Agenda item

Alwen Williams (Prif Weithredwr Dros Dro y CBC) i gyflwyno’r adroddiad.  

Adolygu a cymeradwyo'r Safleoedd Treth a adnabuwyd (Porth Glannau Dyfrdwy, Warren Hall ac Stad Ddiwydiannol Wrecsam) ac Ardaloedd Ardrethi a Gedwir (Porth Glannau Dyfrdwy ac Stad Ddiwydiannol Wrecsam).

Adolygu a cymeradwyo'r Model Llywodraethu gyffredin arfaethedig.

Adolygu a cymeradwyo Themâu'r Parth Buddsoddi (Arloesi, Sgiliau a Thrafnidiaeth) a'r ymyriadau lefel uchel, a fydd yn cael eu mireinio fel rhan o Borth 4 (Ymyriadau) ac yn ystyried cynnwys 'Cymorth Busnes' fel y pedwerydd thema, sy’n ymdrin â'r bwriad i fuddsoddi'n uniongyrchol mewn busnesau gweithgynhyrchu uwch gyda chyngor a chyllid grant.

Cyflwynwyd yr adroddiad gan Alwen Williams, Prif Weithredwr Dros Dro'r CBC.

PENDERFYNWYD

Adolygu a chymeradwyo'r Safleoedd Treth a adnabuwyd (Porth Glannau Dyfrdwy, Warren Hall a Stad Ddiwydiannol Wrecsam) ac Ardaloedd Ardrethi a Gedwir (Porth Glannau Dyfrdwy a Stad Ddiwydiannol Wrecsam).

Adolygu a chymeradwyo'r Model Llywodraethu gyffredin arfaethedig.

Adolygu a chymeradwyo Themâu'r Parth Buddsoddi (Arloesi, Sgiliau a Thrafnidiaeth) a'r ymyriadau lefel uchel, a fydd yn cael eu mireinio fel rhan o Borth 4 (Ymyriadau) ac yn ystyried cynnwys 'Cymorth Busnes' fel y bedwaredd thema, sy’n ymdrin â'r bwriad i fuddsoddi'n uniongyrchol mewn busnesau gweithgynhyrchu uwch gyda chyngor a chyllid grant.

TRAFODAETH

Nodwyd bod yr adroddiad yn darparu’r wybodaeth ddiweddaraf am y cynnydd i sicrhau dynodiad Parth Buddsoddi newydd yn Sir y Fflint a Wrecsam fydd yn canolbwyntio ar Weithgynhyrchu Uwch.

Croesawyd Iain Taylor, Ymgynghorwr AMION Consulting i’r cyfarfod gan nodi bod Iain yn gweithio ar ddatblygu’r cynnig ar gyfer y parth buddsoddi. Ychwanegwyd bod gan Iain brofiad diweddar a perthnasol iawn o arwain rhanbarth dinas Lerpwl yn llwyddiannus i gyflawni eu parth buddsoddi sy’n seiliedig ar wyddorau bywyd a bod y cysylltiadau sydd gan Iain wedi bod yn amhrisiadwy i’r CBC i’w helpu i ddatblygu cynnig cadarn.

Ymhelaethodd yr Ymgynghorwr AMION Consulting ar y cynnydd da sy’n cael ei wneud ar ddatblygiad y cynnig a’u bod wedi dechau cadarnhau’r sail ar gyfer pam eu bod yn meddwl y gall yr ymyriadau hyn arwain at newid sylweddol yn nhwf y sector weithgynhyrchu. Credwyd y bydd hyn yn arwain at allu cyflogi tua 6,000 yn fwy o bobl erbyn diwedd y rhaglen.

Cyfeiriwyd at y Safleoedd Treth a adnabuwyd sef Porth Glannau Dyfrdwy, Warren Hall a Stad Ddiwydiannol Wrecsam gan gyfeirio at fuddion y safleoedd hyn a’r awydd i symud ymlaen efo’r safleoedd ar ôl derbyn cymeradwyaeth y Cyd-bwyllgor.

Amlinellwyd y Strwythur Llywodraeth arfaethedig fel sydd wedi ei nodi yn rhan 7.9 o’r adroddiad gan fanylu ar y bartneriaeth rhwng y Cyd-bwyllgor Corfforedig a’r ddau Gyngor sy’n hanfodol i’r strwythur yn ogystal â gwaith yr is-bwyllgor Lles Economaidd. Cyfeiriwyd at swyddogaethau'r Gweithgor Parth Buddsoddi Sir Fflint a Wrecsam yn ogystal â Bwrdd Cynghori Cysgodol y Parth Buddsoddi.

Manylwyd ar y Themâu Craidd fel sydd wedi eu nodi yn rhan 8.1 o’r adroddiad gan adrodd y bydd y Parth Buddsoddi yn clystyru buddsoddiad ar draws tair thema graidd sef Sgiliau, Arloesedd a Thrafnidiaeth. Cynigir datblygu pedwaredd thema sef Cymorth Busnes i ddarparu sylfaen thematig ar gyfer cyngor a chymorth grant i gyd-fuddsoddi mewn busnesau gweithgynhyrchu uwch yn Sir y Fflint a Wrecsam.

Diolchwyd i’r Ymgynghorwr AMION Consulting am y cyflwyniad ac i Brif Weithredwr dros dro’r CBC am yr adroddiad. Holwyd ynghylch rhan 10.3 o’r adroddiad, y Dyraniadau Ymyriadau, gan ofyn a yw’r ffigyrau a’r canrannau sydd wedi eu nodi yn y tabl yn gywir o ran y cydbwysedd ac os bydd hyblygrwydd yn y dyfodol petai cyfle arall yn amlygu ei hun. Cadarnhawyd bod y rhaglenni fwyaf effeithiol a cyraeddadwy wedi eu darganfod a bob blwyddyn bydd y Cyd-bwyllgor yn cymeradwyo Cynllun Cyflawni blynyddol. Nodwyd y bydd modd edrych ar gydbwysedd yr ymyriadau bryd hynny. Ychwanegwyd y bydd gan y Cyd-bwyllgor awdurdod i weithio drwy’r rhaglen ac o ganlyniad yr hyblygrwydd drwy gydol y rhaglen i sicrhau bod yr ymyriadau yn cael yr effaith fwyaf yn Sir y Fflint a Wrecsam.

Mynegwyd balchder o weld safle Warren Hall yn yr adroddiad ac ymfalchïwyd bod rhywbeth bellach yn cael ei wneud yma. Mynegwyd diolchiadau i’r Ymgynghorwr AMION Consulting am ei waith ac i Brif Weithredwr dros dro’r CBC am y cyd-weithio yn ogystal â’r ddau Awdurdod Lleol. Cydnabuwyd bod y gwaith yn symud yn ei falen yn gyflym.

Mynegwyd bod y rhanbarth wedi bod yn ffodus iawn i dderbyn yr arian hwn a chredwyd ei bod yn bwysig symud ar gyflymder. Amlygwyd y pwysigrwydd o osod seiliau a chael popeth yn ei le er mwyn symud ymlaen i gyflawni ar gyfer Sir Fflint a Wrecsam yn ogystal â gweddill Gogledd Cymru gan y bydd y rhanbarth i gyd yn ffynnu.