Agenda item
Cyflwyno adroddiad y Swyddog Morwrol a Pharciau Gwledig.
Cofnod:
Tywysodd y Swyddog Morwrol a Pharciau Gwledig yr aelodau drwy’r
adroddiad, gan dynnu sylw at y prif bwyntiau canlynol:
·
Bod lleihad bychan yn y
nifer o gychod ar yr angorfeydd blynyddol gyda 129 o gychod o gymharu â 142
cwch yn 2015. Nodwyd bod tueddiad i gychod fod yn fwy o ran maint. Roedd 21
cwch wedi gadael yn 2016 gydag 17 cwch newydd wedi angori yn yr Harbwr yn 2016.
·
Nodwyd bod 37 cwch pwer
wedi cofrestru yn yr Harbwr yn 2016 sydd yn cymharu gyda 30 a gofrestrwyd yn
2015. Cadarnhawyd bod 31 cwch pŵer wedi ei gofrestru ym Morfa Bychan o
gymharu â 14 a gofrestrwyd yn 2015.
·
Ni dderbyniwyd sylwadau
o ran y Côd Diogelwch Morwrol yn y cyfnod ers y cyfarfod diwethaf.
·
Bod yr Uwch Swyddog Harbyrau yn adolygu’r
côd diogelwch ac y gobeithir y bydd Uwch Arolygydd Gwylwyr y Glannau yn ymweld
â’r Cyngor yn fuan yn 2017 i’w archwilio a chyflwyno adborth ar y côd.
·
Fe edrychir ar Is-ddeddfau’r Harbwr yn
y Gwanwyn gyda’r bwriad i’w cyflwyno a rhoi mewn grym i gynorthwyo gyda delio
efo’r broblem o oryrru. Cyfeiriwyd at ymgyrch Neifion a lansiwyd yn yr haf er
mwyn ei gwneud yn haws i bobl gysylltu â’r awdurdodau os ydynt yn amau fod
rhywun yn aflonyddu ar fywyd gwyllt y môr a thorri’r Côd Diogelwch Morwrol.
·
Cynhaliwyd archwiliad gan Awdurdod
Goleudai Tŷ’r Drindod ar 26 Gorffennaf 2016. Roedd yr adroddiad yn
cadarnhau gwelliant yng nghyflwr a lleoliadau’r cymhorthion mordwyo o gymharu
ag adroddiadau blaenorol.
·
Gwnaed buddsoddiad
sylweddol yng Nghwch y Dwyfor a chadarnhawyd y byddai’n cael ei lleoli ym
Mhorthmadog i gynorthwyo gyda chynnal a chadw cymhorthyddion mordwyo yn yr
Harbwr.
·
Nid oedd unrhyw rybudd i forwyr mewn grym yn harbwr
Porthmadog.
·
Bod cyfnod cyflogaeth Cymhorthydd
Harbwr (tymhorol) Porthmadog wedi dod i ben 30 Medi 2016. Nodwyd er sicrhau
cefnogaeth a pharhad i’r gwasanaeth ar draws y Sir, roedd cyfnod cyflogaeth
Cymhorthion Harbwr Abermaw ac Aberdyfi wedi eu hymestyn hyd at ddiwedd mis
Rhagfyr 2016. Eglurwyd y byddai Cymhorthydd Harbwr Abermaw yn cael ei ail leoli
i Borthmadog am y cyfnod cychwynnol er sicrhau cymorth ychwanegol ym
Mhorthmadog dros fisoedd y gaeaf.
·
Bod cyfnod secondiad yr Harbwr Feistr
yn cael ei adolygu’n gyfnodol.
·
Y derbyniwyd ymholiad gan gwmni llongau
masnachol yng nghyswllt mewnforio cargo trwm ar gyfer gorsaf bŵer cyfagos
ar fwrdd llongau masnachol i Borthmadog. Nodwyd y tynnwyd sylw’r cwmni i’r
cymhlethdodau a chadarnhawyd pe byddai penderfyniad i fewnforio, y cwmni a
fyddai’n gyfrifol am unrhyw gostau yn gysylltiedig â’r bwriad.
·
Y sefyllfa gyllidebol hyd at ddiwedd
Medi 2016, gan nodi na ragwelir y cyrhaeddir y targed incwm ar gyfer y flwyddyn
ariannol.
·
Bod y system Teledu
Cylch Cyfyng a fuddsoddwyd ynddo er gwarchod eiddo a defnyddwyr yr Harbwr wedi
bod o gymorth i’r Heddlu wrth ymchwilio i 3 achos.
·
Fe argymhellir cynyddu
ffioedd Harbwr Porthmadog ar gyfer blwyddyn ariannol 2017-18, 2% ar gyfartaledd
er cwrdd â her cyllideb a tharged incwm y gwasanaeth. Nodwyd y credir bod y
ffioedd dal yn rhesymol o ystyried yr adnoddau yn yr Harbwr a’r buddsoddiad a
wneir. Eglurwyd y byddai’r Aelod Cabinet - Economi yn cadarnhau’r ffioedd yn
fuan yn 2017.
Cyfeiriodd y Swyddog Morwrol a Pharciau Gwledig at achosion lle'r oedd
aelodau’r cyhoedd a oedd yn tramwyo ar Fanc y Gogledd ar lanw isel wedi mynd i
drafferthion pan fo’r llanw yn dod i mewn. Nodwyd bod ymgais wedi ei wneud i
godi ymwybyddiaeth o’r mater gyda thaflenni wedi eu rhannu o amgylch y meysydd
carafanau. Eglurwyd bod arwydd yn y fynedfa ac arwyddion yn Ffordd Gwydryn yn
nodi’r perygl a pan fo staff y Cyngor yn bresennol y gallent adrodd i’r
gwasanaethau brys. Nodwyd y cynhelir adolygiad o’r sefyllfa i sicrhau bod y
ddarpariaeth bresennol yn ddigonol. Adroddwyd y derbyniwyd llythyr o ddiolch
gan unigolyn a oedd wedi derbyn cymorth gan staff y Cyngor, Gwylwyr y Glannau
ynghyd â’r Bad Achub.
Rhoddwyd cyfle i Gynrychiolydd Sefydliad y Bâd Achub gyflwyno adroddiad ar y mater.
Nododd bod Bad Achub Cricieth wedi achub 11 o unigolion yn yr ardal yma yn
ystod y flwyddyn bresennol a’i fod yn bryderus tu hwnt o’r sefyllfa. Tynnodd
sylw bod Sefydliad y Bâd Achub wedi cynnal archwiliad o ddiogelwch ardal
Portmeirion rhai blynyddoedd yn ôl a bod y gwelliannau a roddwyd mewn lle yn dangos
eu gwerth gan mai ond un galwad a dderbyniwyd yn yr ardal yma eleni ac nid oedd
unrhyw ddigwyddiad yn ystod 2015. Amlygodd ei bryder nad oedd yr arwyddion yn
ardal Banc y Gogledd yn unffurf ac yn safonol. Awgrymodd y dylid gofyn i
Sefydliad y Bâd Achub gynnal archwiliad diogelwch yn ardaloedd aber y Glaslyn a
Thraeth y Graig Ddu.
Nododd aelodau eu cefnogaeth i gynnal archwiliad diogelwch a chael sgwrs
ddilynol i edrych ar sut y gellir gwella’r sefyllfa o fewn yr adnoddau.
Nododd yr Uwch Reolwr Economi a Chymuned bod her sylweddol yn amlygu ar
yr arfordir o ran cyflawni’r dyletswyddau statudol tu mewn i’r gyllideb. Yn
wyneb yr her ariannol bod rhaid cydweithio efo asiantaethau eraill i sicrhau
darpariaeth ac fe groesawir cymorth Sefydliad y Bâd Achub i ychwanegu at
arbenigedd staff y Cyngor i ddelio efo’r mater. Nodwyd bod yr arwyddion yn yr
ardal yma yn cyd-fynd ac arwyddion ar weddill arfordir Gwynedd er sicrhau
cysondeb ar draws y Sir. Ychwanegwyd y dylid rhoi ystyriaeth i ddatrysiadau
lleol i ymateb i sefyllfaoedd ac i edrych ar rôl endidau eraill.
Cadarnhaodd y
Swyddog Morwrol a Pharciau Gwledig y byddai’n cysylltu efo Sefydliad y Bâd Achub yng nghyswllt archwiliad diogelwch.
Cymerodd y
Cadeirydd y cyfle i ddiolch i staff Gwylwyr y Glannau, Bad Achub a’r Cyngor am
eu gwaith.
Manylodd yr Harbwr Feistr ar y rhaglen waith cynnal a chadw a gofynnwyd
i aelodau hysbysu’r gwasanaeth o unrhyw waith arall sydd angen ei wneud. Nododd
aelodau eu diolch i’r staff am ymateb mor fuan â phosib pan hysbysir hwy o
waith oedd angen ei wneud.
Derbyniwyd diweddariad gan Gynrychiolydd Buddiannau Hamdden ar gynllun Clwb Hwylio
Porthmadog i osod pontwns ar wal yr Harbwr. Nododd bod astudiaethau dichonoldeb
yn parhau ac fe obeithir cadarnhau’r sefyllfa erbyn cyfarfod nesaf y Pwyllgor
Ymgynghorol. Mewn ymateb i gwestiwn gan aelod, nododd y cynrychiolydd bod
gwaith i’w gwblhau cyn y gellir ymgynghori a defnyddwyr eraill yr Harbwr.
Dogfennau ategol:
- 7 - Diweddariad ar Faterion Rheolaethol yr Harbwr, eitem 7. PDF 145 KB
- Atodiad 1 - Cynllun Pontwn Clwb Hwylio Madog 2016, eitem 7. PDF 335 KB
- Atodiad 2 - Ffioedd Porthmadog 2017-18, eitem 7. PDF 297 KB
- Atodiad 3 - Lleoliad Cymhorthyddion Mordwyo 2016, eitem 7. PDF 316 KB
- Atodiad 4 - Cynllun o'r Sianel - 2016, eitem 7. PDF 882 KB