Agenda item

I nodi cyllideb yr Uned Gweinyddu Pensiynau a’r Uned Buddsoddi ar gyfer y flwyddyn ariannol 2026/27.

Cyflwynwyd adroddiad gan y Rheolwr Buddsoddi. Nodwyd bod cyllideb yr Uned Gweinyddu Pensiynau a’r Uned Buddsoddi ar gyfer blwyddyn ariannol 2026-2027 wedi eu cymeradwyo gan y Pwyllgor Pensiynau (bore 09-02-26) a bod y wybodaeth yn cael ei rhannu gyda’r Bwrdd fel cyfle iddynt roi trosolwg ar y sefyllfa.

Cyfeiriwyd at gyllideb yr Uned Gweinyddu Pensiynau sydd â 25 aelod o staff cyflogedig ynghyd â chostau systemau, argraffu, ac ad-daliadau canolog. Tynnwyd sylw at y cyflenwadau a’r gwasanaethau gan amlygu bod gofyn cynyddu’r gyllideb i £185,500, a hynny yn bennaf oherwydd cynnydd yn y costau postio, a’r costau meddalwedd - costau na ellid eu hosgoi yn anffodus. 

Yng nghyd-destun cyllideb yr Uned Buddsoddi, nodwyd bod mwyafrif o’u dyletswyddau yn waith Cronfa Bensiwn ond eu bod hefyd yn gyfrifol am Reolaeth Trysorlys Cyngor Gwynedd. Yn ychwanegol, bydd costau Partneriaeth Pensiwn Cymru (PPC), rheolwyr buddsoddi ac ymgynghorwyr o dan gyfrifoldeb y Rheolwr Buddsoddi; bydd y costau hyn yn amrywio ac yn ddibynnol ar berfformiad buddsoddiadau a’r gwaith sydd angen ei gyflawni gan yr ymgynghorwyr ar Bartneriaeth. Wrth drosglwyddo a buddsoddi gyda PPC IM Co bydd angen cadw llygaid barcud ar y costau dros y cyfnod nesaf, ac felly ystyriwyd nad oedd diben gosod cyllideb eleni, ond yn rhywbeth fydd angen sylw yn y flwyddyn ariannol nesaf.

Elfen arall na ellid ei chynnwys yn y gyllideb yw newidiadau fydd angen eu gweithredu fel rhan o reoliadau ‘Addas i’r Dyfodol’ lle bydd gofyn statudol i benodi Prif Swyddog y Gronfa, unigolyn annibynnol i’r Pwyllgor, ynghyd a chostau gofynion llywodraethu a hyfforddiant ychwanegol. Nodwyd, y bydd rhagor o wybodaeth am yr elfennau hyn yn cael eu rhannu gyda’r Bwrdd wrth iddynt ddod ar gael.

Diolchwyd am yr adroddiad

Gofynnodd Mr Eifion Jones, (oedd wedi arsylwi cyfarfod o’r Pwyllgor Pensiynau (bore 09-02-26) lle trafodwyd ymateb i’r rheoliadau, a’r angen i benodi Prif Swyddog y Gronfa, ac unigolyn annibynnol i’r Pwyllgor erbyn y 1af o Hydref 2026, a’r risg ynghlwm a phenodi person addas sydd yn cyfateb i’r gofynion penodol, nodwyd bod risgiau sydd yn cwmpasu goblygiadau ‘Addas I’r Dyfodol’ wedi eu hychwanegu i’r gofrestr risg. Ategwyd y bydd cymwysterau penodol hefyd i rôl y Swyddog Annibynnol ac felly'r penodiad yma hefyd yn un heriol ac yn risg. Bydd gwaith ar sefydlu’r swydd ddisgrifiadau yn dechrau mor fuan â phosib.

Mewn ymateb i gwestiwn ynghylch addasiadau i ddyletswyddau’r Pwyllgor ac os bydd effeithiau i ddyletswyddau’r Bwrdd, nodwyd bod newidiadau i’r Pwyllgor oherwydd eu bod yn gwneud dipyn o waith gyda’r elfen buddsoddi, ond y byddai dyletswyddau’r Bwrdd yn aros yr un fath.

Yng nghyd-destun cynnydd o 60% mewn costau darpariaeth gwasanaeth a pham bod hyn mor uchel, nodwyd mai cynnydd mewn costau datblygu a thrwyddedu meddalwedd oedd hyn yn bennaf, e.e, y Dashfwrdd, creu fideo ar gyfer yr Hunanwasanaeth, a chynnydd mewn costau postio.

Mewn ymateb i gwestiwn ategol ynglŷn â chostau meddalwedd a pham nad yw yn wariant cyfalaf o ystyried yr effaith mae’r cynnydd mewn costau yn ei gael ar y gyllideb, nodwyd mai gwariant untro yw'r rhain rhan amlaf a cânt eu hariannu gan y Gronfa.  Oherwydd hynny, mae’n fwy synhwyrol o safbwynt cyfrifeg i’w drin fel gwariant refeniw o fewn un flwyddyn yn hytrach na’i gyfalafu, fyddai â goblygiadau hirdymor ar y cyfrifon, heb unrhyw wir fantais i hynny.

Mewn ymateb i sylw ynglŷn â nifer staff ac os mai cywir fyddai nodi bod pedwar aelod o staff allan o 23 gyda chytundebau dros dro, nodwyd bod staff dros dro wedi eu penodi ar gyfer gwaith ychwanegol, megis Prosiect Mc Cloud, ond gyda’r gwaith sydd ar y gorwel i’r Uned, bydd angen penodi mwy. Ategwyd mai’r bwriad yw ail edrych ar y strwythur o ystyried y cynnydd yn y gofynion a’r heriau fydd yn wynebu’r Uned i’r dyfodol.

Derbyniwyd y wybodaeth