Agenda item

Derbyniwyd yr adroddiad.

Cyflwynwyd yr adroddiad gan Cyng. Nia Jeffreys.

PENDERFYNIAD

Derbyniwyd yr adroddiad.

TRAFODAETH

Cyflwynwyd yr adroddiad gan nodi fod Ffordd Gwynedd yn un o’r blaenoriaethau sydd i’w gweld yng Nghynllun y Cyngor. Mynegwyd fod yr adroddiad blynyddol yn adrodd ar gynnydd yn y cynllun, ac i godi ymwybyddiaeth o’r datblygiadau sydd i’w gweld yn y naw ffrwd gwaith.

Ychwanegodd y Cyfarwyddwr Corfforaethol fod Ffordd Gwynedd yn ffordd o weithio, yn feddylfryd, amgylchedd gweithio a diwylliant i gyflawni a herio perfformiad. Mynegwyd fod adroddiad blynyddol wedi ei gynnwys yn y Cynllun Ffordd Gwynedd er mwyn mesur cynnydd, ag eglurwyd mai dyma’r ail i gael ei gyflwyno.

Esboniwyd fod y mesuryddion ym mhob gwasanaeth yn dangos arwydd clir o lefel y llwyddiant o roi pobl Gwynedd yn ganolog i bopeth maent yn ei wneud. Nodwyd fod yr adroddiad hwn yn ychwanegu sicrwydd fod y sylfaen a chefnogaeth yn cael ei roi i roi'r gwasanaeth gorau i bobl Gwynedd. Amlygwyd fod rhai man newidiadau i’r drefn llywodraethu ynghyd a chynnig y prif lwyddiannau a oedd yn cynnwys dyfodiad rhaglen ddatblygu rheolwyr, fframwaith dysgu a datblygu newydd ynghyd â hyfforddiant Ffordd Gwynedd ar ei newydd wedd.

Pwysleisiwyd ei bod yn allweddol fod staff yn clywed am ymrwymiad arweinyddiaeth y Cyngor - yn Aelodau ac Uwch Swyddogion - i’r ffordd yma o weithio. Nodwyd fod parhad cynllun Prentisiaethau, Cynllun Yfory, Siarter a Safonau Cynllun Gofal Cwsmer yn gamau pwysig er mwyn gwireddu’r weledigaeth i sicrhau’r gwasanaeth gorau i bobl Gwynedd.

Er hyn, nodwyd nad yw’r diwylliant Ffordd Gwynedd ddim wedi gwreiddio ym mhob man a bod anghysondeb i’w gweld dros y Cyngor. Mynegwyd fod hyn yn flaenoriaeth dros y cyfnod nesaf. Amlygwyd fod llawer o ganmoliaeth wedi ei nodi yn y gyfres ddiweddaraf o’r Pwyllgorau Craffu ond fod beirniadaeth am y methiant i ateb ymholiadau yn rhai gwasanaethau yn amserol. Mynegwyd yn ogystal fod angen edrych ymhellach ar y gweithlu yn y tymor hir i sicrhau lefel o staff. Ond nodwyd ei fod yn grediniol fod ymrwymiad i Ffordd Gwynedd a’i ddiwylliant gwaith i’w weld am y tymor hir.

Sylwadau’n codi o’r drafodaeth:

·       Cymerwyd y cyfle i ddiolch i’r Cyfarwyddwr Corfforaethol am dros 40 mlynedd o wasanaeth i’r Cyngor cyn ei ymddeoliad.

·       Holwyd o ran y pocedi o wasanaethau sydd heb fabwysiadu Ffordd Gwynedd, holwyd os oedd y tîm Arweinyddiaeth wedi ymrwymo i’r ffordd yma o weithio a gofynnwyd a oedd yn hyderus fod y gwaith am barhau. Mynegodd y Cyfarwydd ei fod yn gwbl hyderus fod arweinyddiaeth y Cyngor yn ymrwymedig ond nad yw hyn bob tro yn golygu ei fod wedi ei wreiddio ym mhob man.

·       Mynegwyd fod llawer o sôn am rwystredigaeth ond ei fod yn symud ymlaen i’r cyfeiriad cywir, ond holwyd beth oedd yr heriau mwyaf a’r camau sydd angen ei wneud dros dair blynedd olaf y cynllun. Nodwyd mai trosglwyddo’r sylfaeni cadarn i weithrediad cyson yw’r flaenoriaeth.

·       Amlygwyd llithriad mewn dwy ffrwd gwaith - o ran denu staff a dilyniant i swyddi allweddol, a gofynnwyd oes camau pendant i symud y cynlluniau yn eu blaen. Nodwyd fod llithriad oherwydd bod y pwyslais wedi bod ar lwyddiant cynlluniau megis Cynllun Yfory a Phrentisiaethau ac felly fod cynllunio gweithlu heb gael cymaint o sylw. Mynegwyd fod camau wedi ei wneud ers cyfnod yr adroddiad hwn a grŵp o swyddogion wedi ei sefydlu i symud y cynlluniau yn ei blaen.

·       Pwysleisiwyd fod yr adroddiad yn un sy’n darllen yn wych, ond fod angen ei rannu ymhellach i sicrhau fod pob aelod o staff yn ei dderbyn ar bob lefel. Nodwyd ei bod yn anodd cael y dogfennau i bawb ond fod camau wedi ei wneud drwy ei rannu yn y Rhwydwaith Rheolwyr ac Arweinyddion Tîm ond fod angen meddwl am ffyrdd newydd o rannu gwybodaeth er mwyn esblygu Ffordd Gwynedd ymhellach.