Agenda item

Dymchwel estyniadau cefn a chodi estyniad deulawr newydd ynghyd a gwaith tirluno, codi adeilad beics a sbwriel ac ail-osod y maes parcio.

 

AELOD LLEOL: Cynghorydd Elin Walker Jones

 

Dolen i'r dogfennau cefndir perthnasol

 

PENDERFYNIAD: Hawl i weithredu - caniatáu gydag amodau yn ddarostyngedig i dderbyn gwybodaeth bellach a sylwadau cadarnhaol gan yr Uned Draenio 

 

1.         5 mlynedd

2.         Unol a’r cynlluniau.

3.         Amod archeolegol

4.         Manylion gwydriad eilradd i’w gytuno o flaen llaw.

5.         Cytuno i ail-ddefnyddio deunyddiau o’r adeilad i’w ddymchwel

6.         Nwyddau dwr glaw alwminiwm

7.         Manylion manwl y paneli solar

8.         Manylion unrhyw oleuadau i’w gytuno

9.         Manylion unrhyw arwyddion i’w gytuno

10.       Rhaid cyflwyno manylion y sgrin wrth y grisiau cyn eu gosod

11.       Rhaid cyflwyno manylion o sut i gofnodi hoel y gampfa cyn eu dymchwel

12.       Cyflwyno samplau o’r deunyddiau

13.       Defnyddio calch gydag unrhyw waith pwyntio / render

14.       Amod priffyrdd

15.       Amodau Dwr Cymru

16.       Amodau Iaith

17.       Amodau Bioamrywiaeth gan gynnwys cytuno mesurau lliniaru a          gwelliannau

18.      Cytuno Cynllun Rheoli Amgylcheddol Adeiladu (CEMP) cyn cychwyn  gwaith – i gynnwys oriau gwaith

 

Dymchwel estyniadau cefn a chodi estyniad deulawr newydd ynghyd a gwaith tirlunio, codi adeilad beics a sbwriel ac ail-osod y maes parcio.

 

Tynnwyd sylw at y Ffurflen Sylwadau Hwyr (sylwadau gan Uned Draenio Tir)

 

a)           Amlygodd y Swyddog Cynllunio mai cais llawn ydoedd gyda bwriad o ddymchwel rhan ddeulawr cefn o’r adeilad a chodi estyniad deulawr newydd modern i alluogi cael ystafelloedd dysgu i fyny at safonau modern. Byddai’r estyniad newydd yn gymysg o frics llwyd golau / coch a chladin alwminiwm coch i gynnwys dwy neuadd darlithio fawr, ystafell ddysgu cyffredinol, toiledau ac ardaloedd eistedd ynghyd a choridorau, grisiau a drysau allanol a lifft newydd. Ar ail lawr yr estyniad bydd gofod o’r ddwy neuadd darlithio ynghyd ag ardaloedd eistedd, toiledau, ystafelloedd offer a storfeydd - i gyd yn cysylltu yn ôl gyda’r prif adeilad. Eglurwyd bod rhan gwaith adfer mewnol o fewn y prif adeilad hefyd yn rhan o’r cais, ond nad oedd angen hawl cynllunio ffurfiol ar gyfer y gwaith, ond ei fod wedi ei asesu o fewn y cais adeilad rhestredig cysylltiedig (C25/0706/11/CR). Ategwyd bod asesiad adeilad rhestredig wedi ei gwblhau ar y gwaith dymchwel ac adeiladau’r estyniadau

 

Adroddwyd bod yr adeilad yn un sylweddol a thrawiadol iawn, gyda phwyslais ar ei edrychiad blaen. Ni fydd newid i’r edrychiad blaen gan fydd y gwaith dymchwel i gefn yr adeilad yn golygu  dymchwel estyniad sylweddol o’r 1930au; fodd bynnag bydd y gwaith dymchwel yn golygu bod modd codi estyniad sy’n darparu gofod pwrpasol ar gyfer sicrhau defnydd hirdymor o’r adeilad gan Brifysgol Bangor fel rhan o’u campws presennol. Nodwyd bod gwaith tirlunio, ail-osod y ddarpariaeth parcio a chreu mannau beics hefyd yn ffurfio rhan o’r cais gyda bwriad i hwyluso’r cysylltiad drwy greu llwybr newydd i gysylltu safleoedd y Brifysgol.

 

Saif y safle o fewn ffin ddatblygu Dinas Bangor ond tu allan i’r ardal ganolig. Amlygwyd bod safleoedd y Brifysgol ger y safle ynghyd a thai preswyl cyfagos. Yr adeilad yn adeilad rhestredig gradd II.

 

O ystyried defnydd blaenorol y safle fel ysgol a choleg, y polisi perthnasol oedd Polisi ISA 3 sy’n datgan y caniateir cynigion ar gyfer cyfleusterau newydd neu estyniadau i adeiladau presennol ar gyfer dibenion academaidd neu gefnogol cyn belled bod ystyriaeth i raddfa, lleoliad, dyluniad, mwynderau a chludiant.

 

O ran materion dyluniad, ystyriwyd bod yr estyniad wedi ei ddylunio o gwmpas nodweddion presennol yr adeilad oedd yn cynnwys defnydd lliw coch sydd o gwmpas y ffenestri; yn ddyluniad modern cyfoes wedi ei leoli i gefn y prif adeilad fel estyniad atodol. Ategwyd mai’r  prif adeilad fyddai’n parhau i fod y prif ffocws, a chyda nodweddion megis y to brig ar yr estyniad yn cyd-fynd a’r hen adeilad, ystyriwyd fod y dyluniad yn dderbyniol ac yn cydymffurfio gyda pholisïau PCYFF 2, PCYFF 3 a PS 20.

 

Yng nghyd-destun materion trafnidiaeth a mynediad, nodwyd bod datganiad trafnidiaeth wedi ei gyflwyno gyda’r cais yn mynegi nad oedd bwriad newid nag addasu’r mynediad cerbydol presennol, ond i ail-osod y llecynnau parcio presennol o fewn y safle - nid oedd  gan yr Uned Drafnidiaeth unrhyw wrthwynebiad i’r bwriad. Ategwyd, er bod gwasanaethau cludiant cyhoeddus yn pasio’r safle yn aml a bod llwybrau ar gyfer gerddwyr a beicwyr, fodd bynnag, ystyriwyd mai rhesymol fyddai cynnwys amod i gytuno i greu llwybr diogel i feicwyr er mwyn gwella’r sefyllfa gyfredol. Roedd y bwriad yn cyfarch gofynion polisïau TRA 2 a TRA 4 o’r Cynllun Datblygu Lleol (CDLl).

 

Yng nghyd-destun materion Bioamrywiaeth, nid oedd gan yr Uned Bioamrywiaeth unrhyw wrthwynebiad i’r bwriad wedi iddynt dderbyn a chymeradwyo cynllun yn arddangos lleoliadau’r blychau nythu adar ac ystlumod. Fodd bynnag, amlygwyd pryder dros osodiad dau o’r blychau ar flaen y prif adeilad ac er bod cytundeb gyda’r Uned Bioamrywiaeth i’w hail-leoli, ystyriwyd y byddai gosod amod i gytuno’r lleoliad newydd cyn eu gosod yn dderbyniol. Cyfeiriwyd at sylwadau gan Cyfoeth Naturiol Cymru oedd yn cyd-fynd a hyn, ond yn cynnig amodau perthnasol er mwyn dilyn y mesurau priodol.

 

Yng nghyd-destun materion Archeolegol, cyfeiriwyd at sylwadau Heneb oedd yn awgrymu, oherwydd gwaith dymchwel ar y safle, gosod amod ar gyfer sicrhau cynllun gweithredu addas o flaen llaw. Ystyriwyd bod hyn yn rhesymol a’r bwriad felly yn cydymffurfio gyda gofynion polisi PS20 o’r CDLl.

 

Wrth drafod materion Draenio, nodwyd bod bwriad cychwynnol ar gyfer cysylltu’r dŵr wyneb i’r brif garthffos, ond amlygwyd bod Dwr Cymru wedi nodi nad yw hyn yn dderbyniol. Roedd yr Uned Draenio Tir wedi cadarnhau bod y datblygwr bellach wedi cyflwyno cais SAB ar gyfer y datblygiad ond nad oeddynt mewn sefyllfa i gymeradwyo'r cais gan fod angen ymchwiliad pellach.  O dderbyn sylwadau newydd gan yr Uned Draenio Tir (ffurflen sylwadau hwyr) oedd yn nodi na ellid  sicrhau bod modd delio gyda’r dŵr wyneb o’r safle mewn ffordd dderbyniol, ac yn unol â gofynion Nodyn Cyngor Technegol 15 heb wybodaeth bellach a chymeradwyaeth Corff Cymeradwyo SDC, diwygiwyd yr argymhelliad.

 

Tynnwyd sylw at y datganiad iaith oedd wedi ei gyflwyno fel rhan o’r cais gyda’r Uned Iaith wedi darparu sylwadau cadarnhaol. Ystyriwyd mai priodol fyddai gosod amodau i sicrhau bod arwyddion sy’n hyrwyddo’r datblygiad yn ddwyieithog, ac felly yn cydymffurfio gyda pholisi PS 1 a’r CCA perthnasol.

 

Roedd y Swyddogion yn argymell caniatáu’r cais gydag amodau yn ddarostyngedig i dderbyn gwybodaeth bellach a sylwadau cadarnhaol gan yr Uned Draenio. 

 

b)           Yn manteisio ar yr hawl i siarad, nododd yr Aelod Lleol y sylwadau canlynol;

·        Yn croesawu’r syniad o adeiladu Ysgol Fusnes Albert Gubay, ac yn dymuno pob lwc i Brifysgol Bangor efo’r fenter. Y Brifysgol yn sicr o elwa a rhoi budd i Fangor. Gwych.

·        Serch hynny, nifer o bryderon wedi codi, ac felly’n hoffi gweld amodau pellach ar y cais wrth ei ganiatáu.

·        Yn llwyr gytuno gyda phryderon yr Uned Draenio - angen eu cyfarch cyn symud ymlaen

·        Ei bod wedi ymgynghori’n bersonol a threfnu cyfarfod penodol gyda’i chyd-gynghorwyr ward a swyddogion y Brifysgol, lle mynegwyd pryderon am draffig, dŵr, effeithiau ecolegol ac amgylcheddol, asbestos, aflonyddwch ar drigolion lleol a diffygion y broses ymgynghori’n lleol. Er bod cyfarfod wedi ei gynnal ym Mhontio yn ystod yr haf, ystyriwyd nad oedd hyn yn ddigonol fel ymgynghoriad lleol, a bod angen  cyfarch pryderon cymuned Maestryfan sydd wedi ei leoli gyferbyn a’r safle (llythyrwyd holl drigolion Maestryfan yn dilyn y cyfarfod efo’r swyddogion).

·        Gan dynnu sylw at fap o’r safle nodwyd bod y darn tir gyferbyn a hen ysgol Friars yn llecyn o dir a roddwyd i bobl Bangor, mewn ewyllys gan ddoctor lleol. Nodwyd bod cyfamod ar y tir fel na all neb adeiladu arno ( y doctor yn gredwr cryf fod angen mannau gwyrdd ar drigolion). Hyd 2021, roedd yn ddarn o dir diffaith, lle'r oedd cŵn yn bawa a phobl yn defnyddio cyffuriau. Yn 2021, sefydlwyd Grŵp Cymunedol Maestryfan, ac o  dderbyn grant, gweithiodd y gymuned yn galed i greu gardd gymunedol, hardd allan o racsyn o dir. Byddai chwalu’r ardd yn chwalu calon y gymuned ac felly angen gofalu nad yw’r holl adeiladu, y baw a’r llwch, yn amharu ar yr ardd.

·        Er nad yn siŵr os oedd ystlumod yn byw yn y coed gerllaw, yn sicr bod adar yn nythu yn y coed ac yn y bocsys nythu sydd o gwmpas yr ardd, ac felly dim eisiau gweld y rhain yn cael eu hamharu.

·        Naratif y gymuned wedi newid ers creu’r ardd - o fod yn gymuned oedd yn teimlo bod pawb wedi anghofio amdani, i fod yn gymuned bositif, obeithiol, yn llawn brwdfrydedd a gofal am ei gilydd. Yr ardd yn symbol o’r gwaith cymunedol dwys sydd wedi, ac yn digwydd yn ddyddiol yng nghymuned Maestryfan; yn symbol o lwyddiant menter gymunedol ac y bydd effeithiau o’i cholli yn bellgyrhaeddol, ac yn ddinistriol i enaid y gymuned.

·        Gwaredu asbestos – yn disgwyl bydd y Brifysgol yn sicrhau nad yw clirio’r asbestos yn cael effeithiau niweidiol ar y gymuned gyfagos.

·        Yn croesawu’r sicrhad nad oedd cynlluniau i ddatblygu’r cae gwyrdd sydd agosaf at yr adeiladwaith.

·        Bod Ffordd Ffriddoedd yn brif ffordd mewn i ddinas Bangor, yn goridor strategol dinesig; yn cynnwys llwybr bysiau penodol mewn ac allan o’r ddinas. Ar oriau brig, defnyddir y ffordd gan dros 2000 o ddisgyblion ysgol a’u rhieni a’r staff, sydd yn mynd a dod o ddwy ysgol uwchradd, ysgol gynradd, ac ysgol annibynnol - i gyd o fewn tafliad carreg i’r datblygiad. Rhaid, wrth greu Cynllun Rheoli Traffig mewn ac allan o’r safle,  ystyried diogelwch plant, ac oedolion, yn gerddwyr, seiclwyr, a gyrwyr ceir

·        Bod nant danddaearol o dan Rhodfa Belmont sy’n rhedeg lawr am y cae chwarae wrth ymyl hen ysgol Friars. Rhaid ystyried hyn wrth gynllunio unrhyw beth yn y cyffiniau ac unrhyw newidiadau yn y llif dwr tanddaearol, dadleoli dŵr wyneb a risgiau llifogydd o ganlyniad i aflonyddu’r tir.

·        Yn tynnu sylw bod yr Uned Ddraenio yn cynnig gwrthod y cais tan fod archwiliadau pellach wedi eu cwblhau a’r  argymhelliad wedi ei ddiwygio

·        Gofynnwyd am yr effaith benodol ar Coed Menai. Er bod sylwadau wedi eu nodi am ystlumod ac adar, nid oedd unrhyw sylwadau tuag at wiwerod a thylluanod gwynion. Angen  ystyriaeth i’r rhywogaethau hyn hefyd.

·        Mewn egwyddor, o’r farn bod modd cefnogi’r datblygiad, ond bod angen amodau pendant ar nifer o faterion. Yn gofyn i’r Pwyllgor Cynllunio oedi ar wneud penderfyniad, er mwyn caniatáu amser i gyfarch y materion yn llawn neu osod amodau tynn wrth ganiatáu - amodau fydd yn ystyried diogelwch y cyhoedd, effeithiau andwyol ar ecoleg, amgylchedd a’r gymuned leol ac eiddo cyfagos;

-        Cyfarch pryderon yr adran ddraenio’n llawn, gan ystyried y nant danddaearol, patrymau llif dwr yn yr ardal ac ati,

-        gwaredu asbestos yn ddiogel

-        Ystyried a rhoi cynlluniau manwl gerbron i osgoi niweidio’r amgylchedd presennol fyddai’n cynnwys yr ardd gymunedol, adar gerddi cyfagos ac unrhyw rywogaethau gwyllt eraill

-        Diogelwch y Cyhoedd. Bod angen rhoi cynllun gerbron sy’n ystyried dwysedd traffig yn gyffredinol ar Ffordd Ffriddoedd, yn enwedig ar oriau brig

-        Ystyried budd cymunedol teilwng i’r gymuned leol ddifreintiedig hon

-        Gwneud yn iawn / digolledu’r gymuned am unrhyw ddifrod i’r ardd.

 

c)           Cynigiwyd ac eiliwyd caniatáu y cais yn ddarostyngedig i gynnwys amod ychwanegol am  gynllun rheoli amgylcheddol cyn dechrau’r gwaith - i gynnwys oriau gwaith, sŵn a llwch

 

ch)    Yn ystod y drafodaeth ddilynol, nodwyd y sylwadau canlynol gan Aelodau:

·     Bod y buddsoddiad yn un sylweddol i Fangor

·     Yn croesawu bod yr adeilad at bwrpas addysg

·     Angen sicrhau bod yr ychwanegiadau modern yn gweddu a’r hen adeiladau

·     Angen cadw urddas yr adeilad a pheidio tynnu oddi ar yr olwg drawiadol

·     Dim eisiau gweld dirywiad pellach i’r adeilad fyddai yn arwain at ei ddymchwel

 

PENDERFYNWYD caniatáu gydag amodau yn ddarostyngedig i dderbyn gwybodaeth bellach a sylwadau cadarnhaol gan yr Uned Draenio 

 

1.              5 mlynedd

2.              Unol a’r cynlluniau.

3.              Amod archeolegol

4.              Manylion gwydriad eilradd i’w gytuno o flaen llaw.

5.              Cytuno i ail-ddefnyddio deunyddiau o’r adeilad i’w ddymchwel

6.              Nwyddau dwr glaw alwminiwm

7.              Manylion manwl y paneli solar

8.              Manylion unrhyw oleuadau i’w gytuno

9.              Manylion unrhyw arwyddion i’w gytuno

10.            Rhaid cyflwyno manylion y sgrin wrth y grisiau cyn eu gosod

11.            Rhaid cyflwyno manylion o sut i gofnodi hoel y gampfa cyn eu dymchwel

12.            Cyflwyno samplau o’r deunyddiau

13.            Defnyddio calch gydag unrhyw waith pwyntio / render

14.            Amod priffyrdd

15.            Amodau Dwr Cymru

16.            Amodau Iaith

17.            Amodau Bioamrywiaeth gan gynnwys cytuno mesurau lliniaru a chwblhau’r gwelliannau

18.            Cytuno Cynllun Rheoli Amgylcheddol Adeiladu (CEMP) cyn cychwyn gwaith – i gynnwys oriau gwaith