Agenda item

David Roberts (Cadeirydd Partneriaeth Sgiliau Rhanbarthol Gogledd Cymru) a Catherine Morris-Roberts (Rheolwr Sgiliau Rhanbarthol) I gyflwyno’r adroddiad.

 

Cymeradwyo Cynllun Sgiliau a Chyflogaeth Gogledd Cymru a’r blaenoriaethau fel y’u nodir yn y cynllun. 

 

Gofyn i’r Bartneriaeth Sgiliau Rhanbarthol gyflwyno adroddiad diweddariad ymhen 12 mis. 

 

Cyflwynwyd yr adroddiad gan Gadeirydd Partneriaeth Sgiliau Rhanbarthol Gogledd Cymru a Rheolwr Sgiliau Rhanbarthol.

 

PENDERFYNIAD

 

Cymeradwyo Cynllun Sgiliau a Chyflogaeth Gogledd Cymru a’r blaenoriaethau fel y’u nodir yn y cynllun.

 

Gofyn i’r Bartneriaeth Sgiliau Rhanbarthol gyflwyno adroddiad diweddariad ymhen 12 mis.

 

RHESYMAU DROS Y PENDERFYNIAD

 

Adrodd i’r Is-bwyllgor Lles Economaidd ar Gynllun Sgiliau a Chyflogaeth Gogledd Cymru a cheisio cymeradwyaeth o’i flaenoriaethau er mwyn cefnogi’r Gwaith o gyflawni yn rhanbarthol.

 

TRAFODAETH

 

Eglurwyd bod Cynlluniau Sgiliau a Chyflogaeth yn gweithredu ar gylchred 3 mlynedd o hyd, gan nodi bod y cylchred diweddaraf wedi diweddu ar ddechrau’r flwyddyn hon. Nodwyd nad oedd arweiniad clir wedi cael ei ddarparu gan Lywodraeth Cymru yn y misoedd diwethaf gan fod paratoadau yn cael ei wneud ar gyfer Etholiad Senedd Cymru ym mis Mai.

 

Adroddwyd bod Bwrdd Partneriaeth Sgiliau Rhanbarthol Gogledd Cymru wedi penderfynu parhau gyda Chynllun newydd am y tair blynedd nesaf er mwyn sicrhau datblygiad a pharhad momentwm, gan obeithio bydd y Llywodraeth newydd yn ei fabwysiadu maes o law. Cydnabuwyd y posibilrwydd bydd man addasiadau yn cael eu gwneud wrth i’r Llywodraeth ei ystyried, ond hyderwyd bod y Cynllun yn ddigon cadarn i ymdopi gyda hynny.

 

Tynnwyd sylw bod Cynllun Sgiliau a Chyflogaeth Gogledd Cymru yn unigryw i’r tri chynllun arall a welir yng Nghymru, gan ei fod wedi ei glymu yn agos gyda’r Cyd-bwyllgor Corfforedig. Hyderwyd bod hyn yn gryfder gan fod modd darparu cefnogaeth ar lefel rhanbarthol.

 

Adroddwyd bod oddeutu 30 o bartneriaid yn rhan o’r Bwrdd, gan gynnwys colegau a phrifysgolion, gan nodi bod eu presenoldeb ar y Bwrdd yn eu cynorthwyo gyda’u cynlluniau unigol. Mynegwyd balchder bod y Bwrdd wedi ymgysylltu gyda dros 350 o gyflogwyr ar draws y naw sector blaenoriaeth, drwy arolygon, rhwydweithiau cyflogwyr a chyfarfodydd, er mwyn gallu datblygu’r Cynllun.

 

Cadarnhawyd bod tair thema yn parhau o’r Cynllun blaenorol, er mwyn sicrhau parhad yng ngwaith da'r Bwrdd a’r gefnogaeth a gynigir o fewn y rhanbarth. Manylwyd bod y rhain yn cynnwys darparu cefnogaeth i gyflogwyr, unigolion ac addysgu sut y darperir cefnogaeth a gwneud y cysylltiadau rhwng unigolion a chyflogwyr.

 

Eglurwyd bod y cynllun yn cynnwys mewnwelediadau cyflogwyr am yr anghenion recriwtio a’r sgiliau angenrheidiol o fewn y sectorau yn ogystal â gwybodaeth am y rhwystrau mae unigolion yn eu hwynebu. Ymhelaethwyd bod y cynllun yn rhoi trosolwg o heriau sylweddol a chyfleoedd sydd ar gael gyda phrosiectau buddsoddi mawr Tynnwyd sylw bod nifer o brosiectau’r Cyd-bwyllgor Corfforedig wedi gwneud defnydd o’r Cynllun yn y gorffennol. Nodwyd bod y cynllun yn cyfarch y ffaith bod y farchnad lafur yn esblygu megis Deallusrwydd Artiffisial, Sero Net, a sut all cyflogwyr wneud y defnydd gorau o’r materion hyn.

 

Amlygwyd bod trafferthion cysylltedd economaidd yn effeithiol ar unigolion o fewn y rhanbarth, gan gydnabod nad yw 15.1% o bobl 16-24 oed yng ngogledd Cymru mewn addysg, cyflogaeth neu hyfforddiant - y gyfradd uchaf yng Nghymru. Nodwyd mai iechyd meddwl yw’r ffactor sy’n cyfrannu mwyaf at achosion economaidd anweithredol ar hyn o bryd.

 

Yn ystod y drafodaeth, cyflwynwyd y sylwadau a ganlyn:-

 

Diolchwyd i’r Bwrdd am eu gwaith o ddatblygu sgiliau ar draws y rhanbarth.

 

Croesawyd y Cynllun newydd gan ddatgan pryder am yr ystadegau brawychus nad yw 15.1% o bobl rhwng 16 a 24 oed mewn addysg, gwaith neu hyfforddiant yn y rhanbarth. Pwysleisiwyd y pwysigrwydd i ymchwilio i hyn ymhellach er mwyn cynorthwyo’r unigolion hynny. Mewn ymateb i’r sylwadau, cadarnhaodd Cadeirydd y Bwrdd y dymuna gweld gogledd Cymru gyda’r cyfraddau isaf ar y mater hwn, gan bwysleisio ei fod yn gyfrifoldeb i’r holl bartneriaid er mwyn sicrhau bod y sefyllfa yn gwella.

 

Cysidrwyd bod angen gwaith ehangach ar y cyfleoedd prentisiaethau sydd ar gael yn y rhanbarth. Cydnabuwyd nad oes modd i’r Bwrdd greu prentisiaethau, ond ystyriwyd ei allu i roi pwysau ar y Llywodraeth i ystyried y system prentisiaethau, cymharu gydag awdurdodau eraill, er mwyn cydnabod prentisiaethau fel modd o darparu sgiliau i weithwyr. Mewn ymateb i’r sylwadau, cadarnhaodd Cadeirydd y Bwrdd bod pwysau parhaus yn cael ei roi ar y Llywodraeth i fanteisio ar brentisiaethau a darparu cyllidebau ar eu cyfer, gan gadarnhau bod anogaeth a gwybodaeth yn cael ei rannu gyda chyflogwyr yn gyson fel rhan o weithrediad y Bwrdd, ar brentisiaethau.

 

Teimlwyd nas oes digon o bwyslais yn cael ei roi ar yr angen gwirioneddol ar draws y rhanbarth i ddenu gweithwyr o fewn y maes gofal cymdeithasol ac iechyd. Pwysleisiwyd bod heriau recriwtio o fewn y maes gofal yn her eithriadol i’r awdurdodau lleol, a dylid amlygu hynny yn fanwl o fewn y Cynllun. Dymunwyd gweld y maes hwn yn derbyn mwy o flaenoriaeth o fewn y Cynllun er mwyn denu pobl i mewn i swydd yn y maes gofal yn ogystal â chanfod dulliau i ddatblygu gyrfa. Cytunwyd gyda’r sylwadau hyn gan gydnabod bod angen amlygu’r sefyllfa o fewn y Cynllun.

 

Amlygwyd bod bylchau mewn sgiliau ac arbenigedd i’w weld o fewn yr awdurdodau lleol eu hunain, fel prif gyflogwyr o fewn ardaloedd y rhanbarth. Cydnabuwyd nad yw hyn yn berthnasol i’r mwyafrif o weithwyr ond ei fod yn cael effaith ar feysydd arbenigol megis cynllunio a chyfreithiol. Dymunwyd gweld hyn yn cael ei adlewyrchu yn ehangach o fewn y Cynllun.

 

Tynnwyd sylw bod economi wledig o fewn y rhanbarth yn ddibynnol ar fusnesau bychan, yn hytrach na chyflogwyr mawr sydd yn cyflogi nifer fawr o bobl. Pwysleisiwyd y pwysigrwydd o sicrhau bod y cwmnïau hynny yn elwa ar y Cynllun, drwy nodi bod sgiliau yn cael eu datblygu er mwyn i’r busnesau ffynnu. Mewn ymateb i’r sylwadau, cadarnhawyd bod llais busnesau bach yn cael ei glywed, gan fod Ffederasiwn Busnesau Bychan (FSB) yn bartner gwerthfawr. Nodwyd hefyd bod busnesau o bob maint wedi cael mewnbwn i’r cynllun wrth i’r Bwrdd gynnal trafodaethau ac arolygon. Cadarnhawyd bydd y cydweithio hyn yn parhau dros gyfnod y cynllun.

 

Yn dilyn y sylwadau a dderbyniwyd yn ystod y drafodaeth, ystyriwyd gofyn i’r Bwrdd am ddiweddariad ymhen 12 mis ar ddatblygiad y Cynllun.

 

Diolchwyd am yr adroddiad.