Rhaglen, penderfyniadau a chofnodion drafft

I ethol Cadeirydd ar gyfer 2024 /25

PENDERFYNIAD:

Ethol y Cynghorydd Elin Hywel yn Gaderiydd ar gyfer 2024/25

Gyda phenodiad y Cynghorydd Medwyn Hughes i’r Cabinet, nodwyd yr angen i ethol Cadeirydd ar gyfer diwedd 2024/25. Cymerwyd y cyfle i ddiolch i’r Cynghorydd Medwyn Hughes am ei waith a’i gefnogaeth i’r Pwyllgor a dymunwyd y gorau iddo fel Aelod Cabinet Economi a Chymuned.

Cynigiwyd ac eiliwyd y Cynghorydd Elin Hywel

Penderfynwyd ethol y Cynghorydd Elin Hywel yn Gadeirydd y Pwyllgor hwn ar gyfer diwedd 2024/25

I ethol Is-gadeirydd ar gyfer 2024/25

PENDERFYNIAD:

Ethol y Cynghorydd Ioan Thomas yn Is-gadeirydd ar gyfer 2024/25

Cynigwyd ac eiliwyd y Cynghorydd Ioan Thomas

Cynigiwyd ac eiliwyd y Cynghorydd Iwan Huws

Pleidleisiwyd ar yr enwebiadau

Penderfynwyd ethol y Cynghorydd Ioan Thomas yn Is-gadeirydd y Pwyllgor hwn ar gyfer diwedd 2024 / 2025

I dderbyn unrhyw ymddiheuriadau am absenoldeb

Dim i’w nodi

I dderbyn unrhyw ddatganiad o fuddiant personol

Dim i’w nodi

Nodi unrhyw eitemau sy’n fater brys ym marn y cadeirydd fel y gellir eu hystyried.

Dim i’w nodi

Bydd y Cadeirydd yn cynnig y dylid llofnodi cofnodion cyfarfod o’r pwyllgor hwn a gynhaliwyd 25ain o Dachwedd fel rhai cywir  

Bu i’r Cadeirydd dderbyn cofnodion y cyfarfod a gynhaliwyd 25 Dachwedd 2024 fel rhai cywir.

I dderbyn a nodi diweddariad chwarterol gan Bartneriaeth Pensiwn Cymru

PENDERFYNIAD:

• Derbyn a nodi’r wybodaeth
• Cadeirydd y Pwyllgor Pensiynau i amlygu pryderon y Pwyllgor i’r PPC o’r awgrym y gall yr holl weithgarwch gweithredu ei ddirprwyo i'r Bartneriaeth. Nodwyd pryder, pe byddai’r Bartneriaeth am gymryd mwy o gyfrifoldeb am weithredu strategaeth fuddsoddi, rhaid sicrhau mewnbwn gan gronfeydd unigol y Bartneriaeth.
• Croesawu bod defnydd o’r Iaith Gymraeg wedi ei nodi yn anghenrheidol mewn ymateb i Ymgynghoriad gan yr MHCLG - ‘Fit for the Future’ - bydd angen i Gronfa Bensiwn Gwynedd a PPC allu darparu gwybodaeth ac unrhyw waith cyfathrebu yn Gymraeg yn ogystal â'r Saesneg.

Amlygodd y Rheolwr Buddsoddi bod yr adroddiad bellach yn nodi’r wybodaeth ddiweddaraf ar waith PPC. Tynnwyd sylw at drafodaethau cyfarfod Rhagfyr 2024 o’r Cydbwyllgor gan amlygu bod y Bartneriaeth wedi ennill gwobr ‘ESG Innovation’ yn ddiweddar a hynny oherwydd yr Is-gronfa Ecwiti Gweithredol Cynaliadwy.

Cyfeiriwyd at ddiweddariad y Gweithredwr dros y cyfnod ac amodau’r farchnad maent yn monitro. Adroddwyd bod perfformiad y cronfeydd wedi bod yn gryf gydag ecwiti byd-eang a marchnadoedd incwm sefydlog yn codi yn y cyfnod. Eglurwyd bod dau ymarfer caffael wedi digwydd yn ddiweddar ar gyfer Ymgynghorydd Goruchwylio a Darparwr Gwasanaeth Pleidleisio ac Ymgysylltu gydag argymhellion y broses wedi eu cymeradwyo gan y Pwyllgor ym mis Rhagfyr. Cyhoeddwyd mai Hymans Robertson oedd wedi eu hail benodi fel Ymgynghorydd Goruchwylio a Robeco wedi ail ennill cytundeb Darparwr Gwasanaeth Pleidleisio ac Ymgysylltu.

Tynnwyd sylw at ymgynghoriad diweddaraf Llywodraeth San Steffan - ‘Addas I’r Dyfodol’ oedd yn galw am dystiolaeth sy’n awgrymu’n fras y trywydd mae Llywodraeth San Steffan yn disgwyl i’r LGPS ei ddilyn. Adroddwyd bod yr ymgynghoriad yn edrych ar feysydd megis pwlio asedau, buddsoddi yn lleol ac yn y Deyrnas Unedig, a llywodraethu gyda 30 cwestiwn i ymateb iddynt erbyn 16eg o Ionawr 2025. Cyfeiriwyd at ymateb Cronfa Bensiwn Gwynedd i’r ymgynghoriad (gydag ymateb PPC eisoes wedi ei rannu gyda’r Aelodau drwy e-bost), gan nodi bod ffrydiau gwaith parod i weithredu unwaith bydd canlyniadau’r ymgynghoriad yn cael eu rhannu.

Diolchwyd am yr adroddiad

Mewn ymateb i gwestiwn ynglŷn â newidiadau disgwyliedig i’r pwls, a'r gofyn iddynt fod wedi cofrestru gyda’r FCA (Financial Conduct Authority), nodwyd mai tri pwl yn unig oedd heb gofrestru. Mewn ymateb i gwestiwn ategol os oedd gan yr FCA gapasiti i gofrestru cwmnïau, derbyniwyd y sylw bod hwn yn waith ychwanegol iddynt, ond bod angen sicrhau'r gwasanaeth gorau i’r dyfodol gan yr FCA. Ategwyd bod cyswllt parhaus  gyda’r FCA a chyfarfodydd rheolaidd yn cael eu cynnal rhwng aelodau PPC a’r FCA.

Yn ystod y drafodaeth ddilynol, nodwyd y sylwadau canlynol gan Aelodau;

·        Pryder o’r awgrym y gall yr holl weithgarwch weithredu ei ddirprwyo i'r Bartneriaeth. A fydd Cronfa Pensiwn Gwynedd yn colli rheolaeth? Colli allan?

·        Derbyn bod angen Strategaeth Buddsoddi, ond a fydd gan Wynedd fewnbwn i’r strategaeth?

·        Bod PPC yn gwneud gwaith da iawn ac er yn deall ystyriaethau ymgynghoriad Llywodraeth San Steffan, bod rhai o’r syniadau yn achosi pryder

·        Bod yr Iaith Gymraeg yn elfen bositif a chryf i PPC

·        Pryderon i’w cyflwyno i gyfarfod nesaf Fforwm Cadeiryddion PPC – ymateb o’r Fforwm i’w rhannu gyda’r Pwyllgor

PENDERFYNWYD

·        Derbyn a nodi’r wybodaeth

·        Cadeirydd y Pwyllgor Pensiynau i amlygu pryderon y Pwyllgor i’r PPC o’r awgrym y gall yr holl weithgarwch gweithredu ei ddirprwyo i'r Bartneriaeth. Nodwyd pryder, pe byddai’r Bartneriaeth am gymryd mwy o gyfrifoldeb am weithredu strategaeth fuddsoddi, rhaid sicrhau mewnbwn gan gronfeydd unigol y Bartneriaeth.

·        Croesawu bod defnydd o’r Iaith Gymraeg wedi ei nodi yn angenrheidiol mewn ymateb i Ymgynghoriad gan yr MHCLG - ‘Fit for the Future’ - bydd angen i Gronfa Bensiwn  ...  gweld y cofnod llawn ar gyfer eitem 7.

I gymeradwyo cyllideb ar gyfer y flwyddyn ariannol 2025/26 ar gyfer yr Uned Gweinyddu Pensiynau a’r Uned Buddsoddi..

PENDERFYNIAD

• Derbyn a nodi’r wybodaeth
• Cymeradwyo Cyllideb Uned Gweinyddu Pensiynau a’r Uned Buddsoddi ar gyfer y flwyddyn ariannol 205/26

Cyflwynwyd adroddiad gan y Rheolwr Buddsoddi yn ceisio derbyn cymeradwyaeth y Pwyllgor i gyllideb ar gyfer yr Uned Gweinyddu Pensiynau a’r Uned Buddsoddi am y flwyddyn ariannol 2025–2026. Adroddwyd bod y gyllideb bellach yn cael ei chymeradwyo yn flynyddol gan y Pwyllgor Pensiynau. 

Cyfeiriwyd at gyllideb yr Uned Gweinyddu, gan adrodd bod 25 aelod o staff yn gyflogedig yn yr Uned a bod y gyllideb yn cynnwys costau systemau, argraffu, ac ad-daliadau canolog. Nodwyd bod y costau yn gyson ar wahân i chwyddiant a nodwyd bod ambell swydd yn mynd drwy'r broses arfarnu ar hyn o bryd ac o ganlyniad, efallai bydd angen cynyddu’r gyllideb rhywfaint.

Cyfeiriwyd ar gostau'r Uned Buddsoddi sydd yn cael eu rhannu rhwng y Gronfa a Chyngor Gwynedd gan fod yr Uned hefyd yn gyfrifol am Reolaeth Trysorlys.

Nododd y Rheolwr Buddsoddi bod costau Partneriaeth Pensiwn Cymru,  costau ymgynghorwyr a chostau rheolwyr buddsoddi yn rhan o gyfrifoldeb yr Uned Buddsoddi, ond bod y costau yn amrywio yn ddibynnol ar berfformiad y buddsoddiadau a’r gwaith sydd angen ei gyflawni gan yr ymgynghorwyr a’r Bartneriaeth. Ystyriwyd bod bwriad edrych yn fanylach ar waith a chostau'r ymgynghorwyr, gydag asiantaethau megis PIRC yn edrych ar werth am arian y Rheolwyr Buddsoddi ar draws y Cronfeydd. O ganlyniad, ni ystyriwyd budd o osod cyllideb fanwl i’r costau hyn.

Diolchwyd am yr adroddiad.

Mewn ymateb i gwestiwn ynglŷn â’r eitemau heb gyllideb nodwyd bod y sefyllfa yn cael ei monitro yn barhaus.

PENDERFYNWYD:

·        Derbyn a nodi’r wybodaeth

·        Cymeradwyo Cyllideb Uned Gweinyddu Pensiynau a’r Uned Buddsoddi ar gyfer y flwyddyn ariannol 205/26

I nodi cynnydd ac amcanion y dyfodol

PENDERFYNIAD:

• Derbyn a nodi’r adroddiad cynnydd
• Derbyn amcanion yr Ymgynghorwyr Buddsoddi am y cyfnod nesaf

Cyflwynwyd adroddiad gan y Rheolwr Buddsoddi yn adrodd ar y cynnydd yn erbyn amcanion ymgynghorwyr y Gronfa, Hymans Robertson a hynny i wneud yn siŵr bod y gwaith sydd yn cael ei gyflawni ganddynt yn cyfateb ag amcanion strategol y Gronfa. Ategwyd bod yr ymarfer yn cael ei ystyried fel llywodraethu da.

Adroddwyd bod y flwyddyn ddiwethaf wedi bod yn flwyddyn brysur gyda’r ymgynghorwyr yn darparu cyngor ar y strategaeth buddsoddi, opsiynau marchnadoedd preifat, ecwiti goddefol a sicrhau bod llif arian digonol gan y Gronfa i dalu’r pensiynwyr yn fisol. Ategwyd bod Hymans hefyd wedi cyd weithio gyda’r swyddogion wrth adolygu polisïau mewnol a sicrhau cydymffurfiaeth gydag unrhyw reoliadau pensiwn perthnasol.

Er nad yw Hymans yn darparu hyfforddiant drwy gytundeb uniongyrchol gyda Chronfa Gwynedd, bod hyfforddiant amserol ar gael drwy PPC, gyda chyfraniadau sylweddol gan Hymans.

Cyfeiriwyd at yr amcanion ar gyfer 2025 gan nodi eu bod yn parhau i fod yn debyg i’r amcanion cyfredol, ond bod elfennau o’r gwaith ychwanegol fydd yn cymryd lle yn 2025 wedi ei gynnwys (megis y prisiad tair blynedd, sefydlu targed sero net a datblygiadau Ymgynghoriad gan y Llywodraeth).

Diolchwyd am yr adroddiad

PENDERFYNWYD:

·        Derbyn a nodi’r adroddiad cynnydd

·        Derbyn amcanion yr Ymgynghorwyr Buddsoddi am y cyfnod nesaf

Y ystyried a derbyn yr adroddiad er gwybodaeth

PENDERFYNIAD:

Derbyn a nodi’r wybodaeth

Cyflwynwyd er gwybodaeth, adroddiad yn amlygu gwir weithgarwch Rheolaeth Trysorlys y Cyngor yn ystod y flwyddyn ariannol gyfredol. Yn unol â Chod Ymarfer y Sefydliad Siartredig Cyllid Cyhoeddus a Chyfrifyddiaeth ar gyfer Rheoli Trysorlys (Cod TM CIPFA) mae’n ei gwneud yn ofynnol i gynghorau adrodd ar berfformiad y swyddogaeth rheoli trysorlys o leiaf ddwywaith y flwyddyn (canol y flwyddyn a diwedd y flwyddyn).

Adroddwyd bod y cyfnod (6 mis hyd at 30 Medi 2024) wedi bod yn un prysur a llewyrchus iawn i weithgaredd rheolaeth trysorlys y Cyngor. Eglurwyd bod y gweithgaredd buddsoddi wedi aros o fewn y cyfyngiadau a osodwyd ac ni wnaeth unrhyw sefydliad wnaeth y Cyngor fuddsoddi arian gyda hwy fethu â thalu’n ôl. Ategwyd bod yr incwm llog wedi bod yn is na’r gyllideb wrth i’r radd sylfaen (base rate) ddechrau gostwng.

Tynnwyd sylw at y cefndir economaidd, y marchnadoedd arian a’r adolygiadau credyd ar gyfer y cyfnod. Yn nhermau gweithgareddau buddsoddi, cyfeiriwyd at y mathau o fuddsoddiadau y buddsoddir ynddynt sydd, yn unol ar arfer, yn cynnwys banciau a chymdeithasau adeiladu, awdurdodau lleol, cronfeydd marchnad arian, cronfeydd cyfun a’r swyddfa rheoli dyledion sydd yn gyson gyda’r math o fuddsoddiadau sydd wedi eu gweithredu ers nifer o flynyddoedd bellach.

Cadarnhawyd bod gweithgareddau rheoli trysorlys a gynhaliwyd yn ystod y cyfnod wedi cydymffurfio’n llawn gyda chyfyngiadau buddsoddi Cod Ymarfer CIPFA.

Diolchwyd am yr adroddiad

Mewn ymateb i gwestiwn ynglŷn ag ystyr ‘Datguddiad Bail In’ nodwyd mai ‘bail in’ yw pe byddai sefydliad yn methu gweithredu, yn unol â’r hierarchaeth credydwyr, byddai gwahanol lefelau o warchodaeth ar gael i fuddsoddwyr. Mae’r datguddiad yn dangos pa mor uchel fuasai arian y Cyngor yn yr hierarchaeth, pe byddai’r sefydliad yn methu.

Mewn ymateb i gwestiwn ynglŷn â Benthyciadau Awdurdodau Lleol, eglurodd y Pennaeth Cyllid, yn unol â chyngor Arlingclose, bod cyfleodd da i Awdurdodau Lleol roi benthyg arian i Awdurdodau eraill oherwydd bod y gyfradd llog tymor byr yn uwch na chyfraddau llog y banc a hyd yn oed os yw’r Awdurdod wedi cyhoeddi hysbysiad adran 114, bod rhaid i’r arian, yn unol â gofyn statudol, gael ei dalu yn ôl. Ategwyd bod y Cyngor yn monitro'r sefyllfa yn ddyddiol a bod Arlingclose hefyd yn cadw golwg ar y sefyllfa gan rannu rhybuddion ymlaen llaw gyda’r Cyngor o’r Awdurdodau hynny i’w hosgoi.

Nodwyd hefyd bod risg i enw da (reputation risk) fel unrhyw risg buddsoddi arall, yn cynnwys camau gweithredu ac amgylchiadau fyddai’n gallu achosi i sefydliad golli hygrededd gyda rhanddeiliaid, cwsmeriaid, partneriaid, neu’r cyhoedd.

PENDERFYNWYD:

Derbyn a nodi’r wybodaeth

Bydd y Cadeirydd yn cynnig y dylid cau’r wasg a’r cyhoedd allan o’r cyfarfod yn ystod y drafodaeth ar yr eitemau canlynol gan ei fod yn debygol y datgelir gwybodaeth eithriedig fel y’i diffinnir ym mharagraff Paragraff 14 o Atodiad 12A o Ddeddf Llywodraeth Leol 1972 Gwybodaeth ynglŷn â thrafodion ariannol neu fusnes unrhyw berson penodol( yn cynnwys yr awdurdod sydd yn dal y wybodaeth hynny).

Mae budd cyhoeddus cydnabyddedig mewn bod yn agored ynglŷn â defnydd adnoddau cyhoeddus a materion ariannol cysylltiedig. Cydnabyddir fodd bynnag fod adegau, er gwarchod buddiannau ariannol awdurdod cyhoeddus fod angen trafod gwybodaeth fasnachol heb ei gyhoeddi. Byddai cyhoeddi gwybodaeth fasnachol sensitif o’r math yma yn amhriodol o ran buddiannau cydnabyddedig trydydd bartïon ac yn gallu tanseilio hyder i ddod a gwybodaeth ymlaen gerbron y Cyngor a felly gallu’r Cyngor i wneud penderfyniadau ar ran y gronfa. Byddai hyn yn groes i’r budd cyhoeddus ehangach o sicrhau gwerth am arian a’r allbwn cyfansawdd gorau ac felly am y rhesymau yma mae’r materion yn gaeedig er y budd cyhoeddus.

PENDERFYNWYD cau’r wasg a’r cyhoedd allan o’r cyfarfod yn ystod y drafodaeth ar yr eitemau canlynol gan ei fod yn debygol y datgelir gwybodaeth eithriedig fel y’i diffinnir ym mharagraff Paragraff 14 o Atodiad 12A o Ddeddf Llywodraeth Leol 1972 Gwybodaeth ynglŷn â thrafodion ariannol neu fusnes unrhyw berson penodol (yn cynnwys yr awdurdod sydd yn dal y wybodaeth hynny).

Mae budd cyhoeddus cydnabyddedig mewn bod yn agored ynglŷn â defnydd adnoddau cyhoeddus a materion ariannol cysylltiedig. Cydnabyddir fodd bynnag fod adegau, er gwarchod buddiannau ariannol cyhoeddus fod angen trafod gwybodaeth fasnachol heb ei gyhoeddi. Mae’r adroddiadau yn benodol ynglŷn â phroses gaffael arfaethedig. Byddai cyhoeddi gwybodaeth fasnachol sensitif o’r math yma yn gallu bod yn niweidiol i fuddiannau’r Cyngor a’i bartneriaid drwy danseilio cystadleuaeth. Byddai hyn yn groes i’r budd cyhoeddus ehangach o sicrhau'r allbwn cyfansawdd gorau. Am y rhesymau hyn mae’r materion yn gaeedig er y budd cyhoeddus.

I ystyried yr adroddiad

(copi i’r Aelodau yn unig).

PENDERFYNIAD

Derbyn a nodi’r wybodaeth

Nodyn: Diffyg cysondeb o wybodaeth yn adroddiad ysgrifenedig Robeco o gymharu â’r wybodaeth yn nhabl cynnydd Robeco - angen sicrhau bod y wybodaeth yn gywir

Cyflwynwyd adroddiad chwarterol yn crynhoi'r gwaith mae Robeco (Darparwr Pleidleisio ac Ymgysylltu PPC) yn cyflawni ar ran y Gronfa Bensiwn, gan gynnwys y gwaith ymgysylltu. Nodwyd bod y wybodaeth yn rhoi ffocws i’r Pwyllgor ar faterion buddsoddi cyfrifol sydd bellach yn chwarae rhan flaenllaw.

Cyfeiriwyd at yr ystadegau manwl o’r meysydd buddsoddi, enwau’r cwmnïau, nifer y gweithgareddau a manylion pellach am yr ymgysylltu mae Robeco wedi ei wneud yn y chwarter. Nodwyd hefyd bod Robeco yn dewis thema ymgysylltu pob chwarter ac mai Arferion Llafur mewn byd - ôl Covid 19 oedd thema'r cyfnod yma.

Trafodwyd cynnwys yr adroddiad a mynegwyd pryder unwaith eto gan yr Aelodau am safon gwaith ymgysylltu ac ymgynghori'r cwmni. Nodwyd, er bod nifer o elfennau positif yn eu gwaith, bod elfennau negyddol i’w gweld hefyd ac felly angen sicrhau i’r dyfodol bod mwy o wybodaeth am ddatblygiadau yn cael eu cynnwys a sut mae’r datblygiadau hynny yn cael eu mesur.

Diolchwyd am yr adroddiad.

Mewn ymateb i’r sylwadau, nodwyd bod bwriad, yn dilyn cytundeb newydd gyda Robeco bod PPC am sicrhau bod elfen ragweithiol yn rhan o’r cyfrifoldebau ymgysylltu, ynghyd a gofynion cyflwyno gwybodaeth glir a dealladwy. Nodwyd bod PPC yn adolygu trefniadau ymateb i’r wybodaeth sydd yn cael ei gyflwyno ac yn llunio Polisi Uwch-gyfeirio / Cynnydd (Escalation Policy)

Mewn ymateb i gwestiwn os bydd fformat newydd i’r wybodaeth a gyflwynir i’r dyfodol o ystyried bod cytundeb newydd gyda Robeco, nodwyd y bydd pob ymdrech yn cael ei wneud i sicrhau mwy o wybodaeth i’r dyfodol

Sylwadau pellach yn codi o’r drafodaeth ddilynol:

·        Bod y tablau yn yr adroddiad yn amlygu nad oedd y perfformiad yn dda, ond bod y wybodaeth yn yr adroddiadau ysgrifenedig yn edrych yn dda iawn gyda nifer o bwyntiau positif. A yw’r cwmni felly yn rhannu perfformiad / newyddion da yn unig? Awgrym i gynnwys cymariaethau rhwng ‘da’ a ‘phethau sydd ddim mor dda’, mewn adroddiadau i'r dyfodol.

PENDERFYNWYD

Derbyn a nodi’r wybodaeth

Nodyn: Diffyg cysondeb o wybodaeth yn adroddiad ysgrifenedig Robeco o gymharu â’r wybodaeth yn nhabl cynnydd Robeco - angen sicrhau bod y wybodaeth yn gywir