Agenda item

I dderbyn a nodi’r wybodaeth

PENDERFYNIAD:

Derbyn a nodi’r wybodaeth

Amlygodd y Rheolwr Buddsoddi bod yr adroddiad bellach yn un rheolaidd sy’n nodi’r wybodaeth ddiweddaraf ar waith PPC. Tynnwyd sylw at drafodaethau cyfarfod Medi 2024 o’r Cydbwyllgor oedd yn cynnwys gwybodaeth am y cronfeydd sydd wedi eu pwlio (Gwynedd yr ail uchaf gyda 85%), y cynllun busnes safonol a’r gofrestr risg.

Cyfeiriwyd at ddiweddariad y Gweithredwr dros y cyfnod ac amodau’r farchnad maent yn monitro. Adroddwyd bod perfformiad y cronfeydd wedi bod yn amrywiol gyda’r cronfeydd ecwiti yn perfformio yn gryf tra bod cronfeydd incwm sefydlog wedi llusgo dros y chwarter dan sylw. Nodwyd mai buddsoddiadau tymor hir yw’r cronfeydd ac y bydd y swyddogion, ar y cyd gyda’r ymgynghorwyr Hymans Robertson, yn asesu’r perfformiadau dros gyfnodau o 3 mis, 12 mis a 3 blynedd.

Ategwyd bod Russell Investments, y Rheolwr buddsoddi hefyd yn asesu’r rheolwyr yn barhaus a byddant yn lleihau, cynyddu neu’n dileu taliadau i geisio gwella perfformiad hir dymor yr is- gronfeydd - cyfeiriwyd at enghraifft o waith sy’n cael ei wneud ar hyn o bryd gydag is gronfa Global Growth, sydd wedi bod yn tanwario yn hanesyddol. Adroddwyd bod Russell Investments wedi rhoi diweddariad ar gronfa newydd Credit Preifat gyda Chronfa Pensiwn Gwynedd wedi buddsoddi £29m yn y gronfa gyda bwriad o gynyddu’r swm yn sylweddol dros amser.

Tynnwyd sylw at ddau ymarfer caffael oedd wedi digwydd yn ddiweddar (ar gyfer Ymgynghorydd Goruchwylio a Darparwr Gwasanaeth Pleidleisio ac Ymgysylltu). Nodwyd bod cyfweliadau wedi eu cynnal gyda bwriad cyflwyno argymhelliad i’r cydbwyllgor nesaf.

Yng nghyd-destun yr ymgynghoriad ‘Galw am Dystiolaeth’ lle mae Llywodraeth San Steffan yn adolygu cynlluniau pensiwn yr LGPS, tynnwyd sylw at ymateb Cronfa Bensiwn Gwynedd. Adroddwyd bod y sefyllfa bellach wedi newid gydag ymgynghoriad pellach, yn dilyn araith “Mansion House” Canghellor y Trysorlys, wedi ei gyhoeddi yn galw am dystiolaeth sy’n awgrymu’n fras y trywydd mae Llywodraeth San Steffan yn disgwyl i’r LGPS ei ddilyn. Adroddwyd bod yr ymgynghoriad newydd yn edrych ar feysydd megis pwlio asedau, buddsoddi yn lleol ac yn y Deyrnas Unedig, a Llywodraethu gyda 30 cwestiwn i ymateb iddynt erbyn 16eg o Ionawr 2025.

Prif negeseuon yr ymgynghoriad oedd nad oedd newid i gronfeydd lleol, fel Cronfa Bensiwn Gwynedd, ond bod angen ystyried uno cronfeydd, er nad yn fandadol. Nodwyd y bydd newidiadau disgwyliedig i’r pwls, megis Partneriaeth Pensiwn Cymru yng nghyd-destun Gwynedd, gyda gofyn iddynt fod wedi cofrestru gyda’r FCA (Financial Conduct Authority), fod yn gallu rhoi cyngor i’r cronfeydd lleol, fod y dyraniad ased strategol yn eistedd gyda’r pŵl yn hytrach nac ar lefel lleol fel y mae ar hyn o bryd, bod 100% o asedau yn cael eu pwlio, ac adrodd yn barhaus yn yr Adroddiad Blynyddol ar gynlluniau lleol.

Ategwyd bod y gofyniad i fod wedi cofrestru gyda’r FCA yn un sylweddol fydd yn golygu newid yn strwythur presennol PPC gan greu strwythur rheolaethol newydd gyda phrif swyddog a phrif swyddog buddsoddi gofynion llywodraethu. Nodwyd y byddai angen cynllunio a gweithredu hyn erbyn Mawrth 2025. Yn ychwanegol, bydd gofynion llywodraethu newydd yn galw am benodi swyddog uwch i fod yn gyfrifol am y Gronfa gan sicrhau bod polisïau penodol mewn lle a phroses gadarn i fonitro hyn.

Yn sgil newidiadau sylweddol posib i’r pŵl, adroddwyd y bydd swyddogion Gwynedd yn cydweithio gyda’r awdurdod lletyol i ddarparu ymateb teg i’r ymgynghoriad; bydd unrhyw wybodaeth / ymateb yn cael ei rannu gyda'r Aelodau

Diolchwyd am yr adroddiad

Yn ystod y drafodaeth ddilynol, nodwyd y sylwadau canlynol gan Aelodau;

·       Dylai Cymru aros fel un pŵl - dyma beth fyddai cryfder pŵl Cymru. Petai Cymru yn gorfod ymuno gydag eraill - materion gwleidyddol yn deillio o hyn

Mewn ymateb, nodwyd bod yr ymgynghoriad yn awgrymu bod posibilrwydd i Gymru aros fel pŵl cyn belled a bod eglurhad / cynllun busnes cryf a hyfyw yn cael ei gyflwyno yn cefnogi hyn.

·       Bwriad Llywodraeth San Steffan yw’r pwlio. Angen cadw pŵl Cymru yn annibynnol - datblygiad y pŵl yng Nghymru wedi bod yn llyfn a naturiol ac wedi datblygu yn llwyddiannus ac ar y blaen i eraill. Os gorfod uno gydag eraill, posib colli rheolaeth a’r cyfleoedd buddsoddi yn lleol.

·       Cyfleoedd buddsoddi yn lleol - angen mwy o fanylion am y broses o gyflwyno prosiectau - awgrym rhannu gwybodaeth am y broses gyda Chynghorau  Conwy a Môn

·       Awgrym cynnal sesiwn wyneb yn wyneb fel bod modd i’r aelodau gael cyfle i rannu syniadau / ystyried posibiliadau / trefniadau buddsoddiadau lleol, i’w rhoi ymlaen yn y cynllun busnes. Bydd rhaid cael cynllun strategol, manwl

·       Bwrdd Pensiwn yn pryderu am y sefyllfa pwlio - pŵl Cymru yn un bach - efallai bydd hyn yn wendid ac y byddai risg o ddisgyn i gategori ‘lleiaf’

·       Angen pwysleisio bod pŵl Cymru yn gwasanaethu aelodau drwy’r Gymraeg - risg o golli hyn os bydd rhaid ymuno ag eraill - angen pwysleisio hyn yn yr ymateb

·       Bod Cadeirydd y Pwyllgor yn rhannu pryderon y Pwyllgor gyda’r Cydbwyllgor

Mewn ymateb i gwestiwn ynglŷn â chronfeydd yn yr Alban a Gogledd Iwerddon ac os fel Cymru mewn sefyllfa o orfod cyflwyno achos busnes, nodwyd bod y gwledydd hyn gyda rheoliadau gwahanol ac nad oeddynt wedi datganoli yn yr un modd a Chymru.

PENDERFYNWYD

Derbyn a nodi’r wybodaeth