Agenda item

Derbyniwyd a nodwyd y wybodaeth yn yr adroddiad.

Cyflwynwyd yr adroddiad gan Cyng. June Jones

PENDERFYNIAD

Derbyniwyd a nodwyd y wybodaeth yn yr adroddiad.

TRAFODAETH

Cyflwynwyd yr adroddiad gan nodi y bydd yn amlinellu’r hyn sydd wedi ei gyflawni o fewn yr Adran fel rhan o flaenoriaethau Cynllun Cyngor Gwynedd 2023-28 ac yn rhoi diweddariad ar y sefyllfa ariannol a’r cynlluniau arbedion. Adroddwyd bod cynnydd sylweddol wedi ei wneud gyda phrosiectau Cynllun y Cyngor ac er bod yr Adran yn parhau i wynebu heriau mynegwyd hyder fod gan yr Adran gynlluniau addas i gyfarch y sefyllfa hyd eithaf ei gallu.

Rhedwyd drwy’r tabl yn Atodiad 1 sy’n rhoi diweddariad ar gynnydd tri phrosiect blaenoriaeth yr Adran yng Nghynllun y Cyngor sef Cymunedau Glas a Thaclus, Gweithredu ar Risgiau Llifogydd ac Ymestyn cyfleoedd chwarae a chymdeithasu ar gyfer plant a phobl ifanc y Sir. Darparwyd trosolwg o’r prosiectau gan nodi beth sydd ar y gweill a’r diweddariad hyd at fis Mawrth 2025.

Tywyswyd Aelodau’r Cabinet trwy weddill yr adroddiad oedd yn manylu ar berfformiad gwasanaethau’r Adran. I gloi tynnwyd sylw at sefyllfa ariannol yr Adran gan nodi y rhagwelir gorwariant o tua £700,000 eleni sy’n gyfuniad o ffactorau megis lleihad mewn incwm a phwysau ychwanegol ar gyllidebau glanhau strydoedd a glanhau toiledau cyhoeddus.

Ychwanegwyd bod teimlad gwych o fewn yr Adran ble mae’r staff yn frwdfrydig ac yn cymryd gwir ddiddordeb yn eu gwaith. Diolchwyd i staff yr Adran am eu hymroddiad.

Mynegodd y Pennaeth Adran Priffyrdd, Peirianneg ac YGC ei ddiolch i’r Aelod Cabinet am fynd o amgylch holl wasanaethau’r Adran er mwyn cyflwyno ei hun a dysgu am waith yr Adran. Ychwanegwyd bod yr Adran yn wynebu heriau ariannol sylweddol ond yn gwneud eu gorau i leihau’r gorwariant ac efo cynlluniau arbedion ac yn hyderus y bydd gwerth £278,500 o arbedion yn cael eu cyflawni flwyddyn yma.

Sylwadau’n codi o’r drafodaeth:

•           Cydnabuwyd gwaith da’r Adran a diolchwyd am hynny.

•           Ynglŷn â gorfodaeth stryd a’r graff yn yr adroddiad, gofynnwyd sut mae’r Cyngor yn cymharu â Chynghorau eraill a gofynnwyd pam bod gwahaniaeth sylweddol yn ffigurau’r Haf o gymharu â ffigyrau’r Gaeaf.

-           Mewn ymateb esboniwyd bod y tîm dan bwysau o ran lefelau staff. Esboniwyd bod y graff ar dudalen 102 yn benodol ar faw cŵn a dim ysbwriel. Ymhelaethwyd ei bod yn anodd cosbi am droseddau baw cŵn am ei bod yn anodd dal y person ar y pryd. Tynnwyd sylw at y gwelliant sylweddol sydd wedi bod hyd yma eleni.

-           Nodwyd nad yw’r wybodaeth ar gael ar hyn o bryd er mwyn gwneud cymhariaeth efo awdurdodau eraill ond gall y Pennaeth Adran ddarganfod y wybodaeth yno.

•           Tynnwyd sylw at y diffyg buddsoddiad mewn caeau chwarae dros y blynyddoedd. Dymunwyd codi ymwybyddiaeth bod grwpiau cymunedol yn gallu ymgeisio am grantiau i wella caeau chwarae.

-           Atgoffwyd bod 131 o gaea chwarae ar draws y Sir a cydnabuwyd bod angen gwella cyfleusterau ar gyfer defnydd cadair olwyn yn y caeau chwarae. Nodwyd bod y gwasanaeth yn ail edrych ar y strategaeth ond fod arian yn brin ar gyfer y ddarpariaeth yma. Ategwyd bod y gwasanaeth yn hapus i drafod efo Cynghorau Cymuned a bod bwriad i gysylltu efo Cynghorau Cymuned yn y dyfodol wrth symud y gwaith yn ei flaen.

•           Mynegwyd diolchiadau i dîm tacluso Ardal Ni, yn benodol tîm David Charles Williams am eu gwaith.

•           Gofynnwyd a oes bwriad i ymestyn y cynllun ‘person a chart’ ymhellach i ardaloedd Dwyfor a Meirionnydd.

-           Cadarnhawyd bod y cynllun ar waith ym Mangor a Chaernarfon ar hyn o bryd a bod bwriad i’w ymestyn i ardal Dwyfor (Pwllheli a Porthmadog) yn fuan. Nodwyd bod trefniadau tebyg mewn rhai ardaloedd ym Meirionydd e.e. glanhawr tref hanesyddol efo oriau traddodiadol o gychwyn yn fuan yn y bore. Cadarnhawyd bod trafodaethau ar y gweill i newid yr oriau fel bod yr oriau yn oriau mwy gweledol.

•           Mewn ymateb i gwestiwn am heriau ariannol Cyfoeth Naturiol Cymru ag os yw hyn wedi effeithio ar y cyd-weithio efo’r Adran, cadarnhawyd nad oes effaith wedi ei weld hyd yma ar unrhyw brosiect ar y cyd nac dim i awgrymu unrhyw effaith ar gynlluniau yn symud yn eu blaen.