Agenda item

I ystyried yr adroddiad a nodi’r wybodaeth

Cyflwynwyd adroddiad cynhwysfawr gan y Rheolwr Pensiynau yn rhoi trosolwg cyffredinol o weinyddu Cynllun Pensiwn Llywodraeth Leol dros y flwyddyn ddiwethaf ynghyd a’r gweithgareddau sy’n cael eu cynnal gan Gronfa Bensiwn Gwynedd i ymateb i ddatblygiadau cyfredol, cynnal safonau gwasanaeth a gwybodaeth am y gwaith a gyflawnwyd dros y cyfnod, a diweddariadau amrywiol brosiectau:

·          Diweddariad Rheoleiddiol - Addas ar Gyfer y Dyfodol - pwyslais ar atebolrwydd, safonau proffesiynol a gwneud penderfyniadau effeithiol. Bydd gofyn i bob Cronfa CPLlL benodi Uwch Swyddog CPLlL dynodedig i reoli a gweinyddu’r Gronfa Bensiwn yn effeithiol a phenodi Person Annibynnol i gael ei gynnwys ar y Pwyllgor Pensiynau i ddarparu her allanol, cefnogi penderfyniadau cadarn a chryfhau goruchwyliaeth llywodraethu - penodiadau yn eu lle erbyn 31 Rhagfyr 2026

·          Cynnal Adolygiad Llywodraethu i asesu effeithiolrwydd strwythurau llywodraethu presennol - y gwaith i’w gwblhau erbyn 31 Ragfyr 2026

·          Diwygiadau Mynediad a Thegwch CPllL i wella cydraddoldeb, hygyrchedd a thegwch ar draws y CPLlL. Y gwaith yn amlygu sialens o gysoni ac adnabod achosion perthnasol i’r diwygiadau

·          Effaith ar weinyddiaeth - cais i’r Gronfa adolygu gweithdrefnau, asesu achosion hanesyddol, diweddaru prosesau gweinyddu a chyfathrebu Aelodau, a pharatoi ar gyfer gofynion adrodd newydd

·          Diweddariad staffio - croesawu penodiad Prentis a Swyddog Pensiwn dan Hyfforddiant

·          Cyfraniadau Gwirfoddol Ychwanegol - oherwydd heriau sy’n deillio o drefniadau presennol y Gronfa, comisiynwyd Hymans Robertson i adolygu’r farchnad i ganfod gwell darparwr. Penodwyd Legal & General, sydd â phrofiad a buddion da, i ddarparu trefniadau cyfraniadau gwirfoddol ar gyfer aelodau’r Gronfa a bod trafodaethau yn cael eu cynnal i osod amserlen trosglwyddiadau.

·          System Gyflogres Newydd - cynlluniau presennol ar gyfer profi'r system newydd i ddechrau yn ystod tymor yr Hydref 2026, gyda disgwyliad i’r system newydd fod yn weithredol yn gynnar yn 2027

·          Datrysiad McCloud - cynnydd yn parhau i fod yn gadarnhaol a gwaith ar y trywydd iawn i gwblhau’r gwaith prosiect sydd yn weddill (yn unol â’r amserlen a gytunwyd).

Cyfeiriwyd at lwyddiant parhaus ‘Fy Mhensiwn Ar-lein’ gan nodi bod aelodaeth y porth yn parhau i dyfu’n gyson gyda 8,200 o Aelodau wedi cofrestru i’r porth newydd. Adroddwyd bod Cronfa Bensiwn Gwynedd yn archwilio cyfleoedd i ehangu ymarferoldeb y porth ymhellach sydd yn cynnwys cyflwyno ffurflenni digidol. Ategwyd, yn dilyn llwyddiant fideos AI bod bwriad gwneud mwy o ddefnydd o fideos fel bod modd i Aelodau gael mynediad at bynciau pensiwn penodol.

Tynnwyd sylw at yr Arolwg Boddhad Gwasanaeth sy’n cael ei anfon at Aelodau ar ddiwedd prosesau allweddol, megis ymddeoliadau a thaliadau ad-dalu, i gasglu barn ar ansawdd y gwasanaeth a dderbyniwyd. Adroddwyd bod 89 o aelodau wedi cymryd rhan yn yr arolwg gyda’r canlyniad yn galonogol iawn (95% o’r defnyddwyr yn cytuno’n gryf neu gytuno bod yr ansawdd o safon uchel a 97% yn cytuno’n gryf neu gytuno bod y gwasanaeth a ddarparir gan staff yn bodloni safon uchel).

Diolchwyd am yr adroddiad.

Yn ystod y drafodaeth ddilynol nodwyd y sylwadau canlynol gan Aelodau’r Bwrdd:

·        Yn diolch am y wybodaeth.

·        Llawer o waith yn cael ei wneud mewn ymateb i newidiadau a’r gwasanaeth yn parhau yn foddhaol iawn

·        Diolch arbennig am y gwaith McCloud ac am gadw i’r amserlen

Yng nghyd-destun penodi person annibynnol ar gyfer y Pwyllgor Pensiynau, fydd angen “i ffitio i mewn”, a beth fydd y broses o ddewis y person hwnnw, nodwyd bod y fframwaith yn cynnwys manylion unigolion sydd â chymwyseddau ar gyfer gwneud y dasg - y bwriad yw penodi o’r pwl yma. Ategwyd bod Hymans Robertson yn arwain ar gyngor mewn buddsoddi, ond bod hefyd angen ystyried yr elfen llywodraethiant; Bydd angen i’r person llwyddiannus fod a phrofiad helaeth ym maes CPLlL ynghyd a chael gwybodaeth arbenigol yn y meysydd buddsoddi a llywodraethu.

Mewn ymateb i sylw ynglŷn â’r gyflogres newydd ar heriau fydd yn wynebu’r Uned o beidio argraffu a phostio slipiau cyflog neu ail adrodd y trefniant presennol lle dim ond pan fydd taliad pensiwn o fwy na £10 o’i gymharu â’r mis blaenorol y caiff slip cyflog papur ei gyhoeddi, nodwyd er yn derbyn y bydd mwy o alwadau ffôn, bydd y gwaith papur yn lleihau yn sgil dyfodiad Pensiwn ar Lein. Ategwyd bod mwyafrif o’r ymholiadau yn ymwneud a chod treth newydd.

Yng nghyd-destun achosion hanesyddol o Ddiwygiadau Tegwch a’r angen i edrych yn ôl dros 15 mlynedd i sicrhau bod y buddion cywir yn cael eu talu ac os oedd gan yr Uned adnoddau digonol i gwblhau’r gwaith o fewn yr amserlen, nodwyd bod cwmni systemau yn edrych i mewn ar sut i adnabod achosion ond nad oedd y system honno yn gallu cyfrifo’r buddion - y gwaith yn gorfod cael ei gwblhau gyda llaw. Pan fydd y niferoedd wedi eu hadnabod, y bwriad yw cynnal trafodaethau gyda’r cwmni systemau i geisio datrys ffordd o gysoni’r wybodaeth.

Mewn ymateb i gwestiwn ynglŷn ag adnoddau digonol i ymdopi gyda’r gwaith ychwanegol, nodwyd bod penodiad Swyddog Pensiwn Dan Hyfforddiant yn un i’w groesawu ac y bydd y swydd honno yn cael ei defnyddio yn benodol ar gyfer cefnogi’r elfen llywodraethiant. Ategwyd bod cwrdd â gofynion llywodraethiant yn heriol ac unwaith bydd yr Uwch Swyddog CPLlL wedi ei benodi, bydd cyfle i adolygu’r strwythur i sicrhau bod y gwaith ychwanegol yn cael ei gyfarch.

Mewn ymateb i sylw bod 8,200 o Aelodau wedi cofrestru i’r porth newydd ac os oedd y nifer yn cyfateb i gynrychiolaeth deg o’r holl Aelodau, nodwyd bod cynrychiolaeth dda o bob grŵp ond mai grŵp oedran 30-40 oedd â’r canran lleiaf ac efallai bod hynny oherwydd nad oedd pensiwn yn flaenoriaeth iddynt ar hyn o bryd.

Mewn ymateb i gwestiwn ynglŷn â risgiau yn codi o drosglwyddo Cyfraniadau Gwirfoddol Ychwanegol Aelodau o Clerical Medical I Legal & General, nodwyd mai'r risg uchaf fwyaf fyddai aros gyda Clerical Medical. Ategwyd bod Legal & General yn cynnig gwell profiad, ystod ehangach o ddewisiadau buddsoddi, ffioedd îs a gwell ymarferoldeb ar lein.

Yng nghyd-destun yr Arolwg Boddhad ac os oedd 89 ymateb allan o holl Aelodau’r Gronfa yn rhoi darlun dibynadwy o’r sefyllfa, derbyniwyd bod y ffigwr yn isel, ond bod parodrwydd gan Aelodau i gwyno yn uniongyrchol os nad ydynt yn hapus gyda’r profiad. Y bwriad yw cyflwyno holiadur ar lein yn hytrach nag ar bapur ac felly'r gobaith i’r dyfodol yw cael gwell ymateb.

PENDERFYNWYD derbyn a nodi’r wybodaeth