Agenda item

I dderbyn adroddiad llafar gan gynrychiolydd o Trenau Arriva Cymru Cyf.

Estynnodd y Cadeirydd groeso i Mr Ben Davies a Mr Lewis Bencher i'r cyfarfod. 

 

Roedd Ms Claire Williams, Swyddog Partneriaeth Rheilffyrdd y Cambrian oedd newydd ei phenodi, wedi ymddiheuro am nad oedd yn gallu bod yn bresennol yn y cyfarfod ond roedd wedi anfon adroddiad at Mr Davies ac fe wnaeth yntau ei gyflwyno fel a ganlyn: 

 

Roedd yr adroddiad yn cyfeirio at weithgareddau cyn ac ar ôl penodiad Claire.  Cyn ymuno â byd Rheilffyrdd Cymunedol, gweithiodd am bum mlynedd fel Swyddog Partneriaeth Cymunedol gyda Chyngor Caerdydd ac roedd ei gwaith yn cynnwys holl agweddau Diogelwch Cymunedol, Iechyd a Llesiant, Materion Amgylcheddol ac Addysg a Chyflogaeth ac felly gyda chefndir mewn ymgysylltu cymunedol fe ddaw â chyfoeth o brofiad gyda hi.

 

Yn ystod y cyfnod byr yma roedd Claire wedi cyfarfod gyda nifer o bartneriaid ariannu a strategol i gyflwyno ei hun ac i drafod sut y gellid barhau i weithio ar y cyd i sicrhau nad yw'r gwaith yn cael ei ddyblygu a chael y gwerth gorau i arian cyhoeddus.

 

Masnachfraint Rheilffyrdd a chefnogaeth Llywodraeth Cymru

Yn ddiweddar, roedd Ms Claire Williams wedi mynychu cyfarfod gyda Threnau Arriva Cymru ble trafodwyd dyfodol Partneriaethau Rheilffyrdd Cymunedol a sut y byddant yn ffitio i mewn gyda'r fasnachfraint nesaf a bydd yn cyfarfod KeolisAmey a MTR Corporation (Cymru) Ltd    yn yr wythnosau nesaf.   

 

 

 

Arolygon

Mae Partneriaeth Rheilffyrdd y Cambrian yn falch o gael gweithio gyda Phwyllgor Cyswllt Rheilffordd Amwythig i Aberystwyth gan gomisiynu arolwg a gynhaliwyd yng ngwanwyn 2017 fel rhan o grant gan Lywodraeth Cymru.  Mae'r arolygon yn dilyn llwyddiant arolygon 2013 a 2015 a olygodd well gwasanaethau ar Leiniau'r Cambrian.   Cyflwynir canlyniadau'r arolwg i Gareth Evans, Economegydd Rheilffyrdd Llywodraeth Cymru gan y Pwyllgor ar Dachwedd 17eg 2017 mewn cyfarfod ym Mharc Cathays.

 

Ymgyrch Hyrwyddo 201/2018

Derbyniodd y bartneriaeth arian ychwanegol oedd yn caniatau iddynt baratoi gwefan newydd sbon yn canolbwyntio ar ymwelwyr ac mae'r wefan bellach yn fyw, y cyfeiriad yw www.walesonrails.com gan gynhrychu mwy o ffilmiau byr fydd yn cael eu rhyddhau yn Chwefror/Mawrth tan ddechrau'r haf eleni.  Bydd yr ymgyrch wedi ei seilio yn uniongyrchol ar lwyfannau cyfryngau cymdeithasol ac ar 'Flwyddyn y Môr 2018'.  

 

2018 yw Blwyddyn y Môr ac ar y cyd gyda Croeso Cymru, TAC and amryfal bartneriaid allweddol eraill cynhelir nifer o ddigwyddiadau ymgysylltu cymunedol yn ystod y flwyddyn ar sail amrywiaeth o themâu i bob tymor gyda'r holl ddigwyddiadau yn cael eu cynnal yn ardal Arfordir y Cambrian a rhai yn digwydd ar y trên.   Bydd mwy o fanylion ar gael yn y cyfarfod nesaf. 

 

Ychwanegodd Mr Ben Davies y bydd Trenau Arriva Cymru yn gweithio'n agos mewn partneriaeth gyda Swyddog Partneriaeth Rheilffyrdd y Cambrian ac roeddent yn awyddus i gysylltu cymunedau gyda'i gilydd gan hyrwyddo teithio ar y trên.  Un digwyddiad a awgrymwyd oedd troi trên yn garnifal yn ystod misoedd yr haf, cynnal cystadleuaeth adeiladu castell tywod yng Nghricieth i ddenu mwy o bobl, gweithio mewn partneriaeth gyda Hafan y Môr Pwllheli, Croeso Cymru, Rheilffordd Ffestiniog ac ati.

 

Ail-agor Gorsaf Rhyd y Pennau

Yn ddiweddar roedd Ms Claire Williams wedi mynychu cyfarfod gyda Llywodraeth Cymru, Trafnidiaeth Cymru a nifer o bartneriaid strategol eraill ynglŷn ag ail-agor Gorsaf Rhyd y pennau. Roedd Adran Drafnidiaeth y DU wedi cyhoeddi canlyniad ceisiadau llwyddiannus a wnaed i'r Gronfa Gorsafoedd newydd, oedd ar gael tuag at gost arian cyfalaf cynlluniau i agor gorsafoedd o'r newydd neu ail-agor gorsafoedd oedd wedi cau, wedi ei hyrwyddo gan drydydd partïon yng Nghymru a Lloegr.  

 

Roedd y cynllun arfaethedig yn flaenoriaeth trafnidiaeth leol a rhanbarthol yng Nghynllun Trafnidiaeth Leol ar y Cyd Canolbarth Cymru 2015-2020 a bydd yn darparu cyfnewidfa cludiant cyhoeddus gyda gorsaf newydd, cyfleusterau parcio i geir a beiciau i alluogi teithwyr i gael mynediad i wasanaethau bws a rheilffordd ac i rannu ceir o'r lleoliad yma.  Roedd y cynllun hefyd yn ceisio mynd i'r afael gyda phryderon diogelwch ffordd lleol drwy darparu gwelliant i gyffordd A487 / A4159 gyda chyfleusterau teithio llesol.  Bydd y cynllun yn cefnogi ac yn darparu cyfleoedd twf economaidd posib a gwell mynediad i wasanaethau a chyfleusterau a leolir yn Aberystwyth a'r cyffiniau ac yng ngogledd Ceredigion.

 

Er bod y prosiect ar hyn o bryd yn y cam dylunio, roedd ar y ffordd i'w gwblhau yn ystod haf 2020.

 

Cynllun Busnes 2017-2018

Cyflwynwyd cynllun busnes y flwyddyn ariannol gyfredol yng nghyfarfod Mawrth o Bartneriaeth Rheilffyrdd y Cambrian i'w gymeradwyo gan y rhan-ddeiliaid ariannu.   Cymeradwywyd y cynllun busnes gan y Bartneriaeth ac mae gwaith yn cael ei wneud arno ar hyn o bryd.

 

Cymunedau a Gorsafoedd Dementia Gyfeillgar

Fel Swyddog Datblygu newydd i Bartneriaeth Rheilffyrdd y Cambrian, un o'r amcanion allweddol yw ymgysylltu â'r gymuned, datblygu cynlluniau i ehangu cyrhaeddiad PRhC i ystod ehangach o grwpiau yn cynnwys y rhai sydd dan anfantais gymdeithasol. 

 

Yn unol â'r cylch gwaith yma mae Claire ar hyn o bryd yn gweithio gyda phartneriaid ariannu a strategol i wneud Lein Rheilffordd y Cambrian yn Gymuned Dementia Gyfeillgar ei hun.  Mae hon yn dasg enfawr a bydd yn cymryd tua tair blynedd i'w chyflawni.  Er hynny, mae am ymgymryd â hyn fesul cam o orsaf i orsaf, gan ddechrau yn y gorsafoedd ble mae swyddogion sef Machynlleth, Abermaw, Pwllheli ac Amwythig.  Gallai hyn wneud Lein Rheilffordd y Cambrian y Lein Reilffordd Ddementia Gyfeillgar gyntaf yn y DU.  Ar hyn o bryd mae nifer fechan iawn o orsafoedd DG yng Ngymru ond mae'n credu yn gryf y gellir cyrraedd y nod yma.  

 

Oherwydd bod gorsaf Rhyd y pennau yn y cam dylunio, pan gynhaliwyd Asesiad Effaith Cydraddoldeb i ail-agor yr orsaf gofynnwyd i ni weithio gyda'r Gymdeithas Alzheimer's i'w gwneud yn Orsaf Ddementia Gyfeillgar. 

 

I gloi, dywedodd Mr Ben Davies fod Trenau Arriva Cymru wedi tynnu yn ôl o'r broses i wneud cais i redeg gwasanaethau rheilffyrdd yng Nghymru o 2018.    Er hynny, bydd y 2000+ o staff yn trosglwyddo dan delerau ac amodau TUPE i gwmni newydd y fasnachfraint.   Bydd Trenau Arriva Cymru yn parhau i wella'r gwasanaeth i bobl Cymru am yr un mis ar ddeg nesaf.

 

Nid oedd y tywydd wedi bod yn ffafriol yn ystod yr haf ac mewn partneriaeth gyda Network Rail roedd y perfformiad wedi dechrau cynyddu a gall barhau i wneud hynny.

 

Yn ystod y drafodaeth ddilynol gwnaeth yr aelodau’r sylwadau a ganlyn:

 

1.         Diolchwyd i Mr Ben Davies am y diweddariad ynglŷn â'r fasnachfraint newydd, roedd yn ddealladwy fod gweithwyr Trenau Arriva Cymru yn poeni am eu dyfodol a dyfodol eu teuluoedd.  Roedd swyddi cludiant cyhoeddus ym Machynlleth yn cael eu gwerthfawrogi ac roedd canran enfawr o boblogaeth y dref a'r ardal yn dibynnu ar y swyddi hyn am eu bywoliaeth.  Roedd y berthynas waith rhwng Trenau Arriva Cymru a Network Rail yn cael ei gwerthfawrogi a hefyd y gefnogaeth i'r ardal gan Lywodraeth Cymru.

 

2.         Roedd Trenau Arriva Cymru wedi gwella dros y blynyddoedd a'r gobaith oedd y byddai'r cwmni fyddai'n llwyddo i ennill y fasnachfraint yn parhau gyda'r gwaith da a wnaed.  

 

3.         Pwysleiswyd pwysigrwydd casglwyr tocynnau / giard ar y trenau. 

 

4.         Nodwyd hefyd y pwysigrwydd o edrych ar ôl pobl anabl oedd yn defnyddio'r gwasanaethau.

 

5.         Roedd angen adeiladu lloches yng Nghyffordd Dyfi.  Wrth ateb, cytunodd Mr Ben Davies i holi ymhellach am y mater yma.

 

6.         O ran cyflwyno tocynnau trên i grŵp o bobl, dywedodd Mr Lewis Brencher fod Trenau Arriva Cymru wedi buddsoddi mewn cynllun newydd ac yn gweithio i ostwng maint y tocynnau.   Yn y dyfodol, bydd teithwyr yn gallu prynu tocynnau misol yn ogystal â thocynnau grŵp a hefyd gellid lawr lwytho tocynnau i ffonau symudol.

 

7.         Wrth ateb cwestiwn a fyddai mwy o gerbydau ar Wyliau Banc o safbwynt agwedd iechyd a diogelwch, dywedodd Mr Davies nad oedd gan Trenau Arriva Cymru ddigon o drenau - 24 yn rhedeg o Fachynlleth.   Y flwyddyn nesaf bydd Trenau Arriva yn buddsoddi a'r gobaith oedd y byddai mwy o drenau ar gael ar gyfer haf 2018.

 

8.         Roedd yn braf nodi'r amcan i wneud Lein Rheilffordd y Cambrian yn Gymuned Ddementia Gyfeillgar ei hun.  Roedd hyn yn arbennig o bwysig ac fe awgrymwyd fod Swyddog Partneriaeth Rheilffyrdd y Cambrian yn cysylltu ag Emma Quaeck yng Nghanolfan Hamdden Glaslyn, Porthmadog, os yw angen rhagor o wybodaeth gan fod Emma wedi bod yn cynnal digwyddiadau arbenigol i gleifion dementia.

 

Penderfynwyd:          Derbyn a nodi’r adroddiad a diolch i'r swyddogion am yr adroddiad uchod a'r sylwadau.