Agenda item

Codi ffens newydd 2400mm o uchder ogwmpas rhan o ffin y cae chwarae.

AELOD LLEOL: Cynghorydd Ioan Thomas

Dolen i'r dogfennau cefndir perthnasol

PENDERFYNIAD:

Gohirio i gynnal ymweliad safle

Codi ffens newydd 2400mm o uchder o gwmpas rhan o ffin cae chwarae.

a)     Amlygodd yr Uwch Swyddog Cynllunio mai cais llawn ydoedd ar gyfer codi ffens o amgylch rhan o ffin cae chwarae Ysgol Syr Hugh Owen.

Cyflwynwyd y cais i’r Pwyllgor Cynllunio oherwydd bod yr Aelod Lleol wedi datgan buddiant ac wedi darparu sylwadau ar y cais. 

Amlygwyd bod sylwadau o’r ymgynghoriad statudol a chyhoeddus yn cyfeirio fwyaf at bryderon yn deillio gan gymdogion yn nodi ei fod yn ddatblygiad di angen gan greu effaith weledol, effaith ar fwynderau preswyl ac effaith ar hawliau dynol. Derbyniwyd llythyr hefyd yn cefnogi'r ffens oherwydd bod problemau gyda thaflu cerrig, tresmasu ar eiddo preifat a sbwriel yn cael ei daflu i mewn i erddi.

Cyfeiriwyd at Polisi ISA 2, sy’n ymwneud gyda chyfleusterau cymunedol sy’n cynnwys ysgolion, ac yn nodi y bydd y CDLl yn cynorthwyo i gynnal a gwella cyfleusterau cymunedol. Byddai’r bwriad yn cael ei leoli ar ffiniau ysgol bresennol a bod angen y ffens o gwmpas yr adeilad er mwyn gwella diogelwch o fewn tir yr ysgol.  O ran yr egwyddor ystyriwyd bod y bwriad yn un rhesymol ac yn cyd-fynd gydag egwyddor Polisi ISA 2 CDLl.

Bydd y ffens bwriedig yn un “weldmesh” o liw gwyrdd, sydd yn ffens lle mae modd gweld drwyddi ac felly ystyriwyd na fydd yn creu golwg gaeedig na gormesol i’r ysgol na’r tai cyfagos. Gan ei fod yn cydweddu â ffensys presennol yr ysgol ac yn caniatáu gwelededd, ni ystyriwyd y bydd yn creu effaith weledol yn yr ardal, ac felly’n cydymffurfio â pholisi PCYFF 3.

Adroddwyd bod rhai preswylwyr cyfagos wedi gwrthwynebu ar sail effaith weledol a theimlad gormesol, ond nodwyd bod ffensys o’r math yma yn gyffredin mewn ysgolion er mwyn diogelu staff a disgyblion. Gan fod ffensys tebyg eisoes yn bodoli o amgylch y safle, nid yw’r cynnig yn anghyson â’r amgylchedd. Bydd y ffens newydd tua 4–5 metr o gefn y tai, gan ddarparu bwlch digonol fel nad yw’n cael effaith sylweddol ar fwynderau preifat. Ategwyd bod rhaid ystyried yr angen ar gyfer diogelu disgyblion a thir yr ysgol ynghyd a’r tir tu allan i’r ysgol rhag difrod ac felly, ystyriwyd na fyddai’r ffens o’r math yma’n achosi niwed arwyddocaol sylweddol i fwynderau’r gymdogaeth leol, ac felly yn cydymffurfio  gyda Polisi PCYFF 2 y CDLl. Yn ogystal, tynnwyd sylw at goed sydd â gorchymyn gwarchod ar hyd y ffin gydag amod i’w osod i sicrhau na chaiff unrhyw waith ar y coed ei wneud heb ganiatâd ymlaen llaw – byddai hyn yn diogelu’r coed fel rhan o’r datblygiad.

Nid oedd y bwriad arfaethedig yn cyrraedd y trothwyon ar gyfer cyflwyno Datganiad Iaith Gymraeg neu Adroddiad ar Asesiad Effaith Iaith Gymraeg, er hynny ni ystyriwyd byddai’n niweidiol  i’r iaith Gymraeg ac felly yn cydymffurfio a gofynion Polisi PS 1.

Ystyriwyd bod y materion cynllunio wedi derbyn sylw teilwng gyda rhai sylwadau yn cyfeirio at faterion gweithredol. Ni ystyriwyd bod y dystysgrif perchnogaeth tir yn anghywir, gan fod yr ymgeisydd yn gweithredu ar ran yr Ysgol a’r Cyngor, ac ni ystyriwyd bod cynnwys rhai dogfennau a gyflwynwyd yn anghywir nac yn ddiffygiol. Ategwyd mai mater i’r ymgeisydd yw cysylltu gyda pherchnogion tir cyfagos ac o dan y drefn Cynllunio nid oes rheidrwydd iddo wneud hynny.

Ystyriwyd fod y bwriad yn dderbyniol ac yn cydymffurfio gyda’r polisïau perthnasol. Argymhellwyd caniatáu'r bwriad gydag amodau

b)     Yn manteisio ar yr hawl i siarad, nododd gwrthwynebydd i’r cais y sylwadau canlynol:

·        Er yn derbyn bod y sylw tu allan i’r broses gynllunio,  bod Deddf Presgripsiwn 1832, yn caniatáu hawl tramwy drwy bresgripsiwn os bu defnydd di-dor am 40 mlynedd; yn hawl anorchfygol, yn un absoliwt, na ellid ei drechu, bod tystiolaeth o ddefnydd di-dor am dros 40 mlynedd gan nifer o berchnogion eiddo felly byddai gosod y ffens yn dor-cyfraith. 

·        Para 5.3 o’r adroddiad yn nodi, “Bydd y ffens newydd yn gwahanu gerddi’r tai cyfagos oddi wrth gae chwarae’r ysgol, a bydd y ffens oddeutu 4 i 5 medr i ffwrdd o gefn y tai dan sylw. Credwn felly fod yr ardal yma rhwng cefn y tai a’r ffens yn ddigon i beidio creu effaith negyddol ac andwyol sylweddol ar fwynderau preifat perchnogion y tai hynny”. Nid oes gwybodaeth yn nodi bod eisoes ffensys a waliau yn gwahanu gerddi tai cyfagos a chae chwarae’r ysgol.

·        Bod ymweliad safle gan swyddog achos cynllunio yn darparu’r cyd-destun ffisegol angenrheidiol i werthuso cais cynllunio, gan ganiatáu i'r swyddog asesu'r effaith ar eiddo cyfagos gan ystyried yr effaith gweledol, a deall y cymeriad lleol sy’n greiddiol cyn gwneud argymhelliad i’r Pwyllgor. Byddai'n ddiddorol gwybod a wnaeth y swyddog achos gynnal archwiliad manwl o’r safle ac yn fwy perthnasol o le'r oedd yr archwiliad hynny

·        I werthuso'r cynnig hwn yn gywir ac i ddeall pam y cafwyd nifer o wrthwynebiadau, byddai'n rhaid i'r swyddog ymweld â'r eiddo a fynegodd wrthwynebiadau i weld yr effaith y byddai'r ffens arfaethedig yn ei gael cyn penderfynu ar yr argymhelliad. Yn dadlau yn gryf na ellid dod ag argymhelliad i’r Pwyllgor heb ystyried effaith gosod ffens ar eiddo h.y. yr effaith ar edrych i fyny ar y ffens  a’r effaith o gael eich cau i mewn. Yn tybio mai asesiad gan swyddog naill ai heb ymweld â’r safle neu ymweliad o lefel y cae yn unig sydd wedi ei weithredu - dim yn ymwybodol o gais gan swyddog am ganiatâd i fynd i mewn i eiddo i wneud asesiad, sy’n syndod!

·        O ystyried topograffi'r tir, bydd y ffens fwy neu lai ar uchder llawr cyntaf nifer o’r eiddo.  Bydd y ffens yn nodwedd amlwg fydd yn cael effaith ormesol a digydymdeimlad ar yr eiddo, gan arwain at ymdeimlad o gael eich cau i mewn a cholled sylweddol o amwynder. Wrth edrych i fyny o ddrws cefn i edrych ar ffens, bydd top y ffens rhyw 5 medr yn uwch na lle mae rhywun yn sefyll a hynny gan ddyfynnu o’r adroddiad “oddeutu 4 i 5 medr i ffwrdd o gefn y tai”.

·        Gwahaniaeth lefel rhwng y cae a nifer o’r eiddo yn amlwg. Nid oes cyfeiriad at y gwahanol lefelau hyn yn yr adroddiad - gwybodaeth yma yn bwysig ac yn dadleu  y dylid ei ystyried yn ddwys cyn dod i benderfyniad.

·        Yn cadarnhau  ei wrthwynebiad ynghyd a gwrthwynebiadau nifer o drigolion eraill  i ganiatáu gosod ffens oherwydd effaith negyddol ac andwyol sylweddol ar fwynderau preifat perchnogion - ffens ddiangen o ystyried bod waliau a ffensys eisoes yn bodoli ar y safle rhwng tir yr ysgol ac eiddo

c)     Cynigiwyd ac eiliwyd caniatáu y cais

ch)   Cynigiwyd ac eiliwyd gwelliant i gynnal ymweliad safle

PENDERFYNWYD: Gohirio i gynnal ymweliad safle