Agenda item

Estyniad i gompownd ceblau selio pen presennol Wern gan gynnwys mynediad parhaol newydd, Compownd selio pen newydd ac adeilad pen twnnel gyda mynediad parhaol ym Minffordd; tynnu compownd selio pen presennol Garth;  gosod ceblau 400 cilofolt (kV) newydd i ddisodli ceblau 400 kV a 132 kV di-angen; ac isadeiledd a gwaith atodol cysylltiedig.  

 

AELODAU LLEOL:

 

Cynghorydd Nia Jeffreys

Cynghorydd Gwilym Jones

Cynghorydd June Jones

Cynghorydd Meryl Roberts

 

Dolen i'r dogfennau cefndir perthnasol

PENDERFYNIAD: Caniatáu

 

1. Terfyn Amser        

Rhaid i'r datblygiad ddechrau o fewn 5 mlynedd i'r dyddiad caniatâd.

2. Cynlluniau a Gymeradwywyd   

Y datblygiad i'w wneud yn unol â'r cynlluniau a'r dogfennau a gymeradwywyd.

3. Oriau Gwaith        

Yn cyfyngu ar oriau gwaith adeiladu ac yn rheoli gweithrediadau y tu allan i oriau.

4. Gosod Seilbyst     

Yn gofyn am ddulliau distaw (non-percussive) o osod seilbyst ac yn cyfyngu ar oriau gosod y seilbyst. 

5. Goleuadau  

Yn gofyn am gymeradwyo cynllun goleuo i amddiffyn ystlumod a rheoli gorlif golau cyn gosod goleuadau gweithredol.

6. Rhannau Caeedig 

Yn gofyn am gymeradwyo lliwiau a gorffeniadau ar gyfer ffensys, waliau, giatiau a thriniaethau eraill ar gyfer terfynau.

7. Halogiad     

Yn gofyn am waith ymchwilio a chyweirio unrhyw halogiad nas nodwyd o'r blaen a ganfuwyd yn ystod y datblygiad. 

8. Lliniaru Llifogydd

Yn gofyn am gymeradwyo a gweithredu cynllun lliniaru llifogydd dros dro ar gyfer y gwaith adeiladu.

9. Parc a Gardd Gofrestredig y Wern     

Yn gofyn am gynllun lliniaru/gwrthbwyso ar gyfer effeithiau ar Barc a Gardd Gofrestredig y Wern.

10. Cynllun Rheoli a Monitro Cynefinoedd (HMP)        

Yn sicrhau gwneud iawn am gynefinoedd, budd net i fioamrywiaeth, monitro cynefinoedd a rheoli INNS dros yr hirdymor.

 

11. Cynllun Rheoli Tirwedd ac Ecolegol (LEMP)

Yn sicrhau adfer tirwedd, plannu, rheoli cynefinoedd, monitro ecolegol a chynnal a chadw hirdymor.

12. Ymchwiliad Archeolegol (WSI) 

Yn ei gwneud yn ofynnol cael ymchwiliad a chofnod archeolegol cyn dechrau'r gwaith paratoi tir.

13. Adrodd Archeolegol       

Yn gofyn am gyflwyno adroddiad archeolegol ac archif yn dilyn gwaith maes.

14. Cynllun Rheoli Deunyddiau a Gwastraff

Yn sicrhau rheolaeth gynaliadwy, ailddefnyddio, adfer a chael gwared ar ddeunyddiau a gloddiwyd a gwastraff.

15. Hawliau Tramwy Cyhoeddus    

Yn gofyn am drefniadau rheoli ar gyfer hawliau tramwy cyhoeddus a Llwybr Beicio Cenedlaethol 8 yn ystod y gwaith adeiladu.

16. Datganiad Dull Adeiladu 

Cyn dechrau unrhyw waith ar y safle, Datganiadau Dull Adeiladu (CMS) ac Asesiadau Risg i fodloni'r Sefydliad Goruchwylio ar gyfer y Rhwydwaith Ffyrdd Strategol (SRN).

17. Dyluniad ailsefydlu'r ffordd gerbydau

Cyn dechrau unrhyw waith ar y safle, bydd angen cyflwyno dyluniad ailsefydlu'r ffordd gerbydau a manyleb palmant a fydd yn bodloni Llywodraeth Cymru, fel y Sefydliad Goruchwylio ar gyfer y Rhwydwaith Ffyrdd Strategol

18. Asedau Dŵr Cymru        

Yn ei gwneud yn ofynnol cynnal arolygon a threfniadau diogelu/dargyfeirio ar gyfer seilwaith dŵr a charthffosiaeth.

19. Draenio Dŵr Wyneb        

Yn atal dŵr wyneb rhag cysylltu â'r rhwydwaith carthffosiaeth cyhoeddus.

20. Arwyddion Cymraeg       

Yn ei gwneud yn ofynnol i arwyddion sy'n gysylltiedig â'r datblygiad fod yn y Gymraeg neu'n ddwyieithog gyda blaenoriaeth i'r Gymraeg.

21. Tŷ Pen Twnnel (THH) Minffordd

Yn gofyn am Gynllun Rheoli Traffig Adeiladu pecyn-benodol ar gyfer gwaith Tŷ Pen Twnnel Minffordd. 

22. CEMP Tŷ Pen Twnnel Minffordd         

Yn gofyn am Gynllun Rheoli Amgylcheddol Adeiladu pecyn-benodol ar gyfer gwaith Tŷ Pen Twnnel Minffordd. 

23. HMP Tŷ Pen Twnnel Minffordd 

Yn gofyn am Gynllun Rheoli Cynefinoedd pecyn-benodol ar gyfer gwaith Tŷ Pen Twnnel Minffordd.

24.  CTMPs ar gyfer y Prif Becynnau Gwaith     

Yn gofyn am Gynlluniau Rheoli Traffig Adeiladu ar wahân ar gyfer pecynnau gwaith CSEC y Wern, CSEC Garth, CSEC Minffordd a Cheblau Glaslyn. 

25. CEMPs ar gyfer y Prif Becynnau Gwaith

Yn gofyn am Gynlluniau Rheoli Amgylcheddol Adeiladu ar wahân ar gyfer pecynnau gwaith CSEC y Wern, CSEC Garth, CSEC Minffordd a Cheblau Glaslyn.

26. Cynllun adfer cyfleusterau cymunedol

Cae Chwarae Bodawen ac Ysgol Eifionydd.

 

Nodyn: Diwygio amodau Dŵr Cymru yn unol â’r sylwadau hwyr a dderbyniwyd

 

 

Estyniad i gompownd ceblau selio pen presennol Wern gan gynnwys mynediad parhaol newydd, compownd selio pen newydd ac adeilad pen twnnel gyda mynediad parhaol ym Minffordd; tynnu compownd selio pen presennol Garth;  gosod ceblau 400 cilofolt (kV) newydd i ddisodli ceblau 400 kV a 132 kV diangen; ac isadeiledd a gwaith atodol cysylltiedig.  

 

Tynnwyd sylw at y ffurflen sylwadau hwyr, yn benodol sylw gan Dŵr Cymru am eiriad yr amod. Cyfeiriwyd at gywiriad bod sylwadau ynglŷn â’r Rheilffordd (paragraff 5.299 - 5.303 o’r adroddiad) wedi eu cyflwyno gan Rheilffordd Ucheldir Cymru (Welsh Highland Railway Ltd) sydd yn gweithredu Rheilffordd Treftadaeth Ucheldir Cymru (Welsh Highland Heritage Railway)

 

a)           Amlygodd yr Uwch Swyddog Cynllunio Mwynau a Gwastraff  bod y Prosiect yn rhan o'r uwchraddiadau trawsyrru rhwydwaith ehangach sydd eu hangen i hwyluso'r gwaith o gysylltu 50 Gigawat (GW) o ynni gwynt ar y môr erbyn 2030. Mae cynyddu capasiti ar y llinell drawsyrru bresennol rhwng is-orsafoedd Pentir a Thrawsfynydd wedi cael ei nodi fel cam y mae angen ei gymryd ar frys i ddarparu mwy o gapasiti trawsyrru. Mae hyn yn cael ei gydnabod gan Ofgem, y rheolwyr ynni cenedlaethol, sydd wedi nodi bod y gwaith angenrheidiol yn Fuddsoddiad Trawsyrru Strategol Cyflym.

 

Roedd gwaith arfaethedig y cais yn cynnwys cwmpasu 106.4 hectar ac yn mesur oddeutu 6 km, rhwng CSEC (Cable Sealing End Compounds) Wern a Minffordd. Bydd llwybr y gwaith yn pasio drwy Gylchfan Porthmadog, o dan Ffordd Osgoi Porthmadog yr A487, ac yn croesi Rheilffordd Ucheldir Cymru (WHHR) a Rheilffordd Ffestiniog ac Ucheldir Cymru (FfWHR); Yn parhau i'r gogledd o Glwb Chwaraeon Madog cyn pasio eto o dan Ffordd Osgoi Porthmadog. Bydd yn croesi Safle o Ddiddordeb Gwyddonol Arbennig Glaslyn (SoDdGA), gan barhau i gyfeiriad y dwyrain tuag at ei derfyn yn CSEC presennol Garth. Rhennir y gwaith arfaethedig i'r elfennau canlynol; CSEC Wern, Ceblau Glaslyn, CSEC Garth, Tŷ Pen Twnnel a CSEC Minffordd

 

Adroddwyd bod y cais a gyflwynwyd yn gais Asesiad Effaith Amgylcheddol sydd wedi ystyried yr holl ddatblygiadau sy'n rhan o Brosiect Atgyfnerthu cyfan rhwng Pentir a Trawsfynydd.

 

O ran egwyddor y datblygiad, nodwyd y byddai'r ceblau newydd yn defnyddio technoleg XLPE, yn lle'r system geblau presennol sydd wedi'i llenwi ag olew ac felly bod manteision o ran moderneiddio a gwytnwch y rhwydwaith, yn ogystal â lleihau'r risg amgylcheddol sy'n gysylltiedig â'r ceblau olew presennol. Ategwyd bod y prosiect hefyd yn rhan o'r gwaith rhwydwaith ehangach sydd ei angen i hwyluso cynnydd yn y ddarpariaeth ynni adnewyddadwy ac felly’r egwyddor yn derbyn cefnogaeth polisïau cenedlaethol, sy’n cynnwys Cymru'r Dyfodol a Pholisi Cynllunio Cymru, sy’n cydnabod yr angen am seilwaith grid ychwanegol i gefnogi'r newid i ynni carbon isel.

 

Yng nghyd-destun tirwedd a mwynderau gweledol, gan fod y ceblau'n cael eu gosod dan ddaear, ystyriwyd y byddai’r effeithiau gweledol mwyaf yn digwydd yn ystod y cyfnod adeiladu.

Eglurwyd bod yr Asesiad Effaith Tirwedd a Gweledol yn adnabod effeithiau cymedrol andwyol a sylweddol dros dro mewn rhannau o'r coridor, gan gynnwys mewn perthynas â gosodiad Parc Cenedlaethol Eryri. Er hynny, effeithiau  lleol a dros dro sydd yma gyda’r tir, ar ôl gosod y ceblau, yn cael ei adfer. Ategwyd nad oedd Cyfoeth Naturiol Cymru (CNC) nac Awdurdod Cynllunio Parc Cenedlaethol Eryri yn gwrthwynebu'r cynnig ar sail ei effaith ar y Parc Cenedlaethol. Nodwyd hefyd bod amod yn gofyn am Gynllun Rheoli Tirwedd ac Ecolegol manwl, fydd yn rheoli'r gwaith adfer, plannu, gwarchod coed a rheolaeth hirdymor.

 

Yng nghyd-destun ecoleg a bioamrywiaeth, sydd yn un o ystyriaethau mwyaf sensitif y cais, adroddwyd bod llwybr yn croesi neu'n mynd yn agos at nifer o safleoedd o bwysigrwydd ecolegol, yn fwyaf nodedig SoDdGA Glaslyn ac ACA Coedydd Derw a Safleoedd Ystlumod Meirion. Bydd oddeutu 1.6 hectar o gynefin o fewn SoDdGA Glaslyn yn cael ei effeithio dros dro, ynghyd â cholled barhaol gyfyngedig. Nodwyd bod y dyluniad wedi defnyddio Drilio Llorweddol, neu HDD, mewn nifer o'r lleoliadau mwyaf sensitif er mwyn pasio o dan gynefinoedd, cyrsiau dŵr a seilwaith yn hytrach na'u torri drwyddynt. Bu i Uned Bioamrywiaeth y Cyngor godi pryderon sylweddol ynghylch, adfer cynefinoedd, llygod pengrwn y dŵr, moch daear, colli coed a gwrychoedd, goleuadau a'r posibilrwydd o effeithio ar lwybrau hedfan yr ystlum pedol leiaf.

 

Gan fod y gwaith yn croesi ACA, bu i'r Cyngor gynnal Asesiad Rheoliadau Cynefinoedd. Daeth yr Asesiad Priodol i'r casgliad, gyda'r mesurau lliniaru perthnasol, na fyddai'r cynnig yn cael effaith andwyol ar gyfanrwydd yr ACAau perthnasol. Yn dilyn ymgynghoriad gyda CNC ar yr Asesiad Priodol cytunwyd â'r casgliad, yn ddarostyngedig i osod mesurau lliniaru fyddai’n cynnwys rheolaeth sylweddol drwy amodau, gan gynnwys rheolaeth a monitro cynefinoedd hirdymor, LEMP (Landscape and Ecology Management Plan), rheoli rhywogaethau ymledol, goleuadau ac arolygon ecolegol.

 

Wrth drafod sŵn a dirgryniad nodwyd bod y Datganiad Amgylcheddol yn cydnabod y gallai rhai gweithgareddau adeiladu greu effeithiau sŵn sylweddol dros dro, yn arbennig gwaith drilio HDD  mewn rhai lleoliadau ym Mhorthmadog a Minffordd gyda phosibilrwydd y bydd rhai gweithrediadau drilio HDD angen parhau am 24 awr am resymau technegol a diogelwch. Amlygwyd bod Gwasanaeth Gwarchod y Cyhoedd wedi codi pryder oherwydd nad yw'r holl fanylion gweithredu wedi'u cwblhau – hyn yn cynnwys union amseriad y gwaith mwyaf swnllyd, y mesurau lliniaru a'r trefniadau monitro. Fodd bynnag, barn swyddogion yw y gellid rheoli'r materion hyn drwy amod CEMP mewn pecyn-penodol ar gyfer pob ardal waith, cynlluniau rheoli sŵn a dirgryniad ac, fel bo'n briodol, y broses Adran 61 o dan Ddeddf Rheoli Llygredd 1974. Nid oedd y swyddogion Cynllunio yn anwybyddu'r effeithiau posibl, ond yn hytrach, yn argymell bod rheolaethau manwl ar waith cyn i bob pecyn gwaith perthnasol ddechrau.

 

Yng nghyd-destun llifogydd, nodwyd bod cyfran helaeth o'r gwaith mewn ardal sydd mewn perygl llifogydd gyda’r gwaith modelu cychwynnol yn dangos y gallai'r seilwaith adeiladu dros dro gynyddu lefelau llifogydd mewn rhai ardaloedd o Borthmadog a Thremadog. O ganlyniad, cynhaliwyd modelu hydrolig ychwanegol a datblygwyd cynllun lliniaru dros dro gyda’r strategaeth yn cynnwys trefniadau pwmpio i reoli'r cynnydd mewn perygl llifogydd yn ystod y prif waith adeiladu. Adolygwyd y model gan CNC ac nid oeddynt yn gwrthwynebu'r datblygiad, yn ddarostyngedig i sicrhau'r cynllun lliniaru drwy amod. Derbyniwyd cadarnhad gan yr Awdurdod Llifogydd Lleol Arweiniol yn mynegi nad oedd ganddynt bryder ynghylch cynnwys yr Asesiad Canlyniadau Llifogydd. Roedd y swyddogion o’r farn y byddai’r cynnig yn gallu cydymffurfio â gofynion NCT 15.

 

O ran materion traffig, bydd disgwyl cynnydd mewn traffig adeiladu oherwydd y datblygiad yn ogystal â chreu mynedfeydd newydd dros dro. Tynnwyd sylw at y Datganiad Amgylcheddol oedd yn rhagweld tua 148 o symudiadau cerbydau dwy ffordd y dydd, gan gynnwys tua 100 o symudiadau HGV, ar gyfer gwaith Ceblau Glaslyn. Roedd yr asesiad hefyd yn nodi cynnydd cyfrannol mewn traffig HGV ar rai ffyrdd, ond y cynnydd yng nghyfanswm y traffig yn parhau'n gymharol fach. Yn dilyn trafodaethau gyda'r ymgeisydd, roedd Asiant Cefnffyrdd Gogledd a Chanolbarth Cymru wedi cadarnhau y gellid rhoi caniatâd, yn ddarostyngedig i amodau fyddai’n sicrhau cynlluniau rheoli traffig, datganiadau dull adeiladu ac asesiadau risg mewn perthynas â'r Rhwydwaith Ffyrdd Strategol. Bydd amod hefyd yn sicrhau rheolaeth fanwl o'r Hawliau Tramwy Cyhoeddus a Llwybr Beicio Cenedlaethol 8 yn ystod y gwaith.

 

Mae prif effeithiau ar dreftadaeth i’w gweld yn ardal  Y Wern gyda’r asesiad yn nodi effaith andwyol sylweddol ar Barc a Gardd Hanesyddol Gofrestredig Wern ac ar osodiad y plas dy. Adroddwyd bod Cadw wedi codi pryder sylweddol ynghylch hyn yn wreiddiol, ond yn dilyn trafodaethau pellach, roeddynt yn fodlon y gellid mynd i'r afael â'r effaith drwy gynllun lliniaru neu wrthbwyso, wedi'i sicrhau drwy amod cynllunio - o ganlyniad nid oeddynt bellach yn gwrthwynebu’r cyngor o ganiatáu’r cais. Ategwyd bod amodau yn sicrhau Cynllun Ymchwilio Ysgrifenedig archeolegol a gwaith cofnodi dilynol ar gyfer gweddill y datblygiad.

 

Wrth ddod i gasgliad , nododd y swyddog bod y cynllun yn un mawr, ac yn nodi, yn amlwg  bydd effeithiau adeiladu sylweddol, dros dro mewn rhai lleoliadau. Ystyriwyd yr holl effeithiau tirwedd, amwynder, sŵn a dirgryniad, traffig, llifogydd, ecoleg a bioamrywiaeth, yr amgylchedd hanesyddol a hawliau tramwy cyhoeddus yn ogystal â’r pwysau sylweddol sydd wedi'i roi ar bwysigrwydd strategol y seilwaith trydan, moderneiddio'r rhwydwaith, natur danddaearol rhan helaeth o'r datblygiad, natur dros dro llawer o'r effeithiau, a'r mesurau lliniaru, adfer a gwella arfaethedig.

 

Wedi pwyso a mesur yr holl effeithiau yn erbyn yr angen strategol a'r budd cyhoeddus, roedd y swyddogion yn argymell caniatáu’r cais yn ddarostyngedig i osod mesurau lliniaru ac amodau cynllunio perthnasol.

 

b)           Yn manteisio ar yr hawl i siarad, nododd siaradwr ar ran yr ymgeisydd

·        Bod y cais yn rhan o brosiect Pentir Trawsfynydd i atgyfnerthu ac adnewyddu llinellau trydan presennol

·        Bydd y cynnig yn cynnwys newid y ceblau tanddaearol rhwng safle’r Wern, Penmorfa a Garth, Minffordd

·        Bydd y gwaith yn gyfuniad o greu ffosydd agored (open trench) a thechnegau di-ffôs sydd wedi eu dylunio fel bod cyn lleied o darfu a phosib

·        Bydd gwaith yn cael ei wneud i ymestyn seilwaith presennol ar safle’r Wern ac adeiladu compownd ceblau newydd ym Minffordd  - bydd yn safle cysylltu ar gyfer ceblau tanddaearol ac uwchben

·        Bydd seiliau safle Garth yn cael ei ddadgomisiynu

·        Wedi cwblhau’r gwaith adeiladu, bydd ardaloedd gwaith dros dro yn cael eu hadfer a’r fioamrywiaeth yn cael ei wella mewn lleoliadau oddi ar y safle yn yr ardal leol

·        Bod y prosiect yn rhan o uwchraddiad y grid cenedlaethol - trawsnewid mawr i rwydwaith trydan y  Deyrnas Unedig

·        Llywodraeth Cymru wedi nodi bod hwn yn gynllun pwysig fydd yn gwella dibynadwy a diogelwch y cyflenwad trydan, ac yn cefnogi uchelgais Cymru i ddiwallu 70% o anghenion trydan ffynonellau adnewyddadwy erbyn 2030

·        Polisi Cynllunio Cymru yn cydnabod bod rhwydwaith drydan effeithiol yn hanfodol er mwyn cyflawni amcanion adnewyddadwy a charbon isel Cymru

·        Bydd y cynnig yn darparu capasiti traws yrru trydan ychwanegol hanfodol yng Ngogledd Cymru gan helpu i gysylltu â dosbarthu ynni adnewyddadwy sydd yn cael ei gynhyrchu nawr ac yn y dyfodol

·        Bod y datblygiad arfaethedig  yn cyd-fynd â pholisïau lleol a chenedlaethol a’r cwmni  wedi gweithio gyda rhanddeiliaid i sicrhau nad oedd unrhyw faterion allweddol heb eu datrys mewn perthynas â’r cais

·        Nid oedd gwrthwynebiadau gan rhanddeiliaid statudol

·        Y datblygiad arfaethedig yn seilwaith hanfodol fydd yn cyfrannu at gyflawni nod ynni adnewyddadwy llywodraeth Cymru

·        Pwysig bod y cysylltiad wedi ei uwchraddio ac ar waith erbyn 2030 i gyflawni’r uchelgais yma

 

c)               Yn manteisio ar yr hawl i siarad, nododd yr Aelod Lleol, Y Cynghorydd Nia Jeffreys (Ward Dwyrain Porthmadog) y sylwadau canlynol:

·        Yn diolch i’r swyddogion am y gwaith

·        Nad oedd ganddi wrthwynebiad i’r cais, er hynny yn cymryd y cyfle i amlygu rhai sylwadau roedd trigolion ei ward wedi eu codi megis ecoleg unigryw ardal y Glaslyn, bywyd gwyllt ac adar, ardal Y Cob.

·        Bod angen sicrhau mesurau lliniaru yn ystod y cyfnod adeiladu i leihau’r effaith ar y bobl leol - materion megis traffig, teithio, sŵn, llwch

·        Bod Cae Chwarae Bodawen yn bwysig iawn i blant Porthmadog a Tremadog ac felly yn gofyn am sicrwydd y byddai’r cae chwarae yn cael ei ail agor cyn gynted a bod modd ar ôl i’r gwaith gael ei gwblhau - yr un oedd y gofyn am gaeau chwarae Ysgol Eifionydd - cais i beidio cau'r caeau am gyfnod rhy hir.

 

Mewn ymateb i’r sylwadau ynglŷn â’r caeau chwarae cyfeiriodd y Swyddog at y cytundeb a wnaed gyda Cyngor Tref Porthmadog y byddai popeth yn cael ei ail osod ar ôl y cyfnod cwblhau, ond bod modd gosod amod ychwanegol, manylach i sicrhau rheolaeth dros ail osod yr offer.

 

Yn manteisio ar yr hawl i siarad, nododd yr Aelod Lleol, Y Cynghorydd Gwilym Jones (Ward Gorllewin Porthmadog) y sylwadau canlynol:

·        Ei fod yn cytuno gyda sylwadau’r Cyng. Nia Jeffreys yn enwedig gyda’r sylw am Cae Bodawen gan fod trafodaethau wedi eu cynnal gyda’r Cyngor Tref a’r National Grid.

·        Bod angen sicrwydd nad oedd y hen geblau yn cynnwys cyfansoddiad  polychlorinated biphenyl, sef deunydd oedd yn cael ei ddefnyddio mewn offer trydan yn y 70au – er wedi trafod hyn a chael sicrwydd nad oedd forever chemicals fel y’i gelwir yn gyffredinol, yn yr hen geblau, nid oedd cyfeiriad at y mater yn yr adroddiad

 

ch)   Cynigiwyd ac eiliwyd caniatáu y cais yn unol â’r argymhelliad

 

d)            Yn ystod y drafodaeth ddilynol, nodwyd y sylwadau canlynol gan Aelodau:

·        Pam mai Pentir i Drawsfynydd yw’r flaenoriaeth o ystyried bod ardaloedd eraill yn y Sir angen cysylltiad gwell?

·        Bod y cynllun yn ymddangos fel un sydd wedi ei frysio ac er cydnabod risgiau sylweddol megis, traffig, sŵn a llwch, nad oedd risgiau cymunedol wedi eu hystyried

·        Bod angen mwy o wybodaeth ar sut i liniaru'r risgiau i sicrhau bod y broses yn llai ymwthiol i’r gymuned leol a natur ac ecoleg yn yr ardaloedd

·        Bod yr Uned Bioamrywiaeth wedi nodi mesurau lliniaru annigonol o ran manylion cyfnod hir dymor gan awgrymu monitro’r sefyllfa am 25 mlynedd ac nid 5 mlynedd. Oes modd cryfhau’r amodau bioamrywiaeth cyn ei ganiatáu

·        Bod y cynllun yn mynd drwy ardal hynod o sensitif – angen cysondeb a thegwch wrth ddehongli beth yw ‘ardal sensitif’ mewn ceisiadau cynllunio

·        Bod yr angen wedi ei nodi yn glir; gwaith swmpus wedi ei wneud ar y cais gyda nifer o argymhellion ac amodau i’w reoli

·        Croesawu mai cais i danddaearu sydd yma ac nid gosod peilonau

·        Nid yw’r grid cenedlaethol fel y mae yn ffit i bwrpas wrth edrych i’r dyfodol

·        Cyfle yma i fanteisio ar ynni gwyrdd

 

Mewn ymateb i sylw bod y cais yn ymddangos fel un sydd wedi ei frysio, nododd y swyddog bod y cais a gyflwynwyd yn un oedd wedi ei flaenoriaethu gan Ofgem i wella’r rhwydwaith rhwng Pentir a Trawsfynydd i hwyluso'r gwaith o gysylltu 50 Gigawat (GW) o ynni gwynt ar y môr erbyn 2030. Ategodd y Pennaeth Cynorthwyol, nad oedd y cais wedi cael ei frysio ac ni fyddai'n cael ei gyflwyno i’r Pwyllgor oni bai ei fod yn barod. Nododd bod asesiad manwl o bob ystyriaeth cynllunio berthnasol wedi ei ystyried yn drwyadl ac ar ôl pwyso a mesur yr holl ystyriaethau cynlluniau perthnasol, barn yr Awdurdod Cynllunio oedd bod y datblygiad yn dderbyniol gyda mesurau lliniaru pellach yn gysylltiedig i’r amodau. Ategodd nad oedd y cais o uwchraddio rhwydwaith trydan yn unigryw i Wynedd - bod datblygiadau yn digwydd ar hyd a lled Prydain; y cais yn cael ei gefnogi o ran egwyddor gan bolisïau Llywodraeth Cymru a  pholisïau lleol.

 

PENDERFYNWYD: Caniatáu gydag amodau

 

1.     Terfyn Amser      

Rhaid i'r datblygiad ddechrau o fewn 5 mlynedd i'r dyddiad caniatâd.

2.     Cynlluniau a Gymeradwywyd   

Y datblygiad i'w wneud yn unol â'r cynlluniau a'r dogfennau a gymeradwywyd.

3.     Oriau Gwaith      

Yn cyfyngu ar oriau gwaith adeiladu ac yn rheoli gweithrediadau y tu allan i oriau.

4.     Gosod Seilbyst   

Yn gofyn am ddulliau distaw (non-percussive) o osod seilbyst ac yn cyfyngu ar oriau gosod y seilbyst. 

5.     Goleuadau          

Yn gofyn am gymeradwyo cynllun goleuo i amddiffyn ystlumod a rheoli gorlif golau cyn gosod goleuadau gweithredol.

6.     Rhannau Caeedig          

Yn gofyn am gymeradwyo lliwiau a gorffeniadau ar gyfer ffensys, waliau, giatiau a thriniaethau eraill ar gyfer terfynau.

7.     Halogiad  

Yn gofyn am waith ymchwilio a chyweirio unrhyw halogiad nas nodwyd o'r blaen a ganfuwyd yn ystod y datblygiad. 

8.     Lliniaru Llifogydd

Yn gofyn am gymeradwyo a gweithredu cynllun lliniaru llifogydd dros dro ar gyfer y gwaith adeiladu.

9.     Parc a Gardd Gofrestredig y Wern      

Yn gofyn am gynllun lliniaru/gwrthbwyso ar gyfer effeithiau ar Barc a Gardd Gofrestredig y Wern.

10.  Cynllun Rheoli a Monitro Cynefinoedd (HMP)

Yn sicrhau gwneud iawn am gynefinoedd, budd net i fioamrywiaeth, monitro cynefinoedd a rheoli INNS dros yr hirdymor.

11.  Cynllun Rheoli Tirwedd ac Ecolegol (LEMP)  

Yn sicrhau adfer tirwedd, plannu, rheoli cynefinoedd, monitro ecolegol a chynnal a chadw hirdymor.

12.  Ymchwiliad Archeolegol (WSI)

Yn ei gwneud yn ofynnol cael ymchwiliad a chofnod archeolegol cyn dechrau'r gwaith paratoi tir.

13.  Adrodd Archeolegol      

Yn gofyn am gyflwyno adroddiad archeolegol ac archif yn dilyn gwaith maes.

14.  Cynllun Rheoli Deunyddiau a Gwastraff

Yn sicrhau rheolaeth gynaliadwy, ailddefnyddio, adfer a chael gwared ar ddeunyddiau a gloddiwyd a gwastraff.

15.  Hawliau Tramwy Cyhoeddus    

Yn gofyn am drefniadau rheoli ar gyfer hawliau tramwy cyhoeddus a Llwybr Beicio Cenedlaethol 8 yn ystod y gwaith adeiladu.

16.  Datganiad Dull Adeiladu           

Cyn dechrau unrhyw waith ar y safle, Datganiadau Dull Adeiladu (CMS) ac Asesiadau Risg i fodloni'r Sefydliad Goruchwylio ar gyfer y Rhwydwaith Ffyrdd Strategol (SRN).

17.  Dyluniad ailsefydlu'r ffordd gerbydau 

Cyn dechrau unrhyw waith ar y safle, bydd angen cyflwyno dyluniad ailsefydlu'r ffordd gerbydau a manyleb palmant a fydd yn bodloni Llywodraeth Cymru, fel y Sefydliad Goruchwylio ar gyfer y Rhwydwaith Ffyrdd Strategol

18.  Asedau Dŵr Cymru       

Yn ei gwneud yn ofynnol cynnal arolygon a threfniadau diogelu/dargyfeirio ar gyfer seilwaith dŵr a charthffosiaeth.

19.  Draenio Dŵr Wyneb       

Yn atal dŵr wyneb rhag cysylltu â'r rhwydwaith carthffosiaeth gyhoeddus.

20.  Arwyddion Cymraeg      

Yn ei gwneud yn ofynnol i arwyddion sy'n gysylltiedig â'r datblygiad fod yn y Gymraeg neu'n ddwyieithog gyda blaenoriaeth i'r Gymraeg.

21.  Tŷ Pen Twnnel (THH) Minffordd           

Yn gofyn am Gynllun Rheoli Traffig Adeiladu pecyn-benodol ar gyfer gwaith Tŷ Pen Twnnel Minffordd. 

22.  CEMP Tŷ Pen Twnnel Minffordd          

Yn gofyn am Gynllun Rheoli Amgylcheddol Adeiladu pecyn-benodol ar gyfer gwaith Tŷ Pen Twnnel Minffordd. 

23.  HMP Tŷ Pen Twnnel Minffordd 

Yn gofyn am Gynllun Rheoli Cynefinoedd pecyn-benodol ar gyfer gwaith Tŷ Pen Twnnel Minffordd.

24.   CTMPs ar gyfer y Prif Becynnau Gwaith       

Yn gofyn am Gynlluniau Rheoli Traffig Adeiladu ar wahân ar gyfer pecynnau gwaith CSEC y Wern, CSEC Garth, CSEC Minffordd a Cheblau Glaslyn. 

25.  CEMPs ar gyfer y Prif Becynnau Gwaith

Yn gofyn am Gynlluniau Rheoli Amgylcheddol Adeiladu ar wahân ar gyfer pecynnau gwaith CSEC y Wern, CSEC Garth, CSEC Minffordd a Cheblau Glaslyn.

26.  Cynllun adfer cyfleusterau cymunedol

Caeau Chwarae Bodawen ac Ysgol Eifionydd.

 

Nodyn: Diwygio amodau Dŵr Cymru yn unol â’r sylwadau hwyr a dderbyniwyd