Agenda item

Newid defnydd y llawr gwaelod o Dafarn i Lety Gwyliau ar Osod

 

AELOD LLEOL: Cynghorydd Dafydd Meurig

 

Dolen i'r dogfennau cefndir perthnasol

 

PENDERFNWYD: Gwrthod

Nid yw’r Awdurdod Cynllunio Lleol wedi ei argyhoeddi bod y dystiolaeth a gyflwynwyd gyda’r cais yn ddigonol i gadarnhau nad oes posibl parhau gyda defnydd cymunedol o’r adeilad hwn. Mae’r cais felly’n groes i Bolisi ISA 2 Cynllun Datblygu Lleol ar y Cyd Gwynedd a Môn 2011-2026 fel y mae’n ymwneud ag amddiffyn cyfleusterau cymunedol

 

Newid defnydd y llawr gwaelod o Dafarn i Lety Gwyliau ar osod

a)     Amlygodd y Rheolwr Cynllunio mai cais ydoedd ar gyfer trosi llawr gwaelod tŷ tafarn wag yn ddwy uned wyliau hunangynhaliol. Cyflwynwyd y cais i bwyllgor am benderfyniad ar gais yr aelod lleol a hefyd oherwydd diddordeb cyhoeddus yn y cais. Eglurwyd bod hwn yn drydydd cyflwyniad o gynllun cyffelyb ac fe wrthodwyd y ceisiadau eraill oherwydd diffyg gwybodaeth yn cyfiawnhau colled o adnodd gymunedol. Amlygwyd, mai’r prif wahaniaeth gyda’r cais yma oedd bod Adroddiad Hyfywedd wedi ei gynnwys gyda’r cais.

 

Wrth ystyried egwyddor y datblygiad, tynnwyd sylw at Polisi ISA 2 a’r meini prawf perthnasol. Amlygwyd yn yr adroddiad nad oedd cyfleuster tebyg o fewn pellter cyfleus i’r pentref heb ddefnyddio cerbyd modur i’w gyrraedd.

 

Nodwyd bod yr Adroddiad Hyfywedd yn trafod cynigion gan grŵp cymunedol i gynnal busnes yn y dafarn gan ddod i’r casgliad na fyddai menter o’r fath yn hyfyw yn yr achos hwn. Er hynny, ni ymddengys i’r casgliadau hynny gael eu selio ar unrhyw ddadansoddiad manwl o gynnig busnes penodol ac roedd y grŵp cymunedol yn parhau o’r farn bod eu cynigion i redeg busnes o’r safle yn hyfyw ac ymarferol. Ategwyd bod yr Adroddiad Hyfywedd yn ddibynnol yn bennaf ar farn yr arbenigwr ac nad oedd tystiolaeth ariannol gadarn ar y ffurf briodol wedi ei gyflwyno i gefnogi’r cais.

 

Ymddengys bod y polisi hefyd yn gofyn bod tystiolaeth o ymdrechion gwirioneddol i farchnata’r cyfleuster. Cyfeiriwyd at e-bost oedd wedi ei gyflwyno yn datgan ymdrech i farchnata'r eiddo am dros 12 mis ond nad oedd tystiolaeth fanwl wedi ei gyflwyno i gefnogi’r datganiad yma. Yn ogystal, ymddengys mai ymdrech i farchnata'r eiddo ar gyfer rhentu oedd wedi digwydd yn hytrach nag ymdrech i werthu'r eiddo yn ei gyfanrwydd fel busnes. Derbyniwyd copi o hysbyseb marchnata, ond nid oedd gwybodaeth i ddangos pryd cafodd yr eiddo ei hysbysebu, hyd y cyfnod hysbysebu a beth oedd yr ymateb a fu i’r hysbyseb hwnnw – nid oes hysbyseb ar gyfer yr eiddo ar wefan y cwmni mwyach. Wrth asesu'r wybodaeth a gyflwynwyd gyda'r cais, ni ystyriwyd bod tystiolaeth ddigonol wedi ei gyflwyno ynghylch sefyllfa ariannol y busnes nac i ddangos bod y dafarn wedi cael ei hysbysebu mewn modd priodol am gyfnod parhaus o 12 mis o leiaf yn unol â gofynion y CCA a pholisi ISA 2

 

Yng nghyd-destun darparu llety gwyliau hunanwasanaeth eglurwyd nad oedd tystiolaeth o ormodedd yn yr ardal ac felly’r bwriad yn cwrdd gyda’r maen prawf perthnasol o fewn polisi TWR 2. Er hynny, amlygwyd bod polisi TWR 2 yn anelu at amddiffyn cymeriad preswyl ardal ac wrth ystyried y buasai’r datblygiad hwn yn golygu colli adnodd cymunedol pwysig a chreu cyfleuster preifat cwbl wahanol ei naws yn ei le, byddai’n anorfod y bydd niwed i gymeriad preswyl yr ardal yn deillio o’r datblygiad hwn.

 

Adroddwyd bod y cynllun busnes a gyflwynwyd gyda’r cais yn cyfeirio at fusnes yn cynnwys tair uned wyliau, gyda llawr cyntaf yr adeilad yn cael ei drosi’n uned gwyliau ar osod ar gyfer hyd at 12 o bobl. Nodwyd nad oedd hyn yn rhan o’r cais dan sylw ac felly nid oedd modd rhoi ystyriaeth i’r ddogfen honno fel rhan o’r cais gan ei fod yn ddatblygiad gwahanol i’r un dan sylw. Petai bwriad i ddefnyddio'r llawr i fyny'r grisiau fel llety preswyl parhaol yn ei rinwedd ei hun, yna byddai angen caniatâd cynllunio.

 

Er bod yr asiant wedi cadarnhau bod bwriad diwygio’r cais ym mis Mai eleni, ni dderbyniwyd unrhyw wybodaeth bellach wedi hynny. O ganlyniad, amlygwyd bod y cais wedi cael ei asesu ar sail y wybodaeth oedd ger bron ac felly roedd y Swyddogion yn argymell i’r Pwyllgor wrthod y cais gan nad oeddynt wedi eu hargyhoeddi bod y dystiolaeth a gyflwynwyd yn ddigonol i gadarnhau nad oedd posib parhau gyda defnydd cymunedol yr adeilad.

 

b)     Yn manteisio ar yr hawl i siarad, nododd gwrthwynebydd i’r cais y sylwadau canlynol:

·       Bod y dafarn, yn y gorffennol ymysg y gorau yn yr ardal

·       Drysau’r dafarn wedi cau yn 2019 - ni chafodd y gymuned gyfle i ‘achub y dafarn’

·       Yn dilyn cyfnod covid a rheolau yn llacio gwelwyd colled mewn cyfleuster cymunedol

·       Bod Pwyllgor Parchu Pentir yn cynnal nifer o weithgareddau – yn bwyllgor prysur

·       Yr Eglwys ar hyn o bryd yw’r unig adeilad cyhoeddus yn y pentref

·       Bod Pentir yn safle canolog, yn safle da fel hwb i’r gymdeithas ehangach

·       Bod cau drysau’r dafarn wedi bod yn dolc i’r gymuned – byddai AirB&B yn ergyd farwol

·       Bod y gymuned yn ffynnu  - byddai modd i’r gymuned wneud i’r dafarn weithio

·       Bod pwysigrwydd mewn cynnal cymunedau

 

c)     Yn manteisio ar yr hawl i siarad, nododd yr Aelod Lleol y sylwadau canlynol:

·       Bod teimladau cryf yn lleol am newid defnydd i’r dafarn

·       Nad oedd diweddariad o’r bwriad wedi ei dderbyn ers mis Mai

·       Nad oedd ystyriaeth ddigonol wedi ei roi i golli cyfleuster cymunedol

·       Bod yr Adroddiad Hyfywedd yn amlygu barn un person o Wakefield

·       Dim manylion wedi ei cyflwyno ynglŷn a pham nad oedd y dafarn yn hyfyw – dim manylion ariannol wedi eu cyflwyno nac enghreifftiau o dafarndai yn cael eu rhedeg gan gymunedau

·       Dim ystyriaeth i ddyfodol adeiladau sydd yn cael eu rhedeg gan y Gymuned - enghreifftiau da yng Ngwynedd o lwyddiannau

·       Dim tystiolaeth wedi ei gyflwyno yn dangos yn eglur sut a phryd bu i’r cyfleuster gael ei farchnata na beth oedd yr ymateb i’r ymdrechion hynny

·       Yn gofyn i’r Pwyllgor wrthod y cais yn unol a’r argymhelliad

 

ch)    Cynigiwyd ac eiliwyd gwrthod y cais yn unol â’r argymhelliad. Angen gweld y dafarn yn ail agor ei drysau.

 

         PENDERFYNWYD Gwrthod

 

         Rheswm: Nid yw’r Awdurdod Cynllunio Lleol wedi ei argyhoeddi bod y dystiolaeth a gyflwynwyd gyda’r cais yn ddigonol i gadarnhau nad oes posibl parhau gyda defnydd cymunedol o’r adeilad hwn. Mae’r cais felly’n groes i Bolisi ISA 2 Cynllun Datblygu Lleol ar y Cyd Gwynedd a Môn 2011-2026 fel y mae’n ymwneud ag amddiffyn cyfleusterau cymunedol