwarel barhau i weithredu yn unol â’r cynnig wrth sicrhau na fydd y gwaith yn cael effaith ar yr olion, a bod cofnod llawn o’r olion yn cael ei wneud yn gyhoeddus.

·         Bod y Cwmni’n ymwybodol iawn o werth y chwarel o ran ei hanes a’i lle yn y gymuned, ynghyd a cheisio sicrhau dyfodol disglair i’r safle yn ogystal â gorffennol cyfoethog. 

·         Bydd y datblygiad yn mynd ymhell i gyrraedd y nod hwn.

 

Cynigiwyd ac eiliwyd caniatáu’r cais

 

Mewn ymateb i sylw bod y cais wedi ei gofrestru yn 2022 gyda nifer o sylwadau’r ymgynghoriad wedi eu dyddio 2022 ac os oedd materion mwy diweddar wedi codi ond heb gael sylw, nodwyd bod sylwadau CADW wedi cymryd amser i’w datrys ac o ganlyniad bu rhaid cynnal cyfnod ymgynghori ychwanegol.

 

PENDERFYNWYD:

 

Dirprwyo'r hawl i Bennaeth yr Adran Amgylchedd gymeradwyo'r cais, gydag amodau'n ymwneud â'r canlynol:

 

·         Y gwaith i ddod i ben ar 31/12/2048, adfer y safle erbyn 31/12/2049.

·         Gweithgareddau a ganiateir a chydymffurfiaeth â’r lluniad / manylion / cynlluniau / gwybodaeth a gyflwynwyd.

·         Marcio ffin y safle ac ardaloedd cloddio am fwynau ynghyd â'r ardaloedd tipio.

·         Dirymu hawliau GPDO Rhannau 19 a 21 ar gyfer offer neu beiriannau sefydlog, adeiladau a strwythurau a gwastraff mwynau.

·         Terfyn allforio o 15,000 tunnell y flwyddyn.

·         Deunydd wedi'i allforio wedi'i gyfyngu i'r briffordd gyhoeddus bresennol.

·         Gweithrediadau tipio i'w cyfeirio tuag at y tirffurf terfynol.

·         Capasiti tipio wedi'i ddiweddaru.

·         Rheoli cyfyngiadau sŵn.

·         Cyfyngu ar ffrwydro rhwng 07:00 a 20:00 o ddydd Llun i ddydd Sadwrn. Dim ffrwydro ar ddydd Sul na gwyliau banc na chyhoeddus. ⁠

·         Cyflymder gronynnau brig wedi'i gyfyngu i 50mm/ s ar gyfer 95% o ffrwydradau gorlwytho dros gyfnod o dri mis a heb fod yn fwy na 60mm/s ar unrhyw adeg.

·         Rhaid mesur anterth cyflymder gronynnau ar y pwynt agosaf at safle'r ffrwydrad o fewn yr ardal gysgodol a ddangosir yn Lluniad Cyfeirnod WCYBG2312 Rhif 10.

·         Monitro gweithrediadau ffrwydro i gofnodi cyflymder gronynnau brig.

·         Adolygiad bob pum mlynedd o’r gweithrediadau.

·         Cyflwyno'r adolygiad cyntaf o fewn 12 mis.

·         Cynllun Adfer manwl.

·         Gwaith adfer graddol / blaengar.

·         5 mlynedd ôl-ofal/monitro.

·         Bydd cynllun ailfodelu tirffurf yn cael ei gymhwyso i feinciau Chwarel y North Pole ac wynebau cysylltiedig fel y nodir ar gynlluniau ar gyfer creu tirffurf sefydlog a nodweddion i gyd-fynd â bwtresi a chreigiau a sgri cyfagos.

·         Ar ôl rhoi'r gorau i weithio, bydd y chwareli/peiriannau/deunyddiau/offer yn cael eu clirio a bydd y safle’n cael ei gadael mewn cyflwr glân/taclus, meinciau chwarel yn cael eu paratoi, eu trin a'u plannu gyda fflora o darddleoedd lleol, ffyrdd cludo i gael eu symud.

·         Cyfyngu mynediad i dda byw i'r ardaloedd sydd wedi'u hadfer.

·         Dim peiriannau nac offer i'w gweithredu heb sgriniau 'lladd' sain priodol ac wedi'u cynnal yn iawn, distawyddion ac ati.

·         Bydd pob cerbyd sy'n cludo deunydd crai neu wastraff yn cael eu gweithredu mewn modd fel nad ydynt yn cynhyrchu gormod o sŵn.

·         Dim gweithrediadau fydd yn achosi i lwch ffoi godi a bod pob ardal sy'n cael eu tramwyo gan gerbydau yn cael eu dyfrio i lawr.

·         Bydd cael gwared ar lystyfiant, atgyweirio neu ddymchwel adeiladau a gweithio ardaloedd ble yn flaenorol cafodd mwynau eu tynnu/chwarelu/tipio yn digwydd y tu allan i'r tymor nythu er mwyn gwarchod adar sy'n nythu. Ecolegydd cymwys 

·         ⁠Dim gweithrediadau i'w gwneud ar yr wyneb heb dynnu a storio'r pridd uchaf, isbriddoedd a mawn.

·         Priddoedd uchaf ac isbriddoedd i'w hailddefnyddio cyn gynted â phosibl (Wrth adfer).

·         Priddoedd uchaf i gael eu storio mewn twmpathau heb fod yn fwy na 2m o uchder.

·         ⁠Cofnodi adeilad hanesyddol y cyfleusterau storio celf a Chynllun Ymchwilio Ysgrifenedig.

·         Cynllun monitro a difa rhywogaethau anfrodorol/ymledol.