Agenda item

Cymeradwywyd a galluogwyd y Gwasanaeth Parcio i fwrw ‘mlaen i wireddu dau gynllun arbedion

sydd angen ystyriaeth bellach cyn dod i benderfyniad terfynol, sef:

1.1.1 Ymestyn oriau gorfodaeth meysydd parcio arhosiad byr o 10:00 hyd at 16:30 i 

9:00 hyd at 17:00. 

1.1.2  Addasiad i Strwythur Ffioedd Arhosiad Hir Band 2.

Cymeradwywyd gorchymyn parcio newydd sydd yn cysoni trefniadau cyfredol a chynnwys y newidiadau uchod.

⁠

Cyflwynwyd yr adroddiad gan Cyng. Craig ab Iago. 

PENDERFYNIAD

Cymeradwywyd a galluogwyd y Gwasanaeth Parcio i fwrw ‘mlaen i wireddu dau gynllun arbedion sydd angen ystyriaeth bellach cyn dod i benderfyniad terfynol, sef:

Ymestyn oriau gorfodaeth meysydd parcio arhosiad byr o 10:00 hyd at 16:30 i  9:00 hyd at 17:00. 

Addasiad i Strwythur Ffioedd Arhosiad Hir Band 2.

Cymeradwywyd gorchymyn parcio newydd sydd yn cysoni trefniadau cyfredol a chynnwys y newidiadau uchod.

TRAFODAETH

Rhoddwyd cefndir i’r eitem, gan nodi fod y cynllun hwn yn rhan o’r cynlluniau i gyfarch y diffyg rhwng y targed incwm parcio a’r hyn oedd yn cael ei gyflawni. Nodwyd y bu’r eitem gerbron y Cabinet yn 2024, a chadarnhawyd bod yr hyn a gymeradwywyd bellach yn weithredol ac yn perfformio fel y rhagolygwyd.

Datganwyd bod y targed incwm wedi cynyddu ers i’r adroddiad gael ei gyflwyno yn 2024/25, felly bod angen cymryd camau pellach i’w gyrraedd.

Datgelwyd bod y newidiadau a’u cyflwynwyd yn 2025 wedi eu derbyn yn weddol, ac mai ond ychydig o adwaith a ddeilliodd o hynny. Tynnwyd sylw at y tocynnau tymor sy’n cynnig gwerth am arian da o’i gymharu â thalu gyda phob ymweliad.

Eglurwyd bod yr Adran wedi adolygu’r gorchymyn parcio, a daethpwyd i’r casgliad bod angen cyflwyno gorchymyn newydd sy’n dod a mwy o gysondeb thaclusrwydd o ran mapiau o’r meysydd parcio er enghraifft.

Amlygwyd bod y gwasanaeth yn y broses o gyflwyno 32 peiriant talu ac arddangos newydd, gyda’r bwriad o ddarparu gwasanaeth o well safon i’r cwsmer yn ogystal â sicrhau bod yr incwm yn cael ei ddenu.

Sylwadau’n codi o’r drafodaeth:

·       Adnabuwyd ei bod yn hynod anodd i gymharu sefyllfa strwythur parcio Gwynedd â siroedd eraill, oherwydd bod y strwythurau yn amrywio o sir i sir. Er hyn, nodwyd bod modd cymharu rhai agweddau megis prisiau tocynnau tymor blynyddol - ychwanegwyd bod y tocynnau hyn yn rhesymol iawn yng Ngwynedd. Adroddwyd bod adborth gan ymwelwyr hefyd yn cefnogi’r ffaith fod parcio yng Ngwynedd yn rhesymol o’i gymharu â’u hardaloedd lleol hwy. Eglurwyd y credir bod cydbwysedd wedi’i gyrraedd yma o ran darparu ar gyfer anghenion lleol ar y cyd â chynhyrchu incwm ble mae modd.

·       Cyfeiriwyd at brisiau tocynnau parcio lleol a’r tocynnau parcio tymhorol, ac esboniwyd yr hyn a gynigir i drigolion. Datgelwyd bod yr holl wybodaeth ynghylch y ddarpariaeth hon ar wefan y Cyngor.

·       Holwyd a oes ystyriaethau wedi’u gwneud i effaith yr oriau gorfodaeth estynedig ar fusnesau lleol. Sicrhawyd bod strategaeth parcio ar y stryd, sy’n galluogi i bobl barcio ar y stryd am gyfnodau o 30munud i awr er mwyn galw’n sydyn i mewn i siopau.

·       Cwestiynwyd sut y caiff y newid hwn ei gyfathrebu â’r cyhoedd, fel nad yw pobl yn cael eu dal allan. Mewn ymateb, cynigwyd bod cyfle i fynd ymhellach na’r hyn sy’n ofynnol yn statudol wrth rybuddio am y newid hwn er mwyn codi ymwybyddiaeth gyffredinol trigolion.

·       Cynigiwyd y dylid cynnig cyfnod gras am gyfnod cychwynnol y cyfnod gorfodaeth estynedig, ond sicrhawyd bod digon o amser rhwng cymeradwyo’r cynnig a’i roi mewn grym er mwyn codi ymwybyddiaeth ddigonol o’r newid. Ategwyd yr heriau y byddai cyflwyno cyfnod gras yn ei achosi o ran cysondeb ar draws y sir, a’r heriau i’r swyddogion sy’n rhoi’r gorchmynion ar waith.

·       Cyfeiriwyd at yr asesiad effaith cydraddoldeb, gan fynegi balchder nad oes newid i ddeiliaid bathodyn glas. Adnabuwyd yr her y mae pobl hŷn yn ei gael i ddefnyddio’r peiriannau parcio hyn, a chynhigiwyd y dylid rhoi sylw i wneud meysydd parcio yn fwy oed gyfeillgar wrth symud ymlaen. Mewn ymateb, gobeithiwyd y bydd y peiriannau newydd sy’n dod i'r meysydd parcio yn cynnig mwy o gysondeb i drigolion a bod ymgais i wneud y gwasanaeth yn fwy hygyrch.

·       Tynnwyd sylw at y ffaith nad oes signal ffôn mewn nifer o ardaloedd, felly bod rhai pobl yn methu a thalu o ganlyniad.