Agenda item

I ystyried yr adroddiad.

Derbyn yr adroddiad gan nodi’r sylwadau a dderbyniwyd yn ystod y drafodaeth.

Cyflwynwyd yr adroddiad gan Bennaeth yr Adran Priffyrdd, Peirianneg ac YGC a'r Rheolwr Datblygu Busnes. Tynnwyd sylw’n fras at y prif bwyntiau canlynol:

Nodwyd bod yr adran yn arwain ar dri phrosiect yng Nghynllun y Cyngor ar hyn o bryd, sef; Cymunedau Glân a Thaclus, Gweithredu ar risgiau llifogydd ac Ymestyn cyfleoedd chwarae a chymdeithasu ar gyfer plant a phobl ifanc y Sir.

Adroddwyd bod 11 o feinciau clyfar wedi cael eu gosod yng Ngwynedd eleni. Eglurwyd bod y meinciau hyn yn gallu adrodd hanes lleol cyfagos drwy gydweithio gydag unigolion adnabyddus megis Casi Wyn, Rhys Iorwerth, Guto Dafydd, Gwyneth Glyn, Manon Steffan Ros a Cedron Sion. Mynegwyd balchder bod y prosiect hwn yn arloesol gan ei fod yn ddull newydd o rannu hanes lleol drwy gyfrwng y Gymraeg. Tynnwyd sylw bod y meinciau wedi cael eu gosod ym Mangor, Caernarfon, Pwllheli, Cricieth, Tywyn a Phorthmadog.

Atgoffwyd bod Ymgynghoriaeth Gwynedd yn cael ei weinyddu fel endid masnachol, gan gadarnhau bod y Cynllun Busnes newydd wedi cael ei lansio ym mis Ebrill eleni, ar gyfer y pum mlynedd nesaf. Sicrhawyd bod y cynllun busnes hwn yn cael ei ddatblygu a’i raeadru drwy’r iaith Gymraeg. Ymhelaethwyd bod gwella sgiliau iaith staff yn nod yn ystod y cyfnod hwn drwy ddarparu addysg a hyfforddiant Cymraeg. Rhannwyd fideo recriwtio Ymgynghoriaeth Gwynedd a fydd yn cael ei rannu ar y cyfryngau cymdeithasol yn fuan.

Cadarnhawyd bod yr adran yn cydweithio gyda busnesau lleol ac isgontractwyr yn rheolaidd gan rannu enghraifft bod Tîm Categori Amgylchedd wedi cynnal digwyddiad yn Nhŷ Gwyrddfai ym Mhenygroes gyda chydweithrediad adrannau eraill y Cyngor, Cymdeithas Tai Adra Cyf yn ogystal â chwmnïau eraill. Yn debyg, nodwyd bod yr Adran yn mynychu ffeiriau swyddi a digwyddiadau er mwyn ymgysylltu a phobl Gwynedd, drwy gynnal sgyrsiau wyneb i wyneb ar gyfleon y cwmni a’r buddion o weithio i sefydliad gyda gweithle Cymraeg.

Diolchwyd i’r Adran Gyllid a’r gwasanaeth Technoleg Gwybodaeth am ddatblygu system i reoli Fflyd y Cyngor drwy gyfrwng y Gymraeg gan ei fod yn cynorthwyo’r broses o archebu deunyddiau, cofnodi gwaith, rheoli gyrwyr, cynnal rhaglen cynnal a chadw a chadw manylion am gerbydau. Nodwyd bod y rhaglen hon yn Gymraeg ac wedi cael ei werthu ymlaen i awdurdodau eraill fel y nodwyd yn eitem flaenorol y cyfarfod hwn.

Diweddarwyd bod yr Adran yn y broses o ddiweddaru cerbydau’r fflyd i fod yn rhai trydan, gan nodi bod 88 cerbyd trydan yn rhan o’r fflyd ar hyn o bryd. Cydnabuwyd bod defnyddio cerbydau trydan yn parhau i fod yn brofiad newydd i aelodau staff y Cyngor ac felly mae fideo Cymraeg ‘Sut i ddefnyddio cerbydau trydan’ wedi cael ei ddatblygu gan yr Adran i gynorthwyo aelodau staff wrth ddefnyddio’r cerbyd a'i wefru.

Manylwyd bod yr Adran yn cyflogi 433 o aelodau staff a bod 265 (61.2%) wedi cyflawni eu hunanasesiad iaith. Pwysleisiwyd bod y 149 aelod arall o staff yn weithwyr rheng flaen ac mae’r rheolwyr wedi cwblhau eu hunanasesiad ar eu rhan. Cadarnhawyd mai dim ond 19 o aelodau staff sydd heb gyflawni unrhyw fath o asesiad iaith ar hyn o bryd. Mynegwyd balchder bod 96.9% o aelodau staff yr Adran yn cyrraedd dynodiad iaith eu swydd, gan nodi bod gwaith yn cael ei wneud er mwyn cynnig hyfforddiant Cymraeg i’r 13 aelod staff sydd ddim yn cyrraedd y dynodiad iaith berthnasol ar gyfer eu swydd.

Cydnabuwyd bod rhai systemau a ddefnyddir gan yr Adran yn rhai uniaith Saesneg, gan sicrhau bod pob ymdrech yn cael ei wneud i sicrhau eu bod yn cael eu cyfieithu i’r Gymraeg i’r dyfodol er budd yr aelodau staff a’r cyhoedd.

Mynegwyd balchder bod gan wasanaeth Ymgynghoriaeth Gwynedd achrediad Buddsoddwyr Mewn Pobl gan ymfalchïo bod modd cynnal yr arolwg er mwyn derbyn yr achrediad drwy gyfrwng y Gymraeg.

Yn ystod y drafodaeth, cyflwynwyd y sylwadau a ganlyn:- 

Ystyriwyd bod y nifer o aelodau staff sydd wedi cyflawni’r hunanasesiad iaith yn isel iawn, gan ofyn i’r swyddogion am wybodaeth bellach am y mater hwn. Mewn ymateb i’r ystyriaethau, eglurodd Pennaeth yr Adran bod hyn yn deillio o’r ffaith bod nifer o aelodau staff yr adran yn weithwyr rheng flaen ac nid oes ganddynt gyfrifiadur y Cyngor yn rhinwedd y swydd gan olygu nad oes ganddynt fynediad i’r asesiad. Ymhelaethodd y Rheolwr Datblygu Busnes bod gwaith yn mynd rhagddo  i sicrhau bod Rheolwr yr aelodau staff hynny sydd heb fynediad i’r asesiad yn ei gyflawni gyda hwy ar eu rhan. Cadarnhaodd Swyddog Dysgu a Datblygu’r Iaith Gymraeg bod sylwadau a gyflwynir gan Reolwr yn ystod asesiadau iaith yn gallu bod yn adlewyrchiad mwy teg o wir sefyllfa ieithyddol y staff gan fod unigolion yn dueddol o fod yn ddihyder yn eu sgiliau ieithyddol wrth hunanasesu.

Clodforwyd yr Adran am hyrwyddo eu gwaith mewn amrywiol ffyrdd gan ystyried os yw’r ymgyrchoedd recriwtio hyn wedi bod yn llwyddiannus. Mewn ymateb, cadarnhaodd Pennaeth yr Adran bod nifer o swyddi cyffrous wedi cael eu hysbysebu yn ddiweddar. Nodwyd mai prif her yr Adran yw denu pobl yn ôl i Wynedd i weithio oherwydd bod rhagdybiaeth nad oes swyddi arbenigol ar gael yma. Mynegwyd balchder bod yr Adran wedi llwyddo i gynnig swyddi arbenigol a denu pobl yn ôl i’r ardal a chodi proffil yr Adran ac Ymgynghoriaeth Gwynedd fel cyflogwr lleol. Gobeithiwyd bod y fideo recriwtio a fydd yn cael ei rannu ar y cyfryngau cymdeithasol yn fuan yn hwb ychwanegol i'r nod hwn i’r dyfodol, gan gadarnhau bod yr Adran yn cynnig swyddi a phrentisiaethau. Yn debyg, cadarnhaodd y Rheolwr Datblygu Busnes bod yr Adran wedi hyrwyddo gwaith yr Adran i dros 40 o fyfyrwyr gyda chymorth MSbarc yn ddiwedd a bod myfyrwyr profiad gwaith yn cael eu derbyn yn rheolaidd i ddysgu mwy am yr hyn mae’r Adran yn ei gyflawni.

Diolchwyd am yr adroddiad.

PENDERFYNWYD

Derbyn yr adroddiad gan nodi’r sylwadau a dderbyniwyd yn ystod y drafodaeth.