Agenda item

Alwen Williams (Cyfarwyddwr Portffolio a Phrif Weithredwr Dros Dro y CBC) a Geraint Owen (Cyfarwyddwr Corfforaethol, Cyngor Gwynedd) i gyflwyno’r adroddiad.

Derbyn y diweddariad cynnydd ar y gwaith i sefydlu CBC y Gogledd, gan gynnwys trosglwyddo'r Cynllun Twf a symud ymlaen ar dasgau sy'n ofynnol i gyflawni swyddogaethau statudol y CBC.

Cytuno i dderbyn adroddiad gan y Cyfarwyddwr Portffolio yng nghyfarfod nesaf y Cyd-bwyllgor Corfforedig yn rhoi diweddariad pellach ar gynnydd y trosglwyddo gan gyfeirio at y Cynllun Datblygu Strategol.

Awdurdodi'r Cyfarwyddwr Portffolio i gytuno ar raglen a dyddiad trosglwyddo ddiwygiedig gyda'r Awdurdodau Lleol a phartneriaid Addysg Uwch ac Addysg Bellach o fewn y dyddiad targed o 1 Ebrill, 2025.

Cymeradwyo estyniad o’r trefniant dros dro i Gyfarwyddwr Portffolio'r Bwrdd Uchelgais Economaidd ymgymryd â rôl Prif Weithredwr y Cyd-bwyllgor Corfforedig ar sail dros dro am ddau ddiwrnod yr wythnos hyd at 31 Mawrth, 2025 neu'r dyddiad trosglwyddo, yn dibynnu p'un fydd gyntaf.

Cyflwynwyd yr adroddiad gan Alwen Williams, Prif Weithredwr Dros Dro'r CBC a Dafydd Gibbard, Prif Weithredwr, Cyngor Gwynedd.

PENDERFYNWYD:

Derbyn y diweddariad cynnydd ar y gwaith i sefydlu CBC y Gogledd, gan gynnwys trosglwyddo'r Cynllun Twf a symud ymlaen ar dasgau sy'n ofynnol i gyflawni swyddogaethau statudol y CBC.

Cytuno i dderbyn adroddiad gan y Cyfarwyddwr Portffolio yng nghyfarfod nesaf y Cyd-bwyllgor Corfforedig yn rhoi diweddariad pellach ar gynnydd y trosglwyddo gan gyfeirio at y Cynllun Datblygu Strategol.

Awdurdodi'r Cyfarwyddwr Portffolio i gytuno ar raglen a dyddiad trosglwyddo ddiwygiedig gyda'r Awdurdodau Lleol a phartneriaid Addysg Uwch ac Addysg Bellach o fewn y dyddiad targed o 1 Ebrill, 2025.

Cymeradwyo estyniad o’r trefniant dros dro i Gyfarwyddwr Portffolio'r Bwrdd Uchelgais Economaidd ymgymryd â rôl Prif Weithredwr y Cyd-bwyllgor Corfforedig ar sail dros dro am ddau ddiwrnod yr wythnos hyd at 31 Mawrth, 2025 neu'r dyddiad trosglwyddo, yn dibynnu p'un fydd gyntaf.

TRAFODAETH

Darparwyd crynodeb o’r adroddiad oedd yn cyflwyno diweddariad pellach ar y cynnydd i sefydlu’r Cyd-bwyllgor Corfforedig ac yn ceisio cymeradwyaeth i ymestyn y trefniant i’r Cyfarwyddwr Portffolio ymgymryd â rôl y Prif weithredwr Dros Dro am ddau ddiwrnod yr wythnos tan 31 Mawrth 2025 neu’r dyddiad trosglwyddo.

Atgoffwyd y Cyd-bwyllgor o’r trefniadau presennol gan amlygu fod swyddogaethau a threfniadau’r Bwrdd Uchelgais wedi eu nodi yn GA2 sy’n cynnwys trefniadau llywodraethu a chefnogaeth ariannol i’r Cynllun Twf. Eglurwyd y bydd y Cynllun Twf a’r trefniadau ariannol yn trosglwyddo i’r Cyd-bywllgor Corfforedig a phwysleisiwyd y pwysigrwydd o gydweithio rhanbarthol er mwyn i bartneriaid gytuno ar drefniadau ar gyfer gweithredu swyddogaethau rhanbarthol fel rhan o sefydlu’r CBC. Cadarnhawyd y bydd model trosglwyddo benodol yn cael ei gytuno fel rhan o’r camau nesaf gyda phartneriaid.

Manylwyd ar y materion cyfreithiol allweddol sy’n cael eu datblygu er mwyn gweithredu’r trosglwyddiad fel y nodwyd yn rhan 3.3 o’r adroddiad a cyfeiriwyd at y meysydd ffocws allweddol.

Esboniwyd pam nad oedd y dyddiad targed dros dro o’r 1^af o Dachwedd a osodwyd ar gyfer trosglwyddo swyddogaethau o’r Bwrdd Uchelgais i Gyd-bwyllgor Corfforedig y Gogledd yn gyraeddadwy gan amlygu’r penderfyniadau allweddol sydd angen eu gwneud cyn trosglwyddo. Ymhelaethwyd ar y camau nesaf o ymdrin â threfniadau cyfreithiol, ariannol a llywodraethant i allu trosglwyddo yn llwyddiannus yn y dyfodol.

Cyfeiriwyd at ran 4.6 i 4.8 o’r adroddiad oedd yn crynhoi’r amserlen ddiwygiedig sydd yn cynnig trosglwyddo’r Cynllun Twf erbyn y 1^af o Ebrill, 2025 fan bellaf.

Diolchodd y Cadeirydd i Brif Weithredwr dros dro’r CBC am yr adroddiad cynhwysfawr a gofynnwyd a oes digon o adnoddau ar gael i gyflawni’r gofynion fel sydd wedi eu nodi yn yr adroddiad erbyn yr amserlen ddiwygiedig. Mewn ymateb nodwyd nad oedd yr holl adnoddau ar gael a bod bylchau yn bodoli, yn benodol yn ymwneud â rhai o’r dyletswyddau strategol; nodwyd nad oedd adnodd wedi ei adnabod ar gyfer symud y gwaith yn ei flaen. Cyfeiriwyd at yr adnoddau sydd wedi eu hadnabod hyd yma oedd yn cynnwys Rheolwr Rhaglen dros dro a Chyfreithiwr i roi cymorth cyfreithiol ychwanegol.

Ychwanegwyd bod y CBC wedi cymeradwyo model adnoddau yn flaenorol ond ni ellir recriwtio na chael yr adnoddau mewn lle nes bod y Cynllun Twf a’i bobl wedi trosglwyddo i’r CBC. Nodwyd bod cynllun pontio manwl a chlir wedi ei ddatblygu ar gyfer trosglwyddo’r Cynllun Twf ond bod pa mor gyflym y gall y cynllun hwnnw gael ei roi ar waith yn ddibynnol ar dderbyn y cymeradwyaethau a nodwyd yn yr adroddiad. Credwyd bod y dyddiad diwygiedig o’r 1^af o Ebrill 2025 yn fwy cyraeddadwy a bod amser digonol cyn hynny i gael popeth mewn lle i drosglwyddo.

Mynegwyd barn na ellir parhau i roi estyniad ar estyniad a gofynnwyd a oes angen ystyried prynu adnoddau ychwanegol er mwyn symud y cynlluniau yn eu blaen a chefnog Prif Weithredwr dros dro'r CBC i gwrdd â’r terfynau amser.  

Mewn ymateb, mynegwyd o ran y Cynllun Trafnidiaeth bod hynny eisoes wedi digwydd a bod cefnogaeth ymgynghorwyr ARUP wedi ei sicrhau ar gyfer datblygu’r Cynllun Trafnidiaeth rhanbarthol a bellach bod yr amserlen yn cael ei chwrdd. Nodwyd bod y cymorth sy’n cael ei dderbyn gan ARUP yn help i yrru’r momentwm yn ei flaen. Credwyd bod cyfle i wneud yr un peth ar gyfer y Cynllun Datblygu Strategol a bod hynny’n rhywbeth y bydd y CBC yn mynd allan i dendro arno. Ychwanegwyd ei bod yn angenrheidiol gweithio gyda rhywun sydd â chefndir cynllunio fydd yn gallu gyrru’r rhaglen yn ei blaen. Nodwyd y bydd asiantaethau neu ymgynghorwyr yn cael eu cysidro ond teimlwyd y byddai’n fuddiol gweithio efo cleientiaid mewnol yn y rhanbarth, er enghraifft pe bai capasiti o fewn Cynghorau’r Gogledd. Cadarnhawyd bod secondiadau yn cael eu hystyried a’u croesawu. Cynigiodd Prif Weithredwr dros dro’r CBC gyflwyno adroddiad yn y cyfarfod nesaf yn amlinellu’r uchod.

Pwysleisiwyd pwysigrwydd cwrdd â’r dyddiad trosglwyddo diwygiedig o Ebrill y 1^af gan gydnabod bod materion cymhleth sydd rhaid ymdrin â hwy. Cytunwyd i ofyn am adroddiad gan y Cyfarwyddwr Portffolio yng nghyfarfod nesaf y Cyd-bwyllgor Corfforedig yn rhoi diweddariad pellach ar gynnydd y trosglwyddo gan gyfeirio at y Cynllun Datblygu Strategol.

Gadawodd Brif Weithredwr Dros Dro'r CBC y cyfarfod a thrafodwyd y penderfyniad a geisir yn rhan 2.3 o’r adroddiad. Credwyd bod y cynnig yma yn un teg ac yn adnabod y ffordd ymlaen fwyaf pragmatig. Gwnaethpwyd sylw bod pryderon am yr oedi sydd wedi bod a phwysleisiwyd pwysigrwydd ymdrechu i gwrdd â’r terfynau amser sy’n bodoli. Gofynnwyd i bawb ymdrechu i gwrdd â’r terfyn amser newydd.

Awgrymwyd derbyn adroddiad cynnydd yn fisol er mwyn derbyn diweddariad o’r cynnydd ac i sicrhau fod y gwaith ar y trywydd iawn. Cytunwyd i ddirprwyo hynny i’r Cadeirydd. Nododd y Cadeirydd y bydd yn trafod efo Prif Weithredwr dros dro’r CBC er mwyn iddo dderbyn yr adroddiad cynnydd yna bydd yn ei rannu gyda gweddill y Cyd-bwyllgor.