Agenda item

Cais ôl weithredol i ail adeiladu bwthyn gyda estyniadau deulawr ochr ac estyniad unllawr cefn

 

Aelod Lleol: Cynghorydd Angela Russell

 

Dolen i'r dogfennau cefndir perthnasol

PENDERFYNIAD: GWRTHOD yn groes i’r argymhelliad

Rhesymau:

·       Gor ddatblygiad

·       Effaith niweidiol ar y tirwedd / AHNE yn groes i polisi TAI 13.

 

Cais ôl weithredol i ail adeiladu bwthyn gyda estyniadau deulawr ochr ac estyniad unllawr cefn

 

a)     Amlygodd Arweinydd Tîm Rheolaeth Datblygu bod y  cais yn un ar gyfer dymchwel tŷ presennol a chodi tŷ newydd yn ei le. Eglurwyd bod y safle wedi ei leoli ar gyrion pentref Llanbedrog a thu allan i unrhyw ffin ddatblygu ac wedi ei amgylchu gan goedlan sefydledig eang gyda’r tir yn codi mewn uchder i gefn ag ochr yr eiddo. Ategwyd bod y safle a’r ardal ehangach oddi mewn dynodiadau AHNE ynghyd a Thirlun o Ddiddordeb Hanesyddol Eithriadol.

 

Nodwyd nad oedd y bwriad yn golygu cynnydd yn y nifer o ystafelloedd gwely a bod gwybodaeth a gyflwynwyd gyda’r cais yn cadarnhau mai bwthyn gwyliau yw defnydd presennol a bwriedig yr eiddo. O ganlyniad, nid oedd unrhyw newid yn y defnydd. Mynegwyd bod caniatâd cynllunio wedi ei roi yn 2021 ar gyfer ymestyn yr eiddo gwreiddiol, ond y cais presennol yn ganlyniad o’r bwriad hynny yn dilyn darganfod nad oedd y bwthyn gwreiddiol yn addas ar gyfer ei ymestyn.

 

Tynnwyd sylw at Polisi TAI 13 sy’n ymwneud yn benodol ag ail-adeiladu tai, a’r meini prawf perthnasol. Nodwyd fod Adroddiad Strwythurol o’r bwthyn gwreiddiol wedi ei gyflwyno gan beiriannydd cymwysedig yn cyfiawnhau’r gwaith dymchwel oedd ei angen oherwydd diffygion sylweddol. Yn ogystal, ystyriwyd bod graddfa’r bwriad yn debyg i’r hyn oedd wedi ei ganiatáu yn flaenorol fel estyniadau i’r bwthyn gwreiddiol.

 

Yng nghyd-destun mwynderau gweledol, nid yw’r safle yn gwbl weladwy o fannau cyhoeddus ac ystyriwyd fod y bwriad yn dderbyniol o ran ei ddyluniad a gorffeniad. Ni ystyriwyd y byddai yn cael effaith andwyol ar y tirlun ehangach gan gynnwys yr AHNE na’r Dirwedd o Ddiddordeb Hanesyddol Eithriadol chwaith. Saif ymhell o unrhyw eiddo arall ac ni fyddai’n cael effaith andwyol ar unrhyw drigolion cyfagos. Ni ystyriwyd y byddai’n cael unrhyw effaith ar ddiogelwch ffyrdd, gan fod lle digonol i droi a pharcio ar y safle.

 

Yng nghyd-destun materion bioamrywiaeth, nodwyd bod y bwriad yn cynnwys gwelliannau derbyniol fydd yn cael eu sicrhau drwy amod cynllunio.

 

Yng nghyd-destun materion ieithyddol, nid yw’r bwriad yn golygu unrhyw newid defnydd ac nid oes cynnydd yn y nifer ystafelloedd gwely. O ganlyniad, ni ystyriwyd y byddai’n cael unrhyw effaith ar yr Iaith Gymraeg.

 

Wedi ystyried yr holl faterion cynllunio perthnasol, ni ystyriwyd fod y bwriad yn dderbyniol ac roedd y swyddogion yn argymell caniatáu’r cais gydag amodau

 

b)     Yn manteisio ar yr hawl i siarad, nododd asiant yr ymgeisydd y sylwadau canlynol:

·        Bod caniatâd cynllunio wedi ei ganiatáu yn 2021 gyda gwaith adeiladu wedi dechrau'r Haf canlynol

·        Yn dilyn glaw trwm, sylweddolwyd bod y sylfeini yn ddiffygiol ac ansefydlog oedd wedi arwain at waith ychwanegol

·        Addaswyd y cynlluniau fel bod modd gwella mynediad a symud lleoliad y gegin i geisio mwy o olau

·        Bod rhan ganolig wreiddiol  tŷ wedi ei gadw a’r gwaith carreg wreiddiol wedi ei ddadorchuddio

·        Bod y system draenio wedi ei adnewyddu – system wedi ei moderneiddio

·        Bod y drws ffrynt wedi ei adfer

·        Bod y tŷ wedi ei adnewyddu ar gyfer cenedlaethau’r dyfodol

 

c)     Yn manteisio ar yr hawl i gyflwyno sylwadau, nododd yr Aelod Lleol y sylwadau canlynol:

·        Bod ceisiadau ôl weithredol ar gynnydd yn ei ward ers tro byd gyda nifer helaeth o'r trigolion yn cysylltu yn gofyn iddi ymyrryd; yn amlygu pryder oherwydd diffyg parch tuag at bolisïau cynllunio lleol .

·        Y gred yw ‘fod un rheol i bobl leol i fyw mewn tai 94 medr sgwâr a rheol arall i berchnogion tai haf ac unedau gwyliau’! Ymddengys fod hawliau ganddynt i ddymchwel ac ymestyn maint ei heiddo

·        Bod y cais yn enghraifft glasurol o ymestyn a dymchwel ac ail adeiladu yn fwy na'r hyn sydd yn dderbyniol.

·        Bod y cais oddi fewn i ffin yr AHNE a Tirlun o Ddiddordeb Hanesyddol Eithriadol Llyn ac Enlli - yr adroddiad yn fwriadol dewis peidio atgoffa Aelodau fod "Ddyletswydd Statudol i warchod y tiroedd dynodedig yma"

·        Cyngor Cymuned yn nodi ... "Mae'r adeilad newydd yn sylweddol fwy na'r adeilad gwreiddiol ", ond eto fyth dywed y swyddog "dim ond yn fymryn mwy" heb ychwanegu faint yn fwy yn llorweddol mewn medrau sgwâr ychwanegol .

·        Dywed y Cyngor Cymuned fod y gwaith peirianyddol wedi cael cryn effaith ar fioamrywiaeth a hynny yn groes i bolisïau. e.e., dywed yr adran bioamrywiaeth fod yna bosib fod y gwaith wedi niweidio clwydfannau ystlumod a chynefinoedd ystlumod.

·        Byddai costau gwella, trwsio ac addasu er mwyn cyrraedd gofynion y perchnogion, a safonau cyffredinol yn "debygol o fod yn sylweddol a gwaharddol " - peryg eto o beidio  cael adroddiad sydd heb ei gomisiynu gan yr ymgeisydd. Dylid cael adroddiad strwythurol di duedd gan drydydd parti - digon hawdd yw rhoi adroddiad o'r fath gerbron ar ôl i'r tŷ gael ei ddymchwel ac yna rhoi cais ôl weithredol gerbron

·        Adeiladu o fewn ôl troed - yn gwbl amlwg i’r rhai sydd yn gyfarwydd hefo'r lleoliad, fod y tŷ newydd yn sylweddol fwy na’r bwthyn gwreiddiol. Bod hanes o un estyniad ar ôl y llall cyn i'r cais ôl weithredol ddod gerbron y Pwyllgor Cynllunio. Y swyddog yn datgan "fod yna newidiadau helaeth wedi eu cynnal i'r adeilad dros y blynyddoedd"

·        Bod trigolion Llanbedrog yn erfyn ar y Pwyllgor i wrthod y cais - gôr ddatblygiad o'r safle a'r effaith niweidiol ar yr AHNE a Tirlun o Ddiddordeb Hanesyddol Eithriadol Llyn ac Enlli.

 

    ch)   Cynigiwyd ac eiliwyd gwrthod y cais

           

            Rhesymau: Bod y bwriad yn or ddatblygiad ac y byddai’n cael effaith niweidiol ar yr AHNE

 

d)   Yn ystod y drafodaeth ddilynol, nodwyd y sylwadau canlynol gan yr Aelodau:

·        Bod sawl estyniad yma – heb gadw at y sylfaen / ôl troed gwreiddiol

·        Bod yr eiddo bellach yn sylweddol wahanol i’r bwthyn gwreiddiol

·        Bod diffyg parch i broses gynllunio Cyngor Gwynedd - dylai pensaer, os oes angen addasu cynlluniau, wybod bod angen rhoi gwybod i’r adran cynllunio.

·        Cais ôl-weithredol arall – angen rheolaeth o’r sefyllfa – yn datblygu yn beth ffasiynol

·        Angen pwysleisio bod angen caniatâd cynllunio. Oes diffygion yn y system?

·        Bod y tŷ newydd o faint sylweddol – yn llawer mwy na’r gwreiddiol – adeiladau ôl troed yw’r gofyn.

·        Pryder gosod cynsail o ddymchwel tai bach ac adeiladu tai mawr yn eu lle

·        Maint tai tair llofft i bobl leol yn 94m2!

·        Byddai’n creu effaith niweidiol ar yr AHNE – coed wedi eu torri

 

Mewn ymateb i gwestiwn bod y tŷ gwreiddiol yn dŷ haf sydd bellach wedi ei ddymchwel ac os yw’r bwriad bellach yn gynllun tŷ o’r newydd, a fyddai angen ail ystyried defnydd newydd y tŷ, nodwyd bod Polisi 13 (Dymchwel ac Ail godi sy’n cyfeirio at ddefnydd tŷ), yn nodi os yw’r defnydd gwyliau yn bodoli yn barod nid oes felly angen ystyried newid y defnydd. Petai amod yn cael ei osod yn cyfyngu’r defnydd gwyliau, byddai’r hawl i godi tŷ yn cael ei golli.

 

Mewn ymateb i sylw am ôl troed y tŷ newydd, nodwyd bod y bwthyn gwreiddiol  yn mesur 148m2 gyda chaniatáu addasu yn mesur 184m2: Adeiladwyd 201m2 sydd yn ei gyfanrwydd oddeutu 50m2 o arwynebedd yn fwy na’r gwreiddiol.

 

Mewn ymateb i gwestiwn mai ail gartref sydd yma ac nid bwthyn gwyliau ac os byddai hawl newid y defnydd, nodwyd bod hawl i’w newid os byddai angen, ond byddai hyn yn golygu colled o dŷ lleol.

 

PENDERFYNWYD: GWRTHOD yn groes i’r argymhelliad

 

Rhesymau:

·        Gorddatblygiad

·        Effaith niweidiol ar y dirwedd / AHNE yn groes i bolisi TAI 13.