Agenda item

Dewi A. Morgan, Pennaeth Cyllid (Swyddog Cyllid Statudol y CBC) a Sian Pugh, Pennaeth Cynorthwyol Cyllid, i gyflwyno’r adroddiad.

• Nodi sefyllfa alldro’r Cynllun Twf ar gyfer 2025/26 gan nodi, oherwydd tanwariant, peidio â defnyddio £60,990 o’r gronfa wrth gefn wedi’i chlustnodi, a defnyddio swm llai o £867,731 o grant Cynllun Twf Gogledd Cymru, i ddangos sefyllfa niwtral ar gyfer y flwyddyn.

 

• Nodi sefyllfa cronfeydd y Cynllun Twf.

 

• Nodi adolygiad cyfalaf diwedd flwyddyn y Cynllun Twf ar 31 Mawrth 2026.

 

• Nodi sefyllfa alldro y Parth Buddsoddi ar gyfer 2025/26.

 

• Nodi sefyllfa alldro y Partneriaeth Sgiliau Rhanbarthol ar gyfer 2025/26.

 

Cyflwynwyd yr adroddiad gan Bennaeth Cynorthwyol Cyllid

 

PENDERFYNIAD

 

·       Nodi sefyllfa alldro’r Cynllun Twf ar gyfer 2025/26 gan nodi, oherwydd tanwariant, peidio â defnyddio £60,990 o’r gronfa wrth gefn wedi’i chlustnodi, a defnyddio swm llai o £867,731 o grant Cynllun Twf Gogledd Cymru, i ddangos sefyllfa niwtral ar gyfer y flwyddyn.

 

·       Nodi sefyllfa cronfeydd y Cynllun Twf.

 

·       Nodi adolygiad cyfalaf diwedd flwyddyn y Cynllun Twf ar 31 Mawrth 2026.

 

·       Nodi sefyllfa alldro y Parth Buddsoddi ar gyfer 2025/26.

 

·       Nodi sefyllfa alldro y Partneriaeth Sgiliau Rhanbarthol ar gyfer 2025/26.

 

RHESYMAU DROS Y PENDERFYNIAD

 

Hysbysu’r Is-bwyllgor Lles Economaidd am sefyllfa ariannol y Cynllun Twf (gan gynnwys y Gronfa Ffyniant Gyffredin a Chynllun Ynni Ardal Leol), y Parth Buddsoddi a’r Bartneriaeth Sgiliau Rhanbarthol ar gyfer refeniw a chyfalaf yn 2025/26.

 

TRAFODAETH

 

Tywyswyd yr aelodau drwy sefyllfa refeniw a chyfalaf ar gyfer y Cynllun Twf, Parth Buddsoddi a’r Bartneriaeth Sgiliau Rhanbarthol ar gyfer y flwyddyn ariannol 2025/26.

 

Sefyllfa Alldro Net Terfynol

Adroddwyd bod tanwariant o £543,000 o fewn y sefyllfa alldro net terfynol, gyda’r prif danwariant yn deillio o bennawd ‘gweithwyr’. Ymhelaethwyd bod oddeutu £90,000 o’r tanwariant hwn yn deillio o staff sydd yn gweithio cyfran o’u hamser ar y Cyd-bwyllgor Corfforedig, £39,000 yn ymwneud a staff sy’n gweithio ar y Bartneriaeth Sgiliau Rhanbarthol a £156,000 yn ymwneud â staff a ariannwyd gan brosiectau’r Cynllun Twf. Cadarnhawyd bod swyddi gwag wedi arwain at danwariant o oddeutu £255,000.

 

Nodwyd hefyd bod tanwariant yn erbyn pennawd ‘rolau llywodraeth ychwanegol’ oherwydd, er bod penodiadau wedi cael eu gwneud yn ystod y flwyddyn, eglurwyd eu bod yn cael eu hariannu o’r Gronfa Adnoddau ac felly bu i gyllideb y gronfa honno gael ei haddasu i gyfateb â’r tanwariant. Cyfeiriwyd hefyd at danwariant o £181,000 ar y gwariant cefnogol i brosiectau.

 

Amlygwyd mai prif ffrydiau incwm ar gyfer y flwyddyn oedd: cyfraniadau partneriaid, grant Cynllun Twf Gogledd Cymru, grant ynni Llywodraeth Cymru, y Gronfa Ffyniant Gyffredin, y gronfa Wrth Gefn a’r Gronfa Adnoddau. Atgoffwyd mai cyfraniadau partneriaid yw’r unig ffynhonnell ariannu barhaol ar gyfer y Cyd-bwyllgor Corfforedig a'u bod yn gyfanswm o 20% o’r gyllideb lawn. Adroddwyd bod y cyfraniadau gan bartneriaid wedi eu cymeradwyo fel rhan o’r Cytundeb Cyflawni ac Ariannu gan yr holl bartneriaid perthnasol.

 

Cyfeiriwyd at ffynonellau ariannu tymor byr megis y Grant Cynllun Twf. Eglurwyd bod hanner yr arian a dderbyniwyd fel rhan o’r grant hwnnw wedi cael ei ddynodi i wariant refeniw, gan nodi ei fod eisoes wedi cael ei ddefnyddio ym mhum mlynedd gyntaf y rhaglen - gyda 10 mlynedd yn weddill. Pwysleisiwyd pwysigrwydd amrywiaeth ffynonellau ariannu i’r dyfodol.

 

Ystyriwyd defnyddio’r tanwariant hwn er mwyn gadael sefyllfa niwtral ar ddiwedd y flwyddyn. Nodwyd byddai modd gwneud hyn drwy leihau cyfraniad o’r grant Cynllun Twf o £1,350,000 i oddeutu £868,000 ac i beidio defnyddio £61,000 o’r gronfa Wrth Gefn. Eglurwyd byddai’r ffynonellau hyn yn cael eu defnyddio i ariannu gwariant o fewn y blynyddoedd dilynol ac yn lleihau’r risg o’r angen i gynyddu cyfraniadau partneriaid yn y dyfodol agos.

 

Cronfeydd

Adroddwyd ar y symudiad o fewn cronfeydd yn ystod y flwyddyn, gan gynnwys balansau’r cronfeydd hynny ar 31 Mawrth 2026.

 

Atgoffwyd bod Cronfa Llog gwerth oddeutu £5miliwn wedi’i neilltuo er mwyn ariannu costau benthyca yn y blynyddoedd nesaf, gan nodi bod y balans hwn wedi ei gymryd i ystyriaeth wrth gyfrifo costau benthyca'r partneriaid yng nghyllideb y flwyddyn ariannol 2026/27.

 

Cadarnhawyd bod balans y Gronfa Adnoddau yn £4.4miliwn ar 31 Mawrth 2026, gan adrodd bod oddeutu £1miliwn wedi ei glustnodi i’w ddefnyddio yng nghyllideb 2026/27.

 

Sefyllfa Cyfalaf Terfynol y Cynllun Twf

Adroddwyd bod £30.64miliwn o wariant wedi ei wneud ar y Cynllun Twf erbyn diwedd y flwyddyn ariannol 2025/26. Nodwyd bod hyn yn ostyngiad net o £14.28miliwn o’i gymharu â’r gyllideb a gymeradwywyd ym mis Chwefror 2025, yn dilyn llithriad ar brosiectau. Er hyn, nodwyd bod y gwariant ar brosiect Cydnerth wedi ei wneud yn gynt na ragdybiwyd, gyda £8.87miliwn yn arddangos yng ngwariant 2025/26 yn hytrach na rhwng dwy flwyddyn ariannol fel y proffiliwyd yn wreiddiol. Cadarnhawyd bod cyllideb y Cynllun Twf a ddynodwyd ar gyfer gwariant refeniw yn 2025/26 wedi cael ei ostwng i £0.87miliwn er mwyn adlewyrchu ffigyrau’r alldro refeniw terfynol.

 

Gwariant ac Incwm gwirioneddol y Parth Buddsoddi

Eglurwyd bod oddeutu £323,000 o wariant wedi ei nodi yn erbyn Cyngor Sir y Fflint a Wrecsam ar y ddogfennaeth, ond yn dilyn gwybodaeth fwy diweddar, cadarnhawyd bydd y ffigwr hwn yn cael ei addasu i £230,000 erbyn i’r wybodaeth gael ei gyflwyno’n derfynol am gymeradwyaeth. Soniwyd bod y ffigwr gwreiddiol yn cynnwys £93,000 o ymrwymiadau a fyddai’n cael ei arddangos fel rhan o wariant 2026/27. Ymhelaethwyd bydd swm y Grant Parth Buddsoddi a ddefnyddir hefyd yn cael ei addasu i adlewyrchu hyn, fel na fyddai’n cael effaith ar sefyllfa net y flwyddyn.

 

Y Bartneriaeth Sgiliau Rhanbarthol

Cadarnhawyd bod sefyllfa ariannol y bartneriaeth yn dangos sefyllfa niwtral am y flwyddyn, gan fod grant o £290,000 yn cael ei ariannu gan arian grant Llywodraeth Cymru.

 

Cadarnhawyd bydd y wybodaeth a gyflwynwyd o fewn yr adroddiad hwn yn cael ei gyflwyno i’r Is-bwyllgor Llywodraethu ac Archwilio ar 04 Mehefin cyn ennyn cymeradwyaeth terfynol gan y Cyd-bwyllgor Corfforedig ar 19 Mehefin.

 

Yn ystod y drafodaeth, cyflwynwyd y sylwadau a ganlyn:-

 

Mewn ymateb i ymholiad, cadarnhaodd y Pennaeth Cyllid Cynorthwyol bod tanwariant yn parhau mewn gwirionedd, er bod modd cadarnhau sefyllfa niwtral ar falansau 2025/26. Fodd bynnag, nodwyd bod y tanwariant hwn o £543,000 yn galluogi’r ffynonellau ariannol a nodwyd o fewn yr adroddiad i barhau i fod ar gael i’r dyfodol.

 

Diolchwyd am yr adroddiad.