Agenda item

Dewi Morgan (Pennaeth Cyllid yr Awdurdod Lletya ac Swyddog Cyllid Statudol) a Sian Pugh (Pennaeth Cyllid Cynorthwyol yr Awdurdod Lletya) i gyflwyno’r Adroddiad.

1. Nodi a derbyn adolygiad refeniw diwedd Rhagfyr 2024 y Bwrdd Uchelgais.
2. Nodi a derbyn diweddariad cronfeydd wrth gefn y Bwrdd Uchelgais.
3. Cytuno ar broffil gwariant cyfalaf diwygiedig y Bwrdd Uchelgais.

Cyflwynwyd yr adroddiad gan Bennaeth Cyllid a Phennaeth Cyllid Cynorthwyol yr Awdurdod Lletya.

PENDERFYNWYD

1.     Nodi a derbyn adolygiad refeniw diwedd Rhagfyr 2024 y Bwrdd Uchelgais.

2.     Nodi a derbyn diweddariad cronfeydd wrth gefn y Bwrdd Uchelgais.

3.     Cytuno ar broffil gwariant cyfalaf diwygiedig y Bwrdd Uchelgais.

RHESYMAU DROS Y PENDERFYNIAD

Nodi tanwariant a ragwelir o £205,405 yn erbyn y gyllideb refeniw yn 2024/25. Bydd y tanwariant terfynol ar ddiwedd y flwyddyn ariannol yn cael ei defnyddio i leihau’r swm a hawlir o’r Grant Cynllun Twf Gogledd Cymru.

Nodi llithriad pellach ar y rhaglen gyfalaf, gydag amcangyfrif o wariant o £12.51m yn 2024/25 o’i gymharu â chyllideb gymeradwy o £24.67m ar gyfer y flwyddyn.

TRAFODAETH

Amcanwyd bydd tanwariant o £205,000 erbyn diwedd y flwyddyn ariannol gyfredol.

Manylwyd ar y meysydd ble mae’r tanwariant hynny yn deillio ohono gan egluro yr amcanwyd tanwariant o £43,000 yng nghyllideb y Swyddfa Rheoli Portffolio gan gadarnhau mai’r prif reswm am hyn yw bod gwir chwyddiant cyflogau oddeutu 3% o’i gymharu â 6% a amcanwyd yn gynharach yn y flwyddyn ariannol. Ymhelaethwyd bod estyniad yng nghyllideb y Gronfa Ffyniant Gyffredin hyd Mawrth 2025 wedi galluogi defnyddio tanwariant ar y gyllideb ‘Cynlluniau’ er mwyn ariannu costau tri swyddog yn hytrach na gwneud defnydd o’r gyllideb graidd. Tynnwyd sylw bod estyniad hyd at Fawrth 2025 hefyd wedi cael ei dderbyn ar y prosiect Ynni Ardal Leol a bydd y gorwariant perthnasol yn cael ei ariannu gan yr arian grant.

Eglurwyd hefyd y rhagwelwyd tanwariant o £17,000 yng nghyllideb ‘Gwasanaethau Cefnogol’ yn ogystal â rhagdybio tanwariant o £34,500 yn y gyllideb ‘Cyd-bwyllgor’.

Adroddwyd bod gorwariant net o £181,000 i’w weld yng nghyllideb ‘Prosiectau’ gydag oddeutu £136,000 ohono yn orwariant ar gostau cefnogaeth gyfreithiol allanol a oedd yn allweddol ar gyfer nifer o brosiectau’r rhaglen gyfalaf. Ymhelaethwyd bod cyllideb ‘Datblygu Achosion Busnes y prosiectau o fewn y gyllideb hon yn gorwario £86,000. Cadarnhawyd bod cyfraniad o £152,000 gan y gyllideb ‘Prosiectau’ wedi ariannu cyfran o brosiect Ynni Lleol Blaengar.

Cadarnhawyd bod prif ffrydiau incwm ar gyfer y flwyddyn ariannol hon yn cynnwys cyfraniadau partneriaid, dyraniad refeniw Grant Cynllun Twf Gogledd Cymru, grant Ynni Llywodraeth Cymru, secondiad staff Cyd-bwyllgor Corfforedig Gogledd Cymru, y Gronfa Ffyniant Gyffredin yn ogystal â’r gronfa ‘Prosiectau’ a'r gronfa wrth gefn.

Eglurwyd bydd y gwarged o £205,000 a ragwelir yn y gyllideb ar gyfer y flwyddyn ariannol hon yn cael ei ddefnyddio er mwyn lleihau cyfraniad o’r Grant Cynllun Twf sydd ei angen ar gyfer y flwyddyn hon. Cadarnhawyd bydd y cyfraniad hwn yn cael ei drosglwyddo i gyllideb 2025/26.

Mynegwyd balchder yr amcanwyd bydd cyfanswm o bron i £211,000 yn y gronfa wrth gefn cyffredinol ar ddiwedd y flwyddyn ariannol hon. Ymhelaethwyd nad oes arian yn y gronfa ‘Prosiectau’ ac amcanwyd bydd £7.2miliwn yn y gronfa llog erbyn diwedd y flwyddyn ariannol.

Tywyswyd yr aelodau drwy ddiweddariad ar sefyllfa’r rhaglen gyfalaf gan nodi bod gostyngiad net o £12.16miliwn yn y gwariant disgwyliedig ar gyfer y flwyddyn ariannol hon. Pwysleisiwyd bod hyn yn deillio o lithriad ar brosiectau Ynni Lleol Blaengar, Porth Caergybi a chyn Ysbyty Gogledd Cymru yn ogystal â’r penderfyniad i dynnu prosiect Canolfan Treuliad Anaerobig Glannau Dyfrdwy yn ei ôl. Eglurwyd bod ffigyrau hyd at flwyddyn ariannol 2030/31 i’w gweld yn yr adroddiad ar gyfer y prosiectau Canolfan Treuliad Anaerobig Glannau Dyfrdwy ac Ynni Carbon Isel ar hyn o bryd er mwyn sicrhau bod arian yn cael eu clustnodi i brosiectau newydd yn y dyfodol, gan nad oes modd cadarnhau beth fyddai’r prosiectau hynny ar hyn o bryd, gan sicrhau bydd y wybodaeth hon yn cael ei adolygu yn y dyfodol i nodi pa brosiectau sydd yn derbyn yr arian a glustnodwyd yma. Tynnwyd sylw bod y gwariant ar Ganolfan Biotechnoleg Amgylcheddol a'r Rhwydwaith Talent Twristiaeth yn cyd-fynd gyda’r proffil cyfalaf diweddaraf.

Amlygwyd bod cynnydd yng nghostau cyfreithiol i’w weld yn ystod y flwyddyn ariannol hon gan ystyried os yw’r ffioedd hyn yn debygol o barhau i gynyddu’n raddol yn y dyfodol. Mewn ymateb i’r sylwadau, cadarnhaodd y Swyddog Monitro bod nifer o ffactorau wedi cyfrannu at y cynnydd hwn mewn ffioedd cyfreithiol eleni gan gynnwys ffioedd cwmni cyfreithiol allanol ar faterion arbenigol ynghlwm â’r prosiectau ac i ariannu cyflogau cyfreithwyr dros dro. Cadarnhawyd y gobeithir i’r ffioedd hyn leihau dros y misoedd nesaf wrth i wasanaeth cyfreithiol yr Awdurdod Lletya gynnal proses recriwtio ar gyfer y rolau perthnasol. Cydnabuwyd ei fod yn bosib bydd ffioedd cyfreithiol yn parhau i gynyddu i'r dyfodol wrth i’r angen godi i gefnogi niferoedd uwch o achosion busnes prosiectau fel maent yn cael eu cymeradwyo.