Agenda item

Newid defnydd swyddfeydd i 5 fflat preswyl, yn cynnwys estyniad ar y cefn. Gosod pwmp gwres ffynhonnell aer a gosod drws i storfa gwastraff.

 

AELOD LLEOL: Cynghorydd Cai Larsen

 

Dolen i'r dogfennau cefndir perthnasol

PENDERFYNIAD: Gohirio

 

Rheswm: Cais am wybodaeth a thystiolaeth pellach o’r angen, er mwyn sicrhau gofynion polisi TAI 8

 

 

Newid defnydd swyddfeydd i 5 fflat preswyl, yn cynnwys estyniad ar y cefn. Gosod pwmp gwres ffynhonnell aer a gosod drws i storfa gwastraff

 

Tynnwyd sylw at y ffurflen sylwadau hwyr

 

Amlygodd y Rheolwr Cynllunio bod yr adeilad yn un o faint sylweddol wedi ei leoli ar gornel y stryd fawr o fewn ffin datblygu Tref Caernarfon ac Ardal Cadwraeth Safle Treftadaeth y Byd. Nid oedd bwriad newid edrychiad blaen nac ochr yr adeilad sy’n amlwg o’r stryd fawr.  Cadarnhawyd bod capasiti digonol o fewn cyflenwad dangosol Caernarfon ar gyfer y datblygiad yma ar hyn o bryd.

 

Amlygwyd bod yr eiddo o dan berchnogaeth Cyngor Gwynedd ac y bydd y defnydd arfaethedig yn rhan o ymateb statudol y Cyngor i’r ddyletswydd o letya pobl digartref. Pwysleisiwyd mai grŵp targed y cynllun yw unigolion digartref risg isel, nid llety â chefnogaeth gymhleth na defnydd fyddai’n creu lefel uchel o effaith ar y gymuned. Nodwyd bod yr unedau yn cydymffurfio gyda safonau Llywodraeth Cymru ar gyfer unedau fforddiadwy o ran maint  a‘r defnydd arfaethedig yn mynd i’r afael â digartrefedd (heb achosi gorlwytho ar y ddarpariaeth tai lleol, ac yn darparu unedau fforddiadwy yn unol â gofynion y polisi cynllunio).

 

Cyfeiriwyd at ddatganiad oedd wedi ei dderbyn gan Adran Tai ac Eiddo Cyngor Gwynedd yn cadarnhau y byddai’r eiddo yn cael ei glustnodi fel eiddo “meanwhile” sy’n cynnig llety sefydlog am gyfnod o hyd at ddwy flynedd tra bod unigolion yn aros am ddatrysiad parhaol addas. Amlygwyd bod cyfanswm o 81 o unigolion wedi eu lleoli o fewn y Dref ar hyn o bryd ac nad oedd cynlluniau ychwanegol yn cael eu hystyried yng Nghaernarfon ar hyn o bryd. Gyda’r bwriad yn cael eu darparu fel eiddo cymdeithasol o dan reolaeth y Cyngor o fewn Canolfan Gwasanaeth Trefol, ystyriwyd fod y bwriad yn cwrdd â gofynion polisi TAI 15 yn ddarostyngedig i gynnwys amod fod y bwriad yn sicrhau unedau fforddiadwy am byth.

 

Eglurwyd  bod y gwaith addasu yn cynnwys newidiadau mewnol, ac adeiladu estyniad 3 llawr o fewn iard gefn yr eiddo ac felly  ni fyddai’n effeithio ar edrychiad na chymeriad yr adeilad sy’n amlwg i’r cyhoedd na chael  effaith weledol andwyol ar Safle Treftadaeth y Byd na’r Ardal Gadwraeth. Byddai’r gwaith yn cynnwys gosod ffenestri llawr daear a ffenestri llawr cyntaf ar gyfer ystafelloedd gwely cefn a chadarnhawyd y byddai’r ffenestri llawr cyntaf i’w gosod gyda gwydr wedi eu cymylu - bydd modd gosod amod cynllunio er mwyn sicrhau hyn. Nodwyd hefyd fod bwriad gosod amod cynllunio ar gyfer cyflwyno manylion a lleoliad y pwmp gwres ffynhonnell aer. O ganlyniad, ystyriwyd na fyddai’r bwriad yn cael effaith andwyol sylweddol ar drigolion cyfagos.

 

Yng nghyd-destun materion trafnidiaeth a mynediad, nodwyd bod yr eiddo wedi ei leoli yng nghanol y Dref ble mae gofodau parcio cerbydau ar y strydoedd ac o fewn meysydd parcio cyhoeddus. O ran materion bioamrywiaeth cyfeiriwyd at y gwelliannau oedd wedi eu cynnig ac adroddwyd bod y datganiad iaith a gyflwynwyd yn datgan effaith niwtral i bositif ar yr iaith.

 

Ystyriwyd fod y bwriad yn cydymffurfio gyda gofynion polisïau lleol a chenedlaethol a’r swyddogion yn argymell caniatáu’r cais yn ddarostyngedig i osod amodau perthnasol.

 

b)               Yn manteisio ar yr hawl i siarad, nododd yr Aelod Lleol y sylwadau canlynol;

·        Ei fod yn gwrthwynebu’r cais, er yn teimlo yn anghyffyrddus iawn yn gwneud hynny

·        Bwriad dros newid dynodiad yr eiddo oedd darparu lloches ‘meanwhile’ ar gyfer pobl ddigartref sy’n aros am ddatrysiad parhaol i’w anghenion tai

·        Ei fod yn gefnogol iawn i’w etholwyr sydd yn chwilio am gymorth wrth wynebu digartrefedd – yn teimlo’r boen a’r gofid sydd yn eu hwynebu ar amser anodd.

·        Bod problem arwyddocaol o ran diffyg tai cymdeithasol yng Ngwynedd sy’n gallu arwain at ddigartrefedd - byddai’n hapus cefnogi rhan fwyaf o gynlluniau’r  Cyngor i fynd i’r afael a hyn

·        Er hynny, bod ward Canol Tref Caernarfon eisoes yn darparu yn helaeth ar gyfer y digartref a’i fod yn falch o hyn ac yn cymryd y cyfrifoldeb o ddifrif

·        Bod 58 unigolyn mewn gwahanol lety a lleoliadau argyfwng yn y Dref ynghyd â 23 unigolyn mewn eiddo wedi ei lesu gan yr Adran Tai; Cyfanswm 81unigolyn

·        Bod lleoliad 5 fflat yn cael eu rhentu gan Adra i GISDA a’i fod pob amser yn gefnogol i’r elusen yma

·        Ymwybodol hefyd o nifer sylweddol o gynlluniau preifat megis HMO’s sydd yng nghanol Caernarfon. Cysylltiad agos, er yn gymhleth  rhwng presenoldeb HMO a digartrefedd

·        Bod nifer o gynlluniau ar y gweill i ddarparu lloches -  Cynllun ‘Lle Da’ fydd wedi ei leoli yn hen adeilad Banc Nat West a chynllun sylweddol hen Swyddfa’r Goron (40 uned breswyl) - yn gefnogol i’r cynlluniau er gwrthwynebiad lleol

·        Yn gefnogol i ddatblygiad fel hyn mewn egwyddor, ond yn cymryd y safbwynt oherwydd ei fod yn pryderu bod gormod o’r un math o eiddo sy’n mynd i’r afael â digartrefedd wedi eu lleoli mewn tref sydd yn fach o ran maint, ond yn uchel o ran poblogaeth

·        Pryder am gynnydd mewn tor cyfraith a phroblemau gwrthgymdeithasol

·        Petai gwerthu rhain fel fflatiau yn opsiwn, neu eu rhentu gyda thelerau parhaol / tai cymdeithasol, yna byddai’n gefnogol iawn i hynny

 

c)                Cynigiwyd ac eiliwyd gohirio y cais

 

Rheswm: bod angen gwybodaeth a thystiolaeth bellach o’r angen, er mwyn sicrhau gofynion polisi TAI 8.

 

ch)          Yn ystod y drafodaeth ddilynol, nodwyd y sylwadau canlynol gan Aelodau:

·       Bod angen gwell dealltwriaeth o’r galw i sicrhau bod y fflatiau yn cartrefu’r bobl iawn - angen tystiolaeth bendant

·       Defnydd da o hen swyddfeydd, ond a’i digartrefedd yw’r defnydd gorau?

·       Bod y Cynllun yn rhan o Gynllun Tai y Cyngor sydd ynghlwm â grant (fydd yn cael ei golli os na fydd defnydd yn cael ei wneud ohono)

·       Pam nad oedd ymgynghori gyda’r Aelod Lleol wedi ei wneud ymlaen llaw?

·       Byddai cartrefu’r digartref yn arbediad - yn osgoi defnydd llety argyfwng

 

Mewn ymateb i sylwadau ynglŷn â phrofi’r angen tynnwyd sylw at y ffurflen sylwadau hwyr oedd yn nodi bod galw mawr am y math yma o eiddo, gan fod nifer sylweddol yn disgwyl mewn llety argyfwng anaddas am flynyddoedd cyn medru symud ymlaen i eiddo addas, mwy sefydlog. Ategwyd bod y data yn profi hynny, gydag 81 unigolyn mewn gwahanol lety a lleoliadau argyfwng o fewn y dref, ac amcan y cynnig yw cyfarch  dyletswydd statudol o letya pobl ddigartref.

 

Nodwyd bod Caernarfon yn cael ei adnabod fel Canolfan Gwasanaeth Trefol ac felly’n anheddle sy’n cyfarch angen y Sir yn ei gyfanrwydd. Ystyriwyd felly nad oedd amheuaeth o’r angen, ond o safbwynt Cynllunio, bod bwriad gosod amod fforddiadwy fel gall y cynllun esblygu yn llety fforddiadwyedd i’r dyfodol. Amlygwyd bod y math o lety yn un cymharol newydd ac yn gam at beidio rhoi pobl mewn llety argyfwng sydd ddim yn addas i bwrpas. Bwriad y Cyngor  yw symud i ffwrdd o hyn. Er yn derbyn bod cynlluniau eraill yn y Dref ar  gyfer y digartref, nid oedd ceisiadau wedi eu cyflwyno.

 

Mewn ymateb i sylwadau am y grant ac am arbedion ariannol, nododd y Swyddog Monitro nad oedd goblygiadau ariannol yn berthnasol i’r drefn cynllunio ac mai defnydd tir oedd yn cael ei ystyried ac nid defnydd grant.

 

PENDERFYNWYD: Gohirio

 

Rheswm: Cais am wybodaeth a thystiolaeth bellach o’r angen, er mwyn sicrhau gofynion polisi TAI 8