Agenda item

Newid defnydd tir a datblygu llety gwyliau newydd ar ffurf a) 2 pod glampio parhaol a parcio cysylltiedig; b) 33 llain ar gyfer carafanau teithiol a parcio cysylltiedig; c) cyfleusterau lles yn cynnwys bloc toiledau, bloc cawod a storfa; a d) trefniadau mynediad cysylltiedig, cysylltiad llwybr cerdded i Ffordd Abererch, draenio a tirlunio.

 

AELOD LLEOL: Cynghorydd Elin Hywel

 

Dolen i'r dogfennau cefndir perthnasol

PENDERFYNIAD: Dirprwyo’r hawl i’r Uwch Reolwr Cynllunio i ganiatáu’r cais yn ddarostyngedig i’r amodau canlynol:

1.     Amser

2.     Yn unol â’r cynlluniau diwygiedig.

3.     Cyfyngu nifer o unedau teithiol i 33 carafán a 2 pod yn unig.

4.     Defnydd gwyliau yn unig a chadw cofrestr.

5.     Tymor gwyliau'r unedau teithiol - 1af Mawrth i 31 Hydref

6.     Dim storio carafanau teithiol ar y safle.

7.     Cwblhau’r cynllun tirweddu yn y tymor plannu cyntaf yn dilyn derbyn caniatâd.

8.     Rhaid cadw coed a gwrychoedd ar hyd terfynau’r safle.

9.     Cyfyngir unrhyw loriau caled i leiniau carafanau yn unig.

10.  Cytuno llwybr gwasanaethau trydan a dŵr

11.  Cyflwyno Cynllun Rheoli Eurinllyn Collddail

12.  Cwblhau gwelliannau Bioamrywiaeth yn unol â’r wybodaeth sydd wedi ei gyflwyno

13.  Amodau Priffyrdd

14.  Oriau gwaith adeiladu

15.  Enw Cymraeg

16.  Hysbysiadau dwyieithog

17.  Gwybodaeth hysbysu prif fynediad safle oddi ar y A499

18.  Gosod ffens o amgylch y safle

 

Nodiadau:

Nodyn Gwarchod y Cyhoedd

Nodiadau Priffyrdd

Nodyn llythyr CNC

Nodyn llythyr Dwr Cymru

Nodyn SUDS

Nodyn Trwyddedu

 

Newid defnydd tir a datblygu llety gwyliau newydd ar ffurf a) 2 pod glampio parhaol a pharcio cysylltiedig; b) 33 llain ar gyfer carafanau teithiol a pharcio cysylltiedig; c) cyfleusterau lles yn cynnwys bloc toiledau, bloc cawod a storfa; a d) trefniadau mynediad cysylltiedig, cysylltiad llwybr cerdded i Ffordd Abererch, draenio a thirlunio

a)    Amlygodd yr Arweinydd Tim Rheolaeth Datblygol bod y safle wedi ei leoli ar fryncyn yng nghefn gwlad agored ar gyrion Tref Pwllheli gyda thai preswyl wedi eu lleoli ar waelod y bryncyn;  y safle wedi ei leoli o fewn Ardal o Ddiddordeb Hanesyddol, ac ar gyrion Safle Bywyd Gwyllt a gwaelod y bryncyn wedi ei ddynodi yn ardal llifogydd C2/ Parth 2 a 3.

Yng nghyd-destun egwyddor y datblygiad, a’r bwriad yn cynnwys unedau teithiol a pharhaol, eglurwyd mai polisïau perthnasol oedd TWR 3 a TWR 5 a’u meini prawf yn canolbwyntio ar effaith weledol a mynediad derbyniol i’r safle. Adroddwyd bod Arfarniad Tirwedd a Gweledol wedi ei gyflwyno fel rhan o’r cais oedd yn cynnwys safbwyntiau o’r safle o’r ardal gyfagos ac o bellter. Ategwyd bod yr Arfarniad yn un o safon ac yn cadarnhau na fyddai’r datblygiad yn weladwy o’r rhan fwyaf o’r safbwyntiau, a thra byddai’r datblygiad yn weladwy o rai safbwyntiau uchel neu o bellter, dim ond rhan o’r safle a fyddai’n weladwy neu byddai yn weladwy mewn cyd-destun golygfa ehangach o Bwllheli hefyd. Nodwyd bod bwriad tirweddu’r safle ymhellach ac felly ystyriwyd na fydd y bwriad yn cael effaith weledol annerbyniol.

Yng nghyd-destun trafnidiaeth a mynediad, adroddwyd bod bwriad gwella mynediad presennol i mewn i’r safle a’i ddefnyddio fel prif fynediad ar gyfer y datblygiad. Ategwyd bod Datganiad Trafnidiaeth wedi ei gyflwyno gyda’r cais ac er y cydnabuwyd bod Lôn Nant Stigallt yn gyffredinol yn gul gyda rhai darnau serth, bod mynedfa'r safle ger y gyffordd gyda'r A499. Disgrifiwyd lled y lôn yn y fan yma yn fwy na'r cyfartaledd ar gyfer y ffordd, a’r Datganiad yn cadarnhau bod modd cyflawni traffig dwy ffordd ar gyfer y rhan yma. O ganlyniad, gyda’r bwriad i un ai darparu mannau pasio, neu gyflawni system unffordd ar hyd gweddill y ffordd roedd yr Uned Drafnidiaeth yn ystyried fod y defnydd o’r ffordd yn dderbyniol.

Yng nghyd-destun gosodiadau'r ddau pod parhaol sy’n cael ei gynnig, nodwyd nad oedd y safle wedi ei leoli o fewn yr AHNE nac Ardal Tirwedd Arbennig,  ac yn unol â’r Astudiaeth Sensitifrwydd a Chapasiti y Dirwedd roedd y nifer  unedau a gynigiwyd yn cael ei ddiffinio fel datblygiad bach iawn ac felly ni ellid ei ystyried fel gormodedd. Yng nghyd-destun yr unedau teithiol, eglurwyd bod posib sicrhau lleiniau caled, defnydd unedau teithiol yn unig a defnydd gwyliau drwy osod amodau cynllunio. Ystyriwyd bod yr adeilad cyfleusterau yn addas ac yn briodol ac yn parchu cyd-destun y safle a’i le yn y dirwedd.

Tynnwyd sylw at bryderon a gyflwynwyd ar yr effaith ar fwynderau trigolion cyfagos, ond ystyriwyd, ar sail y pellter a natur guddiedig y safle, ni fyddai’r bwriad yn cael effaith andwyol sylweddol ar unrhyw drigolion cyfagos. Nodwyd bod ystyriaeth wedi ei roi i bryderon ynglŷn â’r effaith ar wreiddiau coed gan amlygu bod rhai bellach wedi eu datrys gan gynlluniau a gyflwynwyd gan yr Uned Bioamrywiaeth fyddai’n golygu symud un o’r lleini teithiol, gwybodaeth bellach gan yr ymgeisydd ac amodau cynllunio. Ategwyd bod materion archeolegol, llifogydd ac ieithyddol wedi derbyn sylw a’r bwriad yn dderbyniol o ran y materion hynny.

Ystyriwyd fod y bwriad yn dderbyniol ac roedd y swyddogion yn argymell caniatáu’r cais gydag amodau perthnasol.

b)    Yn manteisio ar yr hawl i siarad, nododd yr ymgeisydd y sylwadau canlynol:

·       Mai ef oedd perchennog y safle. Wedi ymddeol o’r Heddlu ac yn gobeithio sefydlu menter newydd i gefnogi ei deulu

·       Bod y lleoliad wedi ei guddio gyda nodweddion tirweddol naturiol

·       Ei fod yn croesawu bod rhai o’r aelodau wedi ymweld â’r safle a’u bod o ganlyniad yn rhannu ei weledigaeth

·       Ei fod wedi derbyn cyngor cyn ymgeisio ac wedi cydweithio gyda’r swyddogion

·       Bod y cais yn cefnogi’r ymgais i leihau’r galw am ddefnydd Air B&B fel bod modd rhyddhau tai i bobl lleol

·       Nad oedd safleoedd teithiol yn yr ardal leol gyfagos

·       Bod bwriad ganddo reoli’r tir yn effeithiol – wedi cysylltu gyda CNC i drafod planhigion prin

·       Y byddai’n cyflogi busnesau lleol

·       Bod y cais a gyflwynwyd yn cydymffurfio a pholisïau lleol

 

c)     Yn manteisio ar yr hawl i siarad, nododd yr Aelod Lleol y sylwadau canlynol:

·       Bod y cais yn un cymhleth gyda theimladau cryf yn lleol

·       Pobl gyfagos i’r safle wedi cysylltu yn mynegi pryder am ddefnydd y lon gysylltiedig sydd yn gul a throellog, defnydd o’r lon wedi cynyddu yn sylweddol yn ddiweddar a cheg y lon yn beryg i garafanau teithiol

·       Pryder gan drigolion sydd yn byw ar waelod y clogwyn ynglŷn â diogelwch / symudedd ar y bryncyn. Profiadau o ddefaid yn syrthio; y datblygiad yn debygol o gario sŵn fydd yn tarfu

·       Bod yr ymgeisydd yn ddyn lleol sydd â bwriad creu datblygiad fydd yn cynnal ei deulu, gweithwyr lleol a busnesau lleol. Yn ystyried y busnes yn fusnes caredig sydd yn parchu nodweddion twristiaeth gynaliadwy ac yn parchu’r Gymraeg

·       Y safle yn un hardd - gwaith tirweddu wedi ei gwblhau i wneud y gorau o’r safle

 

d)    Mewn ymateb i’r sylwadau traffig, nododd y Rheolwr Cynllunio nad oedd y traffig presennol ar y lon yn cael eu hachosi gan fenter yr ymgeisydd. Ategodd bod cynlluniau gwelliannau i’r ffordd i’w gweithredu yn y dyfodol agos fydd yn cynnwys cynllun gyda chyfyngiadau unffordd neu osod llefydd pasio. Nododd bod modd gosod amod fyddai yn gofyn i’r ymgeisydd wrth hysbysebu’r safle, i annog defnyddwyr i ddefnyddio’r fynedfa o’r A499.

Yng nghyd-destun diogelwch y bryncyn, nodwyd na fyddai’n afresymol gosod amod i ffensio’r safle. Ategwyd bod yr Uned Bioamrywiaeth wedi awgrymu hyn i warchod y safle.

e)    Yn ystod y drafodaeth ddilynol, nodwyd y sylwadau canlynol gan yr aelodau:

·       Bod y safle yn guddiedig

·       Angen cefnogi pobl lleol sydd eisiau aros yn lleol

·       Os caniatáu, angen sicrwydd bydd y gwaith yn cael ei weithredu yn unol a’r gofynion

 

Mewn ymateb i sylw bod gwaith clirio’r safle wedi ei wneud cyn i’r cais gael ei ganiatáu, nododd y Rheolwr Cynllunio mai’r ymgeisydd oedd perchennog y safle a bod hawl, o dan reoliadau taliad fferm iddo weithredu gwaith clirio heb ganiatâd. Ategodd bod cwynion i’r gwaith clirio wedi eu hymchwilio.

 

f)      Cynigiwyd ac eiliwyd caniatáu y cais

PENDERFYNWYD: Dirprwyo’r hawl i’r Uwch Reolwr Cynllunio i ganiatáu’r cais yn ddarostyngedig i’r amodau canlynol:

1.     Amser

2.     Yn unol â’r cynlluniau diwygiedig.

3.     Cyfyngu nifer o unedau teithiol i 33 carafán a 2 pod yn unig.

4.     Defnydd gwyliau yn unig a chadw cofrestr.

5.     Tymor gwyliau'r unedau teithiol - 1af Mawrth i 31 Hydref

6.     Dim storio carafanau teithiol ar y safle.

7.     Cwblhau’r cynllun tirweddu yn y tymor plannu cyntaf yn dilyn derbyn caniatâd.

8.     Rhaid cadw coed a gwrychoedd ar hyd terfynau’r safle.

9.     Cyfyngir unrhyw loriau caled i leiniau carafanau yn unig.

10.  Cytuno llwybr gwasanaethau trydan a dŵr

11.  Cyflwyno Cynllun Rheoli Eurinllyn Collddail

12.  Cwblhau gwelliannau Bioamrywiaeth yn unol â’r wybodaeth sydd wedi ei gyflwyno

13.  Amodau Priffyrdd

14.  Oriau gwaith adeiladu

15.  Enw Cymraeg

16.  Hysbysiadau dwyieithog

17.  Gwybodaeth hysbysu prif fynediad safle oddi ar y A499

18.  Gosod ffens o amgylch y safle i sicrhau diogelwch defnyddwyr

 

Nodiadau:

Nodyn Gwarchod y Cyhoedd

Nodiadau Priffyrdd

Nodyn llythyr CNC

Nodyn llythyr Dwr Cymru

Nodyn SUDS

Nodyn Trwyddedu