Agenda item

Derbyniwyd y Cynllun Llesiant fel cynllun ar gyfer cefnogi a hybu llesiant staff tros y blynyddoedd nesaf. 

Cyflwynwyd yr adroddiad gan Cyng. Llio Elenid Owen.

PENDERFYNIAD

Derbyniwyd y Cynllun Llesiant fel cynllun ar gyfer cefnogi a hybu llesiant staff tros y blynyddoedd nesaf. 

TRAFODAETH

Atgoffwyd bod Cynllun Llesiant Staff yn weithredol a'i fod wedi derbyn Gwobr Lefel Aur gan Lywodraeth Cymru nifer o weithiau am Safon Iechyd Corfforaethol. Er hyn, eglurwyd bod cyfnod Covid wedi arwain at nifer o newidiadau i lesiant staff ac mae anghenion yn dra gwahanol erbyn hyn, i’r disgwyliadau cyn y pandemig. Eglurwyd ei fod yn amserol i adolygu’r Cynllun yn llawn er mwyn sicrhau ei fod yn gyfredol ac yn addas i bwrpas i’r dyfodol.

Adroddwyd bod y Cynllun Llesiant yn ymdrin â nifer o ddyletswyddau megis y ddyletswydd foesol i warchod iechyd a llesiant staff. Manylwyd bod y Cynllun hefyd yn cyfarch dyletswyddau cyfreithiol i warchod diogelwch, iechyd a llesiant staff. Eglurwyd hefyd bod dyletswyddau ariannol o fewn y Cynllun Llesiant er mwyn sicrhau bod y staff yn iach a bodlon. Cadarnhawyd bod costau absenoldebau salwch dros y flwyddyn ddiwethaf yn £5.7m.

Cadarnhawyd bod ‘Gweithlu Iach a Bodlon’ yn ffrwd gwaith o fewn Cynllun Ffordd Gwynedd gan ei fod yn ddull o ddenu gweithwyr newydd, cadw gweithwyr presennol, gostwng cyfraddau absenoldeb salwch a gwella perfformiad a datblygiad staff y Cyngor. Ymfalchïwyd bod rhan gyfan o’r Holiadur Llais Staff wedi manylu ar lesiant staff eleni ac mae’r canlyniadau wedi cael eu bwydo mewn i’r cynllun.

Eglurwyd bod tri sylfaen i’r Cynllun newydd sef ‘Arwain a Rheoli’, ‘Cefnogaeth gynaliadwy’ ac ‘Yr Amgylchedd Waith’. Eglurwyd bod sylfaen ‘Arwain a Rheoli’ yn ymgymryd â datblygu Arweinyddion a Rheolwyr i gefnogi llesiant staff yn well gan roi pwyslais ar rôl greiddiol y Rheolwyr i gefnogi llesiant. Ymhelaethwyd bod y sylfaen ‘Cefnogaeth Gynaliadwy’ yn sicrhau bod trefniadau mewn lle megis cynigion cwnsela, ffisiotherapi, gwiriadau iechyd a chefnogaeth Uned Iechyd Galwedigaethol yn parhau er mwyn cynnig cefnogaeth llesiant meddyliol, corfforol, cymdeithasol ac ariannol. Tynnwyd sylw bod sylfaen ‘Yr Amgylchedd Waith’ yn ffocysu ar weithleoedd yn y Cyngor er mwyn sicrhau bod yr adeiladau yn hybu llesiant tra hefyd yn cefnogi timoedd os oes patrymau absenoldebau yn codi.

Cadarnhawyd bod y Cynllun Llesiant wedi dilyn proses ymgynghori cyn ei gyflwyno i’r Cabinet gan ei fod wedi derbyn mewnbwn gan y Tîm Rheoli Corfforaethol, Fforwm Iechyd Diogelwch a Llesiant, Panel Iechyd Diogelwch a Llesiant, y Rhwydwaith Rheolwyr a staff y Cyngor drwy’r Holiadur Llais Staff.

Sylwadau’n codi o’r drafodaeth:

·       Gofynnwyd a yw’r costau absenoldebau salwch yn uchel o’i gymharu gydag Awdurdodau eraill.

o   Mewn ymateb i’r cwestiwn, cadarnhaodd Pennaeth Adran Gwasanaethau Corfforaethol nad yw pob Awdurdod Lleol yn adrodd ar y niferoedd hyn. Fodd bynnag, cadarnhawyd mai costau Cyngor Gwynedd yw’r lleiaf ond un o ystyried ffigyrau’r 13 Awdurdod Lleol sy’n datgelu’r wybodaeth.

·       Cefnogwyd y Cynllun gan ei fod yn arwain at waith Ataliol pwysig iawn. Pwysleisiwyd bod hyrwyddo gweithgareddau a’r gefnogaeth sydd ar gael yn holl bwysig i iechyd a llesiant staff. Ychwanegwyd ei fod yn bwysig derbyn adborth gan staff am y cynigion hyn gan ddiolch i’r Adran am ei gynnwys o fewn yr Holiadur Llais Staff.

·       Ystyriwyd sylfaen ‘Arwain a Rheoli’ yn un pwysig iawn ac ymfalchïwyd ei fod yn rhan allweddol o’r Cynllun yn dilyn yr adolygiad. Gofynnwyd a fydd mesuriad yn cael ei wneud o’r newid agwedd a llwyddiant y sylfaen hwn gan ei fod yn sylfaen newydd i’r Cynllun.

o   Eglurwyd bod y Cynllun Llesiant bellach yn rhan o Gynllun Ffordd Gwynedd a chadarnhawyd bod proses arfarnu yn cael ei weithredu fel rhan o system fonitro’r Cynllun hwnnw. Cadarnhawyd y golyga hyn bod gofyniad i bob adran arfarnu eu datblygiad gyda’r sylfaen hwn yn rheolaidd.

·       Gofynnwyd a oes modd adnabod Adrannau neu Wasanaethau penodol sydd yn profi mwy o absenoldebau staff nag eraill.

o   Mewn ymateb i’r cwestiwn, cadarnhaodd Pennaeth Adran Gwasanaethau Corfforaethol bod modd canfod y data yma. Ymhelaethwyd bod polisi rheoli ac adrodd ar absenoldebau wedi cael ei fabwysiadu eleni  gan ddefnyddio’r system hunanwasanaeth er mwyn cefnogi’r Adrannau. Cadarnhawyd bod hyn wedi arwain at ddarlun cyflawn o heriau absenoldebau staff. Pwysleisiwyd bod gwaith pellach yn mynd rhagddo er mwyn canfod ymyraethau a datrysiadau pellach i unrhyw wasanaethau sydd yn profi heriau absenoldebau uchel.

Diolchwyd i’r Pennaeth Adran a’r Pennaeth Cynorthwyol am eu gwaith o arwain datblygiad y Cynllun Llesiant. Diolchwyd hefyd i’r Cynghorydd Menna Trenholme am ei chefnogaeth i’r Adran dros y blynyddoedd diwethaf.