Agenda item

I dderbyn adroddiad gan Mr Sam Hadley a Mr Mark Peters, Network Rail.

 

(Copi’n amgaeedig)

Croesawyd Mr Sam Hadley, Rheolwr Materion Cyhoeddus Llwybrau Cymru a Mr Mark Peters, Peiriannydd Asedau i'r cyfarfod.

 

Roedd Mr Mark Peters wedi paratoi cyflwyniad ar Draphont Abermaw ar ffurf sleidiau ond yn anffodus nid oedd yr offer angenrheidiol ar gael ac felly addawodd y byddai'n anfon y cyflwyniad i'r Swyddog Cefnogi Aelodau iddi hithau ei anfon ymlaen i aelodau'r Pwyllgor.

 

Aeth yn ei flaen i ddatgan fod y trenau yn rhedeg ers y tân diweddar ar Draphont Abermaw a hyderai mai dim ond ychydig o waith adfer oedd ar ôl i'w orffen ac y bydd hyn yn cael ei wneud cyn gynted â phosib.  

 

Dywedodd Swyddog Partneriaeth Rheilffyrdd y Cambrian y byddai'r draphont yn dathlu 150 mlynedd y flwyddyn nesaf ac roedd yn awyddus i wybod am raglen y gwaith datblygu ar y draphont a'r amserlen i gael gwybod am faint o amser na fyddai modd ei defnyddio.   Gofynnodd hefyd i Network Rail i fod yn ystyriol gan leihau unrhyw darfu cymaint ag oedd yn bosib yn ystod y tymor gwyliau prysur, gan fod yr ardal yn dibynnu yn llawer iawn ar dwristiaeth.  

 

Fel rhan o'r dathliadau pen-blwydd, awgrymwyd y dylid dangos ffilm enwog a chyffrous 'Ghost Train' ac awgrymodd Mr Ben Davies, Trenau Arriva Cymru, hefyd y gellid defnyddio hanner un o'r trenau fel sinema i ddangos y ffilm.  

 

I ateb yr uchod, dywedodd Mr Sam Hadley fod Siân Lewis, oedd yn bresennol yn y cyfarfod diwethaf, bellach ddim yn swyddog noddi i'r Cynllun Noddi Masnachol (Network Rail) ac y bydd yna noddwr newydd.   Ychwanegodd hefyd y bydd Network Rail eisiau cymryd rhan yn y dathliadau a bydd yn cyfrannu ato.   Addawodd Mr Hadley cyn gynted ag y byddai gwybodaeth ar gael, byddai yn rhoi gwybod i'r  Swyddog Cefnogi Aelodau fel ei bod hithau yn rhoi gwybod i aelodau'r Pwyllgor.

 

Dywedodd aelod ei fod yn ymwybodol y byddai'r dathliad 150 mlynedd yn digwydd ym mis Hydref er mwyn peidio â gwrthdaro gyda Ras y Tri Chopa a gynhelir yn flynyddol ym mis Mehefin.

 

I ateb y pryderon a godwyd, sicrhaodd Mr Hadley Aelodau'r Pwyllgor:

 

·         nad oedd gan Network Rail unrhyw fwriad i gau'r lein, er bod pobl leol yn bryderus y byddai'n cau ac roedd yn sylweddoli pa mor werthfawr ydoedd i'r gymuned

·         na fyddai dim yn tarfu ar y dathliad 150 mlynedd o ran gwaith amddiffyn rhag y môr

·         na fyddai'r gwaith ychwanegol i wyneb y graig yn Llanaber yn effeithio ar lein y rheilffordd o gwbl a chafwyd sicrwydd y byddai'r peiriannau angenrheidiol yn mynd at y man gwaith o'r traeth. 

 

I ateb cais Aelod Seneddol Dwyfor/Meirionnydd am ragor o wybodaeth am geisiadau cynllunio, dylunio ac ati ar Draphont Abermaw, dywedodd Mr Hadley nad oedd unrhyw eglurder ar y mater yma ond fe fyddai yn ysgrifennu i ddiweddaru'r AS ac aelodau'r Pwyllgor hwn cyn gynted ag y byddai wedi derbyn yr wybodaeth.

 

Nododd yr aelodau hefyd pan fo'r gwaith yn cael ei ymgymryd:

 

·         Y dylai Network Rail/Trenau Arriva gyd-gysylltu i gael dau gerbyd ychwanegol ar y trên o Abermaw i Bwllheli

·         Dylai Network Rail gyd-gysylltu gydag Adran Priffyrdd Gwynedd am ffordd brysur yr A496 rhwng Abermaw a Dolgellau gan fod nifer o ddamweiniau wedi digwydd arni a olygai fod yn rhaid gwyro cerbydau drwy Faentwrog.  

 

Dywedodd Mr Ben Davies, Trenau Arriva, os fyddai'r gwaith atgyweirio yn waith tymor hir yna byddai'n achosi problemau gan fod yn rhaid i drenau gael eu harchwilio yn unol â'r canllawiau diogelwch safonol bob tair wythnos. 

 

Aeth Mr Hadley yn ei flaen i nodi'r isod:

 

·         Roedd Mr Andy Thomas wedi ei benodi i swydd Rheolwr Gyfarwyddwr Llwybrau Cymru a'i flaenoriaeth oedd sicrhau bod Llwybrau Cymru'n cyflawni blaenoriaethau cynrychiolwyr etholedig a'r cymunedau maent yn eu cynrychioli.

·         Diweddariad ar groesfannau rheilffordd 

·         Rheilffyrdd Cymunedol

 

Yn ystod y drafodaeth ddilynol, codwyd y materion isod gan yr Aelodau:

 

(a)          Pryder a chwynion a dderbyniwyd am drafferthion a'r diffyg llefydd parcio yng Ngorsaf Machynlleth gyda theithwyr yn gorfod gyrru ymlaen i Gaersws

 

Wrth ymateb, dywedodd Mr Sam Hadley bod y lifftiau wedi eu comisiynu yng Ngorsaf Machynlleth ac roeddent yn hollol hygyrch ond roedd materion angen eu cwblhau yn y bloc toiled.   O ran y maes parcio, addawodd Mr Hadley i drafod y mater gyda Mr Ben Davies, Trenau Arriva Cymru, ond nododd y byddai unrhyw welliannau oedd yn fwy ac uwchben yr hyn a ystyrid yn waith gwella gorsaf, angen arian trydydd parti. 

 

Ychwanegodd Mr Rhydian Mason ei fod fel rhan o'i waith fel swyddog datblygu i'r lein rheilffordd yn ymgynghori gyda Chyngor Sir Powys gan edrych ar amryfal opsiynau i greu cyfnewidfa gorsaf reilffordd drwy gael gwell gosodiad, creu cylch troi i fysiau a maes parcio gwell.    Roedd tir a fedrai fod ar gael ac y gellid ei ddefnyddio wedyn i ddyblu maint y maes parcio.   Y gobaith oedd y gellid fod wedi cyflwyno cais i Lywodraeth Cymru eleni, ond yn anffodus roedd y cais yn bell o fod yn barod gan fod materion ar ôl gyda draenio a rhai materion eraill oedd angen eu goresgyn.  Er y gwerthfawrogwyd fod y sefyllfa fel yr oedd yn bell o fod yn ddelfrydol, sicrhawyd y byddai newidiadau mawr ymhen amser ac y byddai cynllun cyfnewidfa ystyrlon a thrawiadol ym Machynlleth. 

 

Yn y cyfamser, cytunodd Mr Ben Davies i ymgynghori gyda Rheolwr Gorsaf Machynlleth i osod arwyddion yn y maes parcio i ddatgan mai dim ond defnyddwyr y rheilffordd a ddylai ei ddefnyddio.

 

 

(b)          Tynnwyd sylw’r swyddogion fod maes parcio Fairbourne mewn cyflwr gwael ac angen ei dacluso.  

 

Wrth ateb, cytunodd Mr Sam Hadley a Mr Ben Davies i holi pwy oedd yn gyfrifol am y maes parcio uchod.  

 

(c) I ateb pryder y Cyng. Dewi Owen am Gyffordd Dyfi, dywedodd Mr Hadley ei fod yn gyfarwydd gyda'r trafferthion ac roedd wedi trafod hyn gyda’r Cyngor Cymuned, ac yn ôl yr hyn a ddeallai roedd y giât mynediad i gerbydau bellach wedi ei chloi.  Os fyddai rhagor o wybodaeth am hyn byddai yn cael ei anfon ymlaen. 

 

 

Penderfynwyd:          (a) Nodi’r adroddiad a'r sylwadau uchod.

 

                                     (b) Gwahodd Mr Andy Thomas, Rheolwr Gyfarwyddwr Llwybrau Cymru, i gyfarfod y Pwyllgor yn y gwanwyn.   

 

                                    (c) Bod Mr Sam Hadley yn diweddaru'r aelodau ar y materion isod cyn gynted ag yr oedd yr wybodaeth i law:

 

·         Traphont Abermaw o ran noddwr newydd, manylion cais cynllunio, 

·         Trafferthion parcio yng Ngorsaf Machynlleth

·         Perchnogaeth maes parcio Fairbourne a'r angen i'w dacluso

·         Cyffordd Dyfi