Agenda item

Newid defnydd a trosi adeilad yn 9 uned byw

AELODAU LLEOL: Cynghorydd Dylan Fernley a’r Cynghorydd Nigel Pickavance

Dolen i'r dogfennau cefndir perthnasol

PENDERFYNIAD: Caniatáu’r cais yn ddarostyngedig i’r amodau canlynol :-

1.         5 mlynedd

2.         Unol a’r cynlluniau.

3.         Amod Cyfoeth Naturiol Cymru parthed llifogydd – cau’r mynediad llawr daear isaf.

4.         Manylion unrhyw awyrdyllau a ffliwiau i’w gytuno o flaen llaw

5.         Amodau Dwr Cymru sy’n ymwneud a diogelu’r carthffosydd.

6.         Cytuno manylion enwau Cymraeg ar gyfer y datblygiad ynghyd ac arwyddion sy'n hysbysu ac yn hyrwyddo 'r datblygiad

7.         Cyfyngu’r defnydd i anheddau o fewn dosbarth defnydd C3.

a)     Amlygodd y Rheolwr Cynllunio mai cais llawn ydoedd ar gyfer newid defnydd cyn ysgol yn naw uned breswyl hunangynhaliol fyddai’n cynnwys dwy uned fforddiadwy. Nodwyd nad oedd bwriad gwneud unrhyw waith addasu allanol - yr adeilad yn adeilad 4-llawr trawiadol  o fewn cwrtil annibynnol sydd hefyd yn adeilad rhestredig gradd II. Eglurwyd bod y safle wedi ei leoli o fewn y ffin datblygu, yng nghanol dinas Bangor ac o fewn ardal cadwraeth.

O safbwynt egwyddor y datblygiad, nodwyd bod polisi TAI 9 yn caniatáu isrannu eiddo presennol i fflatiau hunangynhaliol. Ystyriwyd fod y bwriad yn cwrdd gyda meini prawf y polisi gan nad oedd angen newid allanol i’r adeilad. O ganlyniad, nid oedd pryder o safbwynt effaith ar osodiad yr adeilad rhestredig na’r ardal cadwraeth, ac ystyriwyd na fyddai yn debygol o gael effaith andwyol ar fwynderau o ystyried ei leoliad yng nghanol y ddinas. Nodwyd bod y safle yn eistedd o fewn cwrtil eu hun, gyda digonedd o le parcio; y safle’n hygyrch ac yn agos i drafnidiaeth gyhoeddus.

O ystyried ffigyrau tai Bangor, adroddwyd bod y ddarpariaeth ddisgwyliedig yn cael ei gyfarch trwy’r safleoedd yn y banc tir, ond bod yr angen yn parhau am ragor o dai yn yr haen prif ganolfannau. Ystyriwyd bod y bwriad yn dderbyniol o safbwynt angen a nodwyd bod bwriad gosod amod i sicrhau defnydd C3 prif gartref yn unig a rhwystro defnydd ail gartref neu llety gwyliau tymor byr. Byddai darparu dwy uned fforddiadwy yn cwrdd gyda pholisi tai 15, a gellid sicrhau hynny drwy osod amod cynllunio priodol.

Derbyniwyd Datganiad Iaith Gymraeg gyda’r Uned Iaith yn amlygu nad oedd y datganiad yn dod i gasgliad pendant o’r risg / effaith ieithyddol y datblygiad. Er hynny, ni dderbyniwyd unrhyw dystiolaeth yn dangos y byddai’r datblygiad yn debygol o fod yn niweidiol i’r iaith, ac o ystyried bod y bwriad yn cynnwys dwy uned fforddiadwy, ni ystyriwyd ei fod yn gwbl groes i bolisi PS1. Ategwyd bod modd gosod amod i sicrhau enw Cymraeg i’r datblygiad i gwrdd yn llawn gyda pholisi PS1.

Yng nghyd-destun bioamrywiaeth, nodwyd bod datganiad seilwaith gwyrdd yn cynnig mesurau i wella bioamrywiaeth wedi ei gyflwyno gyda’r cais ac os byddai’r caniatâd yn cynnwys amodau sydd yn sicrhau cydymffurfiaeth gyda’r wybodaeth ecolegol yna byddai hyn yn lleihau pryderon.

Yng nghyd-destun materion llifogydd a draenio, tynnwyd sylw at y trafodaethau gyda Cyfoeth Naturiol Cymru (CNC) a hynny oherwydd diffyg gwybodaeth am y perygl o lifogydd ar y safle. Eglurwyd bod y safle wedi ei leoli o fewn Parth A, sy’n gysylltiedig gyda’r NCT presennol, sy’n golygu nad yw defnydd preswyl yn y lleoliad yma yn groes i bolisi. Er hynny, amlygwyd bod Map Llifogydd ar gyfer Cynllunio, sydd yn cynnwys gwybodaeth mwy diweddar, yn nodi bod y safle yn rhannol o fewn Parth Llifogydd 2/3 Afonydd, sef yn yr achos yma, ardal y maes parcio sydd i gefn yr adeilad. Ategwyd bod Map Llifogydd ar gyfer Cynllunio yn ystyriaeth faterol ac felly oherwydd y risg, ystyriwyd bod cyfiawnhad dros ofyn am asesiad canlyniadau llifogydd. Derbyniwyd asesiad gyda’r cais ac roedd yn dangos bod modd rheoli’r risgiau yn effeithiol. O ganlyniad, nid oedd gan CNC wrthwynebiad i’r cais.

Wedi ystyried yr holl faterion cynllunio perthnasol gan gynnwys bod y bwriad yn un fyddai’n gallu gwarchod a sicrhau dyfodol i adeilad rhestredig trawiadol o fewn canol Dinas Bangor, ystyriwyd bod y bwriad yn dderbyniol. Roedd y swyddogion yn argymhell caniatáu y cais gydag amodau.

b)    Cynigiwyd ac eiliwyd caniatáu y cais

c)    Mewn ymateb i gwestiwn ynglŷn a nifer caniatadau dros y blynyddoedd ar gyfer trosi adeiladau yn ardal Bangor i ddefnydd aml-denantiaeth ac os oedd y rhestr niferoedd yn aros am gartref yn cynyddu neu yn gostwng, nodwyd mai cais oedd yma am naw tŷ parhaol fyddai gydag amod defnydd C3 yn unig. Ni fydd ar gael fel unedau aml-denantiaeth -  byddai’r amod yn sicrhau uned parhaol.

Mewn ymateb i gwestiwn ynglŷn â’r nifer cyfeiriadau at lifogydd yn yr adroddiad, nodwyd bod trafodaethau wedi eu cynnal gyda CNC oherwydd gwybodaeth anghyson rhwng mapiau sydd yn gysylltiedig gyda’r NCT a mapiau llifogydd newydd. Ategwyd er bod y mapiau newydd yn amlygu risg yn y maes parcio, bod CNC yn hapus gyda’r mesurau lliniaru sydd wedi eu cyflwyno.

PENDERFYNWYD: Caniatáu’r cais yn ddarostyngedig i’r amodau canlynol :

1.         5 mlynedd

2.         Unol a’r cynlluniau.

3.         Amod Cyfoeth Naturiol Cymru parthed llifogydd – cau’r mynediad llawr daear isaf.

4.         Manylion unrhyw awyrdyllau a ffliwiau i’w gytuno o flaen llaw

5.         Amodau Dwr Cymru sy’n ymwneud a diogelu’r carthffosydd.

6.         Cytuno manylion enwau Cymraeg ar gyfer y datblygiad ynghyd ac arwyddion sy'n hysbysu ac yn hyrwyddo 'r datblygiad

7.         Cyfyngu’r defnydd i anheddau o fewn dosbarth defnydd C3.