Agenda item

I ystyried a chynnig adborth ar yr adroddiad

Cyflwynwyd yr adroddiad blynyddol (drafft) gan y Rheolwr Buddsoddi. Eglurwyd bod yr adroddiad yn darparu manylion am weithgareddau’r Gronfa Bensiwn yn ystod y flwyddyn a ddaeth i ben 31 Mawrth 2025 ac wedi ei gwblhau yn unol â chanllawiau statudol. Tynnwyd sylw at newidiadau yng nghofynion y Bwrdd Cynghori Cynllun (Scheme Advisory Board) i adnabod a chyflwyno'r wybodaeth drwy dri chategori - rhaid (must), dylid (should) ac efallai (may). Sicrhawyd bod popeth sydd yn cael ei adnabod fel ‘rhaid’ a ‘dylid’ wedi cael ei gynnwys, oni bai nad oedd y wybodaeth ar gael. Yn sgil hynny eglurwyd bod yr adroddiad blynyddol wedi cynnyddu mewn maint gan ei fod yn cynnwys adroddiadau blynyddol gan y Bwrdd, y Pwyllgor Pensiynau, gwybodaeth bellach am ystadegau gweinyddu, a gwybodaeth bellach am pwlio.

Adroddwyd bod yr adroddiad yn y broses o gael ei adolygu gan Archwilio Cymru gyda bwriad o’i gyflwyno gyda’r cyfrifon terfynol yng nghyfarfod blynyddol y Gronfa Bensiwn ar y 24ain o Dachwedd 2025.

Diolchwyd am yr adroddiad

Sylwadau yn codi o’r drafodaeth ddilynol:

·        Bod y sefyllfa yn un iach

·        Yn llongyfarch y tîm ar eu gwaith da

·        Bod y sefyllfa yn dystiolaeth o’r llywodraethu da mewn hinsawdd economi heriol

·        Bod y sefyllfa wedi gwella yn sylweddol dros y blynyddoedd - angen ceisio osgoi sefyllfa o ostwng a chodi cyfraniadau

·        Bod yr adroddiad yn un trylwyr ac yn hawdd i’w ddarllen

·        Yn derbyn nad oedd angen cynnwys gwybodaeth categori ‘efallai’ (may)

Mewn ymateb i sylw bod gostyngiadau i’r cyflogwyr yn sgil prisiad ac os oedd byffer wedi ei osod, nodwyd bod y cyflogwyr mwyaf, o ystyried bod y  gronfa wedi ei gyllido 166%,  wedi gosod mecanwaith sefydlogi a bod cyflogwyr eraill gyda bwriad o wneud rhywbeth tebyg.

Mewn ymateb i gwestiwn bod cyfeiriad y Gronfa at gyrraedd targed sero net yn 2050, ond bod Strategaeth Hinsawdd y Cyngor wedi nodi targed sero net erbyn 2030 a pam y gwrthdaro, nodwyd bod trafodaethau wedi eu cynnal gyda swyddogion, ond bod targed y Gronfa Bensiwn yn seiliedig ar ddadansoddiad manwl gydag ymrwymiad i gynnal adolygiadau i geisio gostwng y dyddiad. Ategwyd nad oedd 2030 yn opsiwn i’r Gronfa.

Mewn ymateb i gwestiwn ategol os oedd ymrwymiad i gyrraedd y targed 2050 yn gynt ac os oedd ystyriaeth i darged interim, nodwyd bod gwaith pellach yn cael ei wneud ar yr amcanion strategol gyda Hymans yn edrych ar yr asedau i geisio cwrdd â’r targed yn gynharach. Ategwyd y byddai’n debygol y bydd addasiadau pellach yn dilyn sefydlu cwmni IMCo fydd yn cymryd drosodd yr agweddau llywodraethiant, cynghori a sicrhau gwerth am arian. Ategwyd nad oedd gwrthwynebiad i’r awgrym i ystyried targed interim gan fod holl aelodau’r pwl gyda’r un agwedd tuag at gyrraedd at y targed sero net yn gynt.

Mewn ymateb i sylw bod cofnod o ddatblygiad aelodau o’r Pwyllgor Pensiynau wedi ei gynnwys yn yr adroddiad ac os dylid gweithredu cofnod tebyg ar gyfer aelodau’r Bwrdd Pensiwn, nodwyd bod cynllun hyfforddiant mewn lle ar gyfer aelodau’r Bwrdd Pensiwn a bod y Rheolwr Buddsoddi yn cadw cofnod o’r datblygiadau hynny. Nodwyd bod cofnod aelodau’r Pwyllgor yn un mwy ffurfiol.

Mewn ymateb i sylw  ynglŷn ag aelodaeth y Gronfa a’r gofod rhwng cyfranwyr a nifer pensiynwyr a delir, ac os oedd gwaith modelu yn cael ei wneud ar y tueddiadau hyn,  nodwyd bod Hymans yn ymwybodol o’r tueddiadau a’u bod yn ystyried effaith hyn i’r dyfodol.

Wrth gyfeirio at y dangosyddion perfformiad allweddol (DPA), holiwyd beth oedd y rheswm dros ‘beidio adrodd’, ac os oedd amserlen / targed i ‘adrodd’, nodwyd bod gwaith yn cael ei wneud i gwrdd â’r gofynion. Amlygwyd nad oedd dull adrodd perfformiad Gwynedd yn dilyn proses o gwblhau DPA (Gwynedd yn adrodd ar welliant parhaus) ac felly bod angen addasu’r dasg i gyfarch y gofynion. Ategwyd bod tasgau wedi eu gosod mewn ffordd benodol, ond nad oedd Gwynedd yn cofnodi yn yr un modd â gofynion CIPFA am wybodaeth. Cadarnhawyd bod y perfformiad yn dda ac yn cyfarch y gofynion, ond bod angen addasu’r system i amlygu’r perfformiad yn well.

Mewn ymateb i gwestiwn ynglŷn â ‘gwybodaeth ddim ar gael’, (DPA Cyfathrebu) nodwyd mai enghraifft o hyn fyddai defnydd system ffôn newydd y Cyngor sydd heb orffen cael ei sefydlu. Bydd y wybodaeth yn fwy cyflawn ar gyfer flwyddyn nesaf.

PENDERFYNWYD

Derbyn yr adroddiad a nodi’r wybodaeth