Agenda item

Datblygiad arfaethedig ar gyfer newid defnydd eiddo presennol i ffurfio 13no. fflat preswyl hunangynhaliol (defnydd C3) ar hyd y llawr gwaelod isaf, llawr gwaelod, llawr cyntaf, ail a thrydydd llawr. Mae'r cynnig hefyd yn ceisio cadw elfen o arwynebedd llawr masnachol ar y llawr gwaelod i'w gyflwyno at ddibenion manwerthu (A1). 

 

AELODAU LLEOL: Cynghorywr Dylan Fernley a Nigel Pickavance

 

Dolen i'r dogfennau cefndir perthnasol

PENDERFYNIAD: Caniatáu’r cais yn ddarostyngedig i’r amodau canlynol:

 

1.     Amser 5 mlynedd

2.     Yn unol â’r cynlluniau

3.     Cyfyngu’r defnydd i anheddau preswyl dosbarth defnydd C3 yn unig

4.     Cyfyngu’r oriau adeiladu

5.     Rhaid cyflwyno a chytuno mesurau ynysu sŵn

6.     Rhaid gweithredu amcanion y Datganiad Seilwaith Gwyrdd

7.     Amod tai fforddiadwy

 

Nodiadau:

Nodyn Dŵr Cymru

 

Datblygiad arfaethedig ar gyfer newid defnydd eiddo presennol i ffurfio 13 fflat preswyl hunangynhaliol (defnydd C3) ar hyd y llawr gwaelod isaf, llawr gwaelod, llawr cyntaf, ail a thrydydd llawr. Mae'r cynnig hefyd yn ceisio cadw elfen o arwynebedd llawr masnachol ar y llawr gwaelod i'w gyflwyno at ddibenion manwerthu (A1).

 

a)           Amlygodd yr Uwch Swyddog Cynllunio mai cais llawn ydoedd i newid defnydd adeilad presennol yn 13 fflat preswyl gyda chynllun i gadw elfen o arwynebedd llawr ar gyfer defnydd manwerthu ar y llawr gwaelod. Bydd y fflatiau wedi eu gosod dros y 5 llawr gyda mynediad i’r fflatiau drwy risiau yng nghefn yr adeilad a mynediad i’r ardal manwerthu o’r stryd fawr.  Bydd y datblygiad yn cynnwys storfa biniau a storfa beiciau ar y llawr gwaelod. Defnydd C3 fydd i’r fflatiau hunangynhwysol a defnydd A1 fydd i’r ardal manwerthu gyda blaen y siop yn aros yr un fath. Ni fydd y gwaith yn cynnwys unrhyw waith allanol.

 

Saif yr adeilad yng nghanol Stryd Fawr Bangor, o fewn ffin ddatblygu'r Ganolfan Isranbarthol fel y'i diffinnir gan y CDLl. Saif o fewn Ardal Gadwraeth ac o fewn y Canol Tref Diffiniedig a'r Brif Ardal Siopa.

 

Cyfeiriwyd at lefel cyflenwad dangosol o dai ar gyfer Bangor dros gyfnod y CDLl gan nodi bod y ddarpariaeth eisoes yn cael ei gyfarch trwy’r safleoedd yn y banc tir. Mewn amgylchiadau o’r fath fe fydd ystyriaeth yn cael ei roi i’r unedau sydd wedi eu cwblhau hyd yma o fewn yr haen y Prif Ganolfannau. Ystyriwyd, drwy ychwanegu 13 uned anheddol at y stoc dai, byddai'r datblygiad sy’n destun y cais hwn yn gymorth i gyfrannu tuag at dargedau tai'r CDLl mewn ffordd sy'n ymateb yn gadarnhaol i ofynion y farchnad dai lleol. Ategwyd bod maint a math yr anheddau a gynigiwyd yn gymysgedd priodol o ddarpariaeth tai ac yn cydymffurfio gyda Polisi TAI 8.

 

Cyflwynwyd y cais i bwyllgor gan ei fod yn ddatblygiad o bum annedd neu fwy.

        

Ystyriwyd bod y defnydd arfaethedig yn dderbyniol ac yn bodloni gofynion polisïau. Roedd y swyddogion yn argymell caniatáu y cais gydag amodau.

 

b)           Yn manteisio ar yr hawl i siarad, nododd yr Asiant y sylwadau canlynol:

·          Bod y cais yn ymwneud a throi adeilad gwag ar Stryd Fawr Bangor i ffurfio 13 fflat ac ardal manwerthu

·          Bod yr adeilad, oedd yn gyn fanc, yn wag ers Ebrill 2023 a dim defnydd ohono ers hynny

·          Bod y bwriad yn cynnig defnydd addas o’r adeilad fyddai yn cwrdd â gofynion tai yn lleol a hyfywedd y Stryd Fawr

·          Bod ymchwil marchnata gan arwerthwyr tai wedi amlygu bod galw pendant am fflatiau rhent gyda 1,2 a 3 stafell wely

·          Er bod tai llety myfyrwyr ar gael ym Mangor, bod diffyg anheddau ar gyfer unigolion proffesiynol, cyplau a theuluoedd bach, gyda rhai yn symud allan o’r ddinas i rentu yn Ynys Môn, Bethesda a Chaernarfon

·          Bydd maint y fflatiau yn fforddiadwy - ni fyddant allan o gyrraedd pobl leol

·          Bod yr uned manwerthu, er yn llai, ar gael am rent fforddiadwy. Hyn yn annog busnesau lleol i symud i’r Stryd Fawr a chael effaith gadarnhaol economaidd ar yr ardal

·          Byddai’r bwriad yn cynnig effaith meintiol ar yr iaith Gymraeg - bod gan Uned Iaith Cyngor Gwynedd dystiolaeth ddigonol i gefnogi hyn

·          Bod y safle yng nghanol Dinas Bangor, gyda mynediad da at drafnidiaeth gyhoeddus - y lleoliad yn un cynaliadwy ac yn un fyddai’n hyrwyddo defnydd o deithio heb gar

·          Bod y bwriad yn diwallu gofynion tai yn lleol ac yn arwain at fuddiannau economaidd o ran cyflogaeth a defnydd manwerthu ar y Stryd Fawr

·          Bod y bwriad yn dod ag adeilad sydd wedi bod yn wag am ddwy flynedd yn ôl i ddefnydd pwrpasol.

 

c)           Cynigiwyd ac eiliwyd caniatáu y cais

 

ch)    Yn ystod y drafodaeth ddilynol, nodwyd y sylwadau canlynol gan yr Aelodau:

·        Yn croesawu’r cais

·        Er nifer ceisiadau am fflatiau ym Mangor yn cael eu cyflwyno heb yr elfen fforddiadwy (gan gynnig yr esgus y byddant yn fforddiadwy beth bynnag), da gweld bod rhai o’r anheddau yma wedi eu hamodi i fod yn fforddiadwy

·        Bod galw am anheddau newydd o safon ym Mangor - e.e., nyrsys eisiau byw mewn llefydd sydd yn hwylus i’r gwaith

·        Bod niferoedd sydd yn mynychu Prif Ysgol Bangor yn gostwng, bod llai o dramor yn dod i’r ddinas ers y cyfnod clo a llai o alw am dai amlfeddiannaeth. Dywed bod poblogaeth Bangor yn gostwng 4% erbyn 2043, - i bwy felly fydd y tai yma? Y ddinas yn llenwi gyda thai amlfeddiannaeth - angen tai i deuluoedd

 

Mewn ymateb i gwestiwn ynglŷn â darpariaeth parcio ac egwyddorion mwynderol y tenantiaid, nodwyd yng nghyd-destun materion mwynderau megis darpariaeth parcio, bod hyn yn cael ei gyfarch tu allan i’r safle gan feysydd parcio cyhoeddus cyfredol a thiroedd gwyrdd, sydd yn safonol i ddatblygiad mewn canol dinas. Ategwyd bod y bwriad yn cyfarch yr angen am dai ac yn dod ag adeilad gwag yn ôl i ddefnydd sydd yn cyfrannu at adfywiad y Stryd Fawr. Nodwyd hefyd nad oedd y cais yn un ar gyfer tai amlfeddiannaeth - cais am fflatiau hunangynhaliol oedd yma gyda’r Uned Strategol Tai ac ymchwil gan arwerthwyr tai wedi cydnabod yr angen.

 

PENDERFYNWYD: Caniatáu’r cais yn ddarostyngedig i amodau.

 

1.            Amser 5 mlynedd

2.            Yn unol â’r cynlluniau

3.            Cyfyngu’r defnydd i anheddau preswyl dosbarth defnydd C3 yn unig

4.            Cyfyngu’r oriau adeiladu

5.            Rhaid cyflwyno a chytuno mesurau ynysu sŵn

6.            Rhaid gweithredu amcanion y Datganiad Seilwaith Gwyrdd

7.            Amod tai fforddiadwy

 

Nodiadau:

Nodyn Dŵr Cymru