Agenda item

Caniatâd cynllunio dros dro am gyfnod o 40 mlynedd i godi System Storio Ynni (ESS), ynghyd â seilwaith cysylltiedig, mynediad i’r safle, tirlunio a gwaith atodol ar dir yn Tyddyn Forgan, Llanddeiniolen, Caernarfon, LL55 3AN

 

AELODAU LLEOL: Cynghorydd Elwyn Jones a’r Cynghorydd Menna Baines

 

Dolen i'r dogfennau cefndir perthnasol

PENDERFYNIAD:

 

1.                         5 mlynedd.

2.                         Yn unol â’r cynlluniau/manylion a gyflwynwyd gyda’r cais.

3.                         Cydymffurfio â’r cynllun tirweddu ynghyd a gwaith cynnal a chadw i’r dyfodol.

4.                         Cydymffurfiaeth gydag argymhellion y dogfennau Asesiad Effaith Ecolegol, Asesiad Effaith Coedyddiaeth, Nodyn Technegol Ecolegol a’r Datganiad Seilwaith Gwyrdd.

5.                         Cydymffurfiaeth gyda’r Asesiad Canlyniadau Llifogydd. 

6.                         Cyfyngu amseroedd adeiladu

7.                         Gosod uchafswm ar gyfer allyriadau sŵn

8.                         Cytuno ar fesurau monitro sŵn

9.                         Amod i sicrhau camau priodol os darganfyddir llygredd annisgwyl.

10.                     Cytuno gyda gorffeniadau allanol y strwythurau.

11.                     Sicrhau enw Cymraeg ac arwyddion dwyieithog gyda’r flaenoriaeth i’r Gymraeg.

12.                     Cytuno rhaglen waith Archeolegol

13.                     Cyflwyno Cynllun Rheolaeth Adeiladu Amgylcheddol diwygiedig (i gynnwys rheolaeth o’r cyswllt gyda chyfarpar SP Manweb)

14.                     Cyflwyno Cynllun Rheolaeth Tirwedd ac Ecoleg ddiwygiedig i gymryd i ystyriaeth sylwadau’r Uned Bioamrywiaeth

15.                     Rhaid adfer y safle i’w gyflwr a gytunir gyda’r Awdurdod Cynllunio wedi i’r cyfnod gweithredol y datblygiad ddod i ben

 

Nodiadau:    

Uned Dŵr ac Amgylchedd

Cyfoeth Naturiol Cymru

Gwasanaeth Cynllunio Archeolegol Gwynedd

Dŵr Cymru

SP Manweb

 

Caniatâd cynllunio dros dro am gyfnod o 40 mlynedd i godi System Storio Ynni (ESS), ynghyd â seilwaith cysylltiedig, mynediad i’r safle, tirlunio a gwaith atodol ar dir yn Tyddyn Forgan, Llanddeiniolen, Caernarfon, LL55 3AN.

 

Tynnwyd sylw at y ffurflen sylwadau hwyr

 

Roedd rhai o’r Aelodau wedi ymweld â’r safle 12-01-26

 

a)    Amlygodd yr Uwch Swyddog Cynllunio bod y math o system yn storio ynni dros ben o ddatblygiadau ynni adnewyddadwy pan fo galw isel am drydan yna mae'n rhyddhau'r trydan fel mae’r galw yn codi.

 

Gyda’r Aelodau Lleol yn methu a bod yn bresennol, cyflwynodd y Swyddog ymatebion a dderbyniwyd ganddynt drwy e-bost;

 

Cyng. Menna Baines:

 

“Mae rhan fechan o’r datblygiad yn fy ward i gan fod is-orsaf drydan Pentir o fewn ei ffiniau. Mae’r Cyngor wedi ymrwymo i’r nod o fod yn garbon sero net erbyn 2030 ac mae’n ymddangos i mi fod y cynllun hwn yn gydnaws efo’r nod a’r egwyddor honno, a hynny am y byddai’n ffurfio rhan o rwydwaith cefnogol y gellid ei ddefnyddio yn ôl yr angen wrth reoli’r cyflenwad o ynni adnewyddol. Rwyf yn nodi pryderon a godwyd am ‘orddatblygiad’ o gynlluniau o’r fath yn yr ardal ond mae’n ymddangos bod lleoli’r datblygiad penodol yma ger yr is-orsaf yn ffordd o fanteisio ar y seilwaith sydd yno’n barod yn hytrach na chreu galw am fwy o geblau neu waith trwm pellach. O’r safbwynt hwnnw mae’r lleoliad yn gwneud synnwyr. O ran yr effaith weledol, mae’n ymddangos na fydd effaith rhy fawr, yn enwedig o gofio bod cyfarpar yr is-orsaf yno’n barod, a hefyd o ystyried mai dim ond yn rhannol y bydd y datblygiad i’w weld wrth i’r gwaith plannu arfaethedig aeddfedu dros amser gan sgrinio’r safle yn well. Rwyf hefyd yn nodi pryderon eraill a godwyd, yn enwedig y rhai am golli bioamrywiaeth ac am beryglu rhan o’r dreftadaeth archeolegol, ond rydw i’n derbyn bod amodau cadarn ynghlwm â’r argymhelliad o ganiatáu’r datblygiad. O sicrhau bod y datblygiad yn cadw at yr amodau hyn a’r rhai eraill sy’n cael eu rhestru, nid oes gennyf wrthwynebiad i’r cais”.

 

Cyng. Elwyn Jones:

 

“Hoffwn ddatgan fy ngwrthwynebiad i’r cais ynghyd a gwrthwynebiad Cyngor Cymuned Pentir anfonais fel Clerc y Cyngor hwnnw i’r Adran Gynllunio fis Ebrill diwethaf.

 

Bu i’r Cwmni yma ein cyfarfod yn rhithiol yng Nghyfarfod Cyngor Cymuned Llanddeiniolen wrth iddynt geisio ein darbwyllo bod y system yma yn fanteisiol i’r Grid Cenedlaethol i ddiwallu diffygion y grid. Wrth eu holi ynghyn diogelwch, sŵn, cyflogaeth, a pham na fyddai'r Grid Cenedlaethol eu hunain yn buddsoddi mewn cyfarpar tebyg ni chafwyd ateb o unrhyw fath dim ond waffl. Nid oedd ganddynt ateb ynglŷn â’r ffordd roeddynt wedi ymgynghori gan iddynt ymffrostio dosbarthu rhai cannoedd o bamffledi gwybodaeth er nad oedd neb yn y cymunedau agosaf wedi derbyn unrhyw wybodaeth. Hawdd yw datgan wedyn nad oes gwrthwynebiad trigolion lleol.

 

‘Rwyf yn falch mai argymhelliad i wrthod mae swyddogion Gwynedd wedi ei ddatgan ar gyfer C25/0277/18/LL    Land South of B4547 Seion / Pentir LL55 3AN a braf fyddai bod wedi darllen yr un argymhelliad i’r cais hwn.

 

Hoffwn nodi fy ngwrthwynebiad fel a ganlyn

1.     Mae’n or-ddatblygiad yng nghefn gwlad ag safle hwn ar ardal o ddiddordeb hanesyddol lleol

2.     Fydd eu tirweddu ddim yn cael ei wireddu yn effeithiol am o leiaf 15 mlynedd ac felly wrth gwrs yn weledol am 15 mlynedd

3.     Tra yn amheus o wir fanteision y system storio ynni nid yw mewn unrhyw ffordd yn hwb i’r economi lleol a DIM cyflogaeth

4.     Mae yn ffaith na ellir diffodd tan batri lithiwm - ond ei adael i losgi allan

5.     Dim ymgynghoriad lleol wedi digwydd - nid yw gosod darn o bapur ar bolyn ar ochr ffordd brysur lle nad oes fawr neb yn ei gerdded na thŷ o fewn 200 metr yn ymgynghori nac yn rhoi cyfle i drigolion lleol fynegi barn

 

Er gwybodaeth cefais lythyr Cymraeg a Saesneg o gefnogaeth i’r fenter ar e-bost heddiw gan Net Zero. Gan ei fod wedi ei anfon o Lundain mi wnes eu ffonio i’w holi am y safle - wydda fo affliw o ddim! Efallai mai yn Llundain mae’r Cwmni yma wedi bod yn ymgynghori.

 

Gwrthwynebwch a/neu dewch draw am ymweliad safle”

 

 

Eglurwyd bod safle’r cais yn cynnwys 4.6ha o dir pori garw sydd wedi ei ddosbarthu fel tir graddfa 3 a 5 mewn lleoliad yng nghefn gwlad agored y tu allan i unrhyw ffin datblygu gyfredol ac ar dir cyfochrog i ffordd fynediad is-orsaf drydan bresennol Pentir sydd oddeutu 150m i’r gogledd o ran agosaf y safle. Saif o fewn Tirwedd o Ddiddordeb Hanesyddol Eithriadol Dinorwig ac yn rhannol o fewn Parth Llifogydd B fel y’i nodir yn y Mapiau Perygl Llifogydd. Mynegwyd bod coetir cyfagos i’r de-ddwyrain, “Coed Tŷ’n Llwyn” a “Choed Tyddyn Morgan” tua’r gogledd, yn “Safleoedd Bywyd Gwyllt Rhanbarthol” cydnabyddedig.

 

Adroddwyd, fel rhan o’r cais cyflwynwyd nifer o ddogfennau ac adroddiadau yn cynnwys gwybodaeth arbenigol gan gynnwys adroddiad ymgynghori cyn cyflwyno cais yn unol â gofynion Deddf Gynllunio Gwlad a Thref gan fod y bwriad yn ddatblygiad a ddiffinnir yn ddatblygiad mawr ac yn mesur mwy nag 1 ha.

 

Tynnwyd sylw at ymateb y Gwasanaeth Bioamrywiaeth i’r cais, oedd wedi datgan eu bod yn gwrthwynebu’r bwriad gan nad oedd mesurau lliniaru digonol ar gyfer colli cynefinoedd ac nad oedd y datblygiad yn darparu gwelliant i fioamrywiaeth. Er hynny, roeddynt yn cydnabod bod y cais yn ymgorffori llawer o fesurau ar gyfer lleihau effaith y datblygiad ar fioamrywiaeth a chyfeiriwyd at y nifer o asesiadau ecolegol oedd wedi eu cynnal ar y safle a bod mesurau cyfatebol i’r tir a’r golled o diroedd yn cael eu cynnig. Nodwyd bod  cyfathrebu cyson wedi ei gynnal rhwng ecolegydd y datblygwr a’r uned bioamrywiaeth ac er bod pryderon yr Uned Bioamrywiaeth yn parhau, pwysleisiwyd y materion canlynol:

·       Byddai caniatáu yn galluogi rheolaeth o’r safle trwy amodau cynllunio at ddibenion ecolegol gan nad oes amddiffyniad o'r fath ar gyfer y safle presennol

·       Gellid cytuno ar y camau manwl sydd wedi'u cynnwys yn y Cynllun Rheoli Tirwedd ac Ecolegol yn ôl yr angen a'r Cynllun Rheoli Amgylcheddol Adeiladu a'r Cynllun Rheoli Tirwedd ac Ecolegol yn nodi mesurau fydd yn amddiffyn, cadw ac, yn y pen draw, yn adfer a gwella'r cynefinoedd a gedwir o fewn ffin y llinell goch a'r ardal lliniaru

·       Oherwydd cyfyngder ac argaeledd tiroedd eraill, nid oes digon o le oherwydd yr angen am hawddfraint 80 m ar y llinellau pŵer foltedd uchel uwchben yn yr ardal sy'n lleihau'r arwynebedd o dir sydd ar gael ar gyfer yr unedau storio batri. Yn ogystal nid oedd unrhyw ganiatâd gan y tirfeddiannwr i'r ymgeisydd ddatblygu safle amgen.

·       Byddai 0.09ha ychwanegol o gynefin naturiol yn cael ei reoli'n benodol ar gyfer gwella bioamrywiaeth o fewn yr ardal gyfagos.

 

Cyfeiriwyd at bryderon Cyfoeth Naturiol Cymru ynghylch y cynnig ond mynegwyd eu bod yn fodlon derbyn y datblygiad yn ddarostyngedig i amodau fyddai’n sicrhau gweithrediad y datblygiad yn unol â’r mesurau a gwelliannau a argymhellwyd. Ategwyd nad oedd y safle wedi ei warchod yn ffurfiol mewn unrhyw ffordd ar hyn o bryd o safbwynt bioamrywiaeth ac oherwydd hynny, nid oedd unrhyw reolaeth ffurfiol i atal gwerth bioamrywiaeth y safle gael ei golli’n llwyr trwy newidiadau mewn rheolaeth amaethyddol na fyddai angen caniatâd cynllunio ar eu cyfer er enghraifft.

 

Ystyriwyd y byddai’r datblygiad yn cynnig cynnydd sylweddol ym maint y tir a fyddai’n cael ei reoli’n benodol ar gyfer cynnal a gwella bioamrywiaeth a, thrwy gytuno cynllun rheolaeth briodol, gellid sicrhau na fydd niwed arwyddocaol i fioamrywiaeth yn deillio o’r datblygiad ac y gellid sicrhau camau a fyddai’n cynyddu gwerth bioamrywiaeth y safle yn y tymor hir.

 

Ystyriwyd fod y bwriad yn dderbyniol ag yn bodloni gofynion y polisïau perthnasol. Roedd y swyddogion yn argymell caniatáu’r cais yn ddarostyngedig i amodau.

b)             Yn manteisio ar yr hawl i siarad, nododd asiant yr ymgeisydd y sylwadau canlynol;

·       Bod y bwriad yn cefnogi ymrwymiad y Cyngor i fod yn garbon sero net erbyn 2030, a tharged Llywodraeth Cymru

·       Bod safleoedd storio ynni yn hanfodol i gefnogi ynni adnewyddadwy - byddai’r system yn storio ynni dros ben o ddatblygiadau ynni adnewyddadwy pan fo galw isel am drydan ac yna yn rhyddhau'r trydan fel mae’r galw yn codi.

·       Yn storio digon ar gyfer 323,000 o gartrefi - mwy na holl gartrefi Gogledd Cymru

·       Y seilwaith presennol yn berffaith i ymateb i’r targedau lleol a chenedlaethol

·       Bod y bwriad yn saff a safonol a chynllun diogelwch wedi ei gyflwyno gyda’r cais

·       Nad oedd unrhyw wrthwynebiadau gan y Gwasanaeth Tan ac Achub

·       Bod cysylltiad grid wedi'i gytuno gydag Is-orsaf Pentir - hyn yn lleihau effeithiau gosod ceblau tanddaearol ac felly’r effaith weledol yn isel ar y dirwedd oherwydd ei agosatrwydd at yr is-orsaf

·       Bod trafodaethau cyn cyflwyno cais ac ymgynghoriadau lleol wedi eu cynnal yn unol â gofynion ymarfer da

·       Bod y bwriad yn cefnogi dosbarthiad lleol gan ynni SP Energy Network a dim dosbarthiad ledled y DU - hyn yn fuddiol i gartrefi a busnesau lleol

·       Bod Cronfa Budd Cymunedol i’w sefydlu o £100,000 gyda thrafodaethau gyda’r gymuned ar sut i’w ddosbarthu

·       Yn gynllun glan, yn wyrdd, yn gynllun ynni da, yn saff, fyddai’n cyfarch targedau

·       Y buddion yn gorbwyso’r niwed

c)              Cynigwyd ac eiliwyd caniatáu y cais

ch)       Mewn ymateb i gwestiwn, pam bod 40 mlynedd yn cael ei ystyried yn ‘gyfnod dros dro’, nodwyd mai dyma yw bwriad y cais yma a dyma’r cyfnod amser perthnasol i’r math yma o gais.

 

PENDERFYNWYD:

 

1.         5 mlynedd.

2.         Yn unol â’r cynlluniau/manylion a gyflwynwyd gyda’r cais.

3.         Cydymffurfio â’r cynllun tirweddu ynghyd a gwaith cynnal a chadw i’r dyfodol.

4.         Cydymffurfiaeth gydag argymhellion y dogfennau Asesiad Effaith Ecolegol, Asesiad Effaith Coedyddiaeth, Nodyn Technegol Ecolegol a’r Datganiad Seilwaith Gwyrdd.

5.         Cydymffurfiaeth gyda’r Asesiad Canlyniadau Llifogydd. 

6.         Cyfyngu amseroedd adeiladu

7.         Gosod uchafswm ar gyfer allyriadau sŵn

8.         Cytuno ar fesurau monitro sŵn

9.         Amod i sicrhau camau priodol os darganfyddir llygredd annisgwyl.

10.       Cytuno gyda gorffeniadau allanol y strwythurau.

11.       Sicrhau enw Cymraeg ac arwyddion dwyieithog gyda’r flaenoriaeth i’r Gymraeg.

12.       Cytuno rhaglen waith Archeolegol

13.       Cyflwyno Cynllun Rheolaeth Adeiladu Amgylcheddol diwygiedig (i gynnwys rheolaeth o’r cyswllt gyda chyfarpar SP Manweb)

14.       Cyflwyno Cynllun Rheolaeth Tirwedd ac Ecoleg ddiwygiedig i gymryd i ystyriaeth sylwadau’r Uned Bioamrywiaeth

15.       Rhaid adfer y safle i’w gyflwr a gytunir gyda’r Awdurdod Cynllunio wedi i’r cyfnod gweithredol y datblygiad ddod i ben

 

Nodiadau:      

Uned Dŵr ac Amgylchedd

Cyfoeth Naturiol Cymru

Gwasanaeth Cynllunio Archeolegol Gwynedd

Dŵr Cymru

SP Manweb