Rhaglen, penderfyniadau a chofnodion drafft

I ethol Cadeirydd ar gyfer 2025 / 2026

PENDERFYNIAD:

Ail Ethol y Cynghorydd Elin Hywel yn Gadeirydd y Pwyllgor hwn ar gyfer 2025/26

Penderfynwyd ail ethol y Cynghorydd Elin Hywel yn Gadeirydd y Pwyllgor hwn ar gyfer 2025/26

I ethol Is-gadeirydd ar gyfer 2025 / 2026

PENDERFYNIAD

Ethol y Cynghorydd  John Pughe Roberts  yn Is-gadeirydd y Pwyllgor hwn ar gyfer 2025/26

Penderfynwyd ethol y Cynghorydd John Pughe Roberts yn Is-gadeirydd y Pwyllgor hwn ar gyfer 2025/26

I dderbyn unrhyw ymddiheuriadau am absenoldeb

Derbyniwyd ymddiheuriadau gan y Cyng Stephen Churchman, Cyng John Brynmor Hughes a’r Cyng Elin Hywel

I dderbyn unrhyw ddatganiad o fuddiant personol

Dim i’w nodi

Nodi unrhyw eitemau sy’n fater brys ym marn y cadeirydd fel y gellir eu hystyried.

Dim i’w nodi

Bydd y Cadeirydd yn cynnig y dylid llofnodi cofnodion cyfarfod o’r pwyllgor hwn a gynhaliwyd 17 Mawrth 2025 fel rhai cywir  

Bu i’r Cadeirydd dderbyn cofnodion y cyfarfod a gynhaliwyd ar 17 Mawrth 2025 fel rhai cywir.

I ystyried a chymeradwyo’r Cynllun Busnes

PENDERFYNIAD

Cymeradwyo Cynllun Busnes Diwygiedig Partneriaeth Pensiwn Cymru 2025 - 2028

Cyflwynwyd adroddiad gan y Rheolwr Buddsoddi yn gofyn i’r Pwyllgor gymeradwyo Cynllun Busnes diwygiedig Partneriaeth Pensiwn Cymru. Adroddwyd bod y Cynllun Busnes wedi cael ei gymeradwyo gan y Cydbwyllgor Llywodraethu ym mis Mawrth 2025, ond bellach wedi ei addasu i amlygu costau dylunio a galluogi Prosiect Wyddfa, ble derbyniwyd cymeradwyaeth yn ei gyfarfod 4ydd o Fehefin 2025. Ategwyd y bydd y Cynllun angen derbyn cymeradwyaeth gan y Pwyllgorau unigol o fewn y Bartneriaeth.

Nodwyd bod y Bartneriaeth yn creu Cynllun Busnes yn flynyddol am gyfnod o dair blynedd a’r prif bwrpas yw:

•           Esbonio cefndir a strwythur llywodraethu

•           Amlinellu’r blaenoriaethu ac amcanion dros y tair blynedd nesaf

•           Cyflwyno polisïau a chynlluniau’r Bartneriaeth

•           Amlinellu’r gyllideb ariannol

•           Crynhoi buddsoddiad ac amcanion perfformiad PPC

Diolchwyd am yr adroddiad

Cynigiwyd ac eiliwyd cymeradwyo'r Cynllun Busnes

PENDERFYNWYD

Cymeradwyo Cynllun Busnes Diwygiedig Partneriaeth Pensiwn Cymru 2025 – 2028

I ystyried yr adroddiad ac argymell i'r Cyngor Llawn (yn ei gyfarfod ar 3 Gorffennaf 2025):

1. Nodi Achos busnes PPC Addas i’r Dyfodol (Atodiad 3, Atodiad 4 ac adran 4)

2. Cymeradwyo ffurfio endid corfforaethol sy’n berchnogaeth llwyr i Awdurdodau Gweinyddu PPC a fydd yn cael ei adnabod yn Gwmni Rheoli PPC (IMCo.) a'r holl gamau eraill sy'n angenrheidiol i gyflwyno cais i'r Awdurdod Ymddygiad Ariannol (FCA) ar gyfer awdurdodi'r IMCo. gan gynnwys ond heb fod yn gyfyngedig i ddewis a recriwtio Swyddogaethau Uwch Reolwyr (SMF) fel sy'n ofynnol gan yr FCA a pharatoi a chyflwyno'r cais i'r FCA. (Adran 5)

3. Cymeradwyo Cynllun Busnes a chyllideb ddiwygiedig PPC 2025/28 sy'n cynnwys costau dylunio/galluogi ar gyfer Prosiect yr Wyddfa (Atodiad 5 ac Adran 6)

4. Dirprwyo’r hawl i’r S151 mewn ymgynghoriad â Chadeirydd Pwyllgor y Gronfa Bensiwn i fwrw ymlaen gyda Prosiect Wyddfa gyda Awdurdodau Gweinyddu PPC yn unol ag amserlen y Llywodraeth o fewn y gyllideb gymeradwy.

5. Dirprwyo cymeradwyaeth derfynol y dogfennaeth ffurfiol derfynol sy’n ofynnol ar gyfer gweithredu’r ImCo, a ddisgrifir fel ‘Mynd yn Fyw’ fel yr amlinellir yn Adran 7, i’r Pwyllgor Pensiynau i roi effaith i Achos Busnes PPC Addas i’r Dyfodol.

PENDERFYNIAD:

Derbyn yr adroddiad.

Argymell i'r Cyngor Llawn (yn ei gyfarfod  ar 3ydd Gorffennaf 2025):

1. Nodi Achos busnes PPC Addas i’r Dyfodol (Atodiad 3, Atodiad 4 ac adran 4)
2. Cymeradwyo ffurfio endid corfforaethol sy’n berchnogaeth llwyr i Awdurdodau Gweinyddu PPC a fydd yn cael ei adnabod yn Gwmni Rheoli PPC (IMCo.) a'r holl gamau eraill sy'n angenrheidiol i gyflwyno cais i'r Awdurdod Ymddygiad Ariannol (FCA) ar gyfer awdurdodi'r IMCo. gan gynnwys ond heb fod yn gyfyngedig i ddewis a recriwtio Swyddogaethau Uwch Reolwyr (SMF) fel sy'n ofynnol gan yr FCA a pharatoi a chyflwyno'r cais i'r FCA. (Adran 5)
3. Cymeradwyo Cynllun Busnes a chyllideb ddiwygiedig PPC 2025/28 sy'n cynnwys costau dylunio/galluogi ar gyfer Prosiect yr Wyddfa (Atodiad 5 ac Adran 6) 5 - 10 11 - 27 28 - 124
4. Dirprwyo’r hawl i’r S151 mewn ymgynghoriad â Chadeirydd Pwyllgor y Gronfa Bensiwn i fwrw ymlaen gyda Prosiect Wyddfa gydag Awdurdodau Gweinyddu PPC yn unol ag amserlen y Llywodraeth o fewn y gyllideb gymeradwy.
5. Dirprwyo cymeradwyaeth derfynol y ddogfennaeth ffurfiol derfynol sy’n ofynnol ar gyfer gweithredu’r ImCo, a ddisgrifir fel ‘Mynd yn Fyw’ fel yr amlinellir yn Adran 7, i’r Pwyllgor Pensiynau roi effaith i Achos Busnes PPC Addas i’r Dyfodol.

Cyflwynwyd adroddiad ar y cyd gan y Pennaeth Cyllid a’r Rheolwr Buddsoddi

Atgoffwyd yr Aelodau, yn unol â gofynion ‘Ymgynghoriad Addas i'r Dyfodol’  a  lansiwyd ym mis Tachwedd 2024, bod gwahoddiad i’r wyth pwl CPLlL a sefydlwyd yn genedlaethol gyflwyno achos busnes yn amlinellu sut y buasent yn cwrdd â meini prawf angenrheidiol y Llywodraeth. Nodwyd bod y Llywodraeth wedi amlinellu ystod o gynigion i gryfhau’r gwaith o reoli buddsoddiadau CPLlL mewn tri maes allweddol oedd yn cynnwys diwygio cronfeydd asedau'r CPLlL, hybu buddsoddiad y CPLlL mewn ardaloedd lleol a rhanbarthau yn y DU, a chryfhau llywodraethiant Awdurdodau Gweinyddu y CPLlL a chronfeydd y CPLlL.

Yn ystod yr ymgynghoriad codwyd y cwestiwn sylfaenol, a fyddai PPC yntau yn ystyried sefydlu cwmni annibynnol ynteu yn uno â CPLlL arall yn Lloegr. Adroddwyd bod PPC wedi dod i’r casgliad mai’r hyn fyddai orau i’r holl randdeiliaid uniongyrchol ac ehangach yng Nghymru oedd mynd ymlaen i adeiladu ei IMCo. ei hun a chadw ei annibyniaeth fel pŵl gyda phob un o'r 8 CPLlL yng Nghymru fel yr unig randdeiliaid a chleientiaid.

Cyflwynwyd achos busnes PCC i’r Llywodraeth yn Chwefror 2025 ac ym mis Ebrill 2025, derbyniwyd y newyddion calonogol bod y Llywodraeth wedi cymeradwyo achos busnes PPC, gyda  swyddogion y Llywodraeth yn gofyn i'r PPC barhau i weithredu ei gynlluniau a pharhau i hysbysu'r llywodraeth o'r cynnydd. Nodwyd nad oedd 2 bŵl yn Lloegr, Brunel ac ACCESS, yn llwyddiannus wrth gyflwyno eu hachos busnes a'r AG sylfaenol bellach wedi'u gwahodd i geisio ymuno â phŵl arall.

Ategwyd er mwyn bodloni dyddiadau cau heriol y Llywodraeth, bydd angen cyflwyno cais yr Awdurdod Ymddygiad Ariannol (FCA) i sefydlu IM Co PPC yn fuan. Nodwyd bod gofynion yr FCA yn nodi bod yr endid sy'n gwneud cais am awdurdod (h.y. IMCo. PPC) yn gorfod cael ei ymgorffori cyn cyflwyno'r cais FCA a bod yn rhaid i ddeiliaid rhai swyddi Uwch Reoli (SMF), gan gynnwys y Prif Swyddog Gweithredol, gael eu hadnabod a'u cynnwys yn y cais.

Cyfeiriwyd at gamau nesaf y broses oedd yn cynnwys sefydlu Bwrdd gyda chynrychiolaeth o gyfranddalwyr (fydd yn cymryd lle'r Cydbwyllgor) ac yn ystod Haf 2025 bydd angen cofrestru'r cwmni gan sicrhau cydymffurfiaeth a gofynion yr FCA.

Ystyriwyd y byddai ffurfio IM Co. PPC yn gyfle unwaith mewn cenhedlaeth i greu Cwmni Buddsoddi CPLlL annibynnol er budd holl randdeiliaid y 22 awdurdod lleol yng Nghymru, fydd yn parhau i fuddsoddi ar gyfer ei aelodau a diogelu pensiynau CPLlL, a chael y cyfle hefyd i barhau â'i rôl yn buddsoddi'n lleol ledled Cymru a gweddill y DU, gan weithio gyda Chynghorau, Cydbwyllgorau Corfforaethol, Banc Datblygu Cymru, Banc Busnes Prydain a Llywodraeth Cymru, gan hyrwyddo twf economaidd, darparu cyflogaeth, diogelu ynni glân a gwella seilwaith ehangach y wlad, er budd pobl Cymru.

Diolchwyd am yr adroddiad

Mewn ymateb i’r ymgynghoriad ac i drafodaethau ynglŷn â phenodi ‘aelod annibynnol sydd wedi ei gymhwyso’ ac os oedd hynny yn cyfeirio at aelod wedi ei gymhwyso mewn cyllid, nodwyd nad oedd  ...  gweld y cofnod llawn ar gyfer eitem 8.

I ystyried a derbyn y wybodaeth.

PENDERFYNIAD;

Derbyn a nodi’r wybodaeth

Cafwyd diweddariad ar lafar gan y Cynghorydd Iwan Huws oedd wedi mynychu’r gynhadledd ym mis Mai 2025

Adroddwyd mai prif faes trafod y gynhadledd oedd pwlio gan ganolbwyntio ar sut mae pwlio cronfeydd awdurdodau lleol yn parhau i esblygu a beth fydd hyn yn golygu i’r dyfodol. Nodwyd bod yr amseriad yn ddiddorol o ystyried ymateb i’r Ymgynghoriad Addas i'r Dyfodol. Amlygwyd bod canmoliaeth gref i achos Busnes Cymru a llongyfarchwyd pawb oedd ynghlwm â’r gwaith gan fanylu ar y cydweithio da.  Nodwyd bod y gynhadledd wedi bod yn gyfle da i fynychwyr rwydweithio a rhannu arferion gorau ynghyd a chyfle addysgol da i aelodau.

PENDERFYNWYD

Derbyn a nodi’r wybodaeth

I ystyried a derbyn y wybodaeth

PENDERFYNIAD

Derbyn a nodi’r wybodaeth

Cafwyd diweddariad ar lafar gan y Cynghorydd Goronwy Edwards oedd wedi mynychu’r gynhadledd ym mis Ebrill 2025 ynghyd a’r Cyng Elin Hywel a’r Pennaeth Cyllid.

Nodwyd, er bod llawer o siarad am fuddsoddi yng Nghymru, ymddengys mai effaith gymdeithasol (social impact) oedd yn cael ei hyrwyddo yn hytrach na derbyn gwybodaeth lawn am gyfleoedd buddsoddi ariannol yng Nghymru. Cyfeiriwyd at gyfleoedd adfywio canol trefi ac adeiladu tai, ond yn bennaf cafwyd yr ymdeimlad bod Cymru yn wlad o fusnesau bach ac felly angen annog cefnogaeth i’r busnesau hyn i ddatblygu.

PENDERFYNWYD

Derbyn a nodi’r wybodaeth