Agenda item

I ystyried yr adroddiad a nodi'r wybodaeth. 

Amlygodd y Rheolwr Buddsoddi mai adroddiad ydoedd er gwybodaeth yn nodi’r datblygiadau o fewn Partneriaeth Pensiwn Cymru (PPC). Er bod adborth o gyfarfodydd Ymgysylltu Cadeiryddion Bwrdd Pensiwn, sy’n cael eu cynnal bob 6 mis, yn cael ei rannu gyda’r Bwrdd, ystyriwyd gyda’r nifer datblygiadau diweddar mai addas a phwysig fyddai i’r Aelodau dderbyn diweddariad rheolaidd.

Atgoffwyd yr Aelodau, o ganlyniad i Ddeddfwriaeth San Steffan ‘Addas i’r Dyfodol’, bod PPC wedi gorfod mynd ati i ffurfio cwmni buddsoddi newydd sydd bellach yn cael ei adnabod fel ‘WPP Investment Management Company’ (WPP IMCo). Adroddwyd bod oediad  mewn cymeradwyo’r Ddeddfwriaeth ac o ganlyniad nid oedd y cwmni wedi ei lansio - ymddengys mai ar ôl yr etholiad bydd y lansiad bellach.

Cyfeiriwyd at drefniadau newydd y cwmni buddsoddi gan fynegi yn gryno y bydd yn gyfrifol am weithredu pob agwedd a chynghori ar Strategaeth Fuddsoddi’r wyth Awdurdod Cyfansoddol.  Yng nghyd-destun Llywodraethiant y Bartneriaeth, tynnwyd sylw at strwythur lywodraethu’r Bartneriaeth unwaith bydd y cwmni buddsoddi yn weithredol ynghyd a sut bydd y Pwyllgor Pensiynau, yr Awdurdodau Cyfansoddol unigol, a’r Bwrdd Pensiwn yn cyfrannu i’r strwythur. Cyfeiriwyd at a) strwythur y cyfranddalwyr (sef y swyddogion, a’r Aelodau Etholedig) gyda’r Bwrdd Cyfranddalwyr yn cael ei greu i warchod hawliau’r Awdurdodau Cyfansoddol - bydd y Bwrdd ynteu yn cynnwys Swyddog Adran 151 neu Uwch Swyddog CPLlL o bob un o’r Awdurdodau Cyfansoddol; a b) strwythur y cwmni newydd gyda Bwrdd WPP IMCo yn atebol i Bwrdd y Cyfranddalwyr.

Cyflwynwyd Cynllun Busnes Cychwynnol WPP IMCo oedd eisoes wedi  ei gymeradwyo gan y Cyd-Bwyllgor Llywodraethu, a Phwyllgor Pensiynau Cronfa Bensiwn Gwynedd. Nodwyd bod y Cynllun yn manylu ar sut mae’r cwmni yn mynd i gyflawni wyth amcan strategol ac yn gosod cynllun i gyflawni nodau penodol megis llywodraethu a goruchwylio, crynodeb ariannol, dull rheoli buddsoddiadau, gweithrediadau a staffio, rheoli risg a chydymffurfiaeth a buddsoddi cyfrifol.

Diolchwyd am yr adroddiad

Sylwadau yn codi o’r drafodaeth ddilynol:

·        Bod costau staffio yn ymddangos yn aruthrol o uchel

·        Croesawu bod Bwrdd y Cyfranddalwyr gyda grym i herio perfformiad WPP IMCo

·        Bod angen sicrhau bod y Pwyllgor Pensiynau a’r Bwrdd Pensiwn yn craffu yn effeithiol ac yn adnabod problemau yn gynamserol - angen cryfhau rôl o fewn y strwythur i fod yn actif a gweithredol.

Mewn ymateb i gwestiwn os oedd y swyddogaethau allweddol wedi ei llenwi, nodwyd bod nifer bellach wedi eu penodi a’r Uwch Swyddog Buddsoddi wedi dechrau yn ei rôl newydd ac eisoes yn adeiladu cysylltiadau wythnosol gyda swyddogion yr Awdurdodau Cyfansoddiadol. Mewn ymateb i gwestiwn ategol ynglŷn ag a fyddai costau’r strwythur yn cynnig gwerth am arian nodwyd bod y sefyllfa yn un unigryw - bod cwmni yn cael ei greu o’r newydd ac felly amser a ddengys beth fydd canlyniadau’r sefyllfa. Ategwyd nad oedd swyddogion y Gronfa Bensiwn wedi cael mewnbwn i’r strwythur newydd.

Mewn ymateb i gwestiwn, o ystyried bod oediad mewn sefydlu’r cwmni, a phwy felly fydd yn talu cyflogau’r staff, nodwyd mewn amgylchiadau o’r fath bod trefniant mewn lle i’r Cyngor Lletyol dalu dros y cyfnod byr ac anfonebu’r Awdurdodau Cyfansoddiadol am ad-daliad. Ategwyd bod rhaid hefyd cael cymeradwyaeth o’r gwariant gan yr Awdurdod Ymddygiad Ariannol (FCA) i symud ymlaen i sefydlu trefn gytunedig.

Yng nghyd-destun Bwrdd y Cyfranddalwyr a phryd bydd enwebiadau yn cael eu cyflwyno, nodwyd bod enwau wedi cael eu cyfeirio ymlaen at yr FCA fydd yn gyfrifol am y broses ffurfiol o gyfweld a chymeradwyo’r enwebiadau.

Mewn ymateb i gwestiwn ynglŷn â chyfrifoldebau’r Pwyllgor a’r Bwrdd Pensiwn i Aelodau Cronfa Pensiwn Gwynedd a’r angen i fonitro cynllun busnes WPP IMCo a’r cynnydd sylweddol mewn costau, nodwyd bod rôl y Bwrdd yn aros yr un fath gan flaenoriaethu cefnogaeth i swyddogion weinyddu Cronfa Bensiwn Gwynedd. Er yn derbyn bod y costau yn uchel, bod y graddfeydd cyflog yn gyfatebol i gyflogau o fewn y sector ac felly bydd disgwyliad i swyddogion WPP IMCo wneud gwaith da a chael y gorau i aelodau’r Gronfa. Ategwyd bod trefniadau llywodraethu yn eu lle a bod pob ymgais yn cael ei wneud i adrodd yn dryloyw ac agored ar y sefyllfa.

Nodwyd mai Llywodraeth y DU, trwy drefn gyfreithiol oedd wedi gorfodi’r trefniant newydd ac felly nid oedd dewis ond gwario. Awgrymwyd bod y gwariant eisoes yn bodoli o fewn ffioedd ac y byddai’r drefn newydd yn fwy tryloyw.

Derbyniwyd yr adroddiad a nodwyd y wybodaeth