Agenda item

Alwen Williams, Prif Weithredwr, ac Iain Taylor, AMION Conslting, i gyflwyno’r adroddiad.

• Cymeradwyo dyraniadau buddsoddi’r Cynllun Cyflawni Blynyddol ar gyfer Blwyddyn 2 a nodi’r dyraniadau ym Mlwyddyn 1 fydd yn cael eu defnyddio fel rhan o’r rhaglen Blwyddyn 2.
• Cymeradwyo’r Rhaglen Parth Buddsoddi, yn cynnwys dyraniad £4m i brosiect Porth Busnes Prifysgol Wrecsam.
• Caniatáu i Swyddog A151 y CBC lofnodi a chyhoeddi dogfennau’r ADP i Lywodraeth y DU, a Llywodraeth Cymru a gwneud unrhyw fân ddiwygiadau amherthnasol pellach sy’n angenrheidiol i gytuno ar yr ADP  gyda Lywodraeth y DU a Llywodraeth Cymru.

 

Cyflwynwyd yr adroddiad gan y Prif Weithredwr ac ymgynghorydd IMT Consulting.

 

PENDERFYNIAD

 

·       Cymeradwyo dyraniadau buddsoddi’r Cynllun Cyflawni Blynyddol ar gyfer Blwyddyn 2 a nodi’r dyraniadau ym Mlwyddyn 1 fydd yn cael eu defnyddio fel rhan o’r rhaglen Blwyddyn 2.

·       Cymeradwyo’r Rhaglen Parth Buddsoddi, yn cynnwys dyraniad £4m i brosiect Porth Busnes Prifysgol Wrecsam.

·       Caniatáu i Swyddog A151 y CBC lofnodi a chyhoeddi dogfennau’r ADP i Lywodraeth y DU, a Llywodraeth Cymru a gwneud unrhyw fân ddiwygiadau amherthnasol pellach sy’n angenrheidiol i gytuno ar yr ADP  gyda Llywodraeth y DU a Llywodraeth Cymru.

 

RHESYMAU DROS Y PENDERFYNIAD

 

Mae’n ofynnol i Barthau Buddsoddi gytuno ar Gynllunio Cyflawni Blynyddol gyda Llywodraeth y DU a Llywodraeth Cymru yn chwarter olaf y flwyddyn ariannol er mwyn sicrhau’r taliad blynyddol gan Lywodraeth Cymru ym mis Ebrill ym mhob blwyddyn ariannol.

 

TRAFODAETH

 

Eglurwyd bod yr adroddiad yn nodi rhaglen arfaethedig Cynllun Cyflawni Blynyddol Blwyddyn 2 Parth Buddsoddi Sir y Fflint a Wrecsam ar gyfer y flwyddyn ariannol 2026/27. Manylwyd ar y gwaith sydd wedi cael ei wneud yn ystod y flwyddyn gyntaf ac yn adrodd ar y dyraniadau sydd wedi eu cyflwyno i Lywodraeth y DU a Llywodraeth Cymru ar gyfer Blwyddyn 2, gan gadarnhau y disgwylir iddo ddod i law ym mis Ebrill 2026. Ymfalchïwyd bod y datblygiad hwn yn sicrhau parhad datblygiad a momentwm y flwyddyn gyntaf.

 

Atgoffwyd yr aelodau o’r datblygiadau a gyflawnwyd o fewn y flwyddyn gyntaf, gan gynnwys sefydlu strwythur llywodraethiant y Rhaglen, ffurfio seilwedd cynllunio’r Rhaglen yn ogystal â datblygiad cychwynnol y prosiectau blaenoriaeth.

 

Tywyswyd yr Aelodau drwy’r dyraniadau sydd wedi cael eu cyflwyno ar gyfer Blwyddyn 2, yn ogystal â’r datblygiadau y disgwylir eu cyflawni i’r Rhaglen. Pwysleisiwyd bod y targedau hyn wedi eu ffurfio yn unol ag amcanion y Parth Buddsoddi gan eu bod yn ymwneud â themâu seilwaith, sgiliau, arloesi a chefnogaeth busnes.

 

Amlygwyd bod y cynllun hwn yn un sydd yn pwysleisio ar gyflawni, a’i fod yn adlewyrchu’r newid o’r flwyddyn gyntaf a oedd yn ffocysu ar sefydlu gweithdrefn gadarn. Edrychwyd ymlaen am flwyddyn brysur o ymgorffori’r prosiectau a gweithdrefnau yn ystod Blwyddyn 2.

 

Adroddwyd bod y cynllun arfaethedig yn ymgorffori newidiadau bychan a gytunwyd arnynt o fewn y flwyddyn gyntaf megis caniatáu £4miliwn i gefnogi prosiect Porth Busnes Prifysgol Wrecsam.

 

Cadarnhawyd bod ymgynghoriad wedi cael ei wneud gydag arweinwyr Cyngor Sir y Fflint a Chyngor Sir Wrecsam a bod eu mewnbwn yn cael effaith ar lywodraethiant y Parth Buddsoddi. Ymhelaethwyd bod ymgynghoriadau yn elfen bwysig iawn o’r Parth Buddsoddi, gyda phob ymdrech i sicrhau ei fod yn ysbrydoli pobl ifanc, perchnogion busnes a bod pob unigolyn a all elwa o’r Parth Buddsoddi yn ymwybodol o sut y gall wneud hynny. Nodwyd bydd rhai o’r prosiectau yn cael eu cyflwyno i’r Aelodau er mwyn gallu miniogi’r ffordd orau o’u hyrwyddo’n ehangach.

 

Cyhoeddwyd bod Rhaglen Cefnogi Busnes wedi cael ei lansio yn ddiweddar, a’i fod yn Raglen ble mae Cyngor Sir Y Fflint a Chyngor Sir Wrecsam yn gwneud y penderfyniad terfynol ar y prosiectau a ddewisir. Cadarnhawyd bydd Cyd-bwyllgor Corfforedig y Gogledd yn parhau i dderbyn achosion busnes ar gyfer y prosiectau mawr, gan nod y disgwylir Achos Busnes ar gyfer prosiect trawsnewid rhwydwaith bysiau yn fuan. Nodwyd bydd y Bwrdd Sgiliau Rhanbarthol yn derbyn cynigion gan Brifysgol Wrecsam a Choleg Cambria cyn i’r Aelodau benderfynu pa gynigion all y Parth Buddsoddi ei gefnogi.

 

Manylwyd bod nifer o brosiectau wedi bod yn cael eu datblygu dros yr 18 mis diwethaf, tra oedd y Parth Buddsoddi yn cael ei ffurfio. Eglurwyd y disgwylir Memorandwm o Ddealltwriaeth gan y Llywodraethau er mwyn gallu cydlynu cymeradwyo rhaglenni’r Parth Buddsoddi er mwyn gallu datblygu cynnig grant i gynorthwyo’r Rhaglen.

 

Yn ystod y drafodaeth, cyflwynwyd y sylwadau a ganlyn:-

 

Cadarnhawyd mai dyma’r Parth Buddsoddi cyntaf i gael ei wneud y tu hwnt i Loegr. Diolchwyd i bawb sydd wedi ei ddatblygu ar raddfa gyflym, gan obeithio bydd y datblygiad yn parhau ar yr un cyflymder i’r dyfodol.

 

Mynegwyd balchder bod y Parth Buddsoddi yn cael ei ddatblygu a bod cydweithio clos rhwng Cyngor Sir y Fflint, Cyngor Sir Wrecsam a’r holl bartneriaid sydd yn ei ddatblygu. Ategwyd sylwadau o’r angen i sicrhau bod y gwaith a wnaed yn cael ei hyrwyddo’n effeithiol.

 

Manylwyd ar ddyraniadau o fewn thema ‘Seilwaith’ y Parth Buddsoddi gan nodi cefnogaeth i gynyddu cyfraniad cyfalaf i hyd at £6miliwn i brosiect Padeswood Siding yn amodol ar y broses o gais am newid rhwng Llywodraeth Cymru a Chynllun Twf Uchelgais Gogledd Cymru.

 

Diolchwyd i bawb sydd wedi gweithio i ddatblygu’r Parth Buddsoddi hyd yma gan edrych ymlaen at barhau i gydweithio i’r dyfodol.

 

Diolchwyd am yr adroddiad.