Agenda item

Cynyddu nifer carafanau i gyfanswm o 15 uned symudol, adeiladu bloc toiledau/ cawod, tirlunio a gwaith cysylltiedig. 

AELOD LLEOL: Cynghorydd John Brynmor Hughes

Dolen i'r dogfennau cefndir perthnasol

PENDERFYNIAD: Gwrthod yn unol â’r argymhelliad

Rhesymau:

·       Ni ystyrir y byddai’r unedau arfaethedig yn cydweddu’n hawdd i’r dirwedd ac ni ystyrir fel lleoliad anymwthiol wedi'i guddio'n dda gan nodweddion presennol y dirwedd, felly byddai’r datblygiad yn niweidiol i ansawdd gweledol y dirwedd. Ni fyddai'r bwriad yn ychwanegu at gynnal, gwella neu adfer cymeriad cydnabyddedig Ardal o Harddwch Nat uriol Eithriadol Llŷn. Pryderir hefyd am greu safle carafanau newydd gryn bellter o’r prif rwydwaith ffyrdd ar lon wledig brysur ble ceir dwysedd uchel o safleoedd gwyliau ac eff aith y gwaith datblygu cysylltiedig ar nodweddion a chymeriad y dirwedd. Fe ystyrir felly fod y bwriad yn groes i ofynion perthnasol Polisïau TWR 5 ac AMG 1 y Cynllun Datblygu Lleol ar y Cyd Gwynedd a Môn a Chanllawiau Cynllunio Atodol (CCA): Cyfleusterau a Llety i Dwristiaid.

·       Ni chyflwynwyd tystiolaeth ddigonol fel rhan o’r cais cynllunio i ddangos fod ystyriaeth lawn wedi ei roi i’r effaith o golli tir amaethyddol gorau a mwyaf aml bwrpas. Ystyrir felly fod y cais yn groes i ofynion maen prawf 6 Polisi PS 6 Cynllun Datblygu Lleol ar y Cyd Gwynedd a Môn 2011-2026 ynghyd a’r cyngor a roddir ym mharagraffau 3.58 a 3.59 o Bolisi Cynllunio Cymru.

Cynyddu nifer carafanau i gyfanswm o 15 uned symudol, adeiladu bloc toiledau / cawod, tirlunio a gwaith cysylltiedig.

Tynnwyd sylw at y ffurflen sylwadau hwyr

a)       Amlygodd Hyfforddai Cynllunio mai cais llawn ydoedd yn ymwneud ag ymestyn safle carafanau presennol i gae amaethyddol cyfochrog ynghyd â chodi bloc toiledau a chawodydd newydd, thirlunio a gwaith cysylltiedig. Nodwyd bod y safle wedi ei leoli tu allan i’r ffin datblygu, ac felly ystyriwyd bod y safle mewn cefn gwlad agored.

Tynnwyd sylw bod yr eiddo o fewn Ardal o Harddwch Naturiol Eithriadol Llŷn ac o fewn Tirwedd o Ddiddordeb Hanesyddol cofrestredig Llŷn ac Enlli gyda’r safle wedi ei wasanaethu

gan ffordd ddi-ddosbarth wledig sengl. Ategwyd bod y tir dan sylw wedi ei raddio fel tiroedd dosbarth 2, sef tir amaethyddol o ansawdd da. Cyfeiriwyd at baragraff 3.58 o Bolisi Cynllunio Cymru (PC) sy’n nodi mai “tir amaethyddol gradd 3a yn ogystal â dosbarthiadau 1 a 2 yn y Dosbarthiad Tir Amaethyddol (ALC)16 sydd yn cael ei ystyried fel y tir amaethyddol gorau a mwyaf amlbwrpas, a dylid ei warchod fel adnodd y mae terfyn iddo ar gyfer y dyfodol”.

Wedi ymchwilio i hanes cynllunio’r safle, ymddengys nad oedd unrhyw ganiatâd Cynllunio yn bodoli ar gyfer carafanau ar y safle ac er bod arwydd lleoliad ardystiedig ‘Caravan and Motorhome Club’ yn cael ei arddangos yno, yn dilyn ymholiadau gyda’r Clwb eithriedig, derbyniwyd cadarnhad nad oedd tystysgrif ar gyfer y safle bellach. O ganlyniad, nid cais i ymestyn safle presennol oedd dan sylw, ond cais am safle carafanau teithiol (15 carafán) o’r newydd.

Cyflwynwyd y cais i Bwyllgor gan ei fod yn ddatblygiad ar safle sydd yn 0.5 hectar neu fwy o ran maint.

Rhoddwyd ystyriaethau i bolisi TWR 5, AMG1 a PS6 o’r CDLl

Adroddwyd, er bod y cais yn datgan bod coed a gwrychoedd helaeth yn cuddio’r safle o bob gwelfan o archwilio’r safle, gwan oedd ansawdd tirlunio cloddiau terfyn y safle ar y cyfan. Ategwyd mai lled cae oedd yn gwahanu’r safle o’r ffordd sirol, gyda chloddiau cymharol foel ar y terfynau dwyreiniol, fyddai’n gwneud y safle yn amlwg o’r lon gyhoeddus sy’n rhedeg heibio’r eiddo ac o lwybr cyhoeddus sydd led cae i’r gorllewin o’r safle. Er bod  natur wastad i'r safle, cyfyngedig fydd y golygfeydd, ond bydd yn amlwg o’r ffordd gyfochrog ac o diroedd uwch Bwlchtocyn a rhai mannau ar lwybrau cyhoeddus yr ardal. Cydnabuwyd bod bwriad i atgyfnerthu sgrinio’r safle trwy wella ac ychwanegu tirlunio ar y cloddiau presennol, ond o ystyried lleoliad uchel ac agored y safle, nid oedd sicrwydd y byddai’r tirlunio yn sefydlu a phwysleisiwyd y byddai’n cymryd nifer o flynyddoedd i  sgrinio’r safle yn ddigonol, os o gwbl. Nodwyd bod dibyniaeth ar dirlunio i ffurfio sgrin ddigonol yn cynnwys elfen o risg gydag amheuaeth y byddai modd sicrhau sgrinio digonol yn y tymor byr.

Cyfeiriwyd at polisi AMG 1 sy’n nodi bydd angen i gynigion sydd o fewn neu’n effeithio ar osodiad / golygfeydd i mewn ac allan o’r AHNE ystyried Cynllun Rheolaeth yr AHNE. Tynnwyd sylw at sylwadau'r uned AHNE oedd yn nodi, bod “... nifer sylweddol o garafanau teithiol yn ardal Sarn Bach/ Bwlchtocyn sydd yn rhoi pwysau ar amgylchedd yr AHNE a gwasanaethau lleol.” Ni ystyriwyd felly y byddai’r unedau carafanau teithiol yn cydweddu’n hawdd i’r dirwedd ac ni ystyriwyd fel lleoliad anymwthiol wedi'i guddio'n dda gan nodweddion presennol y dirwedd, felly byddai’r datblygiad yn niweidiol i ansawdd gweledol y dirwedd. Ni fyddai'r bwriad yn ychwanegu at gynnal, gwella neu adfer cymeriad Ardal o Harddwch Naturiol Eithriadol Llŷn.

Nodwyd pryder am greu safle carafanau newydd gryn bellter o’r prif rwydwaith ffyrdd ar lon wledig brysur ble ceir dwysedd uchel o safleoedd gwyliau ac effaith y gwaith datblygu cysylltiedig ar nodweddion a chymeriad y dirwedd. Ystyriwyd bod y bwriad yn groes i ofynion perthnasol Polisïau TWR 5 ac AMG 1 y CDLl Chanllawiau Cynllunio Atodol (CCA): Cyfleusterau a Llety i Dwristiaid. Ni chyflwynwyd tystiolaeth ddigonol fel rhan o’r cais cynllunio i amlygu bod ystyriaeth lawn wedi ei roi i’r effaith o golli tir amaethyddol gorau ac aml bwrpas. Ystyriwyd bod y cais yn groes i ofynion maen prawf 6 Polisi PS 6 CDLl ynghyd a’r cyngor a roddir ym mharagraffau 3.58 a 3.59 o Bolisi Cynllunio Cymru.

         Roedd y swyddogion yn argymell gwrthod y cais

c)      Cynigiwyd ac eiliwyd gwrthod y cais

ch)    Yn ystod y drafodaeth ddilynol, nodwyd y sylwadau canlynol gan yr Aelod;

·        Bod y safle yn gweithredu drwy drwydded clwb ar gyfer 5 llain, ond sydd bellach gyda 7 llain – 2 uned yno heb gytundeb

·        Bod y cais yn bwriadu cynyddu o 7 llain i gyfanswn o 15 llain – nid oes caniatâd cynllunio yn bodoli ar gyfer y carafanu, byddai hwn yn gais am safle carafanau teithiol o’r newydd

PENDERFYNWYD: Gwrthod y cais yn unol a’r argymhelliad.

Rhesymau:

·        Ni ystyrir y byddai’r unedau arfaethedig yn cydweddu’n hawdd i’r dirwedd ac ni ystyrir fel lleoliad anymwthiol wedi'i guddio'n dda gan nodweddion presennol y dirwedd, felly byddai’r datblygiad yn niweidiol i ansawdd gweledol y dirwedd. Ni fyddai'r bwriad yn ychwanegu at gynnal, gwella neu adfer cymeriad cydnabyddedig Ardal o Harddwch Naturiol Eithriadol Llŷn. Pryderir hefyd am greu safle carafanau newydd gryn bellter o’r prif rwydwaith ffyrdd ar lon wledig brysur ble ceir dwysedd uchel o safleoedd gwyliau ac effaith y gwaith datblygu cysylltiedig ar nodweddion a chymeriad y dirwedd. Fe ystyrir felly fod y bwriad yn groes i ofynion perthnasol Polisïau TWR 5 ac AMG 1 y Cynllun Datblygu Lleol ar y Cyd Gwynedd a Môn a Chanllawiau Cynllunio Atodol (CCA): Cyfleusterau a Llety i Dwristiaid.

·        Ni chyflwynwyd tystiolaeth ddigonol fel rhan o’r cais cynllunio i ddangos fod ystyriaeth lawn wedi ei roi i’r effaith o golli tir amaethyddol gorau a mwyaf aml bwrpas. Ystyrir felly fod y cais yn groes i ofynion maen prawf 6 Polisi PS 6 Cynllun Datblygu Lleol ar y Cyd Gwynedd a Môn 2011-2026 ynghyd a’r cyngor a roddir ym mharagraffau 3.58 a 3.59 o Bolisi Cynllunio Cymru.