Agenda item

Cais llawn i godi eiddo preswyl 3 ystafell wely deulawr (defnydd C3) ynghyd a chreu mynedfa gerbydol newydd

AEOD LLEOL: Cynghorydd Gruffydd Williams

Dolen i'r dogfennau cefndirol perthnasol

PENDERFYNIAD:

Gohirio er mwyn cynnal ymweliad safle

Cais llawn i godi eiddo preswyl 3 ystafell wely deulawr (defnydd C3) ynghyd a chreu mynedfa gerbydol newydd

a)    Amlygodd y Rheolwr Cynllunio mai cais llawn ydoedd ar gyfer codi eiddo preswyl deulawr o fewn rhan o ardd tŷ presennol ym mhentref Edern. Cyflwynwyd y cais i bwyllgor am benderfyniad ar gais yr aelod lleol.

Eglurwyd bod y safle wedi ei leoli oddi fewn i ffin ddatblygu Edern sydd yn bentref wedi ei adnabod fel Pentref Gwledig yn y CDLl ac fe ystyriwyd polisi TAI1wrth asesu’r  cais. Amlygywd mai lefel cyflenwad dangosol tai Edern yw 12 uned, gyda chyfanswm o 3 uned wedi eu cwblhau a 4 uned yn y banc tir ar hap. Ar sail y wybodaeth yma, byddai caniatáu datblygiad ar y raddfa yma yn gwbl dderbyniol ar sail lefel twf dangosol y Pentref a gan mai 1 tŷ a fwriedir, nid oedd y bwriad yn cyrraedd y trothwy o fod angen cyfraniad tŷ fforddiadwy.

Adroddwyd bod caniatâd cynllunio yn bodoli ar y safle hyd mis Ionawr eleni am yr un datblygiad a’r penderfyniad hwnnw wedi ei ystyried o dan y CDLl - yr un ystyriaethau polisi yn parhau. Ategwyd, gan nad oedd newid yn nhermau polisi nac yn ddaearol, byddai gwrthod y cais yn afresymol ac yn debygol o fod yn destun costau apêl pe byddai’r cais yn cael ei wrthod. Tynnwyd sylw fodd bynnag at hanes cynllunio hynach ble gwrthodwyd ceisiadau ar y sail byddai’r bwriad yn ychwanegu at y nifer o ail gartrefi, pryder am faint y safle a’r gallu i ddarparu mynediad, parcio a lle mwynderol ac nad oedd gwybodaeth i’r cyngor i’r gwrthwyneb. Amlygwyd, ar yr adeg yma, roedd y polisïau yn wahanol, y ceisiadau cynllunio yn rai amlinellol heb angen dangos gosodiad dangosol.

Yng nghyd-destun materion trafnidiaeth a mynediad, nodwyd bod modd darparu mynedfa i safon a digon o le troi a pharcio o fewn y cwrtil. Nid oedd gwrthwynebiad gan yr uned trafnidiaeth.

Nodwyd bod yr ymgeisydd wedi cadarnhau bod y bwriad yn un ar gyfer tŷ parhaol dosbarth C3 sy’n golygu bod modd rheoli’r defnydd drwy amod er mwyn sicrhau mai defnydd preswyl parhaol a wneir yma ac nid defnydd gwyliau na defnydd fel ail gartref. O safbwynt effaith gweledol, eglurwyd bod amrywiaeth i faint a dyluniad tai cyfagos oedd yn cynnwys tai traddodiadol a rhai mwy modern gydag amrywiaeth a chymysgedd o glystyrau o dai teras a thai deulawr ar wahân i’w gweld drwy’r pentref. Gyda’r bwriad wedi ei leoli gerllaw tai eraill, ni ystyriwyd y byddai’n amlwg yn y tirlun.

O ran deunyddiau adeiladu, ystyriwyd y byddai llechi, rendr, byrddau pren a charreg yn addas ar gyfer y lleoliad ac yn cyd-fynd a'r deunyddiau adeiladu lleol. O ran y balconi, cydnabuwyd fod nodweddion megis balconïau yn gyffredin ar dai eraill o fewn yr ardal ehangach oedd yn amrywio o ran maint ac ymddangosiadau, ac felly ni ystyriwyd byddai'r cynnig yma yn sylweddol wahanol os o gwbl i'r mathau o ddatblygiadau oedd eisoes wedi eu cymeradwyo’n lleol. Er bod peth pryder am effaith y tŷ ar gymdogion, ystyriwyd bod yr annedd wedi cael ei ddylunio’n ofalus er mwyn gwarchod mwynderau cymdogion ac nad oedd unrhyw sail i wrthod y cais ar sail effaith mwynderol, yn unol â pholisi PCYFF 2.

Roedd Swyddogion yr Awdudrod Cynllunio Lleol yn nodi nad oedd rheswm cynllunio dilys i wrthod y cais, ac felly’n argymell y Pwyllgor i ganiatáu’r cais a chynnwys amodau.

Yn manteisio ar yr hawl i siarad, nododd yr Aelod Lleol y sylwadau canlynol:

·       Ei fod yn siarad ar ran trigolion lleol Edern i wrthwynbeu’r cais ar sail gorddatblygiad – y bwriad yn rhy fawr, yn rhy amlwg a thu hwnt i bris pobl leol

·       Bod Glascoed, ers blynyddoedd bellach yn lety gwyliau

·       Bod mynediad i’r eiddo yn anaddas – Ffordd Lon Cae Glas yn ffordd ddi-ddosbarth, dim palmant, cul, mwdlyd, cloddiau uchel ac anniogel. Er bod cyfyngiad 20mya, un lôn sydd yma

·       Er bod yr Uned Drafnidiaeth wedi gwneud cais am gynllun manwl ar gyfer y pwynt mynediad arfaethedig, ni dderbyniwyd ymateb

·       Bod Cyngor Tref Nefyn yn gwrthwynebu’r cais ar sail gorddatblygiad

·       Byddai cael balconi yn creu effaith o or-edrych ar dai cyfochrog

·       Ceisiadau hanesyddol wedi eu gwrthod (12/68 a 11/95). Cais 2019 wedi ei gymeradwyo, ond dim adeiladu ar y safle wedi digwydd

·       Bod 15 amod i’r cais petai yn cael ei ganiatáu. Dim cadarnhad o ddefnydd C3 yn unig nac ymateb i addasu’r fynedfa

·       Yn annog y Pwyllgor i wrthod y cais neu ohirio a chynnal ymweliad safle

Cynigiwyd gwrthod y cais ar sail gorddatblygiad. Y bwriad yn cael ei wasgu i lain o dir cul ynghyd ag effeithiau goredrych ar fwynderau preswyl cymdogion.

Atgoffwyd yr Aelodau bod cynllunio ar yr union safle wedi ei ganiatáu 5 mlynedd yn ôl ac mai amser oedd wedi rhedeg allan cyn dechrau adeiladu.

Ni chafwyd eilydd i’r cynnig

Cynigiwyd ac eiliwyd gohirio y cais er mwyn cynnal ymweliad safle.

            PENDERFYNWYD:

            Gohirio er mwyn cynnal ymweliad safle