Agenda item

I dderbyn diweddariad gan gynrychiolwyr:

 

·        Network Rail

 

·        Trafnidiaeth Cymru

 

·        Heddlu Trafnidiaeth Prydeinig

 

·        Arall

Trafnidiaeth Cymru (TrC)

 

Croesawyd James Nicholas (Partner Cefnogi Busnes, Trafnidiaeth Cymru) i’r cyfarfod.

 

Fflyd Trenau newydd Dosbarth 197

·        Bydd y trenau newydd yn cael eu cyflwyno i  wasanaeth ym mis Medi 2026. Nododd y byddai trenau Dosbarth 197 yn fwy dibynadwy ac yn perfformio yn well – wedi eu cynllunio i fod yn fwy hygyrch na'r trenau Dosbarth 158 hŷn; bod drysau canolog ar y trenau yn cynorthwyo teithwyr i fynd ar ac oddi ar y trên yn haws, yn ogystal â symud rhwng cerbydau. Er y gallu i deithio ar gyflymder o 100mya, ni fydd addasiadau i’r amserlen, ond y gobaith yw y bydd y trenau yn cyrraedd a gadael ar amser

·        Bod bwriad gyrru un o’r trenau newydd i Aberystwyth yn ystod yr haf gan wahodd rhanddeiliaid i weld y trên a chwrdd â rhai aelodau o’r Tîm Gweithrediadau sydd wedi bod yn gweithio ar y prosiect.

·        Hyfforddiant gyrwyr yn parhau, a hyfforddiant rheolwyr trên yn dechrau ym mis Mehefin

·        Bod gosod CET (tanciau gwaredu gwastraff toiledau), wedi'i gymeradwyo ar gyfer Pwllheli gyda gobaith i’r gwaith gael ei gwblhau ym mis Awst.

·        Twmpathau Harrington yn cael eu gosod mewn 6 gorsaf ar yr arfordir

·        Platfform yn cael ei addasu yng ngorsafoedd Abermaw, Harlech a Phorthmadog

 

Yng nghyd-destun perfformiad, adroddwyd bod 482 o wasanaethau wedi eu rhedeg rhwng Ebrill a Mai, oedd yn fwy nag unrhyw gyfnod arall yn y flwyddyn. Ategwyd bod perfformiad ‘cyrraedd ar amser’ wedi gostwng ychydig, ond yn parhau i fod yn uwch na lefelau targed Cymru. O ran teithiau sydd wedi eu canslo, bod y rhain islaw 2%, ac eto yn well na chyfartaledd Cymru.

 

Ar gyfer tymor yr Haf, bydd bwriad rhedeg trenau 4 cerbyd ar hyd yr arfordir, yn amodol ar effaith hyfforddiant criwiau trên ar gyfer y trenau newydd.

 

Bod bwriad rhedeg y trên cysgu moethus Britannic Explorer ar y Cambrian, gyda chynllun wedi ei ddatblygu fel nad yw'n cael effaith ar ganslo unrhyw wasanaethau teithwyr.

 

Bydd Trafnidiaeth Cymru yn treialu addasiadau i amserlen yr arfordir gydag ymadawiadau ychydig yn hwyrach, felly anogwyd pawb i wirio amseroedd cyn teithio

 

Diolchwyd i James am y diweddariad

 

Sylwadau a materion yn codi o’r drafodaeth ddilynol:

·        Yn llongyfarch Trafnidiaeth Cymru ar welliant mewn perfformiad, er hynny nifer oriau gwasanaeth yn llawer llai o gymharu gyda gweddill Cymru (trenau'n rhedeg oddeutu pob 2 awr (dydd Llun - dydd Sadwrn) ac yn llai aml ar ddydd Sul).

·        Yn croesawu’r bwriad o gyflwyno trenau 4 cerbyd dros yr Haf

·        Trenau ar amser, cynnydd yn y defnydd, nifer digwyddiadau mewn trefi lleol yn cael eu cefnogi gan ddefnydd y trên – y gobaith yw y gall hyn arwain at drenau yn rhedeg pob awr. Bydd cynnydd mewn defnydd hefyd yn arwain at gynnydd mewn cyflogaeth.

·        Cais i gadw’r trenau hwyr ar amserlen gaeaf 2026/27

·        Pryder yn y nifer achosion lle nad yw teithwyr yn talu, neu'r tocynnwr ddim yn cyrraedd at deithwyr, ac felly nid ydynt yn gynwysedig yn nata nifer defnyddwyr.  Y Pwyllgor yn dymuno peidio gweld cyfanswm gwerthiant tocynnau fel yr unig fodd o fesur nifer defnyddwyr - rhaid cael ffigyrau cywir.

·        Mewn Cynhadledd ddiweddar bu i Mark Hooper, cyn Ddirprwy Weinidog Trafnidiaeth Llywodraeth Cymru, ddiolch i Trafnidiaeth Cymru am y buddsoddiadau i gysylltiadau gyda Lerpwl a Manceinion er ymddengys bod llefydd yng Nghymru angen mwy o fuddsoddiad. Er yn llongyfarch hyn, angen sicrhau cefnogaeth i Reilffordd y Cambrian a gobaith y bydd buddsoddiad i’r dyfodol ac ystyriaeth i drenau pob awr.

·        Ymddengys bod Phil Cauldwell (Rheolwr Croesfan Harlech)  wedi ymddeol – a oes person arall wedi cael ei benodi yn ei le?

 

Mewn ymateb i gwestiwn ynglŷn â Chompownd Machynlleth a’r nifer sydd yn cael eu cyflogi yno, nodwyd bod nifer o elfennau’r gwasanaeth trên yn cael eu cynnal yno - yn ganolfan ar gyfer peirianwyr, gyrwyr, tocynwyr, glanhawyr ac arlwyo. Nid oedd gan y swyddog wybodaeth i law, ond bod modd cael at y wybodaeth ac adrodd yn ôl.

Mewn ymateb i gwestiwn ynglŷn â phrinder biniau mewn gorsafoedd, nodwyd bod cyfraith ailgylchu yn golygu bod angen tri bin ymhob gorsaf yn hytrach nag un ar gyfer gwastraff cyffredinol ac un ar gyfer ailgylchu. Ategodd bod darparu lle addas ar gyfer y biniau mewn gorsafoedd yn fater sy’n derbyn dipyn o sylw gan y Tîm Cynaliadwy sy'n gweithio i wella materion ailgylchu; byddai hefyd yn cyfeirio’r cwestiwn at Reolwr Gorsaf Trenau Arriva Cymru.

 

Mewn ymateb i gwestiwn beth oedd ystyr ‘adfer platfform’ (platform re-instatement) ac os oedd hyn yn ymwneud â ‘lefel’ platfform ynteu ‘hyd’ y platfform, nodwyd mai hyd y platfform oedd yn berthnasol yma; rhai gorsafoedd gyda phlatfform wedi ei gau i ffwrdd ac felly angen dod ag ardal yma o’r platfform yn ôl i ddefnydd yng ngorsafoedd Porthmadog, Bermo a Harlech

 

Network Rail

 

Mynegwyd siom unwaith eto nad oedd cynrychiolydd o Network Rail yn bresennol yn y cyfarfod i gyflwyno diweddariad.

 

Nodwyd bod cyfarfod Grŵp Partneriaeth Ffyrdd Rheilffordd yn cael ei gynnal rhwng Swyddogion Cyngor Gwynedd a Network Rail a bod modd gwneud cais am wybodaeth drwy’r grŵp yma i’r dyfodol.

 

Heddlu Trafnidiaeth Prydeinig

 

Nid oedd cynrychiolydd o Heddlu Trafnidiaeth Prydeinig yn bresennol yn y cyfarfod i

gyflwyno diweddariad

 

Bod cyfrifoldebau Heddlu Trafnidiaeth Prydeinig wedi eu rhannu fesul ardal ar y  Cambrian. Gwnaed cais am fwy o wybodaeth am y rhaniad yma.