Agenda item

I ystyried a nodi’r wybodaeth

Cyflwynwyd adroddiad gan y Rheolwr Buddsoddi yn diweddaru’r aelodau’n ffurfiol o waith Partneriaeth Pensiwn Cymru (PPC). Nodwyd bod yr adroddiad bellach yn un sy’n cael ei gyflwyno yn rheolaidd i’r Bwrdd ac yn elfen bwysig iawn o Gronfa Bensiwn Gwynedd sydd bellach gyda 85% o’r gronfa wedi’i bwlio.

Adroddwyd bod y Pennaeth Cyllid a’r Rheolwr Buddsoddi yn cynrychioli’r Gronfa yn holl gyfarfodydd y pwl, a bod y cydweithio yn parhau i fynd yn dda ar faterion megis ymateb ceisiadau rhyddid gwybodaeth, pleidleisio ac ymgysylltu ac yn gyffredinol rhannu ymarfer da ar draws y cronfeydd.

Tynnwyd sylw at y cronfeydd gan amlygu bod perfformiad y cronfeydd ar y cyfan wedi bod tu ôl i’r meincnod ers y dechrau a hyn yn benodol gan fod y meincnod a osodwyd yn heriol e.e. ar gyfer y Gronfa sustainable equity y meincnod yw MSCI All Country World Index, sydd yn cynnwys yr holl gwmnïau, ond bod cwmnïau y mae’r Gronfa yn gallu buddsoddi ynddi wedi ei gyfyngu. Eglurwyd bod Cronfa Global Growth wedi bod mewn bodolaeth ers dros 5 mlynedd ac wedi tan berfformio'r meincnod. O ganlyniad, mae Russell Investments wedi newid strwythur y gronfa yma ac wedi newid y rheolwyr o fewn y portffolio - bydd swyddogion Gwynedd, ymgynghorwyr y Gronfa, Hymans Robertson a swyddogion PPC yn monitro’r cronfeydd yn fanwl yn y dyfodol. 

Adroddwyd bod cronfeydd newydd marchnadoedd preifat yn prysur gael ei sefydlu gyda diweddariad i’w rannu pan fydd perfformiad y cronfeydd yma yn cael ei dderbyn. Yn yr un modd, nodwyd bod y Bartneriaeth yn sefydlu cronfeydd eiddo ac y bydd  trafodaeth yn cael ei gynnal gyda Hymans Robertson i drafod pa opsiwn y gellid manteisio arno.

Cyfeiriwyd at yr ymgynghoriad ‘Addas i’r Dyfodol’ a gafodd ei lansio gan Lywodraeth y DU oedd yn trafod tri maes allweddol:

·        Diwygio’r trefniadau pwlio asedau Cynlluniau Pensiwn Llywodraeth Leol

·        Hybu buddsoddiadau lleol

·        Cryfhau llywodraethu o fewn y cronfeydd pensiwn.

Amlygwyd bod ymateb i’r ymgynghoriad wedi ei gyflwyno gan Gronfa Bensiwn Gwynedd ynghyd ag achos busnes sy’n awgrymu mai’r ffordd ymlaen i PPC yw i Gymru gadw cronfa CPLlL annibynnol gan adeiladu ar lwyddiant trefniadau cronni presennol. Ategwyd y byddai modd gwneud hynny drwy greu cwmni buddsoddi o dan yr enw ‘IM Co’; yr ail opsiwn fyddai bod fel is bartner neu gleient mewn pŵl gyda chronfeydd mwy yn rheoli, ynghyd â chostau trosiannol. Nodwyd, petai Cronfa Bensiwn Gwynedd eisiau parhau i gael llais mewn penderfyniadau, siapio buddsoddiadau addas i’w proffil a sicrhau buddsoddi yng Nghymru, bydd rhaid datblygu WPP i fod yn IM Co ac er bydd costau ynghlwm a gweithredu hyn, bod y sefyllfa yn cael ei orfodi. Gobeithir y bydd dychweliadau yn parhau yn gryf a’r costau buddsoddi yn îs yn y pen draw.

Ar y 1af o Ebrill 2025 adroddwyd bod Sioned Parry ac Osian Richards wedi mynychu cyfarfod Cadeiryddion y Bwrdd Pensiwn dros Gymru. Cyfeiriwyd at y sylwadau ffafriol oedd wedi cael eu cyfleu yn y cyfarfod at gadw PPC yn annibynnol a bod y swyddogion yn gweithio yn hynod o galed o fewn amserlen dynn i ymateb i ofynion yr adolygiad.

Diolchwyd am yr adroddiad

Sylwadau yn codi o’r drafodaeth ddilynol:

·        Er y costau, byddai’r fenter yn fuddiol i Gymru

·        Croesawu’r ymdrech i gadw annibyniaeth pwl Cymru

·        Bod angen sicrhau bod y broses yn cyfateb i’r angen yn hytrach na phroses fawr, gostus yn creu newid er mwyn newid

·        Mai’r nod yn wreiddiol oedd pwlio cronfeydd i arbed costau ond bellach ceir gorfodaeth i wario i sefydlu cwmni

·        Llywodraeth DU heb gydnabod bod y drefn bresennol yn gweithio yn effeithiol ac yn dderbyniol, ond eto yn gorfod sefydlu cwmni i’w gymeradwyo gan  Awdurdod Ymddygiad Ariannol (FCA - Financial Conduct Authoity)

·        Cais i’r swyddogion rannu gwybodaeth am y fforymau a gyflwynodd sylwadau yn ystod yr ymgynghoriad

Mewn ymateb i gwestiwn ynglŷn â photensial o arbedion yn y tymor hir (er nad oedd cyfeiriad at arbedion yn y Cynllun Busnes) nodwyd, o ran amcanion bras iawn, bydd costau Rheolwyr Buddsoddiadau yn ddibynnol ar berfformiad ac felly yn y tymor hir y gobaith yw bydd arbediad i Wynedd (er nad oedd sicrwydd ar hyn o bryd). Mewn ymateb i sylw ynglŷn ar effaith ar adnoddau a chostau staff, nodwyd nad oedd gwybodaeth ynglŷn â chyfrifoldebau staff wedi dod i law. Derbyniwyd y rhwystredigaeth nad oedd costau ffurfiol i’w rhannu, ond y byddai unrhyw wybodaeth sydd yn cael ei dderbyn yn cael ei rannu gydag aelodau’r Bwrdd.

Derbyniwyd y wybodaeth