Agenda item

Cais llawn i ddymchwel tŷ (C3) a modurdy presennol a chodi tŷ newydd (C3) 3 ystafell wely yn eu lle  

 

AELOD LLEOL: Cynghorydd Gareth Williams

 

Dolen i'r dogfennau cefndir perthnasol

PENDERFYNIAD: Gohirio penderfyniad a chynnal ymweliad safle

 

Cais llawn i ddymchwel tŷ (C3) a modurdy presennol a chodi tŷ newydd (C3) 3 ystafell wely yn eu lle.

 

Tynnwyd sylw at y ffurflen sylwadau hwyr

 

a)           Amlygodd yr Uwch Swyddog Cynllunio mai cais llawn ydoedd i ddymchwel tŷ deulawr presennol ac adeiladu tŷ newydd deulawr 3 ystafell wely yn ei le. Yn ogystal, bydd bwriad cynnal newidiadau allanol gan gynnwys gwaredu modurdy unllawr presennol a chreu mannau parcio. Byddai'r tŷ newydd, or un ôl troed yn cynnig lolfa, ystafell fwyta/cegin, ystafell gawod a chyntedd ar y llawr daear a tair ystafell wely ac ystafell ymolchi ar y llawr cyntaf.

 

Nodwyd bod yr ymgeisydd wedi cadarnhau y bydd yr eiddo yn dŷ cymdeithasol gyda Tim Opsiynau Tai Cyngor Gwynedd yn arwain ar y broses o glustnodi’r eiddo ar y cyd gyda Cynefin i ddefnyddwyr ar restr aros. Ategwyd bod bwriad ei osod fel eiddo rhent canolraddol, ar flaenroaeth fyddai edrych ar y ddeiliadaeth yma i gychwyn, ac os hynny ei hysbysebu drwy Tai Teg.

 

Eglurwyd bod y safle wedi ei leoli y tu allan i unrhyw ffin ddatblygu gyfredol ac felly yng nghefn gwlad agored o fewn dynodiadau Ardal o Harddwch Naturiol Eithriadol Llŷn a Thirwedd o Ddiddordeb Hanesyddol Eithriadol Llŷn ac Enlli. Yn gyfochrog i’r safle ceir dau dŷ ar wahân a ffordd gyhoeddus ddi-ddosbarth yn rhedeg ar hyd ffin ddwyreiniol y safle. Nodwyd bod yr adeilad  presenol mewn cyflwr bresgus a ffens ddiogelwch yn gwarchod y safle.

 

Cyflwynwyd y cais i’r Pwyllgor Cynllunio am benderfyniad yn dilyn derbyn sylwadau’r Aelod Lleol a gadarnhaodd ei fod yn gwrthwynebu’r bwriad.

 

Ystyriwyd bod y bwriad yn cydymffurfio gyda chanllawiau a pholisïau cynllunio ac felly roedd y swyddogion yn argymell caniatáu y cais gydag amodau oedd wedi eu rhestru yn yr adroddiad ynghyd ag amodau ychwanegol yn ymwneud a chytuno gorffeniadau, drysau, ffenestri a manylion triniaethau ffin.

 

b)           Yn manteisio ar yr hawl i siarad, nododd yr Asiant y sylwadau canlynol

·        Y bwriad yw dymchwel yr eiddo presennol ac adeiladu tŷ newydd, 3 llofft fydd yn diwallu’r anghenion tai lleol

·        Bod Ael Y Bryn wedi bod ym mherchnogaeth Cynefin ers iddo gael ei adael iddynt mewn ewyllys

·        Yn cydnabod bod yr eiddo wedi bod yn wag ers tro, ond heriol oedd cael cynllun ar ei gyfer oedd yn hyfyw a chynaliadwy

·        Nid yw’r eiddo yn addas yn ei ffurf bresennol ar gyfer teulu

·        Nid yw’n cwrdd gyda safonau ansawdd tai Llywodraeth Cymru ac ni fuasai gwaith atgyweirio yn ei ffurf strwythurol bresennol yn bodloni’r safonau chwaith, e.e., yr adroddiad strwythurol yn amlygu bod y grisiau presennol yn creu risg i unrhyw breswylydd ac y byddai eu hail wneud yn golygu colli un stafell wely

·        Opsiwn gorau fyddai dymchwel a chreu eiddo newydd fydd yn cydymffurfio gyda gofynion Llywodraeth Cymru ar gyfer tai newydd

·        Byddai Cynefin yn arwain ar y gwaith gyda chefnogaeth grant gan Lywodraeth Cymru fydd yn cael ei reoli drwy raglen datblygu Cyngor Gwynedd - bydd yn cyfarch Strategaeth Tai Cyngor Gwynedd

·        Bod Cynefin wedi ymgynghori a chydweithio gydag ymgynghorwyr perthnasol i sicrhau bod y cynlluniau yn dderbyniol ac hefyd wedi cyfarfod gyda Chyngor Cymuned Aberdaron a swyddogion Cyngor Gwynedd i drafod y cynlluniau - diolchwyd iddynt am eu sylwadau.

·        Er yn cydnabod pryderon gan rai am y dyluniad ac nad oedd yn gweddu i’r ardal, nodwyd bod bwriad ail ddefnyddio cerrig o’r hen dŷ ar y tŷ newydd

·        Bod y cais yn cydymffurfio gyda pholisïau cynllunio

·        Bod bwriad gosod y tŷ newydd ar sail rent gan flaenoriaethu rhent canolraddol drwy bolisïau Tai Teg sydd yn blaenoriaethu cysylltiad lleol fel rhan o’u gofynion

·        Bod y rhestr aros yn dangos bod angen eiddo yn Rhiw

·        Bod Tai Teg yn darparu tai i bobl leol, gan gynnwys rhai sydd yn siarad Cymraeg

·        Yn gofyn i’r Pwyllgor gymeradwyo’r cais am dŷ fforddiadwy yn Rhiw

c)           Yn manteisio ar yr hawl i siarad, nododd yr Aelod Lleol y sylwadau canlynol

·        Bod Ael y Bryn yn fwthyn traddodiadol sydd yn rhan ehangach o glwstwr o fythynnod traddodiadol Mynydd y Rhiw sydd yn gorwedd ynghanol AHNE LlŷN

·        Yn rhan o Arfordir Treftadaeth Llyn ac yn ymylu ar SAC Ardal Cadwraeth Penllyn a'r Sarnau. Bythynnod a ddylasai cael eu gwarchod rhag datblygiadau fel hyn

·        Y cais arfaethedig yn groes i'r polisïau canlynol: AMG1 Gwrthodir ceisiadau a fydd yn amharu'n negyddol ar olygfeydd i mewn ac allan o'r AHNE; AMG3; AMG4; PS19 Bydd y cynghorau 'n rheoli datblygiadau er mwyn gwarchod a lle bo'n berthnasol gwella amgylchedd naturiol cefn gwlad ac arfordir ardal y cynllun a gwrthodir cynigion a fydd yn cael effaith sylweddol andwyol arnynt.

·        Y datblygiad newydd yn groes i Awyr Dywyll AHNE Llŷn

·        Bod Ael y Bryn wedi ei adael i Dai Eryri / Cynefin mewn ewyllys gan y cyn-berchennog gydag amod bod teulu ifanc lleol yn ymgartrefu ynddo - hyn wedi digwydd ddeuddeg mlynedd yn ôl

·        Y teimlad yn lleol yw bod Cynefin wedi amddifadu teulu lleol o gael cartref a gyda’r eiddo wedi bod yn wag dros ddegawd, y gwaith strwythurol wedi dirywio

·        Yn dilyn cyflwyniad gan Cynefin yn egluro’r opsiwn i ddymchwel, amlygwyd y rhesymeg dros hynny gan nodi bod gofyn i’r eiddo ennill sgôr gradd A effeithlonrwydd ynni - i gyrraedd hynny, dymchwel ac ail adeiladu fyddai’r unig opsiwn i sicrhau grant

·        Er derbyn y rhesymeg, rhaid i’r tŷ newydd fod yn debyg i’r eiddo gwreiddiol a gweddu i’r ardal a chadw cymeriad - nid oed ymdrech ddigonol wedi ei wneud gyda’r cais arfaethedig i sicrhau hyn

·        Yn ôl sylwadau’r Swyddog AHNE, nodwyd bod yr adeilad traddodiadol yn cyfrannu at gymeriad yr AHNE a’i fod yn awgrymu amod yn sicrhau y byddai angen ffenestri traddodiadol eu maint i weddu a chyfyngu llif-goleuadau. Serch hynny, nid yw’r amodau hyn wedi eu cynnwys yn yr adroddiad - pam felly holi am sylwadau? Ystyriwyd bod dyletswydd ar y pwyllgor i ystyried sylwadau ac amodau'r Swyddog AHNE

·        Bod gormod o glading plastig ar gynllun y tŷ newydd – nid yw hyn yn gweddu - angen mwy o ddefnydd carreg naturiol

·        Dim yn gofyn i’r Pwyllgor wrthod y cais gan y byddai hyn yn amddifadu grant i adnewyddu’r bwthyn fydd o ganlyniad yn sefyll yn wag, ond rhaid gwneud gwelliannau i’r cais i weddu’r ardal a chadw cymeriad Ael y Bryn.

 

ch)    Cynigiwyd ac eiliwyd cynnal ymweliad safle

 

Rheswm: Bod clystyrau o fythynnod traddodiadol yn cael eu colli - angen rhoi cyfle i’r Pwyllgor ymgyfarwyddo a’r lleoliad naturiol yma i asesu effaith weledol y safle

 

d)           Yn ystod y drafodaeth ddilynol, nodwyd y sylwadau canlynol gan yr Aelodau:

·        Nad oes angen tŷ modern, fel tŷ o Hollywood ynghanol bythynnod traddodiadol

·        Bod angen cynllun a dyluniad sydd yn gweddu i’r ardal

 

·        Bod ymweliad safle yn dileu y grant – adeiladu tŷ i bobl leol yw’r flaenoriaeth

 

PENDERFYNWYD: Gohirio penderfyniad a chynnal ymweliad safle