Agenda item

I nodi’r wybodaeth

Cyflwynwyd adroddiad gan y Rheolwr Buddsoddi yn diweddaru’r aelodau’n ffurfiol o waith Partneriaeth Pensiwn Cymru (PPC). Nodwyd bod yr adroddiad bellach yn un sy’n cael ei gyflwyno yn rheolaidd i’r Bwrdd ac yn elfen bwysig iawn o Gronfa Bensiwn Gwynedd sydd bellach gyda 85% o’r gronfa wedi’i bwlio.

Adroddwyd bod y Pennaeth Cyllid a’r Rheolwr Buddsoddi yn cynrychioli’r Gronfa yn holl gyfarfodydd y pwl, a bod y cydweithio yn parhau i fynd yn dda ar faterion megis ymateb ceisiadau rhyddid gwybodaeth, pleidleisio ac ymgysylltu ac yn gyffredinol rhannu ymarfer da ar draws y cronfeydd.

Tynnwyd sylw at y cronfeydd gan amlygu bod perfformiad y cronfeydd ar y cyfan wedi bod tu ôl i’r meincnod ers y dechrau a hyn yn benodol gan fod y meincnod a osodwyd yn heriol e.e. ar gyfer y Gronfa sustainable equity y meincnod yw MSCI All Country World Index, sydd yn cynnwys yr holl gwmnïau, ond bod cwmnïau y mae’r Gronfa yn gallu buddsoddi ynddi wedi eu cyfyngu. Eglurwyd bod Cronfa Global Growth wedi bod mewn bodolaeth ers dros 5 mlynedd ac wedi tan berfformio'r meincnod. O ganlyniad, adroddwyd mai amserol fyddai adolygu’r gronfa yma. Nodwyd bod Russell Investments yn edrych ar strwythur y gronfa yma ac yn newid y rheolwyr o fewn y portffolio - bydd swyddogion Gwynedd, ymgynghorwyr y Gronfa, Hymans Robertson a swyddogion PPC yn monitro’r cronfeydd yn fanwl yn y dyfodol. 

Yng nghyd-destun datblygiadau yn y maes eiddo, nodwyd bod proses caffael apwyntio rheolwyr buddsoddi eiddo wedi ei gwblhau. Tynnwyd sylw at ofynion sefydlu portffolio buddsoddi eiddo oedd yn cynnwys gofyn am ddatblygu rhaglen fuddsoddi sy'n defnyddio buddsoddiadau cronfeydd a buddsoddiadau uniongyrchol mewn strategaethau sydd yn gwneud gwahaniaeth yn y Deyrnas Unedig, gydag o leiaf 50% o asedau wedi'u lleoli yng Nghymru. Ategwyd y byddai Cronfa Bensiwn Gwynedd maes o law yn ystyried eu portffolio eiddo gan fanteisio yn llawn ar yr opsiynau yma.

Cyfeiriwyd at ddatblygiad diweddar iawn o adolygiad pensiynau ‘Galw am Dystiolaeth’ gyda’r Canghellor yn lansio adolygiad pensiynau nodedig i hybu buddsoddiad, cynyddu enillion cynilo a mynd i’r afael a gwastraff yn y system bensiynau. Bydd camau cychwynnol yr adolygiad yn gofyn i gronfeydd ystyried a ddylid lleihau'r nifer pwls sydd yn weithredol gydag ymateb Cronfa Bensiwn Gwynedd wedi ei gynnwys fel atodiad i’r adroddiad, oedd yn mynegi bod Gwynedd a Phartneriaeth Pensiwn Cymru yn bartneriaeth sydd yn gweithio yn dda, gyda manteision o gyd weithio o fewn Cymru e.e. yr iaith Gymraeg, Deddf Cenedlaethau’r Dyfodol, ynghyd a’r ffaith bod y bartneriaeth wedi sefydlu nifer o is gronfeydd sy’n diwallu anghenion y cronfeydd, a’u bod yn awyddus i wneud buddsoddiadau lleol  -  byddai ymyrryd â hyn yn arall gyfeirio’r arian yma i Brydain yn lle Cymru.

Derbyniwyd adborth gan Sioned Parry ac Osian Richards oedd wedi mynychu cyfarfod ymgysylltu yn ddiweddar gyda byrddau pensiwn eraill Cymru, oedd wedi ei drefnu gan Awdurdod Cynnal PPC (Cyngor Sir Caerfyrddin). Nododd Osian Richards ei fod wedi awgrymu y dylid penodi swyddog polisi i ddatblygu polisïau a chydweithio gyda swyddog y grŵp gweithredol yn hytrach na phenodi ymgynghorydd allanol. Ystyriwyd y byddai hyn yn gyfle da i Gymru ddangos llywodraethu da, yn atgyfnerthu sail i bŵl Cymru aros yn Gymru a bod PPC wedi paratoi ymlaen llaw i brofi gwerth cadw’r pwl yn Gymru.  

Diolchwyd am yr adroddiad

Sylwadau yn codi o’r drafodaeth ddilynol:

·        Da gweld bod buddsoddiadau yn y Gronfa yn parhau i gynyddu

·        Yn cytuno gyda sylwadau’r Cyngor a’r Bartneriaeth i’r adolygiad ‘Galw am Dystiolaeth’, yn enwedig sylw am yr Iaith Gymraeg

·        Mai cyflogau gohiriedig yw pensiynau ac nid arian llywodraeth - er bod cymhelliant i fuddsoddi rhaid sicrhau bod yr arian yn saff

·        Dylai Pensiwn Cymru aros yn Gymru i gael buddsoddi yn Gymru

·        Bod y cronfeydd o fewn y bartneriaeth yn parhau i gydweithio - pryder bod trafodaethau gwleidyddol yn codi o hyn yn hytrach na thrafodaethau ariannol.

Mewn ymateb i gwestiwn os oedd y Canghellor wedi ymgynghori gyda Llywodraeth Cymru nododd y Pennaeth Cyllid bod Llywodraeth Cymru wedi bod yn rhan o’r trafodaethau ond nad oedd yn ymwybodol o ymateb Llywodraeth Cymru i’r ymgynghoriad. Ategodd bod yr ymgynghoriad yn agored i unrhyw un gyflwyno sylwadau - nid oedd cyfyngiad arno.

PENDERFYNWYD nodi’r wybodaeth