Agenda item

I ystyried cais Mr A

 

(copi arwahan i aelodau’r Is Bwyllgor yn unig)

 

Bod yr ymgeisydd yn berson addas a phriodol ar gyfer trwydded gyrrwr cerbyd hacni / hurio preifat gyda Chyngor Gwynedd

 

Croesawodd y Cadeirydd bawb i’r cyfarfod. Amlygodd y byddai'r penderfyniad yn cael ei wneud yn unol â Pholisi Trwyddedu Cyngor Gwynedd. Nodwyd mai pwrpas y polisi oedd gosod canllawiau ar y meini prawf wrth ystyried cais yr ymgeisydd gyda’r nod o ddiogelu’r cyhoedd drwy sicrhau:

 

•       Bod yr unigolyn yn unigolyn addas a phriodol

•       Nad yw'r unigolyn yn fygythiad i'r cyhoedd

•       Bod y cyhoedd wedi'u diogelu rhag pobl anonest

•       Bod plant a phobl ifanc wedi'u diogelu

•       Bod pobl ddiamddiffyn wedi'u diogelu

•       Bod y cyhoedd yn gallu bod yn hyderus wrth ddefnyddio cerbydau trwyddedig

 

Cyflwynodd y Rheolwr Trwyddedu adroddiad ysgrifenedig ar gais a dderbyniwyd gan Mr A am drwydded gyrru cerbyd hacni/hurio preifat. Gofynnwyd i’r Is-bwyllgor ystyried y cais yn unol â’r collfarnau perthnasol

 

Roedd yr Awdurdod Trwyddedu yn argymell i’r Is-bwyllgor gymeradwyo’r cais

 

Gwahoddwyd yr ymgeisydd i ymhelaethu ar y cais gan roi gwybodaeth am gefndir y collfarnau a’i amgylchiadau personol. Amlygodd bod y collfarnau wedi digwydd mewn un digwyddiad yn ystod cyfnod heriol a bregus yn ei fywyd ac nad oedd wedi troseddu ers hynny. Ategodd ei fod bellach yn gweithio llawn amser mewn swydd gyfrifol oedd yn cynnwys gweithio mewn sefyllfaoedd o ymddygiad gwrthgymdeithasol, ac yn gwirfoddoli mewn ysgol leol.

 

Mewn ymateb i gwestiwn gan un o’r Aelodau ynglŷn â’i allu i reoli ei dymer wrth ymdrin â chwsmeriaid heriol, nododd ei fod wedi aeddfedu ers ei gyfnod yn y fyddin ac yn gallu anwybyddu unrhyw gymhelliant i ymateb yn dreisgar.

 

PENDERFYNWYD bod yr ymgeisydd yn berson addas a phriodol ar gyfer trwydded gyrrwr cerbyd hacni/hurio preifat 12 mis gyda Chyngor Gwynedd.

 

Wrth gyrraedd eu penderfyniad, roedd yr Is-bwyllgor wedi ystyried y canlynol:

·     Gofynion ‘Polisi Trwyddedu ar gyfer Hurio Preifat a Cherbydau Hacni Cyngor Gwynedd’

·     Adroddiad yr Adran Drwyddedu

·     Datganiad DBS

·     Adroddiad Asiantaeth Trwyddedu Gyrwyr a Cherbydau

·     Ffurflen gais yr ymgeisydd

·     Sylwadau llafar yr ymgeisydd

 

Rhoddwyd ystyriaeth benodol i’r materion canlynol

 

Cefndir

 

Yn mis Hydref 2008 cafwyd yr ymgeisydd yn euog o Guro (battery) yn groes i Ddeddf Cyfiawnder Troseddol 1988 (a.39) ac Ymysodiad gan Achosi Gwir Niwed Corfforol yn groes i Ddeddf Troseddau yn erbyn y Person 1861 (a.47)

 

Nid oedd collfarnau eraill i’w hystyried

 

CYMALAU PERTHNASOL Y POLISI

 

Ystyriwyd paragraff 2.2 o Bolisi’r Cyngor lle nodi’r nad oes rheidrwydd i berson sydd â chollfarn am drosedd ddifrifol gael ei wahardd rhag cael trwydded, ond bydd disgwyl iddo fod yn rhydd rhag unrhyw gollfarnau am gyfnod priodol fel y nodir yn y Polisi, a dangos tystiolaeth ei fod yn unigolyn addas a phriodol i ddal trwydded. Mae cyfrifoldeb ar yr ymgeisydd i brofi ei fod yn berson addas a phriodol. Mae paragraff 2.4 yn nodi pan fydd ymgeisydd wedi'i gael yn euog o drosedd(au) neu fod mater arall/materion eraill i'w (h)ystyried yng nghyswllt hynny, ni chaiff y Cyngor adolygu rhinweddau'r gollfarn honno na'r mater arall hwnnw.

 

Ystyriwyd paragraff 4.5 sydd yn nodi bod Gorchymyn Deddf Ailsefydlu Troseddwyr 1974 (Eithriadau) (Diwygio) 2002 yn caniatáu’r Is-bwyllgor ystyried pob collfarn, p’run ai ydynt wedi eu treulio o dan Ddeddf 1974 neu beidio.

 

Mae paragraff 6.0 o’r Polisi yn cyfarch troseddau o drais. Ym mharagraff 6.1 nodir, gan fod gyrwyr trwyddedig yn dod i gysylltiad agos gyda'r cyhoedd yn rheolaidd y byddai is-bwyllgor yn mabwysiadu safbwynt cadarn at y rhai hynny sydd â throseddau yn ymwneud a thrais.

 

Mae paragraff 6.2 yn nodi, bod unrhyw un sydd wedi'i gael yn euog o droseddau'n ymwneud â thrais yn annhebygol o gael trwydded hyd nes iddo fod yn rhydd rhag collfarn(au) o'r fath am 3 blynedd o leiaf. Fodd bynnag, o ystyried ystod y troseddau sy'n ymwneud â thrais, rhaid rhoi ystyriaeth i natur y drosedd.

 

CASGLIADAU

 

Ystyriwyd darpariaethau’r Polisi, esboniad yr ymgeisydd o’i amgylchiadau, ac argymhelliad y Rheolwr Trwyddedu. Roedd yr Aelodau o’r farn bod y gollfarn, yn bodloni meini prawf y polisi.

 

Fe ystyriodd yr Is-bwyllgor y ffaith fod 16 mlynedd wedi mynd heibio ers y troseddau ac nad oedd unrhyw dystiolaeth o unrhyw gollfarn neu fater perthnasol arall ers hynny. Ystyriwyd eglurhad yr ymgeisydd bod y digwyddiad yn un oedd yn hollol groes i’w gymeriad, ac wedi digwydd mewn cyfnod anodd ar ôl dychwelyd o fod yn gwasnaethu yn y lluoedd arfog. Derbyniwyd eglurhad yr ymgeisydd ei fod bellach yn gweithio fel warden safle i gwmni lleol ers saith mlynedd ac yn gorfod ymdrin â sefyllfaoedd o ymddygiad gwrth gymdeithasol fel rhan o’i ddyletswyddau dyddiol. Amlygodd ei fod yn hyderus y gallai ymdrin â’r mathau o sefyllfaoedd anodd allai godi wrth yrru tacsi.

 

Penderfynodd yr Is-bwyllgor o blaid caniatáu y cais a bod yr ymgeisydd yn berson addas a phriodol i ddal trwydded gyrrwr cerbyd hacni a hurio preifat.

 

Adroddodd y Cyfreithiwr y byddai’r penderfyniad yn cael ei gadarnhau yn ffurfiol drwy lythyr i’r ymgeisydd.