Agenda item

Derbyn Adroddiad Blynyddol y Gronfa Bensiwn am 2014/15

 

Cyflwynodd y Pennaeth Cyllid Adroddiad Blynyddol y Cynllun Pensiwn am 2014/15 gan dynnu sylw at daflen wybodaeth am y Gronfa Bensiwn yn crynhoi cefndir y Gronfa a’r prif ffeithiau.

Rhoddwyd sylw penodol i brif faterion yr adroddiad sef:

 

·            Perfformiad Buddsoddi

 

Yn 2014/15, llwyddwyd i sicrhau cynnydd yng ngwerth asedau’r Gronfa o £1.3bn (31/03/2014) i bron £1.5bn (31/03/2015) – cynnydd o £187m yn ystod y flwyddyn. Yn dilyn perfformiad gwell na’r farchnad yn 2013/14, roedd 2014/15 yn flwyddyn gymysg gan y cwmnïau sy’n buddsoddi ar ran y Gronfa Bensiwn.  O ran disgwyliadau buddsoddi (dychweliadau 5.9% y flwyddyn), mae’r dychweliadau hynod galonogol o 12.2% a gafwyd gan y Gronfa am y flwyddyn hon yn adlewyrchu perfformiad gwych gan y farchnad stoc yn gyffredinol.

 

Yn 2014/15, roedd y marchnadoedd yn cynhyrchu perfformiad gwell na’r flwyddyn cynt yn gyffredinol, gydag ecwiti yn perfformio’n dda ac eiddo yn perfformio’n arbennig o dda, er bod ein cronfa ni wedi dioddef yn gymharol o fethu’r dychweliadau annisgwyl o uchel ar fondiau eleni. Cyfeiriwyd at berfformiad rhagorol cwmni Fidelity sy’n buddsoddi mewn ecwiti ar ran y gronfa, a pherfformiad da iawn hefyd gan UBS a Threadneedle wrth fuddsoddi mewn eiddo.  Cyrhaeddodd  sawl cwmni ei meincnod, tra disgwylir dychweliadau gwell yn y tymor canol oddi wrth Veritas a Partners, sydd â marchnadoedd arbenigol.

 

·            Prisiad actiwaraidd teir-blynyddol 31 Mawrth 2016 -

 

Bydd pris uchel bondiau, gyda lefel isel o ddychweliadau ar fondiau, yn cael effaith negyddol ar y gyfradd ddisgowntio, ac yn chwyddo’r amcangyfrif o werth ymrwymiadau pensiwn. Er gwaethaf cynnydd sylweddol iawn yng ngwerth ein hasedau ar y farchnad stoc, bydd hynny wedi’i wrthbwyso gan gynnydd sylweddol mewn ymrwymiadau.  Bydd cyflogwyr yn ymwybodol o’r cynnydd mewn ymrwymiadau, sydd wedi’i gyfrifo yn unol â safonau cyfrifo ryngwladol (FRS17, IAS19, ayb).  Rhoddwyd  “ciplun” o hynny yn ei gyd-destun.

 

-     Yn y Prisiad Actiwaraidd Teir-blynyddol 2013, roedd lefel ariannu y Cynllun yn 85%, ac roedd hynny yn well na’r cyfartaledd 79% ar draws y cyfan o'r CPLlL yng Nghymru a Lloegr, lle mae cronfeydd yn defnyddio amrywiaeth o dybiaethau a methodoleg actiwaraidd.

 

-     Byddai hyn yn gosod Gwynedd yn gyfforddus ar gyfer y cyfnod diffyg ac adfer ar draws yr holl CPLlL, ond nid yw canlyniadau cyhoeddedig y cronfeydd pensiwn ar sail debyg am debyg.  Yn dilyn ymlaen o ryddhau canlyniadau’r prisiant, cynhaliwyd adolygiad manwl gan ein actiwari, Hymans Robertson, ac fe ail-seiliwyd y canlyniadau yma ar un set o dybiaethau. Pan ddatgelwyd y darlun cymharol gywir, roedd sefyllfa ariannol Gwynedd ymysg y deg uchaf o gronfeydd Lloegr a Chymru yn gyffredinol.

 

-     Ar sail gyffredin, mae cyfnod adfer diffyg Cronfa Gwynedd yn wyth mlynedd, y byrraf o holl gronfeydd Cymru, a'r seithfed byrraf o’r holl 88 o gronfeydd y CPLlL.  Mae cyfnodau adfer diffyg cronfeydd eraill Cymru yn amrywio o 11 i 44 mlynedd  felly, mae gennym strategaeth gyllido risg isel a chynllun cyllido cymharol sy’n gredadwy.

 

-     Yn gynharach eleni, adroddodd SAC a PWC i Lywodraeth Cymru ar sefyllfa cronfeydd Cymru, a nodwyd ar sail debyg wrth debyg fod Cronfa Gwynedd yn dybiannol wedi’i ariannu 99%, o’i gymharu ag amrediad rhwng 71% a 97% yn y 7 cronfa arall.

 

-     Er bydd sefyllfa cyflogwyr unigol o fewn ein Cronfa yn gwahaniaethu, yn gyffredinol, dylai cryfder y Gronfa ein galluogi i gymryd agwedd hyblyg tuag at gyfraddau cyfraniadau pensiwn ar ôl y prisiad nesaf (2016). Yn amlwg, bydd lleddfu unrhyw gynnydd mewn “pension contribution rates” erbyn 2017/18 yn bwysig, o ystyried y wasgfa barhaus ar wariant cyhoeddus.

 

-     Y brif amcan yw sicrhau fod gan gyflogwyr strategaethau cyfrannu fforddiadwy, teg, a chynaliadwy sy'n adlewyrchu eu hamgylchiadau unigol eu hunain.

 

·            Gweinyddu Pensiynau

 

Parhaodd yr uned weinyddol gyda pherfformiad effeithiol fel y dangosir gan y mesurau yn erbyn ei thargedau gyda gwaith sylweddol wedi ei wneud i weithredu systemau newydd i sicrhau gweithrediad esmwyth, yng nghyd-destun twf sylweddol mewn ceisiadau am amcangyfrifon pensiwn oherwydd cynlluniau arbedion a chynigion ymddeol cynnar gan sawl cyflogwr. Amlygwyd bod nifer pensiynwyr yn parhau i godi, o 7,584 i 7,940 yn 2014/15.

 

·            Datblygiadau Diweddar

 

Ar gyfer y Gronfa Bensiwn adroddwyd bod nifer o newidiadau ac ymgynghoriadau ar y gweill. Mae’r prosiect cydweithio a ddatblygwyd gan yr wyth gronfa yng Nghymru wedi adnabod y gellid cyflawni gwell effeithlonrwydd trwy gydweithio i fuddsoddi drwy un fframwaith neu gerbyd buddsoddi cyffredin.  Bydd ymchwiliad pellach i  hyn yn ystod 2015/16. Adroddwyd bod Llywodraeth Cymru, wedi’u hannog gan undebau llafur ar ei ‘Partnership Council’ yn ystyried annog uno cronfeydd Cymreig.  Erbyn hyn, maent wedi derbyn adroddiad SAC a PWC ym mis Mai, sy’n cefnogi sefydlu cerbyd buddsoddi ar y cyd, yn hytrach nac uno. Mae Llywodraeth yn disgwyl arbedion cost wrth i gronfeydd pŵl buddsoddiadau, ac os nad yw’r cynigion gwirfoddol yn mynd ddigon pell, yna bydd y Llywodraeth yn gorfodi ei “blueprint” nhw. Bydd y Pwyllgor Pensiynau yn trafod y materion hyn.

 

·            Bwrdd Pensiynau

 

Mae Cronfa Gwynedd wedi credu erioed bod llywodraethu da yn sylfaenol i gyflawni cynllun rheoli llwyddiannus ac yn gefnogol i'r sylw cenedlaethol i lywodraethu'r CPLlL.  Mae Pwyllgor Pensiynau Gwynedd wedi llywodraethu ein Cronfa yn gynhwysol am nifer o flynyddoedd, gydag aelodau etholedig o gyflogwyr mawr eraill yn pleidleisio ochr yn ochr ag aelodau Cyngor Gwynedd. Er hynny, adroddwyd bod Bwrdd Pensiynau wedi ei sefydlu eleni i graffu dulliau llywodraethu'r gronfa.

 

Diolchwyd i aelodau’r Pwyllgor Pensiynau am eu cyfraniadau positif a chydwybodol yn ystod y flwyddyn ddiwethaf. Dymunwyd gwellhad buan i’r Cynghorydd Peter Read, cyn-gadeirydd y Pwyllgor Pensiynau, sydd wedi sefyll i lawr ac yn dioddef ag anaf. Diolchwyd hefyd i Gareth Jones oedd yn mynychu ei gyfarfod diwethaf yn y rôl Rheolwr yr Uned Weinyddol cyn ymddeol yn Rhagfyr, yn dilyn blynyddoedd o wasanaeth ffyddlon i’r Gronfa.  Diolchwyd hefyd i’r cyflogwyr am eu cefnogaeth

           

          Diolchodd y Cadeirydd i’r Pennaeth Cyllid a’i staff am adroddiad eglur a chynhwysfawr.

Mewn ymateb i’r cwestiwn, pa risg sydd i gyflogwyr y gronfa petai un cyflogwr yn methu talu  dyledion yn y dyfodol, nodwyd bod y gronfa yn edrych ar fodolaeth  gwarantwr neu fod cyrff codi treth yn codi arian o drethiant. Petai cyflogwr yn sefyll ar ben ei hun ac yn mynd i’r wal heb adnodd i’w gefnogi, yna bydd y dyledion yn cael eu rhannu yn gyfartal ar draws y gronfa. O ganlyniad, ac i osgoi risg, pwysleisiwyd bod gwirio mynediad i’r gronfa yn hanfodol.

Mewn ymateb i gwestiwn ynglŷn â ffurfio un gronfa ac o ganlyniad, colli allan efallai ar ein llwyddiant ein hunain, nodwyd bod pwyslais Llywodraeth Cymru erbyn hyn o uno wedi ei roi i’r neilltu a bod ffocws bellach ar  ‘gerbyd buddsoddi’ ar y cyd.

 

PENDERFYNWYD DERBYN  ADRODDIAD BLYNYDDOL Y GRONFA BENSIWN AM 2014/15

 

Dechreuodd y cyfarfod am 2.00pm a daeth i ben am 2.50pm.