Agenda item

MICKEY’S BEACH CAFE, THE BOATYARD AND SHIPWAY, BWLCHTOCYN, ABERSOCH

 

I ystyried y cais

PENDERFYNIAD: Caniatáu y cais

 

Oriau Agor:

 

Dydd Sul 10:00 - 18:00

Dydd Llun 10:00 -18:00

Dydd Mawrth 10:00 -18:00

Dydd Mercher 10:00 -18:00

Dydd Iau 10:00 - 18:00

Dydd Gwener  10:00 -18:00

Dydd Sadwrn 10:00 -18:00

 

Gweithgareddau Trwyddedadwy

 

Cyflenwi Alcohol ar ac oddi ar yr Eiddo

 

Dydd Sul 10:00 - 17:00

Dydd Llun 10:00 17:00

Dydd Mawrth 10:00 - 17:00

Dydd Mercher 10:00 - 17:00

Dydd Iau 10:00 - 17:00

Dydd Gwener 10:00 - 17:00

Dydd Sadwrn 10:00 - 17:00

 

Y mesurau ychwanegol, fel y nodir yn rhan M y cais, i'w cynnwys fel amodau ar y drwydded:

• Hyfforddiant Staff
• Her 25
• Bydd y safle yn gweithredu polisi dim gwydr gyda’r holl alcohol a werthir yn cael ei wneud mewn defnydd polycarbonadau
• Dim cerddoriaeth uchel i’w chwarae ar y safle
• Staff i ofyn i gwsmeriaid adael yn dawel a pharchu trigolion lleol
• TCC yn weithredol ar y safle

 

Mesurau ychwanegol a gytunwyd gyda Heddlu Gogledd Cymru

 

·        Daw'r cyflenwadau alcohol gan gyflenwyr bwyd presennol - ni ragwelir cyflenwadau ychwanegol fydd yn arwain at gynnydd mewn traffig

·        Mae sbwriel yn rhan o gasgliad cytundeb masnachol ar ddydd Mawrth a dydd Gwener, ac ni fydd yn digwydd y tu allan i'r oriau 17:00 – 08:00 fel sy'n arferol

 

Croesawodd y Cadeirydd bawb i’r cyfarfod.

 

a)                         Adroddiad yr Adran Trwyddedu

 

Cyflwynwyd adroddiad Pennaeth yr Adran Amgylchedd yn manylu ar fwriad i werthu alcohol yn ddyddiol yn ystod y tymhorau prysura o’r flwyddyn. Adroddwyd bod yr ymgeisydd yn ceisio am drwydded eiddo i werthu alcohol (ar ac oddi ar yr eiddo) o 10:00 - 17:30, o ddydd Llun i Sul.

 

Nodwyd bod gan Swyddogion yr Awdurdod Trwyddedu dystiolaeth ddigonol bod y cais wedi ei gyflwyno yn unol â gofynion Deddf Trwyddedu 2003 a’r rheoliadau perthnasol. Cyfeiriwyd at y mesurau yr oedd yr ymgeisydd yn ei argymell i hyrwyddo’r amcanion trwyddedu ac amlygwyd y byddai’r mesurau hyn yn cael eu cynnwys ar y drwydded.

 

Adroddwyd nad oedd yr Awdurdodau Cyfrifol wedi cyflwyno sylwadau ac er i Heddlu Gogledd Cymru amlygu pryderon cychwynnol, bod yr ymgeisydd bellach wedi cytuno i’r mesurau i ymateb i’r pryderon hynny ac felly'r Heddlu wedi eu tynnu yn ôl.

 

Tynnwyd sylw at ymatebion a dderbyniwyd gan Aelodau o’r Cyhoedd a Chyngor Cymuned Llanengan. Roedd y cyhoedd, yn pryderu nad oedd toiledau ar y safle, ac er bod cwsmeriaid yn defnyddio toiledau cyhoeddus gerllaw, nid oedd gan y caffi reolaeth dros y toiledau hyn ac y gallent gau ar unrhyw adeg. Ystyriwyd y gall hyn arwain at y posibilrwydd o achosi trafferthion gwastraff dynol yn yr ardal. Amlygwyd pryder hefyd,

·        bod yr ardal wedi gweld cynnydd mewn gwastraff yn cael ei wasgaru wrth y caffi ac y bydd potensial i hyn waethygu os daw mwy o bobl i yfed yno

·        pryder o gynnydd mewn gwydr wedi malu a phlastig ar y traeth ger y caffi

·        gyda’r traeth o flaen y caffi yn un poblogaidd iawn hefo teuluoedd, ystyriwyd y gall gwerthu alcohol gynyddu’r potensial i bobl yfed a gweithredu cychod pŵer yn yr ardal sydd yn beryglus i unrhyw un sydd yn nofio yn y môr.

 

Roedd sylwadau Cyngor Cymuned Llanengan yn pryderu am

·      yfed ar y traeth gan nodi nad yw peiriannau (e.e. cychod cyflym/badau dwr personol) ac alcohol yn cyd-fynd

·     pryder am ddiffyg toiledau ar y safle - mater a gododd y Cyngor sawl gwaith ers pan sefydlwyd caffi ar y safle

·      gall gwerthu alcohol gynyddu poblogrwydd Traeth Marchros fydd o ganlyniad yn creu traffig ychwanegol ar ffordd gul, droellog sydd heb le digonol i ddau gar basio’i gilydd. 

 

Roedd y swyddogion yn nodi, yn unol â Deddf Drwyddedu 2003, argymhellir fod y Pwyllgor yn ystyried sylwadau'r ymatebwyr, ac ymateb yr ymgeisydd i’r pryderon - ac yn caniatáu’r cais.   Adroddwyd bod alcohol wedi ei werthu ar y safle ar nifer o achlysuron yr haf diwethaf drwy ddefnyddio Hysbysiadau Digwyddiadau Dros Dro. Ni dderbyniwyd cwynion gan yr Awdurdod Trwyddedu nac Uned Gwarchod y Cyhoedd yn dilyn sawl digwyddiad a ganiateir yn defnyddio Hysbysiadau Digwyddiadau Dros Dro. 

 

b)                         Wrth ystyried y cais dilynwyd y drefn ganlynol-:

·        Cyfle i Aelodau’r Is-bwyllgor ofyn cwestiynau i gynrychiolydd y Cyngor.

·        Ar ddisgresiwn y Cadeirydd, yr ymgeisydd neu ei gynrychiolydd i ofyn cwestiynau i gynrychiolydd y Cyngor.

·        Rhoi cyfle i’r ymgeisydd a/neu ei gynrychiolydd ymhelaethu ar y cais a galw tystion

·        Rhoi cyfle i Aelodau’r Is-bwyllgor ofyn cwestiynau i’r ymgeisydd a/neu ei gynrychiolydd

·        Ar ddisgresiwn y Cadeirydd gall cynrychiolydd y Cyngor ofyn cwestiynau i’r ymgeisydd neu ei gynrychiolydd

·        Rhoi gwahoddiad i bob Ymgynghorai gefnogi unrhyw sylwadau ysgrifenedig

·        Rhoi cyfle i gynrychiolydd y Cyngor a’r ymgeisydd neu ei gynrychiolydd grynhoi eu hachos.

·        Swyddog cyfreithiol i grynhoi gofynion y cais

 

c)        Mewn ymateb i gwestiwn ynglŷn â diffyg toiledau ar y safle a’r pryder y bydd y toiledau cyhoeddus yn cau, nodwyd yr angen i drafod y cais yn unol â’r sefyllfa bresennol.

       

ch)     Wrth ymhelaethu ar y cais, nododd cynrychiolydd yr ymgeisydd y sylwadau canlynol:

·        Bod toiled ar y safle

·        Bod cais am drwydded wedi ei gyflwyno yn 2024, ond yn dilyn nifer o gyfarfodydd gyda swyddogion Iechyd yr Amgylchedd a Heddlu Gogledd Cymru i drafod cwynion a phryderon, tynnwyd y cais yn ôl a phenderfynwyd defnyddio  Hysbysiadau Digwyddiadau Dros Dro. Gwerthwyd alcohol ar y safle ar 21 achlysur dros yr Haf ac ni dderbyniwyd cwynion yn dilyn y digwyddiadau hyn.

·        Bod cytundeb masnachol ar gyfer gwaredu gwastraff yn ei le

·        Nid oes bwriad defnyddio gwydr

·        Bod cydweithio da wedi bod gyda’r Awdurdod Lleol i geisio lliniaru pryderon

·        Bod yr ymgeisydd yn cynnig addasu’r amser cau i 1700 – hyn yn amlygu parodrwydd i gyfarch pryderon

 

Mewn ymateb i gwestiwn ynglŷn â sut bydd yr ymgeisydd yn cyfarch yr egwyddor o rwystro niwsans cyhoeddus, nodwyd nad oedd bwriad chwarae cerddoriaeth uchel, bod yr oriau agor wedi eu cyfyngu, ac yn y cyfnod 21 diwrnod o ddefnydd Hysbysiadau Digwyddiadau Dros Dro ni fu i’r Adran Iechyd yr Amgylchedd na’r Awdurdod Lleol dderbyn cwynion. Ategwyd y bydd staff yn derbyn hyfforddiant dogfennol rheolaidd ac er nad yw’r caffi yn agor gyda’r nos, bydd staff ar y safle hyd 1900 yn glanhau yn unig. Bydd y fenter yn un cyfrifol.

 

Mewn ymateb i gwestiwn ynglŷn â’r nifer pobl fydd ar y safle, nodwyd bod lle ar gyfer 20 - 25 o bobl i eistedd o gwmpas y byrddau, ond bod llawer o fynd a dod gyda phobl yn symud ymlaen.

 

Mewn ymateb i gwestiwn ynglŷn â’r casgliadau sbwriel / gwastraff, nodwyd bod casgliad gwastraff yn cael ei wneud i gyd mewn un ymweliad a hynny ar ôl 8am. Mewn ymateb i bryder preswylydd agos oedd yn nodi nad oedd gan y caffi ganiatâd i adael bin ar ei dir, nodwyd bod y biniau yn cael eu storio ar dir ac yn cael eu rhoi allan am gasgliad gerllaw'r maes parcio. Ategodd yr ymgeisydd nad oedd yn ymwybodol o’r hawliau tir, ond y byddai yn barod i symud y biniau i leoliad arall a chynnal trafodaeth gyda’r tirfeddiannwr.

 

d)           Manteisiodd yr ymgynghorai oedd yn bresennol ar y cyfle i ymhelaethu ar sylwadau a gyflwynwyd yn ysgrifenedig ganddynt:

 

Mr Jeremy Beddows

·        Mai ef oedd perchennog y tir gerllaw'r caffi a’i eiddo wedi ei leoli rhyw 1metr i ffwrdd o’r safle

·        Bod ardal y biniau ar ei gwrtil

·        Bod y loriau bin yn gorfod teithio ar hyd ffordd gul iawn sydd hefyd yn arwain at fynediad i’r traeth

·        Byddai cynnal sgwrs yn addas fel modd o ddatrys y sefyllfa

·        Yn croesawu bod toiled ar y safle - y toiledau cyhoeddus yn bell o’r traeth ac felly'r tir gerllaw a’i ardd yn cael ei faeddu

·        Bod y traeth yn un poblogaidd – ei fod yn gweld cynnydd mewn defnydd badau dwr a nifer ceir ar y safle ac felly angen ystyried pryderon o yfed a gyrru

·        Croesawu na fydd gwydr yn cael ei ddefnyddio – hapus gyda defnydd polycarbonadau

·        Bod wal uchel iawn tu ôl i’r caffi a phobl yn mynd i eistedd yno gyda diodydd – angen arwydd i amlygu perygl

 

            Mr Peter Baines

·        Mai ef oedd y preswylydd lleol agosaf i’r caffi

·        Bod cynnydd mewn lefel sŵn symud biniau dros gyfnod y Digwyddiadau Dros Dro

·        Bydd newid i naws yr ardal yn dilyn cyflwyniad alcohol

·        Nid yw yfed a gyrru badau dwr yn cael ei blismona

·        Nid yw gwerthiant alcohol oddi ar y safle yn cael ei reoli yn dda

·        Byddai mwy o loriau yn dod i’r ardal os bydd mwy o ddarparwyr cynnyrch. Yr holl ddanfoniadau yn cael eu dadlwytho yn y maes parcio

·        Bod y traeth o fewn AHNE

·        Bod y busnes yn dueddol o gymryd mantais o sefyllfa

·        Er nad oedd trafferthion yn ystod y digwyddiadau dros dro, bod ymdeimlad y bydd pethau yn mynd allan o reolaeth

·        Nad oedd unrhyw drafodaethau wedi eu cynnal cyn y gwrandawiad

 

Manteisiodd y Rheolwr Trwyddedu ar y cyfle i grynhoi ei hachos, gan nodi bod yr ymgeisydd wedi cytuno i amodau ychwanegol ac wedi rhoi sicrwydd na fydd cerddoriaeth uchel yn cael ei chwarae. Nodwyd hefyd y byddai yn annog i’r ymgeisydd gydweithio gyda chymdogion

 

Manteisiodd cynrychiolydd yr ymgeisydd ar y cyfle i grynhoi ei hachos, gan nodi eu bod wedi ymgysylltu gyda’r Awdurdod Lleol a’r Heddlu ac nad oedd unrhyw ymgais gan yr ymgeisydd i geisio cymryd mantais o’r sefyllfa. Ategodd nad oedd bwriad i redeg y safle fel tafarn ac na ddylai’r fenter gael effaith negyddol ar ymwelwyr. Nododd bod yr ymgeisydd yn barod iawn i gydweithio gyda thrigolion lleol a bod mesurau wedi cael eu cynnig i liniaru’r pryderon. Nododd hefyd nad oedd gwrthwynebiadau wedi eu derbyn gan yr Awdurdodau Cyfrifol.

 

dd)        Cymerodd y Swyddog Cyfreithiol y cyfle i grynhoi gofynion y cais

-        Cais i gyflawni alcohol ar ac oddi ar yr eiddo

-        Bod cynnig i gytuno i oriau trwyddedig 1000 - 17000 Dydd Llun i Ddydd Sul (oriau agor 1000 - 1800

-        Bod amodau yn cynnwys dim gwydr, hyfforddiant priodol i staff, gweithredu Her 25, dim cerddoriaeth i’w chwarae yn uchel, cais i gwsmeriaid ymadael yn ddistaw a pharchu cymdogion, bod TCC ar y safle a bod defnydd toiledau ar yr eiddo.

-        Nododd bod sefyllfa'r wal i gefn yr eiddo, a'r awgrym am arwydd diogelwch yn fater i’r Adran Amgylchedd neu Cyngor Cymuned

 

ee)        Ymneilltuodd cynrychiolydd yr ymgeisydd a’r Rheolwr Trwyddedu o’r cyfarfod tra bu i aelodau’r Is-bwyllgor drafod y cais.

Wrth gyrraedd y penderfyniad ystyriodd yr Is-bwyllgor ffurflen gais yr ymgeisydd, sylwadau ysgrifenedig a gyflwynwyd gan y partïon â diddordeb, adroddiad y Swyddog Trwyddedu ynghyd â sylwadau llafar pob parti yn bresennol yn y gwrandawiad.  Ystyriwyd  Polisi Trwyddedu’r Cyngor a chanllawiau’r Swyddfa Gartref. Rhoddodd yr Is-bwyllgor ystyriaeth briodol i’r holl sylwadau gan eu pwyso a’u mesur yn erbyn yr  amcanion trwyddedu o dan y Ddeddf Trwyddedu 2003, sef:

 

                             i.         Atal trosedd ac anhrefn

                           ii.         Atal niwsans cyhoeddus

                          iii.         Sicrhau diogelwch cyhoeddus

                          iv.         Gwarchod plant rhag niwed

 

Diystyrwyd y sylwadau a ddaeth i law i’r graddau eu bod yn amherthnasol i’r amcanion uchod.

PENDERFYNIAD: Caniatáu y cais

 

Oriau Agor:

 

Dydd Sul 10:00 - 18:00

Dydd Llun 10:00 -18:00

Dydd Mawrth 10:00 -18:00

Dydd Mercher 10:00 -18:00

Dydd Iau 10:00 - 18:00

Dydd Gwener  10:00 -18:00

Dydd Sadwrn 10:00 -18:00

 

Gweithgareddau Trwyddedig

 

Cyflenwi Alcohol ar ac oddi ar yr Eiddo

 

Dydd Sul 10:00 - 17:00

Dydd Llun 10:00 17:00

Dydd Mawrth 10:00 - 17:00

Dydd Mercher 10:00 - 17:00

Dydd Iau 10:00 – 17:00

Dydd Gwener 10:00 - 17:00

Dydd Sadwrn 10:00 - 17:00

 

Y mesurau ychwanegol, fel y nodir yn rhan M y cais, i'w cynnwys fel amodau ar y drwydded:

·        Hyfforddiant Staff

·        Her 25

·        Bydd y safle yn gweithredu polisi dim gwydr, gyda’r holl alcohol a werthir yn cael ei wneud mewn defnydd polycarbonadau

·        Dim cerddoriaeth uchel i’w chwarae ar y safle

·        Staff i ofyn i gwsmeriaid adael yn dawel a pharchu trigolion lleol

·        TCC yn weithredol ar y safle

 

Mesurau ychwanegol a gytunwyd gyda Heddlu Gogledd Cymru

 

• Daw'r cyflenwadau alcohol gan gyflenwyr bwyd presennol - ni ragwelir cyflenwadau ychwanegol fydd yn arwain at gynnydd mewn traffig
• Mae sbwriel yn rhan o gasgliad cytundeb masnachol ar ddydd Mawrth a dydd Gwener, ac ni fydd yn digwydd y tu allan i'r oriau 17:00 – 08:00 fel sy'n arferol

 

Yng nghyd-destun Rhwystro Trosedd ac Anrhefn, ni chyflwynwyd sylwadau na thystiolaeth oedd yn berthnasol i'r egwyddor hon.

 

Yng nghyd-destun materion Diogelwch Cyhoeddus ni chyflwynwyd sylwadau na thystiolaeth oedd yn berthnasol i'r egwyddor hon.

 

Yng nghyd-destun Atal niwsans cyhoeddus, derbyniwyd sylwadau a gwrthwynebiadau gan gymdogion yr eiddo oedd yn mynegi pryderon am y potensial o ymddygiad gwrthgymdeithasol a materion niwsans cyhoeddus yn deillio o ganiatáu’r cais. Fodd bynnag, ni dderbyniwyd unrhyw sylwadau na gwrthwynebiadau gan Adran Gwarchod y Cyhoedd ac ni chyflwynwyd tystiolaeth o ymddygiad gwrthgymdeithasol na chynnydd mewn lefelau sŵn.

 

Wrth nodi'r pryderon dilys a fynegwyd gan y cymdogion a thrigolion lleol, nid oedd yr Is-bwyllgor o'r farn bod tystiolaeth yn dangos bod niwsans cyhoeddus yn cael ei gyflawni. Roedd yr Is-bwyllgor yn annog yr ymgeisydd i drafod materion gyda'r trigolion lleol yn arbennig i ddatrys materion yn ymwneud â chasglu gwastraff a'r pryderon cysylltiedig â lorïau bin a darparwyr. Nododd yr is-bwyllgor fod yr ymgeisydd yn fodlon lleihau ei oriau trwyddedig i 1700 yn hytrach na 1730 er mwyn cyfyngu ar effeithiau posib eiddo cyfagos. Rhoddwyd sylw yn y gwrandawiad i faterion eraill megis argaeledd toiledau a gweithredu polisi dim gwydr. Fel gyda phob trwydded sydd yn cael ei ganiatáu, os bydd unrhyw broblemau'n codi mewn cysylltiad â'r egwyddorion trwyddedu yna bydd y Ddeddf yn caniatáu i unrhyw drwydded gael ei chyfeirio am adolygiad.

 

Yng nghyd-destun Gwarchod Plant Rhag Niwed, amlygwyd bod yr ymgeisydd wedi darparu manylion o'r camau i'w cymryd i sicrhau na fyddai alcohol yn cael ei werthu i rai dan oed a bydd y rhain yn cael eu cynnwys fel amodau ar y drwydded. Nododd yr Is-bwyllgor hefyd fod y safle wedi elwa o nifer o Hysbysiadau Digwyddiadau Dros Dro dros y 12 mis diwethaf ac ni dderbyniwyd unrhyw gwynion ac ni adroddwyd arnynt o dan benawdau'r amcanion trwyddedu yn ystod y digwyddiadau hyn.

 

Adroddodd y Cyfreithiwr y byddai’r penderfyniad yn cael ei gadarnhau yn ffurfiol drwy lythyr i bawb oedd wedi cyflwyno sylwadau ysgrifenedig. Ategwyd bod gan bob parti i’r cais yr hawl i gyflwyno apêl yn Llys Ynadon Caernarfon yn erbyn penderfyniad yr Is-bwyllgor. Dylid cyfeirio unrhyw apêl o’r fath drwy roi rhybudd o apêl i’r Prif Weithredwr, Llys Ynadon Llandudno, Llandudno, o fewn cyfnod o 21 diwrnod gan gychwyn â’r dyddiad y bydd yr apelydd yn derbyn llythyr (neu gopi ohono) yn cadarnhau’r penderfyniad.