Agenda item

Cyfle i Aelodau drafod a chraffu mesurau a blaenoriaethau gwella’r Adran.

Derbyn yr adroddiad gan nodi’r sylwadau a gyflwynwyd yn ystod y drafodaeth.

Cyflwynwyd yr adroddiad gan Aelod Cabinet Priffyrdd, Peirianneg a YGC, ynghyd â Phennaeth a Phennaeth Cynorthwyol yr Adran Priffyrdd, Peirianneg a YGC.

Adroddwyd bod yr Adran yn arwain ar dair o brosiectau Cynllun y Cyngor 2023-2028, sef ‘Ymestyn cyfleoedd chwarae a chymdeithasu ar gyfer plant a phobl ifanc y Sir fel rhan o flaenoriaeth Gwynedd Yfory yn ogystal â ‘Gweithredu ar risgiau llifogydd’ a ‘Cymunedau Glân a Thaclus’ fel rhan o flaenoriaeth Gwynedd Werdd. Ymhelaethwyd bod y wybodaeth a gyflwynwyd ar gyfer y cyfarfod hwn yn nodi cynnydd yr Adran yn erbyn cerrig milltir y prosiectau ar gyfer 2024-2025 yn ogystal â data am fesurau perfformiad gwasanaethau’r Adran.

Yn ystod y drafodaeth, cyflwynwyd y sylwadau a ganlyn gan yr Aelodau:-

Gwasanaeth Cynnal Priffyrdd – Cyflwr Ffyrdd

Diolchwyd i’r Adran am gyflwyno data am ymchwiliadau tyllau mewn ffordd gan ofyn am fwy o wybodaeth ar amseroedd i ymateb i ymholiadau gan y cyhoedd am gyflwr ffyrdd. Mewn ymateb, ymddiheurodd y Pennaeth Adran nad oedd y data hwn ar ystadegau amseroedd i ymateb wedi cael eu cynnwys yn yr Adroddiad gan egluro bod hynny oherwydd problem gyda’r meddalwedd. Eglurwyd bydd y data hyn yn cael ei gynnwys wrth adrodd i’r Pwyllgor hwn yn y dyfodol. Manylwyd bod archwilwyr yn asesu galwadau am gyflwr ffyrdd yn syth gan nodi bod gwaith yn cael ei wneud ar y ffordd o fewn 2 awr os yw wedi cael ei asesu i fod yn broblem gritigol. Adroddwyd bod ymholiadau eraill yn cael eu datrys erbyn diwedd y diwrnod gwaith dilynol er mwyn gallu rhaglennu a phecynnu gwaith yn effeithiol. Mynegwyd hyder gan yr Adran eu bod yn llwyddo i gyrraedd yr amserlenni hyn.

Mynegwyd rhwystredigaeth gan rhai Aelodau nad yw’r ailwynebu a wneir ar y ffyrdd yn dilyn adrodd ar dwll yn y ffordd yn goroesi’n hirdymor. Mewn ymateb, eglurodd y Pennaeth Adran bod pob ymdrech yn cael ei wneud i dorri rhan mwy o’r ffordd allan er mwyn gallu llenwi’r twll yn well ac o safon uchel, ond nad yw hyn yn bosib ar bob achlysur, felly bydd staff yn ailwynebu’r ffordd gan ddefnyddio tar o fwcedi. Cydnabuwyd bod hyn yn gallu cael effaith ar ansawdd y ffordd a byddai’r Adran yn ystyried y sylwadau ymhellach. Ymhelaethwyd bod yr Adran wedi derbyn arian grant o £8miliwn dros gyfnod o ddwy flynedd er mwyn delio gyda materion cyflwr ffyrdd gan nodi bod adrodd ar gyfraddau ymateb i adroddiadau tyllau mewn ffyrdd a chanfod dulliau o’u hatal rhag ymddangos yn allweddol ar gyfer y cais.

Gwasanaethau Stryd

Tynnwyd sylw mai dim ond 23 Hysbysiad Cosb Benodedig a dalwyd yn ystod 2023-24 am achosion o berchnogion cŵn yn peidio codi baw ci. Mewn ymateb, rhannodd y Pennaeth Adran ei rwystredigaeth gyda’r her hon gan egluro bod y ffigyrau hyn yn isel oherwydd bod rhaid i swyddogion gorfodaeth weld y ci yn baeddu ac nad yw’r perchennog yn ei gasglu. Eglurwyd bod hyn yn heriol iawn gan ychwanegu nad oes yna nifer o swyddogion gorfodaeth yn gyflogedig o fewn y gwasanaeth. Fodd bynnag, pwysleisiwyd bod yr Adran yn targedu ardaloedd o bryder ac yn gweithio i addysgu perchnogion cŵn am bwysigrwydd gwaredu â’r baw yn ddiogel. Ymhelaethwyd bod patrymau yn dangos nad yw hon yn broblem mor fawr yn ystod tymor yr haf ond bod mwy o adroddiadau am faw cŵn yn cael eu derbyn yn ystod y gaeaf.

Disgrifiwyd achos yn ardal Dolgellau ble mae diffygion i’w gweld ar balmant cyfyng ers peth amser gan beri risg i’r cyhoedd ac ymwelwyr wrth iddynt gorfod camu i’r ffordd yn hytrach na’i defnyddio. Cadarnhaodd yr Aelod Cabinet a Phennaeth yr Adran y byddent yn cysylltu gyda’r Aelod ymhellach er mwyn ymdrechu i ganfod datrysiad i’r sefyllfa hon.

Prosiect: Ymestyn cyfleoedd chwarae a chymdeithasu ar gyfer plant a phobl ifanc y Sir

Canmolwyd yr Adran am gyflwyno gwelliannau i barciau chwarae, gan ofyn pa waith sydd yn mynd rhagddo er mwyn sicrhau bod arian yn cael ei ddyrannu i barciau chwarae y tu allan i brif drefi’r Sir. Mewn ymateb, cadarnhaodd Pennaeth yr Adran bod gwaith yn mynd rhagddo er mwyn sicrhau bod yr arian yn cael ei ddyrannu yn unol â’r defnydd a wnaed o’r parciau chwarae. Anogwyd Aelodau’r Cyngor i gydweithio gyda’r Adran er mwyn sicrhau bod buddsoddiad i’r parciau chwarae yn cael eu blaenoriaethu i’r lleoliadau cywir. Eglurwyd mai dim ond 1 swyddog caeau chwarae sydd yn yr Adran a’i fod yn mynd o gwmpas y meysydd chwarae er mwyn asesu eu cyflwr ac asesu’r defnydd a wnaed ohonynt.

Tîm Tacluso Ardal Ni

Mynegwyd diolchiadau gan yr Aelodau am waith y Tîm hwn, gan adrodd eu bod yn ymateb i ddigwyddiadau ac ymholiadau yn gyflym ac yn effeithiol. Diolchwyd iddynt am eu gwaith parhaus.

Gwasanaeth Fflyd

Gofynnwyd a oes rheswm pam bod 38 o gerbydau disel a phetrol yn parhau i fod yn rhan o’r fflyd pan mae cerbydau trydan neu hybrid wedi cael eu prynu yn eu lle. Mewn ymateb, cadarnhaodd y Pennaeth Adran bod rhan helaeth o’r fflyd yn geir trydan neu hybrid erbyn hyn. Fodd bynnag, nodwyd bod yr Adran yn derbyn sylwadau o bryder nad yw cerbydau trydan o hyd yn addas i bwrpas oherwydd bod angen teithio ymhell o fewn y sir ac yna gyrru milltiroedd ychwanegol er mwyn cwblhau gwasanaethau gan beri risg nad oes pwynt gwefru cyfleus ar gael ar pob achlysur, ac felly mae cerbydau disel a phetrol yn parhau i gael eu defnyddio mewn rhai achosion yn hytrach na chronni costau hurio cerbyd. Er hyn, pwysleisiwyd bod hyder y gweithlu gyda’r fflyd o geir trydan a hybrid yn tyfu a bydd cyflwyno mwy o bwyntiau gwefru yn y dyfodol hefyd yn arwain at ddatrys y broblem hon.

Heriwyd na ddylai’r nifer o filltiroedd all y cerbydau trydan a hybrid ei deithio cyn gorfod ail-wefru fod yn broblem os yw’r cerbydau cywir yn cael eu prynu. Ystyriwyd hefyd os yw’r pwyntiau gwefru yn y lleoliadau cywir os nad ydynt yn addas ar gyfer gwasanaethau’r Cyngor. Mewn ymateb, sicrhaodd y Pennaeth Adran bod y Cyngor yn prynu’r cerbydau cywir yn dilyn gwaith ymchwil trylwyr. Eglurwyd bod datblygiadau cerbydau trydan ac hybrid yn parhau i fod yn gymharol newydd, yn enwedig ar gyfer faniau a cherbydau diwydiannol eraill, ac bod yr ystod o filltiroedd maent yn gallu ei deithio cyn ail-wefru yn parhau i fod yn isel. Fodd bynnag, cadarnhawyd bod ceir mwy diweddar yn gallu teithio mwy o filltiroedd cyn ail-wefru ac ystyrir bydd y cerbydau yn parhau i ddatblygu yn y modd yma i’r dyfodol. Ymhelaethwyd bod yr Adran hefyd yn gweithio er mwyn cyflwyno pwyntiau gwefru cyflym ar draws y Sir er mwyn cefnogi’r staff nes eu bod yn hyderus i ddefnyddio ceir trydan a hybrid heb boeni yn ormodol am yr angen i ail-wefru.

Nodwyd bod strategaeth newydd y Cyngor yn nodi bod rhaid i swyddogion gael cefnogaeth rheolwr cyn prynu cerbyd newydd i’r fflyd ac bod y Rheolwr Fflyd gyda’r penderfyniad terfynol ar y mater, gan holi’r Adran os yw’r Adrannau eraill yn cydweithio er mwyn sicrhau mai dyma yw’r trefniant perthnasol. Mewn ymateb, eglurodd y Pennaeth Adran bod cyllidebau fflyd yr Adrannau yn parhau i fod o fewn rheolaeth yr Adrannau yn unigol yn hytrach na chyllideb fflyd annibynnol. Pwysleisiwyd bod trafodaethau yn cael eu cynnal o fewn y Cyngor er mwyn canfod y system orau ar gyfer cyllidebu’r fflyd i’r dyfodol.

Gwasanaeth Cynnal a Chadw Strwythurau

Tynnwyd sylw bod yr adroddiad yn nodi bod 22 pont yng Ngwynedd gyda BCI (Bridge Condition Indicators) ‘gwael’ a 10 pont bellach gyda BCI ‘gwael iawn’. Eglurodd y Pennaeth Adran bod archwilwyr yn archwilio pontydd (boed yn ddur, concrid neu garreg) ac yn asesu gwahanol rannau ohonynt er mwyn cynnal sgôr BCI. Ymhelaethwyd bod BCI holl rannau’r pontydd yn cael eu cyfuno ar gyfer creu cyfartaledd cyn mynd ati i flaenoriaethu pa bontydd sydd angen gweithredu arnynt o fewn y strategaeth ar gyfer y flwyddyn i ddod.

PENDERFYNWYD

Derbyn yr adroddiad gan nodi’r sylwadau a gyflwynwyd yn ystod y drafodaeth.