Agenda item

Y Prif Weithredwr a’r Swyddog Cynllunio Strategol Rhanbarthol i gyflwyno’r adroddiad.

Argymell i'r Cyd-bwyllgor Corfforedig ei fod yn barod i gymeradwyo’r Cytundeb Cyflawni drafft yn dilyn ymgynghori a’i gyflwyno i Lywodraeth Cymru, yn amodol ar benderfyniad cyllid yr CDS.

Cyflwynwyd yr adroddiad gan y Swyddog Cynllunio Datblygu Strategol Rhanbarthol.

PENDERFYNWYD

Argymell i'r Cyd-bwyllgor Corfforedig ei fod yn barod i gymeradwyo’r Cytundeb Cyflawni drafft yn dilyn ymgynghori a’i gyflwyno i Lywodraeth Cymru, yn amodol ar benderfyniad cyllid yr CDS.

RHESYMAU DROS Y PENDERFYNIAD

Yr Is-bwyllgor Cynllunio Strategol sydd yn gyfrifol am baratoi’r Cytundeb Cyflawni drafft. Mae gan yr is-bwyllgor swyddogaethau cydlynu a chynllunio ynghylch pob cam tuag at gyflawni'r CDS.

TRAFODAETH

Atgoffwyd bod yr Aelodau wedi cymeradwyo cynnal ymgynghoriad cyhoeddus o Gytundeb Cyflawni’r Cynllun Datblygu Strategol ar ffurf draft am gyfnod o 6 wythnos, mewn cyfarfod anffurfiol o’r Is-bwyllgor hwn a gynhaliwyd ar 27ain Mehefin 2025. Diweddarwyd bod yr ymgynghoriad cyhoeddus bellach wedi dod i ben gan gadarnhau bod yr adroddiad hwn yn cyflwyno’r adborth ac ymatebion a dderbyniwyd gan y cyhoedd a rhanddeiliaid.

Adroddwyd bod Cynllun Cyflawni’r Cynllun Datblygu Strategol wedi cael ei gymeradwyo gan y Cyd-bwyllgor Corfforedig yn ei gyfarfod ar 18 Gorffennaf 2025 a bod yr ymatebion a dderbyniwyd fel rhan o’r ymgynghoriad yn cyfrannu at ddiweddariad o’r ddogfen honno.

Tynnwyd sylw bod Swyddogion wedi gwahodd nifer fawr o rhanddeiliaid a phartneriaid i gymryd rhan yn yr ymgynghoriad cyhoeddus, er mwyn sicrhau proses agored. Diweddarwyd bod 16 ymateb ffurfiol wedi cael ei derbyn i’r ymgynghoriad cyhoeddus gan nifer o sefydliadau megis Awdurdodau Lleol a swyddogion penodol oddi fewn iddynt, Comisiynydd y Gymraeg, grwpiau cymunedol a Heneb. Cydnabuwyd nad oes nifer fawr o ymatebion wedi dod i law ond sicrhawyd bod y sylwadau a dderbyniwyd yn safonol iawn a bod y broses hon yn allweddol o godi ymwybyddiaeth o’r Cynllun Datblygu Strategol yn ei gyfanrwydd.

Nodwyd bod fersiwn diwygiedig o’r ymatebion a dderbyniwyd fel rhan o’r ymgynghoriad cyhoeddus wedi cael ei gylchredeg i’r Aelodau yn dilyn cyhoeddi’r Rhaglen ar gyfer y cyfarfod hwn. Eglurwyd nad oedd yr ymgynghoriad wedi dod i ben pan roedd dogfennaeth y cyfarfod hwn yn cael eu cyhoeddi ac roedd nifer o’r ymatebion wedi cyrraedd Swyddogion ar ddiwrnod olaf yr ymgynghoriad. Ystyriwyd ei fod yn bwysig bod yr aelodau yn derbyn yr holl wybodaeth a ddaeth i law ac felly rhannwyd fersiwn diwygiedig o’r ymatebion i’r Aelodau gyda chaniatâd y Cadeirydd.

Amlygwyd bod yr ymatebion yn gofyn a oes amser digonol wedi cael ei glustnodi ar gyfer ymarferion ymgynghorol. Eglurwyd bod y gofyniadau statudol o sicrhau bod ymgynghoriadau cyhoeddus yn cael eu cynnal am gyfnod o 6 wythnos yn cael ei lynu ato er mwyn sicrhau cydymffurfiaeth ddeddfwriaethol. Nodwyd hefyd bod gan y Cyd-bwyllgor bwerau i ymestyn cyfnodau ymgynghoriadau cyhoeddus os yw’n dymuno gwneud hynny.

Pwysleisiwyd bod nifer o ymatebion i’r ymgynghoriad yn tynnu sylw at ystyriaethau’r iaith Gymraeg. Diolchwyd iddynt am eu sylwadau gan sicrhau bod yr iaith Gymraeg yn derbyn ystyriaeth barhaus o fewn gwaith y Cyd-bwyllgor.

Eglurwyd bod nifer o ymatebwyr wedi tynnu sylw at hyd y Cynllun Cyflawni, sef cyfnod o 5 mlynedd, gan ystyried os yw’r amserlen hon yn rhy heriol ac os bydd angen amser ychwanegol i gyflawni’r Cynllun Datblygu Strategol. Mewn ymateb i’r ystyriaethau hyn, cadarnhaodd y Swyddog Cynllunio Datblygu Strategol Rhanbarthol bod amserlen y Cynllun yn cyd-fynd â gofynion statudol gan bwysleisio bod swyddogion yn derbyn arweiniad a chyngor er mwyn sicrhau nad yw’r amserlen hon yn llithro.

Adroddwyd bod nifer o’r Awdurdodau Lleol a gyflwynodd sylwadau i’r ymgynghoriad cyhoeddus wedi ystyried sut mae’r Cynllun yn cael ei ariannu a pha effaith byddai hynny yn ei gael ar gyllidebau ac adnoddau’r Awdurdodau Lleol. Cydnabuwyd bod cyllido’r Cynllun yn fater i’r Cyd-bwyllgor Corfforedig a’i fod yn derbyn ystyriaeth gyson. Ymhelaethwyd bod Swyddogion yn awyddus i sicrhau bod adnoddau yn cael eu defnyddio yn y dull mwyaf effeithiol er mwyn sicrhau proses cydweithredol ar draws y rhanbarth. Manylwyd bydd rhaid creu swyddi a chynnig secondiadau er mwyn sicrhau bod y Cynllun yn cael ei gyflawni gan wneud pob ymdrech i sicrhau bod y broses honno yn effeithiol a pheidio amharu’n negyddol ar adnoddau’r Awdurdodau Lleol.