Agenda item

I ystyried cais Mr A

 

(copi arwahan i aelodau’r Is Bwyllgor yn unig)

 

PENDERFYNIAD

 

Bod yr ymgeisydd yn berson addas a phriodol ar gyfer trwydded gyrrwr cerbyd hacni / hurio preifat gyda Chyngor Gwynedd

 

Croesawodd y Cadeirydd bawb i’r cyfarfod. Amlygodd y byddai'r penderfyniad yn cael ei wneud yn unol â Pholisi Trwyddedu Cyngor Gwynedd. Nodwyd mai pwrpas y polisi oedd gosod canllawiau ar y meini prawf wrth ystyried cais yr ymgeisydd gyda’r nod o ddiogelu’r cyhoedd drwy sicrhau:

 

•           Bod yr unigolyn yn unigolyn addas a phriodol

•           Nad yw'r unigolyn yn fygythiad i'r cyhoedd

•           Bod y cyhoedd wedi'u diogelu rhag pobl anonest

•           Bod plant a phobl ifanc wedi'u diogelu

•           Bod pobl ddiamddiffyn wedi'u diogelu

•           Bod y cyhoedd yn gallu bod yn hyderus wrth ddefnyddio cerbydau trwyddedig

 

Cyflwynodd y Rheolwr Trwyddedu adroddiad ysgrifenedig ar gais a dderbyniwyd gan Mr A i adnewyddu trwydded gyrru cerbyd hacni/hurio preifat. Gofynnwyd i’r Is-bwyllgor ystyried y cais yn unol â’r hyn sydd yn gysylltiedig ag addasrwydd unigolyn i fod yn yrrwr cerbyd hacni/hurio preifat

 

Roedd yr Awdurdod Trwyddedu yn argymell i’r Is-bwyllgor gymeradwyo’r cais.

 

Gwahoddwyd yr ymgeisydd i ymhelaethu ar y cais gan roi gwybodaeth am gefndir y pwyntiau cosb a’i amgylchiadau personol. Nododd fod ganddo drwydded gyrrwr cerbyd hacni / hurio preifat ers 2008 a phan fu iddo dderbyn y drwydded cafodd gyngor i adrodd ar unrhwy achosion o yfed a gyrru a/ neu ymddygiad troseddol i’r Uned Trwyddedu, ond dim sôn am adrodd ar bwyntiau gyrru. Ategodd mai diweddar oedd y pwyntiau a hynny oherwydd newidiadau mewn cyfyngiadau cyflymder yn yr ardaloedd roedd yn teithio gyda’i waith. Derbyniodd ddifrfioldeb y sefyllfa, petai yn colli ei drwydded y byddai yn colli ei waith.

 

PENDERFYNWYD bod yr ymgeisydd yn berson addas a phriodol ar gyfer trwydded gyrrwr cerbyd hacni/hurio preifat gyda Chyngor Gwynedd.

 

Wrth gyrraedd eu penderfyniad, roedd yr Is-bwyllgor wedi ystyried y canlynol:

·        Gofynion ‘Polisi Trwyddedu ar gyfer Hurio Preifat a Cherbydau Hacni Cyngor Gwynedd’

·        Canllawiau Addasrwydd Unigolyn

·        Adroddiad yr Adran Drwyddedu

·        Ffurflen gais yr ymgeisydd

·        Datganiad DBS

·        Adroddiad Asiantaeth Trwyddedu Gyrwyr a Cherbydau

·        Sylwadau llafar gan yr ymgeisydd ynghyd a thystiolaeth a gwybodaeth ysgrifenedig

 

Rhoddwyd ystyriaeth benodol i’r materion canlynol

 

Cefndir

 

Yn mis Rhagfyr 2022 derbyniodd yr ymgeisydd 3 pwynt cosb am dorri cyfyngiad cyflymder statudol ar ffordd gyhoeddus.

 

Dau ddiwrnod yn ddiweddarach, yn yr un lleoliad, derbyniodd yr ymgeisydd 3 pwynt cosb am dorri cyfyngiad cyflymder statudol ar ffordd gyhoeddus.

 

Yn mis Hydref 2024 derbyniodd yr ymgeisydd 3 pwynt cosb am dorri cyfyngiad cyflymder statudol ar ffordd gyhoeddus.

 

CYMALAU PERTHNASOL Y POLISI

 

Ystyriwyd paragraff 2.2 o Bolisi’r Cyngor lle nodi’r nad oes rheidrwydd i berson sydd â chollfarn am drosedd ddifrifol gael ei wahardd rhag cael trwydded, ond bydd disgwyl iddo fod yn rhydd rhag unrhyw gollfarnau am gyfnod priodol fel y nodir yn y Polisi, a dangos tystiolaeth ei fod yn unigolyn addas a phriodol i ddal trwydded. Mae cyfrifoldeb ar yr ymgeisydd i brofi ei fod yn berson addas a phriodol. Mae paragraff 2.4 yn nodi pan fydd ymgeisydd wedi'i gael yn euog o drosedd(au) neu fod mater arall/materion eraill i'w (h)ystyried yng nghyswllt hynny, ni chaiff y Cyngor adolygu rhinweddau'r gollfarn honno na'r mater arall hwnnw.

 

Ystyriwyd paragraff 4.5 sydd yn nodi bod Gorchymyn Deddf Ailsefydlu Troseddwyr 1974 (Eithriadau) (Diwygio) 2002 yn caniatáu’r Is-bwyllgor ystyried pob collfarn, p’run ai ydynt wedi eu treulio o dan Ddeddf 1974 neu beidio.

 

Mae rhan 13 yn ymwneud a mân droseddau traffig ac yn cyfeirio yn bennaf at droseddau sydd heb eu rhestru ym mharagraff 12.2 o’r Polisi gyda paragraff 13.1 yn diffinio ‘man drosedd traffig fel trosedd sydd yn derbyn rhwng 1 a 3 pwynt cosb. Ystyriwy paragraff 13.3 sy’n datgan y “Gallai mwy nag un gollfarn am fân drosedd traffig neu fater arall i'w ystyried arwain at wrthod cais, yn enwedig os oes sawl collfarn neu faterion eraill i’w hystyried ar gyfer yr un drosedd, e.e. goryrru. Mae’n bosibl y caiff gyrrwr trwyddedig ei gyfeirio at sylw Is-bwyllgor Trwyddedu os oes mwy na dwy drosedd ac/neu gyfanswm o 6 phwynt ar ei drwydded

 

CASGLIADAU

 

Derbyniodd yr Is-bwyllgor bod gan yr ymgeisydd ddwy drosedd o oryrru o fewn 2 ddiwrnod i'w gilydd ac ymhellach drydedd drosedd a ddigwyddodd yn 2024. Cafwyd eglurhad o’r lleoliadau ar gyfer y troseddau; roedd y ddau gyntaf wedi digwydd yng nghyffiniau Fflint ac o fewn ychydig ddyddiau oherwydd bod yr ymgeisydd yn credu mai 40 mya oedd y terfyn cyflymder a'i fod yn gwneud rhwng 30 a 40. Yng nghyd-destun y trydydd trosedd eglurwyd ei fod wedi digwydd mewn ardal cyfyngiad cyflymder o 20mya ac roedd yn gwneud oddeutu 26mya. Ystyriwyd y sylwadau gonest a wnaeth yr ymgeisydd gan dderbyn ei fod yn llawn deall difrifoldeb y sefyllfa gan gydnabod y byddai collfarn arall yn golygu colli trwydded tacsi a thrwydded gyrru. Nododd yr is-bwyllgor hefyd fod yr ymgeisydd wedi dal trwydded tacsi ers 2008 ac nad oedd unrhyw broblemau blaenorol. Amlygwyd pwysigrwydd gohebu unrhyw ddigwyddiadau gyda’r Uned Trwyddedu.

 

Penderfynodd yr Is-bwyllgor o blaid caniatau y cais

 

Adroddodd y Cyfreithiwr y byddai’r penderfyniad yn cael ei gadarnhau yn ffurfiol drwy lythyr i’r ymgeisydd gan amlygu ei hawl i apelio’r penderfyniad